the Berenstain Bears and the Prize Pumpkin

From Lojban
Jump to: navigation, search

le la BERenstein. cribe .e. le jinga guzmrkukurbita

.ni'oni'o lu loi guzmrkukurbita cu fadni le ka go'o lo'i mivmu'e li'u se cusku la pafcribe goi pycy. ca le nu pycy joi le re ribve'a mo'u cicyspavi'u fi le guzme purdi .i lu roda naku su'ode rodi zo'u da de simsa di .ije da na'e du de li'u go'i

.i lu iesai li'u se cusku la buncribe goi bycy .i bycy cusku lu ko catlu ta noi rirci lo ka plita kei le'i guzme vau .e. tu noi ckaji be lo ka pilka punli li'u .i. le purdi cu se diklo la brabracrida ne te me'e pycy zi'e noi simlu lo ka ca'o banro lo brabra

.i lu uanai ma krinu loi nu roda naku su'ode rodi zo'u da de simsa di .ije da na'e du de li'u se retsku la mesycribe goi mycy

.i lu le te mivmu'e li'u te spuda fi pycy

.i lu .ei ca ku ko lumci li'u vu se lausku la mamcribe goi ko'e noi zvati le ricyzda serti

.i lu ienai xu le re cabjbetunba noi ke'a bruna la KUInimykyber to'e mupli ledo se xusra li'u se reisku mycy

.i lu le'i bruna remei cu simxu lo nu smimlu .iku'i za'a le mamta be ra fu'isaidai cu kakne lo nu ganse le ka frica li'u se cusku pycy

.i lu ko mo'ine'i klama li'u se cusku ko'e .icabo ko'e klagau le lanzu le zdani

.iku'i mycy na'e cazi nerkla .i ri ze'iku sanli le serti gi'eve'uvi'a catlu la ribgu'e

.i mijycritu .iseni'i le donri ca'o jdika .i la rolcesydei puzu mulno .i ro la cribe baza pensi la xrismas .i ku'i ba'e caku la ribgu'e cu se gusni fi le nunsolcanci .i ko'i goi le jundi selkurji cange be fi la ben po'u lo cagypre zi'e goi by cu simlu lo ka steci melbi .iki'u lo bakfu be lo sudysrasu ku joi lo derxi be lo zumri ku joi lo guzme tu'i ko'i cu gasnu lo clani ctino

.i lu ja'o loi mivmu'e cu mutce lo ka banli li'u se cusku mycy noi ke'a ca'o catlu le melbi jvinu

.i lu .ie ri cu traji lo ka banli ku fo ro da li'u se cusku ko'e .i lu .o'onairu'e ko mo'ine'i klama li'u se cusku ko'e

.i lu .u'e le la ben po'u lo cagypre zi'e goi by cange cu simlu lo ka melbi ku zo'e le solri noi ca'o canci li'u se cusku mycy seti'u lo nu le lanzu cu zutse tezu'e tu'a lo ctesai

.i pycy patsku lu .iucu'i .o'unai .i by cu na balpre li'u

.i ko'e cusku lu ianai ienai na go'i .i pa'e la ben ralju lo'i xabju be la ribgu'e le ka cagypre .ira'ucu'i by cmima lo'i traji pendo be do li'u

.i pycy cusku lu .ieru'e .oiru'e ku'i by puza klama ti gi'e cusku lu lo melbi ba'e cmalu u'i bo guzmrkukurbita bo purdi cu se ponse do doi paf li'u li'u

.i lu do'i jetnu jufra .i sa'e cmalu fi le so'i guzme purdi pe by li'u se cusku ko'e

.i pycy patsku lu .ieru'e ji'a .iku'i mi na'e nelci le tratadji be le nu by pu cusku ru .i ca by pu jibni cmami'a .i lemi purdi cu cmalu .ie .iku'i la brabracrida cu barda .i lo za'i ri traji lo ka barda .e lo ka xamgu kei fo lo'i guzme ne la ribgu'e cu cumki .i ma cu se jinvi do le go'i li'u

.i lu pe'i do ca dukse cinmo .i doi mi'o ko vimcu lei palta le jubme .iseki'ubo le verba cu kakne le nu gunka tu'a le kulselgu'a li'u se cusku ko'e

.i bycy joi mycy cmodji ca le nu kuspe punji le ri cukta le jubme

.i lu ma krinu ti li'u se retsku pycy fu le nu cmodji

.i bycy cusku lu .u'anairo'i mi ze'i peisku lu lo nu rolcesydei cu mulno .ije le nu xisnunsla cu tertei fi lo masti be li re .iseni'ibo no da se bavykri li'u li'u

.i mycy minsku lu .ie sa'e no da poi na'e kulselgu'a bradre cu go'i li'u

.i tu'a lu xu go'i li'u ve pante fo ko'e

.i lo'u bavykri ba'e su'o lo vajni noi banli tersla ku'o no'u la kirdei .i ca ri ma'a ckire fi ro lo nu le banli cu le'u se cusku ko'e

.i lu ledo mamta cu drani li'u dirsku pycy

.i ri degja'o tu'a lo notci be tu'i le vanci karni .i ra cusku lu ko na'e tolmo'i le cabna'a kirdei bo tersla .i lo'i nuncmibi'o velcpe tepi'o tu'a le barda guzmrkukurbita terjvi cu zvati la tcabriju li'u

.i lu la kirdei cu tcetce lo ka vajni tersla .i lo ka vajni cu steci ti la'i kirdei .iseja'ebo mi'o ba jinga le la ben po'u lo cagypre ge'u palku pe'a la ben le guzme terjvi fi'o guzme la brabracrida li'u se cusku pycy

.i lu .a'onai doi patfu .i ra certu gi'e pu jinga fo le terjvi fi'o temci pano le prulamna'a li'u se cusku bycy

.i lu le za'i la'edi'u krinu le nu ra bilga le nu se ctuca pe'a .i .e'osai mi'o ze'o ba klama gi'e pajni lo pu'u farvi fa le bavla'i ke tijyjunta pe'a bo guzme jinga poi diklo la ribgu'e li'u se cusku pycy

.i ko'e bavla'i fi lo nu cmodji .i la kirdei pu se finti fi lo nu ckire .enai le nu jinga le la ben po'u lo cagypre ge'u[1] palku

.i lu paunai xu ti melbi li'u se cusku pycy ba le nu ri joi le verba cu pa'icta la brabracrida .i ra kakne le nu viska lo purdi pe loi guzme po la ben tu'i le ragve be le dargu .i no lo so'i xamgu guzme pe ta cu mapti la brabracrida goi bybycy lo ka xamgu

.i lu lo nu loi kulselgu'a co'i se mulgau kei ca'o se bilga li'u se ki'asku ko'e di'o le zdani .i ca le nu le ribve'a cu cliva kei ri cu retsku fi pycy fe lu xu do mo'i ne'i klama li'u

.i pycy cusku lu na go'i .i mi ze'i ca'o ku ge stali le bartu gi zgana le nu la brabracrida cu banro li'u

.i .iecai bybycy ca'o ba'e banro .i ri ru'i zenba le ka barda e le ka bolci e le ka narju fi'o temci ro djedi

.i baze'i le nu pycy joi le ribve'a cu klama la tcabriju tezu'e le nu cpacu lo terjvi nuncmibi'o bo velcpe kei kei ru cu viska le stuzi be le nu tu'a le jinga guzme ba se jarco

.i lu ma'a tolka'e lo nu terji'a li'u se cusku pycy .i ra se xanri le za'i le vo'a guzme cu zvati le si'astu

.i ko'e troci lo nu mojgau ra le'i munsi'o la kirdei .i ku'i roroi lo nu go'i ku tu'a pycy dicra .i lu ko ga'icu'i fraxu mi .i mi ca bilga lo nu jaursabji la brabracrida li'u na'o se cusku pycy

.i pycy boi bybycy ge ge di'i jaursabji gi setese sabji lo selte'i spadja gi ji'a .ue tagji setese gairgau lo ckagai tezu'e lo za'i bandu fi loi ka lenku

.i ca pa lo nu dormijbalvi ku le ribve'a cu cliva le ckule sorprekarce gi'e bilga lo nu jungau pycy lo vajni .i tu'a ra se sisti le se viska .i ue pycy ca ba'e tavla bybycy

.i ko'e ciksi fo le du'u pycy puza terve'u fi la ralf po'u lo tolka'eselylacri zi'e no'u lo ticyve'u fe lo cukta be lo ka darsygau lo spati lo nu banro ta'i lo nu tavla ra

.i bycy cusku lu o'ucu'iro'e ru'a na te tolprali li'u

.i lu ienaisai o'unairo'a le ka ba'e sinma ce'u pe pycy cu ka'e se tolprali .ijanai su'o lo prenu cu viska le nu pycy tavla lo guzme li'u se cusku mycy

.i bycy cusku lu ta'a patfu .i pa lo ribve'a poi zvati le ckule pu jungau mi le du'u ri pu ckule litru seka'a le la ben cange gi'e pu viska ge lo so'o guzme poi mutce lo ka barda gi pa lo guzme poi traji le ka barda zi'e noi se cmene zo cizda'u la ben li'u

.i lu mi'o bilga le nu viska ri li'u se cusku pycy

.i ca lo nu cabvanci ku pycy joi le ribve'a cu pargre le mudbi'u le la ben purdi .i ra viska lo so'o guzme poi mutce lo ka barda .iku'i no le guzme cu dunli la brabracrida

.i lu la'a cu'i ri trixe le cagdaidi'u li'u se smasku pycy

.i fi'o suksa fe'u pycy joi le ribve'a cu se gusni gi'e tirna lenu la ben krixa lu o'onaicai zercpare ne'i le guzme purdi .i mi cpacu le mi sudysrasu forca ko li'u

.i ru mutce lo ka sutra be lo nu cliva .iseri'abo le pycy palku cu se katna ca le mu'e ri pargre le mudbi'u

.i lu do puza gasnu ma li'u se retsku ko'e ca lo nu klama le zdani

.i lu no da poi vajni .e sa'u lo nu cadzu fi'o te gusni le lunra li'u se cusku pycy

ni'o le jefyfa'o poi purci la kirdei zi'e no'u le barda tersla temci cu cfari .i le mu'e le cribe lanzu cu klamu'o le tersla cu pu'o lerci .i le nu tu'a loi guzme cu selpai ku co'a cfari .i so'i melbi guzme cu zvati le terjvi .i ku'i pycy pu birti le du'u no le guzme cu dunli bybycy .i la'edi'u selna'e le du'u pycy pu viska la cizda'u .i ri nalme'a je ba'e cumki milxe bo zmadu le pycy guzme lo ni barda .e lo ni bolci .e lo ni narju

.i lai cribe cu denpa fi lo za'i xanka ku fe lo nu lei pajni so'oroi cu lanli je merli je juntymre .i ri se jalge le nu gubysku lu le jinga be le pamoi selji'a e le selke'u balji'a li'o li'u

.i li'a la'e do'i se smuni le du'u la ben po'u lo cagypre pu jinga .i jibni terjvi .i jalge le za'i la cizda'u pe la ben milxe zmadu bybycy pe pycy lo ni barda .e lo ni bolci .e lo ni narju .i na'ebo la'edi'u traji le ka xlali .i na'ebo bybycy pu jinga le ba'e remoi selji'a .i lo melbi guzme poi la MIZmykygriz ma'urgau ke'a go'i .i bybycy pu jinga le cimoi selji'a .i pycy joi lei ribve'a cu ba'e mutce badri je smaji ca lo nu ca'ermuvgau le cimoi selji'a jinga se ka'a le zdani

.i ba'o le nu mo'iga'u klamu'o le galji'o be lo cmana noi ka'ergau lo nu darvi'a la ribgu'e ku'o kei ko'e jdice le nu co'a tavla .i ko'e cusku lu .u'anairo'idai ku'i no da bilga lo nu ckeji tu'a le cimoi selji'a .i ji'a la kirdei na sinxa loi terjvi ja selji'a .i go'i lo nu ckire .i pe'i mi'o bilga le nu ckire fi so'i da li'u

.i le ctununta'a po'e ko'e ku .a le za'i la ribgu'e cu simlu lo ka melbi ku fo tu'a le rozyska gusni be zo'e bei le nunsolcanci be'o cu la'acu'i krinu le nu pycy joi lei ribve'a co'a jimpe fi le ko'e terta'a

.i ra zenba lo ka jimpe sede'i la kirdei .i ba le nu lai cribe cu ckire fi le nu le banli sanmi le no'a pu'o se zanfri kei kei mycy cu selte'i ckire .i mycy cusku lu mi ckire lo nu mi'o na jinga le pamoi selji'a .iganai mi'o pu jinga gi tu'a bybycy caze'u se jarco di'o le crane be la tcabriju gi'enai pagbu lei kukte tisnanba noi mi'o ba citka ke'a fi'o se sanmi le sairfa'o li'u

.i ca le nu ge le mi'asna cu snocanci gi lai cribe cu pensi loi cy seldu'a no'u loi lanzu ja zdani ja pendo ja jbixa'u ku kei lai cribe cu djuno di'o pe'a le risna cnone'i le du'u ju'o lai cribe cu ponse so'i da poi cy bilga lo nu ckire zi'o ke'a

fa'o::

---

Original Book, "The Berenstain Bears and the Prize Pumpkin" is ©1990 by the Berenstains, Inc.

Notes

  1. zo ku'o diklo ti lo krasi jufra i mu'i bo lo dragau cu galfi zo ku'o zo ge'u mi'e la guskant te'i li 2016 02 04 05:52 tete'i U'yTyCy
    ({ku'o} was here in the source text, and a corrector changed it to {ge'u}.)