lo selfri be la .alis. bei bu'u la selmacygu'e

From Lojban
Jump to: navigation, search
lo selfri be la .alis. bei bu'u la selmacygu'e
alis-1book0.jpg

.i finti fa la'o me. Lewis Carroll .me

.i terxra fa la'o me. John Tenniel .me

.i fanva fa la .xorxes.

ni'o ni'o no mo'o

nu nergi'a

.i ze'a lo slolecydo'imi'a surla sakli

.i terbloga'a catke fa lobirka be lo cmaxli

fau lo nu tolcre troci lo nugidva co za'akli

.i .oi lo kusru ci mei ni'alo tai senva tcima

cu ruble pikci fi lo lisri.i uu sai ta'i ma

pa voksa ka'e damba lo cimei tancyselcmima

.i la pa moi fa'a mi'esku«lu ko cfagau li'u»

.i la re moi cu racmau djicpelo nonselsmuji'u

.i la ci moi cu lisri zuntica me'i ro snidu

.i ba zi ca'o xanri jersica lo suksa smaji

lo senva verba pa'o lo semanci jo'u spaji

pe lo nu tavla danlu .i iaru'e jetnu ckaji

.i xarjintysudbi'o uo .ibavlamke'u di'a

.i tatpi bletoi lo nu mi lolisri cu zasli'a

ze'a .i «lu ui bavlamke'unau li'u» selki'a

.i tai pu banro fa lo lisrila selmacygu'e

.i ba lo terpra be lo cizranau mo'u lisru'e

.i ma'a gleki zdakla ni'alo cancysolxu'e

.i ju'i .alis. ko dei lebnagi'e xanracpu'i

lo verba selsne jvibu stuzinoi nunmojbafru'i

tai lo nu friti lo ruldjinepoi vu zu selku'i ni'o ni'o pa mo'o

mo'i ni'a lo ractu kevna

ni'o la .alis. co'a tatpi lo nu zutse lo rirxe korbi re'o lo mensi gi'e zukte fi no da .i .abu cu so'u roi sutra zgana lo cukta poi my tcidu .i ku'i cy vasru no pixra ja nuncasnu .i «lu ji'a ma prali —sei la .alis. cu pensi— fi lo cukta poi vasru no pixra ja nuncasnu li'u»

ni'o .abu ca'o menli jdice (to se kai lo xagrai selka'e poi se curmi lo glare donri noi rinka lo nu .abu lifri lo nu sipydji je bebna toi) lo du'u xu kau lo nu pluka fa lo nu zbasu lo xrula linsi cu se vamji lo raktu poi nu sa'irbi'o gi'e crepu lo xrula .i ca bo suksa fa lo nu lo blabi ractu poi xunblabi se kanla cu bajra zo'a .abu

ni'o la'e di'u na'e ba'e mutce lo ka cizra .i je nai ji'a la .alis. cu jinvi lo du'u ba'e mutce lo ka nalfadni kei fa lo nu tirna lo nu la ractu cu sezysku «lu .oi ro'a .oi ro'a mi lerci li'u» (to baku .abu ca lo nu pensi la'e di'u cu te sidbo ri lo du'u .ei ri .abu cizra .i ku'i ca ku ro ra simlu lo ka rarna toi) .i ku'i la .alis. ca lo nu la ractu ca'a lebna lo junla lo kosta daski gi'e catlu jy gi'e di'a sutra cu spaji sa'irbi'o ki'u lo nu lindi pagre lo menli be .abu fa lo si'o ri pu no roi viska lo ractu poi ponse lo kosta daski .a lo junla poi ry ke'a dy ka'e lebna .i .abu bai lo nu kucli cu bajra pagre lo foldi gi'e jersi ry gi'e .u'a viska lo nu ry canci mo'i ne'i lo barda ke ractu kevna noi cnita lo spabi'u


ni'o ba zi ku la .alis. mo'i ne'i jersi ry gi'e no roi pensi lo du'u ta'i ba'e ma kau .abu ba za'u re'u bartu

ni'o lo ractu kevna cu ve'a tubnu sirji gi'e suksa nitsalpo .i tai suksa ja'e lo nu la .alis. na zifre lo nu ze'i ji'a sai pensi lo nu sezydicra kei pu lo nu .abu ca'o farlu fo lo condi mutce jintyke'a

ni'o ga lo jintyke'a cu mutce lo ka condi gi .abu mutce lo ka masno lo nu farlu .i ni'i bo lo nunfarlu temci cu mutce banzu lo nu catlu lo sruri gi'e kucli lo du'u ma kau ba zi fasnu .i pa mai .abu troci lo nu catlu lo cnita gi'e facki lo du'u .abu ma kau klama .i ku'i dukse lo ka manku kei lo nu ka'e viska .i re mai .abu catlu lo mlana be lo jintyke'a gi'e facki lo du'u my culno lo se kajna tanxe jo'u lo cukta kajna .i .abu viska lo so'o cartu jo'u lo so'o pixra vu'o noi dandu lo so'o genxu .i .abu lebna lo botpi lo kajna ca lo nu lampagre .i by se tcita «lu NAJNIMRE TITYJDU li'u» gi'e ku'i .u'a nai kunti .i .abu mu'i lo nu terpa lo nu catra da cu na djica lo nu falcru lo botpi .i se ki'u bo .abu suksa lo nu punji by lo se kajna tanxe poi .abu ke'a farlu lampagre

ni'o «lu uo —sei la .alis. cu pensi— mi ba lo nu farlu tai ti cu ba na xanka lo nu farlu fo lo serti .i «lu ua virnu —sei lo lanzu fi mi ba jinvi— li'u» .i .u'o mi no da cusku va'o ji'a sai lo nu mi farlu fi lo drudi be lo zdani (to sa'a la'e di'u la'a sai jetnu toi) li'u»

ni'o mo'i ni'a mo'i ni'a mo'i ni'a .i xu lo nu farlu cu no roi mulno .i «lu mi kucli lo du'u mi ca minli li xo kau lo ni farlu —sei .abu cladu cusku— .i ia mi pu'o jibni lo midju be lo terdi .i ka'u minli li vo ki'o lo ni cnita (to sa'a la .alis. pu cilre so'o da la'e di'u lo ckule .i zu'u lo cabna ki'u lo nu no da .abu tirna cu na ba'e mutce mapti lo nu jarco lo ka djuno .i zu'u nai lo nu rapsku cu xamgu .abu lo nu cilre toi) .i ie se'i lo se minli cu jibni drani .i ku'i mi kucli lo du'u ma kau ti bernanjudri gi'e sunsicyjudri li'u» .i (to la .alis. na sai djuno lo du'u ma kau smuni ga zo bernanjudri gi zo sunsicyjudri .i ku'i .abu jinvi lo du'u melbi je banli valsi toi)

ni'o ca ku .abu cu za'u re'u co'a co'e .i «lu mi kucli lo du'u xu kau mi ba farlu ba'e pagre lo terdi .i ba xajmi fa lo nu tolcanci lo jbini be lo prenu poi cadzu fau lo nu lo stedu cu cnita .i pe'i bu'u lo smudukti (to sa'a ca ku .abu lo nu no da tirna cu gleki ki'u lo nu lo valsi na sai drani sance toi) .i ku'i .ei mi te preti lo gugde lo du'u ma kau cmene .i «lu pau doi ninmu ti nuzlo gi'i sralo li'u» (to sa'a .abu ca lo nu tavla cu troci lo nu krorinsa .i xanri ko fa lo nu krorinsa ca lo nu farlu .i xu do snada toi) .i ny ba jinvi lo du'u mi toldjuno ke cmalu nixli kei fo lo nu mi te preti .i .ei mi na te preti .i la'a cu'i mi viska lo nu ba'o ciska lo cmene da li'u»

ni'o mo'i ni'a mo'i ni'a mo'i ni'a .i ka'e zukte no drata be la'e di'e .i se ki'u bo la .alis. za'u re'u co'a tavla .i «lu ju'o la .dinas. ca lo cabnicte ba mutce lo ka claxu mi (to sa'a la .dinas. cu mlatu toi) .i .a'o da ba morji tu'a lo dy ladru palta ca lo sanmi tcika .i doi .dinas. noi dirba mi do'u .au do mi kansa lo nu vi cnita .i .u'u no smacu cu zvati lo vacri .i ku'i do ka'e kavbu lo volratcu noi ka'u mutce lo ka simsa lo smacu .i ku'i .a'u xu lo mlatu cu citka lo volratcu li'u» .i ca ku la .alis. co'a sipydji lifri gi'e di'a senva sezysku «lu xu lo mlatu cu citka lo volratcu .i xu lo mlatu cu citka lo volratcu li'u» .e su'o roi bo «lu xu lo volratcu cu citka lo mlatu li'u» .i ku'i lo du'u porsi ma kau cu na vajni mutce ki'u lo nu .abu ka'e spuda no lo re preti .i .abu lifri lo nu pu'o sipna kei gi'e pu zi co'a senva lo nu .abu xanjaisi'u cadzu kansa la .dinas. gi'e cusku «lu ju'i doi .dinas. ko mi jungau lo jetnu .i xu do su'o roi citka lo volratcu li'u» .i ca bo suksa fa lo nu .abu lo cpana be lo derxi be lo grana jo'u lo sudga pezli mo'u farlu

ni'o la .alis. na sai se xrani gi'e zi sanli fi lo jamfu gi'e catlu lo gapru noi ku'i manku mulno .i crane .abu fa lo drata ke clani vorme .i la blabi ractu cu za'o se viska gi'e sutra lo nu litru vy .i .ei la .alis. na denpa .i .abu klama tai tu'a lo brife gi'e ja'a ru'e snada lo nu tirna lo nu ry cusku «lu .oi doi lo mi kerlo jo'u zbikre ca'o mutce lerci binxo li'u» .i .abu jibni trixe ry ca lo nu carna lo kojna .i ku'i ry ca na za'o se viska .i .abu facki lo du'u ri zvati lo clani je dziseldru kumfa noi se gusni fi lo se linji noi dandu lo drudi

ni'o lo kumfa cu se sruri lo so'i vorme .i ku'i ro ri cu stela ganlo .i la .alis. ca lo nu ba'o litru lo pa moi mlana .e lo drata gi'e troci tu'a ro vorme cu badri cadzu bu'u lo midju gi'e kucli lo du'u ta'i ma kau .abu ba za'u re'u bartu

ni'o ba zi ku .abu penmi lo cmalu ke cibyseltuple jubme be lo sligu blaci .i cpana jy fa po'o lo cmatce ke solji ckiku .i .abu cu pa moi jinvi lo du'u cy ckiku pa lo stela be lo kumfa vorme .i ku'i ui nai ga lo stela cu dukse lo ka barda gi lo ckiku cu dukse lo ka cmalu .i se ju cy ka'e kargau no ra .i ku'i .abu ca lo nu re moi sruli'u cu penmi lo dizlo murta noi .abu na pu sanji ke'a .i my murta lo cmalu vorme noi centre li ji'i vo no .i .abu troci lo nu co'e lo cmalu ke solji ckiku lo stela .i ui sai mapti

alis-1book2.jpg

ni'o la .alis. cu kargau lo vrogai gi'e facki lo du'u vy se jersi lo cmalu vorme noi na bramau lo ratcu kevna .i .abu cidni sanli gi'e catlu lo se vorme noi mlerai lo purdi poi su'o roi se viska .i .a'o sai barkla lo manku kumfa gi'e cadzu jbini lo va carmi xrula zdani jo'u lo va lenku je'erjinto .i ku'i .abu na ka'e gregau lo stedu ji'a sai lo vorme .i «lu lo stedu be mi va'o ji'a sai lo nu ka'e pagre —sei la .alis. uu cu pensi— cu tolmutce lo ka se pilno kei se cau lo mi janco .i .au mi ka'e se polje tai tu'a lo darvistci .i pe'i mi ka'e go'i va'o lo nu da'i mi djuno lo du'u mi co'a go'i ta'i ma kau li'u» .i lo pu zi nalfadni fasnu cu tai so'i mei ja'e lo nu la .alis. co'a jinvi lo du'u so'u sai da ca'a nalcumki

ni'o simlu lo ka na prali fi lo nu denpa fi tu'a lo cmalu vorme .i se ki'u bo .abu xruti lo jubme gi'e xadba pacna lo nu tolcri lo drata ckiku .a do'a nai lo cukta co javni be lo nu ta'i ma kau polje lo prenu tai tu'a lo darvistci .i ca lo ca krefu .abu tolcri lo cmalu botpi (to «lu noi ju'o pu na zvati ti —sei la .alis. cu cusku— li'u» toi) .i sruri lo botpi cnebo fa lo pelji tcita noi lo valsi po'u «lu KO MI PINXE li'u» cu melbi prina ke'a se pi'o lo barda lerfu

alis-1book3.jpg

ni'o .o'o cu'i xamgu fa lo nu cusku «lu ko mi pinxe li'u» .i ku'i la .alis. noi prije cu na ba zi zukte la'e ba'e di'u .i «lu na go'i .i pa mai mi catlu —sei .abu cusku— gi'e facki lo du'u xu kau se tcita zo vindu li'u» .i .abu pu tcidu so'o melbi ke cmalu lisri be lo verba poi jelca se xrani gi'a se citka lo cilce danlu gi'a lifri lo drata tolpluka ki'u lo nu na ba'e morji lo sampu javni poi lo pendo cu ctuca zi'e no'u mu'a lo nu lo xunre glare tunta cu jelca xrani lo za'o jgari be ty zi'e no'u mu'a lo nu lo degji va'o lo nu condi ba'e mutce se sraku se pi'o lo dakfu cu ta'e ciblu cirko .i .abu cu no roi tolmorji lo du'u lo nu da dukse lo ka pinxe lo se botpi be lo se tcita be zo vindu cu ba zi ja ba zu fanza da

ni'o ku'i lo vi botpi na se tcita zo vindu .i se ki'u bo la .alis. cu darsi lo nu vu'irga'e lo selvau .i .abu facki lo du'u pluka (to je'u vrusi lo mixre be lo rutrceraso tisna jo'u lo sovykruji jo'u lo bromeli jo'u lo seljukpa xukre'u jo'u lo satmatne jo'u lo glare ke matne jelnanba toi) .i .abu zi mo'u pinxe


* * * * * * *


* * * * * *


* * * * * * *


ni'o «lu ue cizra selga'e —sei la .alis. cu cusku— .i ru'a ju'o mi se polje tai tu'a lo darvistci li'u»

ni'o ca'a co'e .i ca ku .abu centre li so'u re mu .i lo flira be .abu cu cambi'o se ja'e lo nu pensi lo nu ca ku .abu mapti lo cmalu vorme lo ka pagre fi lo melbi purdi .i ku'i pa mai .abu denpa lo nu zgana lo du'u xu kau za'o brajdika .i .abu milxe lo ka xanka la'e di'u .i «lu cumki fa lo nu se fanmo —sei la .alis. cu sezysku— lo nu mi mo'u canci tai tu'a lo lakyga'a fagri .i mi kucli lo du'u mi ma kau simsa va'o da'i la'e di'u li'u» .i .abu troci lo nu se xanri lo du'u lo lakyga'a fagri ma kau simsa ba lo nu lo lakyga'a cu se gusydicra .i ku'i na ka'e morji lo nu viska lo tai dacti

ni'o ba za ku .abu ca lo nu facki lo du'u no drata cu fasnu cu jdice lo nu zi klama lo purdi .i ku'i la .alis. uu ca lo nu tolcliva lo vorme cu facki lo du'u .abu tolmorji tu'a lo cmalu ke solji ckiku .i ca lo nu ba'o xruti lo jubme te zu'e lo nu cpacu cy cu facki lo du'u lo ni .abu galtu cu na banzu lo nu cpacu cy .i .abu viska cy fi'o klina lo blaci .i .abu traji troci lo nu cpare pa lo tuple be lo jubme .i ku'i ty dukse lo ka se sakli .i .abu uu ca lo nu tatpi lo nu troci cu zutse gi'e klaku

ni'o «lu .e'e no da do prali lo nu tai klaku —sei la .alis. cu kinli sezysku— .i .e'u ko ca zi sisti li'u» .i .abu ta'e sezystidi lo xamgu mutce (to ku'i ta'e nai mapti zukte toi) gi'e su'o roi tai junri sezytolzarsku ja'e lo nu gasnu lo nu lo se klaku cu zvati lo kanla .i .abu morji lo nu pa roi troci lo nu darxi lo kerlo be .abu kei mu'i lo nu .abu tcica .abu ca lo nu .abu fapro .abu lo nu kelcrkroke .i lo vi cizra verba cu mutce lo ka nelci lo nu sruma lo du'u du lo re prenu .i «lu ku'i no da mi ca prali —sei la .alis. uu cu pensi— lo nu sruma lo du'u mi du lo re prenu .i .oi lo ve vimcu be fi mi na banzu lo nu marji fi lo ba'e pa se sinma prenu li'u»

ni'o lo nu .abu catlu cu ba zi se farna lo cmalu ke blaci tanxe noi cnita lo jubme .i .abu kargau ty gi'e facki lo du'u nenri ty fa lo cmalu mutce titnanba noi bu'u ke'a lo valsi po'u «lu KO MI CITKA li'u» se morna lo sudjba .i «lu .ai mi ti citka —sei la .alis. cu cusku— .i mi va'o lo nu da'i gau ti mi braze'a cu snada lo nu cpacu lo ckiku .i mi va'o lo nu da'i gau ti mi cmaze'a cu kakne lo nu reskla ni'a lo vrogai .i se ki'u bo mi va'o ro fasnu cu kakne lo nu klama lo purdi .i na vajni mi fa lo du'u ma kau ca'a fasnu li'u»

ni'o .abu citka lo spisa gi'e xanka sezysku «lu fa'a ma .i fa'a ma li'u» gi'e punji lo xance lo cpana be lo stedu te zu'e lo nu ganse lo nu sy banro fa'a ma kau .i .abu mutce lo ka spaji lo nu facki lo du'u .abu stodi lo ka barda .i li'a la'e di'u ta'e fasnu ca lo nu citka lo titnanba .i ku'i la .alis. tai se tcaci lo nu kanpe lo nu no na'e tolfadni cu fasnu .i ja'e bo simlu lo ka tolzdile gi'e bebna kei fa lo nu lo nunjmive cu ca'o fadni

ni'o .abu co'a batci gi'e ba zi mo'u citka lo titnanba


* * * * * * * * * * * * * * * * * * * *


ni'o ni'o re mo'o

lo se klaku lalxu

alis-1book4.jpg
ni'o «lu cizra je ci'izra —sei la .alis. cu krixa (to .abu tai se spaji ja'e lo nu ze'a tolmorji lo nu ta'i ma kau tavla bau lo drani lojbo toi)— .i ca ku mi se tolplo tai tu'a lo brarai darvistci .i co'o jamfu (to sa'a lo jamfu ca'o binxo lo tai darno ja'e lo nu jy jibni fi'o te simlu .abu lo na ka'e se viska toi) .i uu doi cmalu jamfu ma do ba dasygau lo cutci jo'u lo smoka doi dirba .i ju'o mi na ba ka'e go'i .i mi ba mutce dukse lo ka darno do kei lo nu kurji do .i ko renvi ta'i lo do xagrai selka'e .i ku'i .ei mi jy xendo —sei la .alis. cu pensi— .i va'o da'i na'e bo la'e di'u ju'o cu'i jy na cadzu ve ka'a lo mi se djica .i ua .ai mi dunda ca ro xisyjbenunsla lo cnino cutci re mei li'u»

ni'o .abu ca'o platu lo nu co'e ta'i ma kau .i «lu .ei lo cutci cu se mrilu —sei .abu pensi— .i ba xajmi fa lo nu da benji lo seldu'a lo jamfu be da .i ua lo judri ba simlu lo ka cizra .i «lu

la selsi'a ke pritu jamfu be la .alis.

bu'u la fagzda lolgai

ne'a lo fagju'e

(to la .alis. cu prami benji toi)

li'u» .i ue mi bebna tavla li'u»

ni'o ca ku lo stedu be .abu cu janli lo drudi be lo kumfa .i je'u .abu ca mitre li za'u re pi mu .i .abu ze'i lebna lo cmalu ke solji ckiku gi'e sutra klama lo purdi vorme

ni'o la .alis. uu zo'u: lo nu mlana vreta gi'e catlu lo purdi se pi'o pa kanla cu jimte lo se zukte lo ka .abu kakne ce'u .i lo nu pagre cu nalcumki traji .i .abu zutse gi'e za'u re'u co'a klaku

ni'o «lu .ei do ckeji —sei la .alis. cu cusku— .i do barda nixli (to sa'a ju'o drani toi) .i .i'e nai ca'o tai klaku .i le'o ko ca sisti li'u» .i ku'i .abu za'o klaku lo litce be li so'i ja'e lo nu .abu se sruri lo barda lalxu noi centre li ji'i pa no lo ka condi kei gi'e preja lo xadba be lo kumfa

ni'o ba za ku .abu tirna lo nu cmalu stapa lo darno kei gi'e sutra lo nu sudgau lo kanla te zu'e lo nu viska lo nu ma kau klama .i klama fa la blabi ractu noi xruti gi'e melbi dasni gi'e jgari lo blabi ke kanba gluta re mei fa'u lo barda bifpra lo re xance .i ry sutra bajra klama gi'e sezysku «lu .oi la noltroni'u zo'u: ba'a ny ba cilce fengu va'o lo nu mi gasnu lo nu ny denpa li'u» .i la .alis. tai cinmo lo ka tolpacna kei ja'e lo nu bredi lo nu cpedu lo nunsidju ma kau .i se ki'u bo .abu ca lo nu la ractu cu jibni cu co'a cusku se pi'o lo lauble je toldarsi voksa «lu pe'u doi ractu li'u» .i la ractu cu suksa se jenca gi'e falcru lo blabi ke kanba gluta jo'u lo bifpra gi'e bajra mo'i ne'i lo manku se rai lo kamsutra

alis-1book5.jpg

ni'o la .alis. cu lebna lo bifpra jo'u lo gluta gi'e co'a pilno by mu'i lo nu lo kumfa cu glare .i ca bo ca'o cusku «lu .oi ue ro da cizra ca lo cabdei .i ca lo purlamdei ro da fadni fasnu .i mi kucli lo du'u xu kau da galfi mi ca lo nicte .i .ei mi pensi .i xu mi me mi ca lo nu mi cikna binxo ca lo zi cerni .i pe'i ru'e ba'a nai mi cinmo lo ka frica milxe .i ku'i va'o lo nu mi na me mi cu jersi preti fa lo du'u mi me ma kau .i la'e di'u cu barda nabmi li'u» .i .abu co'a pensi ro lo verba poi ke'a .abu slabu gi'e mintu lo ka ce'u nanca ma kau ku'o te zu'e lo nu jdice lo du'u xu kau cumki fa lo nu da .abu ba'o galfi su'o me vy

ni'o «lu ju'o mi na me la .adas. —sei .abu cusku— .i ki'u bo ge lo kerfa be ri cu clani sarlu gi lo me mi moi cu na sai sarlu .i ji'a ju'o mi na me la .mabel. .i ki'u bo ge mi djuno lo so'i vrici gi my .y djuno lo tolmutce .i ji'a ge my me my gi mi me mi .i .oi ue ro da cfipu .i mi mi cipygau lo ka ca djuno ro da poi mi pu djuno .i pilji li vo li mu fa li pa re .i pilji li vo li xa fa li pa ci .i pilji li vo li ze fa .y .i .oi mi ba no roi snada tu'a li re no va'o lo nu tai masno .i ku'i lo pilji porsi na vajni .i .e'u troci tu'a lo tedyske .i la .londn. cu raltca la .paris. .i la .paris. cu raltca la .romas. .i la .romas. si si la'e di'u naldrani ju'o .i ju'o da pu galfi mi la .mabel. .i mi troci lo nu cusku la'e «lu ua lo cmalu li'u» li'u» .i .abu punji lo kruca xance lo tuple tai lo nu cusku lo se cilre kei gi'e co'a sitsku .i ku'i lo voksa cu se sance lo rufsu je cizra .i lo valsi na mintu lo se tcaci

.i ua lo cmalu krokodilocu zengau lo ky rebla

si'u lo djacu pe la .nilos.lo ka camri'ojvebla

.i ua lo jgalu ja'a tinsaje cnici preja panra

.i lo cmafi'e cu se rinsalo cisma xedja ganra

ni'o «lu ju'o lo valsi na drani —sei la .alis. uu cu cusku— li'u» .i lo kanla be .abu cu za'u re'u tisna lo se klaku ca lo nu di'a cusku «lu ja'o mi me la .mabel. .i mi ba bilga lo nu xabju lo pindi ke cmalu zdani gi'e ponse ji'i no selkei gi'e .oi cilre so'i sai da .i .ai na go'i .i mi mu'o jdice lo du'u mi ga nai me la .mabel. gi stali ti .i no da ba prali lo bartu prenu lo nu py setca lo stedu ti gi'e cusku «lu ko barkla doi dirba li'u» .i mi ba fa'a ga'u catlu gi'e cusku «lu pau mi me ma .i pa mai ko mi jungau la'e di'u .i ba bo mi va'o lo nu nelci lo nu me ma kau cu barkla .i va'o lo nu na nelci cu denpa ti lo nu mi drata li'u» .i ku'i .oi —sei la .alis. cu suksa klaku krixa— .i .au da ba'e ca'a setca lo stedu ti .i mi tai ba'e mutce tatpi lo nu mi ti nonkansa li'u»

ni'o .abu ca lo nu cusku di'u cu fa'a ni'a catlu lo xance gi'e se spaji lo nu viska lo nu .abu pu ca'o dasni pa lo cmalu ke blabi ke kanba gluta pe la ractu ze'a lo nu tavla .i «lu mi kakne ti ma —sei .abu pensi— .i ja'o mi za'u re'u jdika lo ka barda li'u» .i .abu sa'irbi'o gi'e klama lo jubme te zu'e lo nu sezmerli fi jy .i facki lo du'u ca centre li ji'i mu no gi'e sutra lo nu ca'o jdika .i ba zi facki lo du'u rinka la'e di'u fa lo nu jgari lo bifpra .i .abu sutra falcru by pu lo nu zi mo'u sai jdika

ni'o «lu ba'e ja'a jibni rivbi —sei la .alis. noi na toltce lo ka terpa lo nu suksa cenba kei kei gi'e ku'i mutce lo ka gleki lo nu ca'o zasti cu cusku— .i .e'e ca ku mi klama lo purdi li'u» .i .abu bajra se rai lo kamsutra fa'a lo cmalu vorme .i ku'i .oi lo cmalu vorme cu za'u re'u ganlo .i lo cmalu ke solji ckiku za'u re'u vreta lo blaci jubme .i «lu lo tcini ro da xlamau —sei lo se kecti verba cu pensi— .i ki'u bo mi no roi pu cmalu tai ti .i no roi .i ju'a ty mutce lo ka xlali je'u li'u»

ni'o ca lo nu .abu cusku lo di'u valsi kei lo jamfu be .abu cu sakli .i ba zi ku lo nu jaurjanli zo'u: .abu jinru lo silna djacu fe'e co'u lo firji'o .i pa moi sidbo fa lo nu .abu ba'o farlu lo xamsi .i «lu va'o la'e di'u mi ka'e xrukla fu lo trene —sei .abu sezysku— li'u» (to la .alis. pu klama lo xamsi korbi pa roi lo nunjmive gi'e ja'e bo jinvi lo du'u ro pagbu be lo glico korbi cu se zvati so'o jinru minji noi nenri lo xamsi ku'o .e so'o verba noi kakpa lo canre lo loldi lo mudri canpa ku'o .e lo porsi be fi lo xotli be'o .e lo trene tcana noi trixe py toi) .i ku'i ba zi .abu sanji lo nu .abu jinru lo lalxu pe lo se klaku poi .abu klaku ke'a ca lo nu .abu mitre li re pi mu

alis-1book6.jpg

ni'o «lu .au mi na pu klaku lo tai mutce —sei la .alis. ca lo nu limna gi'e troci lo nu tolcri lo bartu pluta cu cusku— .i ru'a sfasa mi la'e di'u lo nu mrobi'o co jinru lo se klaku be mi .i ju'o la'e di'u ba cizra .i ku'i ro da cizra ca lo cabdei li'u»

ni'o ca ku .abu tirna lo nu da va jaurjanli bu'u lo lalxu .i .abu jbize'a limna te zu'e lo nu zgana lo nu da mo kau .i pa mai .abu jinvi lo du'u da .odbenu ja ri'erxi'a .i ku'i re mai .abu morji lo nu .abu ma kau ca mitre kei gi'e ba zi viska lo nu da smacu po'o gi'e mintu .abu lo ka pu sakli

ni'o «lu xu da mi prali —sei la .alis. cu pensi— lo nu tavla lo va smacu .i ro da bu'u lo cnita cu tai tolfadni ja'e lo nu pe'i lakne fa lo nu ta ka'e tavla .i se ju no da mi tolprali lo nu troci li'u» .i se ki'u ku .abu co'a co'e «lu doi smacu xu do se slabu lo pluta be lo bartu be lo bu'u lalxu .i mi mutce lo ka tatpi lo nu ru'u limna doi smacu li'u» (to la .alis. pu jinvi lo du'u ju'o ta drani lo ka tadji lo nu tavla lo smacu .i .abu cu no roi pu zukte lo simsa gi'e ku'i morji lo nu tcidu fi lo latmo gerna cukta pe lo bruna fe «lo'u lo smacu – sera'a lo smacu – fa'a lo smacu – ri'i lo smacu – doi smacu le'u» toi) .i lo smacu cu terpreti mutce catlu .abu gi'e simlu lo ka rinsa fi lo nu ze'i ga'orgau pa lo cmalu kanla .i ku'i sy cusku no da

ni'o cumki fa lo nu ta na se bangu lo lojbo —sei la .alis. cu pensi— .i ru'a ta fraso smacu gi'e kansa la .uiliam. poi jamji'a ku'o lo nu klama ti li'u» (to .abu djuno so'i da lo purcedra gi'e ku'i na mutce lo ka jimpe lo du'u ma kau pu fasnu za ma kau toi) .i .abu cu za'u re'u co'a cusku zoi fy. ou est ma chatte? .fy noi pa moi lo jufra pe lo .abu fraso ve cilre cukta .i lo smacu cu suksa plipe lo bartu be lo djacu gi'e simlu lo ka desku lo nu terpa .i «lu .oi se'i ko mi fraxu —sei la .alis. noi xersmadi lo du'u ke'a crogau lo danlu lo cnirango cu sutra krixa— .i mi mulno lo ka tolmorji lo nu do na nelci lo mlatu li'u»

ni'o «lu .oi na nelci lo mlatu —sei la smacu cu kinli je cinmo voksa krixa— .i xu ba'e do nelci lo mlatu va'o lo nu da'i do me mi li'u»

alis-1book7.jpg

ni'o «lu .y la'a nai —sei la .alis. cu surgau tonga cusku— .i ko na fengu .i ku'i .au mi ka'e jarco lo mi'a mlatu no'u la .dinas. do .i pe'i do co'a nelci lo mlatu va'o lo nu da'i do dy viska .i dy tai dirba smaji —sei la .alis. fi .abu ca lo nu lazni limna lo lalxu cu ca'o cusku— .i dy melbi cmoni zutse ne'a lo fagri gi'e tacpe'u lo xance be dy gi'e lumci lo flira be dy .i dy tai pluka ranti lo nu kujyjai .i dy tai certu lo nu kavbu lo smacu .i .oi se'i ko mi fraxu —sei la .alis. noi birti lo du'u la smacu noi ca ku tinsa cu je'u cnicro cu za'u re'u krixa— .i mi'o dy na ba di'a casnu va'o lo nu do zmanei li'u»

ni'o «lu ue zo mi'o —sei la smacu noi desku fe'e co'u lo jipno be lo rebla cu krixa— .i li'a sai ba'e mi na casnu lo simsa .i lo lanzu be mi cu ze'e xebni lo mlatu .i rigni je tolba'i je malfadni danlu .i .e'u mi na za'u re'u tirna lo cmene li'u»

ni'o «lu vi'o sai —sei la .alis. noi sutra lo nu galfi lo selsnu cu cusku— .i xu .y xu do .y nelci .y lo gerku li'u» .i la smacu na spuda .i se ki'u bo la .alis. ca'o cusku «lu lo melbi ke cmalu gerku noi xabju lo jibni be lo zdani be mi'a zo'u: mi djica lo nu mi gy do jarco .i gy cmalu gerku la .terier. gi'e se kerfa lo clani je sarlu je bunre gi'e xrubei lo dacti poi do renro .i gy fa'a ga'u zutse gi'e cpedu lo sanmi gi'e zukte lo so'i vrici noi mi na morji lo xadba be ke'a .i gy se ponse lo te cange noi xusra lo du'u gy tai plixau ja'e lo nu gy se vamji lo rupnu be li pa no no .i cy xusra lo du'u gy catra ro lo ratcu .i .oi se'i —sei la .alis. cu xenru tonga krixa— .i mi xersmadi lo du'u mi ta za'u re'u cnixai li'u» .i la smacu ca'o limna to'o .abu se rai lo kamvli gi'e mutce lo ka kalsygau lo lalxu ca lo nu klama

ni'o .abu xutla trisku «lu doi smacu dirba ko za'u re'u xruti .i nu'e do'u mi'o ba casnu ge nai lo mlatu gi nai ji'a lo gerku va'o lo nu do na nelci li'u» .i la smacu ca lo nu tirna di'u cu carna gi'e masno limna xruti .abu .i lo flira cu mutce lo ka blabi (to fau lo nu cinmo —sei la .alis. cu pensi— toi) .i sy lauble je desku voksa cusku «lu .e'u mi'o klama lo korbi .i ba bo mi do jungau lo lisri be mi .i do ba jimpe lo du'u ma kau krinu lo nu mi xebni lo mlatu .e lo gerku li'u»

ni'o ca mapti tcika lo nu cliva kei ki'u lo nu lo lalxu cu ca'o tisna lo cipni jo'u lo danlu vu'o poi ba'o farlu ly .i la datka jo'u la cipnrdodo jo'u la cipnrlori jo'u la .atkuila cifnu jo'u lo so'o drata noi vrici je cizra danlu .i la .alis. cu lidne .i lo mulno girzu cu limna fa'a lo korbi ni'o ni'o ci mo'o

lo jdijmaji terjvi jo'u lo clani lisri

ni'o je'u lo cizra simlu gunma cu jmaji lo se lalxu .i lo cipni zo'u: lo pimlu cu dandu .i lo danlu zo'u: lo kerfa cu jibni snipa .i lo ro mei zo'u: cilmo carmi gi'e fengu gi'e na kufra

ni'o lo pa moi preti cu li'a du'u ta'i ma kau za'u re'u sudga .i casnu la'e di'u .i ba bo zi lo mentu be li so'u cu simlu lo ka rarna kei fa lo nu la .alis. ca'o pendo tavla lo ro mei tai lo nu da'i ri .abu cu slabu ze'a lo nu .abu jmive .i je'u .abu cu ze'u daupro la cipnrlori noi uo badri carna gi'e cusku «lu mi do tolcitmau gi'e ja'e bo junmau li'u» po'o .i la'e di'u zo'u: la .alis. na curmi se cau lo nu djuno lo du'u ly nanca ma kau .i la cipnrlori cu je'a tolbre lo nu jungau fi lo du'u ly ma kau nanca .i ja'e bo no drata cu se cusku

ni'o ro mai la smacu noi simlu lo ka catni lo ro mei cu krixa «lu ko zutse doi ro do gi'e jundi mi .i ba'e mi do ba zi sudgau li'u» .i lo ro mei ca zi zutse gi'e barda djine .i la smacu cu midju .i la .alis. cu ca'o xanka catlu sy ki'u lo nu .abu birti lo du'u .abu co'a bilma bai lo nu na ba zi sudga

ni'o «lu ta'a —sei la smacu cu vajni simlu cusku— .i xu ro do bredi .i la'e di'e cu sudrai lo ro se djuno be mi .i .e'o ro ko smaji .i «lu la .uiliam. poi jamji'a zi'e noi lo jdaja'a cu zanru lo jamna te zukte be fi ke'a cu ze'i trubi'o lo glipre noi ke'a djica lo turni gi'e pu mutce lo ka se tcaci lo nu flacau trubasti gi'e jamji'a .i la .eduin. jo'u la .morkar. vu'o noi turni la .mersias. fa'u la .nortumbrias. li'u» li'u»

ni'o «lu .o'u nai —sei la cipnrlori cu cusku je desku— li'u»

ni'o «lu ke'o pe'u —sei la smacu cu frumu cusku je ke ku'i clite mutce— .i xu do cusku — li'u»

ni'o «lu mi na go'i —sei la cipnrlori cu sutra cusku— li'u»

ni'o «lu mi pu jinvi lo du'u ja'a go'i —sei la smacu cu cusku— .i mi di'a cusku .i «lu la .eduin. jo'u la .morkar. vu'o noi turni la .mersias. fa'u la .nortumbrias. cu xusra se va'u .ubu .i je la .stigand. ji'a sai noi naijgi ke banli jdatro la .kanterburis. cu facki fi da fe lo du'u xamgu sidbo li'u» li'u»

ni'o «lu facki fi ba'e ma —sei la datka cu cusku— li'u»

ni'o «lu «lu facki fi ba'e da li'u» —sei la smacu cu spuda co fengu milxe— .i li'a do djuno lo du'u ma kau smuni zo da li'u»

ni'o «lu mi ja'a djuno lo du'u ma kau smuni zo da kei ca lo nu mi facki —sei la datka cu cusku— fi da noi so'e roi pipybanfi ja curnu .i lo preti zo'u: fi ma facki fa lo banli jdatro li'u»

ni'o la smacu na sanji lo di'u preti gi'e sutra lo nu di'a cusku «lu «lu facki fi da fe lo du'u xamgu sidbo fa lo nu kansa la .edgar.atelin. lo nu penmi la .uiliam. gi'e friti lo trumapku .ubu .i lo se tarti be la .uiliam. ca lo nu cfari cu milxe .i ku'i lo nuntolclite be lo .ubu normano li'u» .i pei doi do iu —sei sy di'a cusku je ca bo carcra be la .alis.— li'u»

ni'o «lu cilmo du'i lo nu pu cilmo —sei la .alis. cu badri cusku— .i simlu lo ka na sai sudgau mi li'u»

ni'o «lu va'o la'e di'u —sei la cipnrdodo ca lo nu sa'irbi'o lo tuple cu junri cusku— mi stidi lo du'u lo nu penmi cu se tolcfari'i te zu'e lo nu temsepcau plicu'a lo tolcadmau daftadji li'u»

ni'o «lu ko tavla bau la .lojban. —sei la .atkuila cifnu cu cusku— .i mi na se slabu lo smuni be lo xadba be lo di'u clani valsi .i je pe'i do ji'a na go'i li'u» .i la .atkuila cifnu cu krogau lo stedu te zu'e lo nu mipri lo nu cisma .i su'o lo drata cipni cu mi'amli co se tirna

ni'o «lu mi pu pu'o cusku —sei la cipnrdodo cu se xrani cusku— lo se du'u lo traji be lo ka se jalge lo nu sudgau mi'o cu jdijmaji terjvi li'u»

ni'o «lu ki'a jdijmaji terjvi —sei la .alis. cu cusku— li'u» .i .abu na mutce lo ka djica lo nu djuno .i ku'i la cipnrdodo pu denpa tai lo nu dy jinvi lo du'u ba'e da .ei tavla .i je no drata pu simlu lo ka djica lo nu cusku de

ni'o «lu je'u —sei la cipnrdodo cu cusku— lo xagrai be lo ciksi tadji cu nu zukte li'u» (to ji'a ki'u lo nu ju'o cu'i do ji'a djica lo nu troci ca lo dunra donri kei mi do jungau lo du'u la cipnrdodo cu zukte ma kau toi)

ni'o pa mai dy finti lo sinxa be lo nunbajra pluta be'o noi cukla milxe (to lo satci tarmi na vajni —sei dy cusku— toi) .i ba bo vi fa'u va punji lo ro mei lo pluta .i cusku no «lu pa .i re .i ci .i ko bajra li'u» .i ba'i bo ro da co'a bajra ca lo nu da djica kei gi'e co'u bajra ca lo nu da djica .i se ki'u bo na frili fa lo nu djuno lo du'u mo'u ma kau bajra jivna .i ku'i la cipnrdodo ba lo nu ca'o bajra ze'a lo xadba cacra gi'e za'u re'u je'a sudga cu suksa kixsku «lu lo nu jivna cu mulno li'u» .i lo ro mei cu denmi sanli gi'e vasxu mutce gi'e te preti fi «lu ku'i ma jinga li'u»

ni'o lo di'u preti zo'u: la cipnrdodo na kakne lo nu danfu se cau lo nu mutce pensi .i je dy ze'u zutse fau lo nu pa degji cu danre lo mebri (to tai lo nu tarmi la .ceikspir. fi'o ta'e se pixra ri toi) .i ca bo lo drata cu denpa je smaji .i ro mai la cipnrdodo cu cusku «lu ba'e ro da jinga .i je .ei ro da se cnemu li'u»

ni'o «lu ku'i ma cnemu —sei lo voksa so'i mei cu te preti— li'u»

ni'o «lu li'a ba'e tu —sei la cipnrdodo noi sinxa la .alis. se pi'o pa degji cu cusku— li'u» .i je lo ro mei ba zi jmaji lo sruri be .abu gi'e se cfipu kixsku «lu .au ve cnemu .i .au ve cnemu li'u»

ni'o la .alis. na te sidbo lo du'u .ei zukte ma kau kei gi'e dunku punji lo xance lo daski gi'e vimcu lo tanxe be lo titspi (to .u'a lo silna djacu na pagre lo tanxe lo nenri toi) gi'e fairgau lo titspi lo ro jinga .i satci banzu lo nu ro da cu te dunda pa titspi

ni'o «lu ku'i .ei tu ji'a se cnemu —sei la smacu cu cusku— li'u»

ni'o «lu li'a —sei la cipnrdodo cu junri spuda— .i ma poi drata cu nenri lo do daski —sei fa'a la .alis. cu jmina cusku— li'u»

ni'o «lu lo po'o tajgai —sei la .alis. cu badri cusku— li'u»

ni'o «lu ko ta mi dunda —sei la cipnrdodo cu cusku— li'u»

ni'o baku lo ro mei cu za'u re'u jmaji lo sruri be .abu ca lo nu la cipnrdodo cu junri dunda lo tajgai gi'e cusku «lu mi'a do pikci lo nu do cpazau lo vi melbi tajgai li'u» .i je lo ro mei ca lo nu dy mo'u cusku lo tordu se cusku cu geirkrixa

alis-1book8.jpg

ni'o la .alis. cu jinvi lo du'u pi ro lo tcini cu mutce lo ka cizra .i ku'i lo ro mei cu simlu lo ka tai junri kei ja'e lo nu .abu na darsi lo nu cmila .i .abu ki'u lo nu na te sidbo lo du'u .ei cusku ma kau cu krobi'o rinsa gi'e lebna lo tajgai se rai lo ka junri simlu

ni'o lo bavla'i cu nu citka lo titspi .i la'e di'u rinka lo nu savru gi'e cfipu kei ki'u lo nu ge lo barda cipni cu pante lo nu na banzu lo nu vu'irga'e lo me ri moi gi lo cmalu cu dirva'u gi'e nitcu lo nu se darxi fo lo trixe .i ro mai ku'i mo'u co'e .i je lo ro mei cu za'u re'u djine zutse gi'e pikci la smacu lo nu di'a cusku

ni'o «lu do nupre lo nu jungau mi lo citri be do —sei la .alis. cu cusku— .e lo du'u ki'u ma kau do xebni .y my jo'u gy —sei tolylau jmina— li'u» .i .abu xadba terpa lo nu sy cu za'u re'u cinmo se xrani

ni'o «lu lo lisri be mi cu clani je se badri —sei la smacu fa'a la .alis. cu cusku je dricmo— li'u»

ni'o «lu ba'e je'a clani linsi —sei la .alis. noi manci catlu lo rebla be la smacu cu cusku— .i ku'i ki'u ma do ly mi'a skicu lo ka se badri li'u» .i .abu ca lo nu la smacu cu cusku cu ca'o manci la'e di'u ja'e lo nu lo te sidbo lo rebla linsi lo simsa be «lu

la fengu lo smacu

noi fy ke'a

cpacu cu

penmi lo

zdani .i fy

ra jungasnu

.i .ai no

proki'u .i .ei

flajvisi'u

.i ca lo ca

cerni no

drata cu

fasnu .i .e'o

mi farlu

—sei lo smacu

cu darlu— .i

se cau lo

pairkamni ia

mi'o nolpratra

.i .o'u na

vajni .i

je ba'e mi

pajni

—sei la

fengu cu

cusku—

lo nu

do

se

catra


li'u»

alis-1book9.jpg

ni'o «lu do na jundi —sei la smacu fi la .alis. cu junri cusku— .i do pensi ma li'u»

ni'o «lu ie nai ga'i nai —sei la .alis. cu cumla cusku— .i do pu'o cusku lo mu moi be lo kruvi pe'i li'u»

ni'o «lu .i je ge na go'i —sei la smacu cu cladu je fengu mutce krixa— gi na simsa li'u»

ni'o «lu .a'e jgena li'u» se cusku la .alis. noi ro roi bredi lo nu sidju zi'e noi ru'u xanka catlu .i «lu ko curmi lo nu mi do sidju lo nu luzgau jy li'u»

ni'o «lu .ai mi curmi no simsa —sei la smacu cu cusku je sa'irbi'o je cliva— .i do mi tolsi'a fau lo nu do cusku lo tai nonselsmu li'u»

ni'o «lu .ai nai go'i —sei la .alis. uu cu pikci— .i ku'i frili do fa lo nu selxaicni li'u»

ni'o la smacu cu spuda fi lo po'o nu cmoni

ni'o «lu .e'o sai ko xruti klama gi'e mo'u cusku lo lisri be do —sei la .alis. cu kixsku— li'u» .i lo drata cu kansa cusku «lu go'i .e'o sai li'u» .i ku'i la smacu cu desygau po'o lo stedu gi'e depcau sutyze'a lo ka cadzu

ni'o «lu .u'u na stali li'u» se xersku la cipnrlori zi ba lo nu mo'u na'e se viska .i je lo tolci'o cakyjukni cu cabna cusku fi lo tixnu be ri fe «lu ie doi dirba be mi .i .a'o ctuca do lo nu ba'e do no roi fengu li'u» .i «lu ko na cusku doi mamta —sei lo citno cakyjukni cu milxe bikla cusku— .i do jai banzu lo nu fegygau lo xamsi cakcurnu li'u»

ni'o «lu .au la .dinas. cu vi zvati —sei la .alis. fi no steci cu bacru cusku— .i ju'o da'i dy zi cpacu li'u»

ni'o «lu la .dinas. ki'a .i e'a pei mi darsi lo nu te preti —sei la cipnrlori cu cusku— li'u»

ni'o la .alis. cu djicni spuda ki'u lo nu ro roi bredi lo nu tavla fi lo .abu danlu .i «lu la .dinas. cu me mi'a moi mlatu .i ji'a certu je'u lo nu kavbu lo smacu .i ui .au do viska ca lo nu dy jersi lo cipni .i je'u dy lo cmalu cipni du'i gi catlu gi citka li'u»

ni'o lo di'u se cusku cu se jalge lo banli nu cinmo savru ra'i lo zvati .i so'o lo cipni cu sutra lo nu cliva .i pa tolci'o cipnrpika co'a cliva brebi'o gi'e ca bo cusku «lu .ei je'u mi zdakla .i lo nicte vacri na mapti lo galxe be mi li'u» .i lo cipnrkanario cu nalsto voksa kixsku fi lo panzi fe «lu ko klama doi dirba .i je'u ca tcika lo nu ro do cu sipna bu'u lo ckana li'u» .i ki'u lo vrici ro lo ro mei cu cliva .i je la .alis. cu ba zi kansa no da

ni'o «lu .au mi na pu tavla fi la .dinas. —sei .abu badri sezysku— .i no da dy vi nelci pe'i .i ku'i ju'o dy xagrai lo ro mlatu pe lo munje .i .oi doi .dinas. iu .i'i xu mi do ba za'u re'u viska li'u» .i ca ku la .alis. uu co'a za'u re'u klaku ki'u lo nu .abu cinmo lo ka mutce lo ka nonkansa je badri .i ba zi bo ku'i .abu cu za'u re'u tirna lo nu vu stapa .i je .abu djicni catlu lo galtu gi'e xadba pacna lo du'u la smacu cu jdice lo drata gi'e xruti te zu'e lo nu mo'u cusku lo lisri ni'o ni'o vo mo'o

la ractu cu benji lo cmalu me la .bil.

ni'o me la blabi ractu noi masno bajra xruti gi'e xanka ke sruri catlu ca lo nu klama kei tai lo nu ry da pu cirko .i .abu tirna lo nu ry lauble sezysku «lu .oi la noltroni'u .i .oi la noltroni'u doi dirba xance be mi doi skapi be mi doi zbikre be mi zo'u: ny da mi ba catrymi'e ju'o sai .i jo ro mabrnfuru cu mabrnfuru .i mi ko'a ma falcru li'u» .i la .alis. zi smadi lo du'u ry sisku lo bifpra .e lo blabi ke kanba gluta re mei .i .abu noi xendo cu co'a sisku ko'a .i ku'i ko'a na se viska .i ro da ba lo nu .abu limna lo lalxu cu simlu lo ka ba'o cenba .i lo barda kumfa poi vasru lo blaci jubme .e lo cmalu vorme cu ba'o mulno canci

ni'o ba zi ku la ractu cu sanji la .alis. noi ru'u sisku ku'o gi'e fengu kixsku fi .abu fe «lu ue doi .merian. do ma zukte bu'u lo bartu .i ko ca bajra klama lo zdani gi'e bevri lo gluta re mei .e lo bifpra mi .i ko sutra li'u» .i la .alis. tai terpa ja'e lo nu .abu zi bajra fa'a lo farna poi ry jarco ku'o gi'e na troci lo nu ciksi lo se srera be ry

ni'o «lu tu jinvi lo du'u mi tu zdase'u —sei .abu ca lo nu bajra cu sezysku— .i tu ba se spaji lo nu facki lo du'u mi me ma kau .i ku'i .e'e mi bevri lo bifpra .e lo gluta tu .y va'o lo nu da'i mi tolcri li'u» .i .abu ca lo nu cusku di'u cu penmi lo cnici ke cmalu zdani noi lo ke'a vrogai cu se dandu lo carmi lastu tapla noi lo cmene po'u «lu blabi ractu li'u» ba'o se ciska fi ke'a .i .abu nerkla se cau lo nu vrodarxi kei gi'e sutra lo nu serti cpare kei gi'e terpa lo nu penmi lo ca'a me la .merian. gi'e gau barkla lo zdani pu lo nu tolcri lo bifpra .e lo gluta

ni'o «lu ua cizra —sei la .alis. cu sezysku— fa lo nu mi selfu lo ractu .i ru'a za'u mai la .dinas. mi ba minde li'u» .i .abu co'a se xanri lo klesi be lo cuntu poi da'i fasnu .i «lu doi .nix.alis. ko ca klama ti gi'e bredi lo nu cadzu li'u» .i «lu mi ba zi klama doi kurji .i ku'i .ei mi jundi lo vi kevna gi'e fanta lo nu lo smacu cu barkla li'u» .i «lu ku'i ia nai curmi —sei la .alis. di'a co'e— lo nu la .dinas. cu stali lo zdani va'o lo nu dy co'a tai minde lo prenu li'u»

ni'o ca ku .abu zvati lo cnici ke cmalu kumfa noi lo jubme cu lamji lo canko be ke'a gi'e se cpana (to du'i lo .abu se pacna toi) lo bifpra .e ji'i ci cmatce ke blabi ke kanba gluta re mei .i .abu lebna lo bifpra .e pa lo gluta re mei gi'e pu'o cliva lo kumfa ca lo nu catlu fa'a lo cmalu botpi noi sanli lo jibni be lo minra

ni'o ca lo ca krefu no da by tcita fi'o jufra «lu ko mi pinxe li'u» .i ku'i .abu gacri vimcu gi'e punji by lo .abu ctebi .i «lu ju'o ca ro nu mi pinxe ja citka da kei —sei .abu sezysku— ba'e de poi cinri cu fasnu .i se ki'u bo mi ba zgana lo nu lo vi botpi ma kau gasnu .i .a'o ti gasnu lo nu mi za'u re'u banro lo barda .i mi mutce lo ka tatpi lo nu tai cmatce li'u»

ni'o ja'a ca'a gasnu la'e di'u .i go'i pu lo se pacna be .abu .i pu lo nu .abu mo'u pinxe lo xadba be lo se botpi kei lo stedu be .abu ca'o catke lo drudi .i .abu bilga lo nu korcu kei lo nu marbi lo cnebo lo nu porpi .i .abu sutra lo nu punji lo botpi kei gi'e sezysku «lu banzu .i .a'o mi co'u banro .i ca ku mi na ka'e pagre lo vorme .i .au mi na pu pinxe lo tai mutce li'u»

alis-1book10.jpg

ni'o .oi dukse lo ka lerci kei fa lo nu djica la'e di'u .i .abu banro gi'e za'o banro gi'e ba zi bilga lo nu sanli lo loldi lo cidni .i ba zi bo lo canlu na banzu la'e di'u ji'a sai .i .abu troci lo nu vreta gi'e punji ge lo bircidni lo lamji be lo vorme gi lo drata birka lo sruri be lo stedu .i ku'i .abu za'o banro .i uo .abu tolse'a lo birka lo zdani pa'o lo canko gi'e setca lo jamfu lo danmo tubnu gi'e sezysku «lu uo mi na ka'e gasnu lo bancu .i mi ma ba lifri li'u»

ni'o zanfu'a la .alis. fa lo nu lo cmalu ke makfa botpi ca mulno lo ka ce'u ma kau rinka .i .abu ca na banro lo bramau gi'e ku'i mutce lo ka tolkufra .i za'a na cumki fa lo nu .abu cu za'u re'u bartu lo kumfa .i se ki'u bo .abu tolgei ue nai

ni'o «lu lo mi zdani ti mutce zmadu lo ka pluka —sei la .alis. uu cu pensi— .i bu'u zy ge nai ro roi zenba jo'u jdika gi nai ro roi se minde lo smacu .a lo ractu .i .au nai ru'e mi na klama fo lo ractu kevna .i ku'i .i ku'i cizra fa lo tai nu jmive .i mi ja'a kucli lo du'u mi ma kau ca'a lifri .i mi ca lo nu tcidu lo crida lisri cu krici lo du'u lo tai cuntu no roi fasnu .i ca ku mi cy midju .i .ei da finti lo cukta mi .i ie .ei go'i .i .ai mi ca lo nu ba'o banro cu finti .i ku'i mi ca ba'o banro —sei .abu badri jmina— .i ba'u nai lo bu'u canlu na banzu lo nu banro lo bancu li'u»

ni'o «lu ku'i ja'o —sei la .alis. cu pensi— mi ba no roi zenba lo ka tolcitno .i la'e di'u pluka .i mi no roi tolcitno ninmu .i ku'i mi ro roi cilre da .ei .i .oi .au nai go'i li'u»

ni'o «lu .oi doi .alis. noi bebna —sei .abu sezyspuda— ta'i ma do da bu'u ka'e cilre .i ue lo canlu ja'a ru'e banzu tu'a do .i no da bu'u canlu lo ve cilre cukta li'u»

ni'o .abu ca'o co'e .i pa mai darlu lo mlana gi'e re mai darlu lo drata gi'e zbasu lo vajni nuncasnu lo ro mei .i ku'i ba lo mentu be li so'o .abu tirna lo voksa noi bartu ku'o gi'e sisti te zu'e lo nu tinzga

ni'o «lu doi .merian. doi .merian. —sei lo voksa cu cusku— ko bevri lo mi gluta mi ca ku li'u» .i ba bo tirna lo nu cmalu ke jamfu stapa lo serti .i la .alis. cu djuno lo du'u la ractu cu klama te zu'e lo nu sisku .abu .i .abu desku ja'e lo nu lo zdani cu desku .i .abu tolmorji lo nu ge .abu ca kilto la ractu lo ka barda gi se ki'u bo no da krinu lo nu terpa ry

ni'o ca ku la ractu cu tolcliva lo vorme gi'e troci lo nu kargau vy .i ku'i lo se troci cu fliba ki'u lo nu ge .ei lo vrogai fa'a ne'i karbi'o gi lo bircidni be la .alis. cu catke vy .i la .alis. cu tirna lo nu ry sezysku «lu .ai mi srukla gi'e nerkla fo lo canko li'u»

ni'o «lu na ba go'i —sei la .alis. cu pensi— li'u» .i .abu denpa lo nu krici lo du'u tirna lo nu la ractu cu cnita lo canko .i ba zi bo .abu jai suksa fai lo nu pejgau lo xance gi'e jgari lo vacri .i .abu kavbu no da gi'e ku'i tirna lo cmalu se krixa .e lo nu farlu .e lo porpi blaci sance gi'e nibji'i la'e di'u lo du'u cumki fa lo nu ry farlu lo guzme tanxe .a lo simsa

alis-1book11.jpg

ni'o baku lo fengu voksa (to be la ractu toi) cu co'e «lu ju'i .pat. ju'i .pat. do ma zvati li'u» .i ba bo lo voksa noi .abu ke'a na pu tirna cu co'e «lu ju'o mi ti zvati .i mi kakpa sisku lo plise doi banli li'u»

ni'o «lu .o'o nai kakpa sisku lo plise —sei la ractu cu fengu cusku— .i ko mi klama gi'e sidju lo nu mi ba'e ti bartu li'u» (to sance lo drata ke porpi blaci toi)

ni'o «lu pau ju'i .pat. ta poi zvati lo canko cu mo li'u»

ni'o «lu ju'o ta birka doi banli li'u» (to py bacru zo biryrka toi)

ni'o «lu birka doi bebna .i ma pu viska lo birka poi tai barda .i ta se tisna pi ro lo canko li'u»

ni'o «lu ju'o go'i doi banli .i ku'i ta ca'a birka li'u»

ni'o «lu .i se ju no da va cuntu ta .i ko ta vimcu li'u»

ni'o baku ze'u smaji .i la .alis. so'u roi tirna lo lauble selsku no'u mu'a «lu ju'o mi na nelci doi banli .i na sai go'i li'u» .e «lu ko zukte tai lo mi te minde doi tolvri li'u» .i uo .abu cu re re'u pejgau lo xance gi'e re re'u jgari lo vacri .i ca ku tirna re cmalu se krixa .e lo porpi blaci sance drata .i «lu ue xo kau guzme tanxe cu zvati —sei la .alis. cu pensi— .i .a'u ma ba zi se zukte .i lo nu lacpu mi pa'o lo canko zo'u: .au kakne .i ju'o mi na djica lo nu za'o stali ti li'u»

ni'o .abu ze'a denpa gi'e tirna no lo za'u moi .i ro mai tirna lo sance be lo cmalu carce xislu .e so'i sai voksa noi tavla kansi'u .i .abu snada lo nu jimpe tu'a lo valsi .i «lu lo drata serti ma zvati .i ua .ei mi bevri lo pa mei .i la .bil. cu co'e lo drata .i ju'i .bil. ko ta ti bevri doi citno .i ko ta punji lo vi kojna .i na go'i .i pu ku ko ta jonsimgau .i ta za'o na preja lo galtu banzu .i ju'o ta ba xamgu banzu .i ko na tcila jundi .i ju'i .bil. ko jgari lo vi skori .i xu lo drudi ba sarji .i ko jundi lo va kluza tapla .i .oi ta ca'o farlu ju'i cnita (to sa'a cladu popsna toi) .i ma ta gasnu .i ru'a la .bil. .i ma ba cnita klama fo lo danmo tubnu .i mi na.e ko go'i .i vi'o nai .i la .bil. ba go'i .i ju'i .bil. lo selse'u do minde lo nu do cnita klama fo lo danmo tubnu li'u»

ni'o «lu .a'a .ei pei la .bil. cu cnita klama fo lo danmo tubnu —sei la .alis. cu sezysku— .i su'a la .bil. cu bilga lo nu zukte ro da .i mi na basti la .bil. gi'u te pleji lo mutce .i lo vi fagzda ja'a jarki .i ku'i pe'i mi ka'e tikpa milxe li'u»

alis-1book12.jpg
ni'o .abu tolse'a lo jamfu lo tubnu se rai lo kamvli gi'e denpa lo nu tirna lo cmalu danlu (to .abu na smadi lo du'u danlu ma kau toi) noi sraku je srukla ne'i lo tubnu ga'u ne'a .abu .i ba zi bo .abu ca lo nu sezysku «lu ti me la .bil. li'u» cu pa roi kinli tikpa gi'e denpa lo nu zgana lo nu ma kau ba fasnu

ni'o pa mai .abu tirna lo voksa so'i mei pe «lu ta mo'i me la .bil. li'u» .i re mai go'i lo ractu voksa pe «lu ko ta jgari doi lamji be lo spati bitmu li'u» .i ci mai go'i lo smaji .i vo mai go'i lo drata ke voksa kalsa pe «lu ko sarji lo stedu be ta .i gau ko ta pinxe lo jikru .i ko ta na vaxydicra .i ma mo doi pendo .i do ma pu lifri .i ko mi'a jungau la'e di'u li'u»

ni'o ro mai go'i lo cmalu je ruble je lauble voksa (to «lu tu me la .bil. —sei la .alis. cu pensi— li'u» toi) pe «lu mi ja'a ru'e djuno .i banzu ki'e .i mi ca kufra .i ku'i mi dukse lo ka jenca kei lo nu jungau .i mi djuno lo po'o du'u da mi catke tai lo danre selkei plipe .i mi tolfa'u tai tu'a lo tsani jakne li'u»

ni'o «lu ie do ca'a go'i doi pendo —sei lo drata cu cusku— li'u»

ni'o «lu .ei mi'o jelgau lo zdani —sei lo ractu voksa cu cusku— li'u» .i la .alis. cu krixa se rai lo ka cladu kei «lu ga nai go'i gi mi ba je'icru la .dinas. do li'u»

ni'o zi smaji mulno .i la .alis. cu pensi «lu .a'u tu ma ba zukte .i .ei va'o lo nu prije cu vimcu lo drudi li'u» .i ba zi lo mentu be li ji'i re co'a za'u re'u ru'u muvdu .i la .alis. cu tirna lo nu la ractu cu cusku «lu lo nu carcylai li pa cu banzu lo nu cfari li'u»

ni'o «lu lo nu ba'e ma carcylai li pa —sei la .alis. cu pensi— li'u» .i ku'i na cumki fa lo nu .abu ze'u senpi .i ba zi bo so'i cmalu bidju cu carvi pa'o lo canko .i su'o ra darxi .abu fo lo flira .i «lu mi ti ba tolcfagau —sei .abu sezysku— li'u» .i .abu krixa «lu le'o ko na za'u re'u co'e li'u» .i la'e di'u cupra lo drata ke smaji mulno

ni'o la .alis. cu se spaji sanji lo nu ro lo bidju cu binxo lo cmalu nanba ca lo nu vreta lo loldi .i lo carmi co'a sidbo fi lo .abu menli .i «lu lo nu mi citka pa lo nanba —sei .abu pensi— ba ju'o rinka lo nu mi cenba lo ka barda .i na sai ka'e brazengau mi .i ja'o ju'o pe'i cmazengau mi li'u»

ni'o ki'u la'e di'u .abu tunlo pa lo nanba gi'e gleki lo nu facki lo du'u ca co'a cmaze'a .i .abu ca lo nu cmalu banzu lo nu pagre lo vorme cu bajra klama lo bartu be lo zdani gi'e penmi lo so'i cmalu ke danlu jo'u cipni noi denpa .i lo cmalu rebyrespa uu no'u la .bil. cu midju lo ro mei gi'e se sarji re smacrkobaiu noi dunda lo se botpi .i ro da sutra fa'a la .alis. ca lo nu .abu tolcanci .i ku'i .abu to'o bajra se rai lo kamsutra gi'e ba zi snura zvati lo denmi ricfoi

ni'o «lu .ei pa mai —sei la .alis. ca lo nu ru'u cadzu bu'u lo ricfoi cu sezysku— mi za'u re'u banro lo mi barda .i .ei re mai mi tolcri lo melbi purdi .i pe'i la'e di'u cu xagrai selpla li'u»

ni'o ju'o xamgu selpla .i cnici je sampu .i lo pa po'o nabmi zo'u: .abu na te sidbo lo nu co'a co'e kei lo cmarai ji'a sai .i ca lo nu .abu xanka catlu ru'u lo tricu kei lo cmalu ke kinli se bacru noi vi gapru lo .abu stedu cu gasnu lo nu .abu fa'a ga'u sutra catlu

alis-1book13.jpg

ni'o lo bratce gerpanzi fa'a ni'a catlu .abu se pi'o lo barda je cukla kanla gi'e ruble tengau lo xance gi'e troci lo nu pencu .abu .i «lu uu doi dirba li'u» se cusku la .alis. se pi'o lo xlura tonga .i .abu mutce lo ka troci lo nu siclu .i ku'i mutce terpa lo si'o gy xagji noi la'a nibli lo nu gy citka .abu mu'i nai lo nu .abu xlura

ni'o .abu ja'a ru'e sanji lo nu .abu lo cmalu grana cu lafti gi'e jarco lo gerpanzi .i ja'e bo lo gerpanzi cu plipe lo vacri ro lo jamfu gi'e se pluka cmoni gi'e sezre'o lo garna gi'e gasnu lo nu simlu lo ka gunta ri .i ba bo la .alis. cu rivbi lo nu janli kei lo nu muvdu lo trixe be lo barda cpinyspa .i lo gerpanzi ca lo nu .abu tolcanci lo drata mlana cu za'u re'u sezre'o lo grana gi'e gunro farlu se ja'e lo nu sutra troci lo nu jgari gy .i ba bo la .alis. noi jinvi lo du'u simsa lo nu kelci lo braxirma zi'e noi terpa lo nu se stapa fi lo gy jamfu cu za'u re'u bajra fa'ati'a lo cpinyspa .i lo gerpanzi co'a so'o roi ze'i gunta lo grana gi'e ve'i fa'a je ve'u to'o bajra gi'e ro roi rufsu bacru gi'e ro mai vu zutse gi'e ta'irva'u gi'e se tance lo dandu be lo moklu gi'e se kanla lo xadba ganlo

ni'o lo cabna cu simlu fi la .alis. fe lo ka xamgu mapti lo nu cliva .i se ki'u bo .abu zi co'a go'i gi'e bajra co'u lo nu mutce tatpi gi'e vasxu claxu .e lo nu lo se bacru be lo gerpanzi vu se sance lo ruble mutce

ni'o «lu ku'i ia dirba ke cmalu gerpanzi —sei la .alis. noi surla lo nu vreta lo matnyxrula kei gi'e pilno lo my pezli lo nu cupra lo brife cu cusku— .i mi mutce nelci lo nu ctuca tu lo seltra va'o da'i lo nu mi mapti fi lo ka barda .i .oi mi jibni tolmorji lo nu .ei mi za'u re'u banro .i .a'a .ei mi ma zukte .i ru'a .ei mi citka ja pinxe da .i ku'i lo banli preti zo'u: go'i ma li'u»

ni'o ju'o lo banli preti cu me zo ma .i la .alis. fa'a ru'u catlu lo xrula .e lo srasu gi'e ku'i viska no da poi simlu lo ka mapti lo se citka ja pinxe .i lo barda gumri cu zvati lo jibni be .abu gi'e simsa .abu lo ka galtu .i .abu ca lo nu ba'o catlu lo cnita .e lo re mlana .e lo trixe cu te sidbo fi lo du'u .e'e catlu gi'e viska lo nu ma kau cpana

ni'o .abu tcena ji'u lo jamfu jipno gi'e catlu lo bancu be lo korbi be lo gumri .i lo .abu kanla cu penmi lo kanla be lo barda ciftoldi noi zutse lo cpana zi'e noi lo ke'a birka cu se polje zi'e noi smaji damva'u se pi'o lo clani nargile zi'e noi jundi ge nai .abu gi no drata ni'o ni'o mu mo'o

se djusku lo ciftoldi

no'i la ciftoldi joi la .alis. ze'a simxu lo nu smaji catlu .i ba zu bo la ciftoldi cu bevri lo nargile fo lo moklu gi'e cusku fi .abu fo lo surla je cando voksa

ni'o «lu do me ba'e ma —sei la ciftoldi cu cusku— li'u»

alis-1book14.jpg

ni'o di'u na xamgu mukti lo nu co'a casnu .i la .alis. cu toldarsi spusku «lu mi .y .i mi na'e mulno djuno doi do'u ga'i nai ca lo cabna .i sa'u nai mi djuno lo du'u mi me ma kau ca lo nu mi ckana cliva ca lo cabycerni .i ku'i pe'i mi so'o roi se galfi ba la'e di'u li'u»

ni'o «lu ma di'u do smuni —sei la ciftoldi cu jursa cusku— .i ko ko ciksi li'u»

ni'o «lu .u'u mi na kakne lo nu mi mi ciksi doi do'u ga'i nai —sei la .alis. cu cusku— .i ki'u bo mi na me mi ua pei li'u»

ni'o «lu ua nai —sei la ciftoldi cu cusku— li'u»

ni'o «lu .u'u mi na kakne lo nu xagmau cusku de'u —sei la .alis. cu clite mutce spuda— ki'u lo nu zu'u mi na jimpe la'e de'u .i je zu'u nai lo nu mitre so'i da ze'a lo pa donri cu cfipu mutce li'u»

ni'o «lu na go'i —sei la ciftoldi cu cusku— li'u»

ni'o «lu .o'o cu'i .i'a do za'o na facki —sei la .alis. cu cusku— .i ku'i pe'i do ca lo nu binxo lo todbi'olanka (to ju'o do ba ca'a binxo ca da toi) gi'e ba bo binxo lo toldi cu ba milxe lo ka se cizra pe'i pei li'u»

ni'o «lu pe'i nai sai —sei la ciftoldi cu cusku— li'u»

ni'o «lu .o'o cu'i ju'o cu'i do cinmo lo drata —sei la .alis. cu cusku— .i mi djuno lo du'u da'i ba'e mi cinmo lo se cizra li'u»

ni'o «lu ba'e do ga'i —sei la ciftoldi cu tolsi'a cusku— .i do me ba'e ma li'u»

ni'o di'u xrugau lo re mei lo krasi be lo nu ta'arsi'u .i la .alis. cu milxe fanza lo nu la ciftoldi cu cusku lo tordu mutce pinka kei gi'e sanli zenba gi'e junri mutce cusku «lu pe'i .ei do cusku pu ku lo se du'u ba'e do me ma kau li'u»

ni'o «lu ki'u ma —sei la ciftoldi cu cusku— li'u»

ni'o la'e di'u ji'a cfipu preti .i la .alis. na kakne lo nu pensi lo xamgu krinu .i je la ciftoldi cu simlu lo ka na se zdile .i se ki'u bo .abu co'a cliva

ni'o «lu ko xruti —sei la ciftoldi fa'a .abu krixa— .i .ei mi cusku lo vajni li'u»

ni'o la'e di'u cinri simlu ju'o .i la .alis. cu carna gi'e xruti

ni'o «lu ko surla stali —sei la ciftoldi cu cusku— li'u»

ni'o «lu xu la'e di'u cu mulno —sei la .alis. cu cusku— li'u» .i .abu ralte lo nu fengu kei tai lo xagrai nu .abu kakne

ni'o «lu na go'i —sei la ciftoldi cu cusku— li'u»

ni'o la .alis. cu jdice lo du'u denpa kei ki'u lo nu ge no da se zukte gi cumki fa lo nu cy jungau .abu lo se vamji be lo nu tirna .i cy ze'a lo mentu be li so'o ca'o damva'u gi'e na tavla .i ro mai cy tolpolje lo birka gi'e za'u re'u lebna lo nargile lo moklu gi'e cusku «lu ja'o do jinvi lo du'u do ba'o cenba .i xu go'i li'u»

ni'o «lu .oi mi ba'o cenba doi do'u —sei la .alis. cu cusku— .i mi na kakne lo nu morji tai lo nu mi pu na'o no'a .i ji'a mi na stodi lo ka mitre kei ze'a lo mentu be li su'o pa no li'u»

ni'o «lu na kakne lo nu morji ba'e ma —sei la ciftoldi cu cusku— li'u»

ni'o «lu mi pu troci lo nu sitna «lu ua lo cmalu gunkybifce li'u» .i ku'i ri se bacru ja'e lo frica —sei la .alis. cu badri mutce voksa spuda— li'u»

ni'o «lu ko sitna «lu do tolcitno doi .paf.uiliam. li'u» —sei la ciftoldi cu cusku— li'u»

ni'o la .alis. cu polje lo xance gi'e co'a co'e di'edo tolci'o doi .paf.uiliam. —sei lo citnau cu cusku—.i lo kerfa be do ca'a blabi

.i ue do lo loldi lo stedu cu sanli.i do jinvi xu lo du'u drani

alis-1book15.jpg

.i ca lo mi nunci'o —sei la .uiliam. spuda—mi terpa lo nu mi se benxai

.i ca ku ju'o sai mi no da se besna.i ui sai mi ro roi ka'e co'e

.i —sei lo citnau cu cusku— do ke'u tolci'ogi'e ba'o binxo lo plana

.i ku'i do plipe pu zi vi lo vorme.i ma krinu lo nu ka'e go'i

alis-1book16.jpg

.i ca lo mi nunci'o —sei lo ruskre prijecu cusku— mi pruni se xadni

se pi'o lo vi kruji noi fepni li pa.i xu do te vecnu lo re mei

.i do tolci'o —sei cusku— .i se xedja co rublefi ro da poi jarmau lo grasu

.i ku'i lo gunse do mo'u se citka.i .a'u ta'i ma do snada

alis-1book17.jpg

.i ca lo mi nunci'o mi flara'a gunkagi'e darlu ro da lo speni

.i lo jalge ke sluji kamtsa pe lo xedjacu renvi fi lo mi nunjmive

.i do tolci'o —sei cusku— .i nandu co srumalo nu lo do kanla cu vlipa

.i ku'i lo curfi'e gau do nazbi lanxe.i ma rinka lo nu do tai certu

alis-1book18.jpg

.i mi ba'o spuda ci preti noi banzu—sei lo patfu cu cusku— .i ko cumla

.i pe'i pei mi do ba tirna ze'e sai.i ko cliva .i ja mi do ba tikpa

ni'o «lu di'u na drani se cusku —sei la ciftoldi cu cusku— li'u»

ni'o «lu .u'u na mulno drani —sei la .alis. cu toldarsi cusku— .i su'o lo valsi ba'o cenba li'u»

ni'o «lu toldrani co'a lo krasi co'u lo fanmo —sei la ciftoldi cu birti cusku— li'u» .i smaji ze'a lo mentu be li so'o

ni'o la ciftoldi cu tavla pa moi

ni'o «lu .au pei do clani mitre ma —sei cy te preti— li'u»

ni'o «lu ue .i lo du'u mitre ma kau na vajni —sei la .alis. cu sutra spuda— .i .i'i na nelci lo nu tai cafne fa lo nu cenba li'u»

ni'o «lu .i'i ba'e nai —sei la ciftoldi cu cusku— li'u»

ni'o la .alis. no da cusku .i .abu pu tai se fapro no roi lo .abu nunjmive gi'e ca cinmo lo nu fengu binxo

ni'o «lu xu do ca se mansa —sei la ciftoldi cu cusku— li'u»

ni'o «lu .y .au mi braze'a doi do'u —sei la .alis. cu cusku— .i lo nu centre li ze cu mutce lo ka mabla li'u»

ni'o «lu ia sai mutce lo ka zabna —sei la ciftoldi cu fengu cusku— li'u» .i cy sanli binxo ca lo nu tavla (to cy satci centre li ze toi)

ni'o «lu ku'i mi na se tcaci —sei la .alis. cu kecti tonga pante— li'u» .i .abu pensi «lu .au lo danlu na tai jai frili fai lo nu se cnixrani li'u»

ni'o «lu do ba co'a se tcaci —sei la ciftoldi cu cusku— li'u» .i cy punji lo nargile lo moklu gi'e co'a za'u re'u damva'u

ni'o ca ku la .alis. cu denpa lo nu cy di'a tavla .i ba lo mentu be li ji'i re la ciftoldi cu vimcu lo nargile lo moklu gi'e ji'i re roi sipfru gi'e desku .i cy cliva lo gumri gi'e cpare lo srasu lo darno gi'e ca bo piksku po'o «lu pa mlana do clazengau .i je lo drata mlana do torzengau li'u»

ni'o «lu pa mlana be ba'e ma .i lo drata mlana be ba'e ma —sei la .alis. cu pensi— li'u»

ni'o «lu lo gumri li'u» se cusku la ciftoldi tai lo nu da'i cy tirna lo .abu selpensi .i ba zi bo canci

ni'o la .alis. cu pensi zgana lo gumri ze'a lo mentu gi'e troci co facki lo du'u lo re mlana cu me ma kau .i gy prane cukla .i se ni'i bo lo nabmi cu nadycai .i ku'i ca lo fanmo .abu tengau lo birka ru'u lo gumri ve'a lo selku'e gi'e popygau se pi'o ro lo re xance lo korbi lo spisa

ni'o «lu ma fa'u ma mo fa'u mo —sei .abu sezysku— li'u» .i cmabatci lo pritu spisa te zu'e lo nu cipra fi lo selri'a .i ba zi bo ganse lo vlile nundarxi lo xejni'a .i ri darxi lo jamfu

ni'o .abu carmi terpa lo suksa nuncenba .i ku'i cinmo lo nu .ei na xaksu lo temci .i mu'i bo .abu sutra tolba'o .i je zi co'a zukte lo nu citka pi so'u lo drata spisa .i lo .abu xejni'a cu tai tagji se danre lo jamfu ja'e lo nu carmi nandu fa lo nu kargau lo moklu .i ku'i ca lo fanmo cu kargau gi'e snada lo nu tunlo lo pagbu be lo zunle spisa


* * * * * * *


* * * * * *


* * * * * * *


ni'o «lu ua lo stedu be mi cu zifre li'u» se cusku la .alis. fi'o tonga lo ka gleki poi ba zi binxo lo ka tepselspaji kei ca lo nu facki lo du'u na ka'e tolcri lo janco .i .abu fa'a ni'a catlu gi'e viska lo bratce clani cnebo po'o noi stani simsa sanli lo xamsi be fi lo ni'a vu crino pezli

ni'o «lu lo va crino cu ba'e mo —sei la .alis. cu cusku— .i lo mi janco ba'o klama ma .i .oi doi xance be mi ki'u ma mi nalka'e lo nu viska do li'u» .i .abu muvgau xy ca lo nu tavla .i ku'i se jalge lo po'o cmalu nu desku fa lo darno ke crino pezli

ni'o lo nu muvgau lo xance lo stedu cu simlu lo ka na cumki .i se ki'u bo .abu troci lo nu muvgau lo stedu lo xance .i .abu mutce gleki lo nu facki lo du'u lo cnebo cu jai frili fai lo nu krobi'o fa'a ro da tai tu'a lo since .i .abu ba'o snada lo nu krobi'o ja'e lo melbi zigzagi kei gi'e bredi lo nu sfubu lo jbini be lo pezli noi .abu facki lo du'u ke'a na'e drata lo gapru be lo tricu noi ni'a ke'a .abu pu klama .i ca bo lo kinli se bacru cu gasnu lo nu .abu sutra ti'ekla .i lo barda tcacpi pu vofli fa'a lo .abu flira gi'e vlile darxi .abu lo nalci

ni'o «lu ii since —sei la tcacpi cu krixa— li'u»

ni'o «lu mi ba'e na since —sei la .alis. cu fengu cusku— .i .oi ko mi cliva li'u»

ni'o «lu since ke'u —sei la tcacpi cu mlimau rapsku— li'u» .i ty klaku jmina «lu ro da poi mi troci zo'u: da na mansa sy li'u»

ni'o «lu mi jimpe no da lo te tavla be fi do —sei la .alis. cu cusku— li'u»

ni'o «lu mi troci tu'a lo tricu genja .i je mi troci tu'a lo ri'erkoi .i je mi troci tu'a lo spabi'u —sei la tcacpi se cau lo nu jundi .abu cu cusku— .i ku'i no da pluka lo since li'u»

ni'o la .alis. cu zenba lo ka se cfipu .i ku'i .abu pensi lo du'u no da prali lo nu jmina cusku pu lo nu la tcacpi cu mo'u tavla

ni'o «lu po'o nai nandu fa lo nu kurji lo sovda —sei la tcacpi cu cusku— .i je ji'a .ei mi mi kajde lo since ze'a lo nicte jo'u lo donri .i ze'u lo jeftu be li ci mi sipna no da li'u»

ni'o «lu mi mutce xenru lo nu do se fanza —sei la .alis. noi co'a jimpe lo smuni be fi ty cu cusku— li'u»

ni'o «lu mi cuxna lo tricu poi galrai lo ricfoi —sei la tcacpi cu krixa zenba ke ranji cusku— .i ca bo mi pensi lo du'u uo mi zifre fi lo nu claxu lo since .i ku'i ue sy torni klama fi lo tsani .i .oi since li'u»

ni'o «lu ku'i ju'a sai mi ba'e na since —sei la .alis. cu cusku— .i mi .y .i mi li'u»

ni'o «lu .a'a do ba'e mo —sei la tcacpi cu cusku— .i mi zgana lo du'u do troci co finti da li'u»

ni'o «lu mi .y cmalu nixli li'u» la .alis. cu se cusku co senpi ki'u lo nu morji lo nu so'i roi cenba ze'a lo ca donri

ni'o «lu lisri lakne ia nai —sei la tcacpi cu tolsi'arai tonga cusku— .i mi pu viska so'i cmalu nixli .i ku'i no ri se cnebo lo simsa be ta .i ie nai cai .i do since .i je .e'e nai do tolxu'a .i la'a do ba zi cusku lo se du'u do pu no roi vu'izga lo sovda li'u»

ni'o «lu mi ba'e ja'a vu'izga lo sovda —sei la .alis. noi mutce jetsku verba cu cusku— .i ku'i ka'u lo cmalu nixli cu dunli lo since lo ni citka lo sovda li'u»

ni'o «lu ia nai —sei la tcacpi cu cusku— .i se ni'i bo lo cmalu nixli cu since da .i di'u pi ro si'e lo ka'e se cusku li'u»

ni'o lo sidbo tai cnino la .alis. ja'e lo nu .abu smaji ze'a lo mentu be li ji'i re .i la'e di'u curmi lo nu la tcacpi cu jmina «lu ju'o sai do sisku lo sovda .i na vajni mi fa lo du'u do cmalu nixli gi'i kau since li'u»

ni'o «lu mutce vajni ba'e mi —sei la .alis. cu sutra cusku— .i ku'i je'u mi na sisku lo sovda .i ji'a mi va'o lo nu da'i ja'a go'i cu na djica lo me do moi .i mi na nelci lo nalseljukpa sovda li'u»

ni'o «lu ko cliva va'o ku —sei la tcacpi cu nalta'acni tonga cusku— li'u» .i ty cu za'u re'u zutse lo ty zdani .i la .alis. cu dzibi'o bu'u lo jbini be lo tricu tai lo xagrai selka'e .i lo .abu cnebo jo'u lo jimca cu za'o se jgena binxo .i .abu cu so'i roi bilga lo nu tolselto'i cy

ni'o baku .abu morji lo nu .abu za'o jgari lo gumri spisa lo xance .i .abu co'a junri zukte lo nu citka pa spisa pa mai .e lo drata re mai .i .abu cu su'o roi zenba gi'e su'o roi jdika .i ro mai .abu snada lo nu tcaci clani

ni'o .abu pu mitre lo drani simsa zu lo tai mutce ja'e lo nu cizra ca lo cfari .i ku'i .abu se tcaci binxo ze'a lo mentu be li so'u gi'e di'a ta'e sezytavla .i «lu uo lo xadba be lo mi selpla ba'o se zukte .i .u'e lo bu'u nuncenba cu cizra .i mi no roi birti lo du'u mi ba binxo ma kau zi lo mentu .i ku'i mi ba'o xruti lo ka drani mitre .i ca ku .ei nerkla lo melbi purdi .i .a'u ta'i ma zukte la'e di'u li'u» .i .abu ca lo nu cusku di'u cu suksa tolcliva lo klina noi vasru lo cmalu zdani noi mitre li ji'i pa .i «lu va'o lo nu ma kau xabju ta —sei la .alis. cu pensi— cu na drani fa lo nu mi tolcanci tai lo nu mi ca mitre .i va'o ku mi terpygau mutce li'u» .i se ki'u bo .abu co'a za'u re'u citka lo pritu spisa gi'e na darsi lo nu jbikla lo zdani kei pu lo nu ba'o jdika ja'e lo nu centre li re no ni'o ni'o xa mo'o

xarju jo'u cpinytsapi

ni'o ze'a lo mentu .abu sanli gi'e catlu lo zdani gi'e pensi lo du'u .ei ba zi zukte ma kau .i ca bo lo selfu noi dasni lo manfyta'u cu bajra cliva lo ricfoi (to .abu lo du'u ra selfu cu jinvi fo lo nu ra dasni lo manfyta'u .i va'o da'i na'e bo la'e di'u .abu ca lo po'o nu viska lo flira cu te cmene ra zo finpe toi) gi'e cladu darxi lo vorme lo degycidni .i vy karbi'o gau lo drata manfyta'u dasni selfu noi se flira lo cukla gi'e se kanla lo barda tai tu'a lo pipybanfi .i lo re selfu —sei la .alis. cu sanji— zo'u: lo kerfa cu pumvau gi'e cukla gacri pi ro lo stedu .i .abu mutce kucli lo du'u srana ma kau kei gi'e parkla lo milxe bartu be lo ricfoi te zu'e lo nu tinju'i

ni'o pa mai la finpe selfu cu tolse'a fi lo cnita be lo birka fe lo barda xatra noi jibni ra lo ka barda .i ra dunda xy lo drata selfu gi'e junri tonga cusku «lu fi la noltroni'u cu fityti'i fa la noltruni'u fe lo nu kelcrkroke li'u» .i la pipybanfi selfu cu mintu fi lo ka junri tonga kei gi'e milxe stika lo valsi porsi gi'e refsku «lu fa la noltruni'u cu fityti'i fi la noltroni'u fe lo nu kelcrkroke li'u»

alis-1book19.jpg

ni'o ba ku lo re mei cu simxu lo ka krobi'o rinsa .i lo kerfa be lo re mei cu xrebi'o

ni'o la .alis. tai cmila mu'i la'e di'u ja'e lo nu bilga lo nu bajra xruti lo ricfoi ki'u lo nu terpa lo nu ru tirna .i ca lo nu .abu cu za'u re'u mipri catlu kei ge la finpe selfu ba'o cliva gi lo drata cu zutse lo loldi ne'a lo vorme gi'e bebna catlu fa'a lo tsani

ni'o la .alis. cu toldarsi klama lo vorme gi'e darxi

ni'o «lu no da do prali lo nu darxi —sei la selfu cu cusku— .i go'i ki'u re da .i pa mai mi do dunli lo ka zvati lo mo kau mlana be lo vorme .i re mai ne'i cupra lo tai savru ja'e lo nu no da kakne lo nu tirna do li'u» .i ju'o lo tolfadni savru ca'o nenri .i ru'i cmoni je senci .i ru'i nai barda sance tai lo nu lo palta .a lo patxu cu porpi

ni'o «lu pe'u do'u —sei la .alis. cu cusku— mi nerkla ta'i ma li'u»

ni'o «lu lo nu do darxi cu racli —sei la selfu se cau lo nu jundi .abu kei di'a co'e— va'o lo nu da'i mi do sepli lo vorme .i mu'a va'o lo nu da'i do nenri kei ge do darxi gi mi curmi lo nu do barkla li'u» .i sy catlu lo tsani ze'a lo nu tavla .i la .alis. cu jinvi lo du'u ju'o sai sy tolclite la'e di'u .i «lu ku'i ju'o cu'i ta na kakne lo nu rivbi la'e di'u —sei .abu sezysku— .i lo ta kanla tai jibni lo gapru be lo stedu .i se ju .ei ta spuda lo preti .i mi nerkla ta'i ma —sei .abu cladu ke krefu cusku— li'u»

ni'o «lu mi zutse ti —sei la selfu cu te pinka— co'u lo bavlamdei li'u»

ni'o ca ku lo vorme be lo zdani cu karbi'o .i lo barda palta cu sfubu lo bartu fa'a sa'e lo stedu be la selfu .i py ja'a ru'e pencu lo sy nazbi gi'e porpi janli lo tricu poi trixe sy

ni'o «lu .i ja go'i co'u lo bavlamji re moi djedi li'u» di'a se cusku la selfu se pi'o lo mintu tonga tai lo nu da'i no da fasnu

ni'o «lu mi nerkla ta'i ma —sei la .alis. se pi'o lo lauzma tonga za'u re'u retsku— li'u»

ni'o «lu xu do ba'e ja'a nerkla —sei la selfu cu cusku— .i di'u pa moi lo preti li'u»

ni'o li'a la'e di'u jetnu .i ku'i la .alis. na nelci lo nu te cusku di'u .i «lu .oi —sei .abu bacru sezysku— ro lo danlu cu darlu .i banzu lo nu fenkygau li'u»

ni'o la selfu cu simlu lo ka jinvi lo du'u mapti lo nu za'u re'u te pinka .i «lu mi ti ba zutse —sei sy cusku— ru'i nai ze'a lo djedi be li so'i li'u»

ni'o «lu ku'i .ei mi ma zukte —sei la .alis. cu cusku— li'u»

ni'o «lu lo se djica be do —sei la selfu cu cusku— li'u» .i sy co'a siclu

ni'o «lu .oi no da mi prali lo nu tavla ta —sei la .alis. cu nalpacna cusku— .i ta prane lo ka bebna li'u» .i .abu kargau lo vorme gi'e nerkla

alis-1book20.jpg

ni'o lo vorme cu pluta lo barda jupku'a noi culno lo danmo fe'e co'a lo fanmo fe'e co'u lo drata .i la noltroni'u cu zutse lo cibyseltuple stizu bu'u lo midju gi'e kurji lo cifnu .i lo jukpa cu korcu ga'u lo fagri gi'e jicla do'e lo barda patxu noi simlu lo ka culno lo stasu

ni'o «lu ju'o lo dukse cpinytsapi cu zvati lo va stasu —sei la .alis. noi ru'i senci cu sezysku— li'u»

ni'o ju'o lo dukse cu zvati lo vacri .i la noltroni'u ji'a sai cu ru'i nai senci .i lo cifnu zo'u: cy na di'i senci jo'u kakcmoni se cau lo nu denpa .i lo re po'o zvati be lo jupku'a poi na senci cu me lo jukpa jo'u lo barda mlatu noi zutse lo cpana be lo fagzda gi'e relkerlo ganra cisma

ni'o «lu .e'o ko mi jungau —sei la .alis. noi milxe terpa ri'a lo nu na birti lo du'u xu kau lo nu pa moi tavla cu clite cu cusku— lo du'u lo do mlatu tai cisma mu'i ma kau li'u»

ni'o «lu tu tcicymlatu —sei la noltroni'u cu cusku— .i la'e di'u krinu .i doi xarju li'u»

ni'o lo nu ny viltce bacru lo ro moi valsi cu mukti lo nu la .alis. cu suksa plipe .i ku'i .abu ba zi jimpe lo du'u ny tavla lo cifnu .e nai .abu .i se mu'i bo virnu lo nu di'a cusku «lu mi na pu djuno lo du'u lo tcicymlatu cu ro roi gancisma .i je'u mi na pu djuno lo du'u lo mlatu cu ba'e kakne lo nu gancisma li'u»

ni'o «lu ro mlatu cu kakne —sei la noltroni'u cu cusku— .i je so'e mlatu ca'a co'e li'u»

ni'o «lu mi na djuno fi su'o me my poi ca'a co'e —sei la .alis. cu litytce cusku— li'u» .i .abu mutce se pluka lo nu co'a pagbu lo ta'arsi'u

ni'o «lu do na djuno so'i da —sei la noltroni'u cu cusku— .i je la'e di'u fatci li'u»

ni'o la .alis. na sai nelci lo tonga pe lo pinka gi'e jinvi lo du'u xamgu fa lo nu cfagau lo drata selcasnu .i lo jukpa ca lo nu .abu troci lo nu cuxna sy cu lebna lo patxu be lo stasu lo fagri gi'e co'a zukte lo nu renro ro se kuspe be jy la noltroni'u jo'u lo cifnu .i lo fagri tirse cu pa moi .i ba bo jersi fa lo tansi jo'u palta jo'u palne carvi .i la noltroni'u cu na'e jundi ca ji'a sai lo nu darxi ny .i lo cifnu pu ca'o tai mutce krixa ja'e lo nu nalcumki fa lo nu djuno lo du'u xu kau lo nundarxi cu crogau

ni'o «lu .oi .e'o sai ko kurji lo do se tarti —sei la .alis. cu terpa dunku plipe krixa— .i .oi lo ba'e melbi nazbi be ta uu li'u» ca lo nu lo nalfadni barda tansi cu vofli zo'a ny gi'e na ru'e bevri ny lo sepli

ni'o «lu va'o lo nu ro da kurji lo cuntu be da kei —sei la noltroni'u cu rufsu cmoni cusku— lo munje cu zenba lo ka carna sutra li'u»

ni'o «lu la'e di'u ba'e na prali —sei la .alis. noi mutce gleki lo nu ka'e jarco pi so'u lo nu .abu djuno cu cusku— .i ko pensi lo nabmi poi la'e di'u ke'a rinka sera'a lo donri jo'u lo nicte .i ka'u lo nu lo terdi cu carna lo jendu cu cacra li revo li'u»

ni'o «lu lo nu catra zo'u: —sei la noltroni'u cu cusku— ko vimcu lo stedu tu li'u»

ni'o la .alis. cu xanka catlu lo jukpa te zu'e lo nu zgana lo du'u xu kau jy zukte fi lo nu tinbe .i ku'i lo jukpa cu jicla lo stasu gi'e simlu lo ka na jundi .i se ki'u bo .abu di'a cusku «lu cacra li revo pe'i ji li pa re pei .i mi .y li'u»

ni'o «lu .oi ko mi na fanza —sei la noltroni'u cu cusku— .i mi na ka'e renvi lo namcu li'u» .i ca bo ny co'a za'u re'u kurji lo cifnu gi'e sanga lo sipselsa'a simsa cy gi'e vlile desygau cy ca lo fanmo be ro vlali'i

ko rufsu tavla lo do panzi.i ko py senci sfasa

.i lo nu po'o py do fanzacu ia te zukte krasi

KREFU

(to lo jukpa lo cifnu cu kansa toi)

ua ua ua

ni'o la noltroni'u ca lo nu sanga lo re moi be lo vlagri cu ca'o vlile renro lo cifnu lo gapru jo'u lo cnita .i lo se kecti cmalu cu tai krixa ja'e lo nu la .alis. cu ja'a ru'e tirna lo valsi

mi junri tavla lo mi panzi.i mi py senci sfasa

.i li'a py se pluka banzu.i cpinytsapi stasu

KREFU

ua ua ua

ni'o «lu ju'i do'u .e'a do ti kurji —sei la noltroni'u ca lo nu renro lo cifnu la .alis. cu cusku— .i .ei mi mi bredygau lo nu kansa la noltruni'u lo nu kelcrkroke li'u» .i ny sutra cliva lo kumfa .i lo jukpa cu renro lo tansi ny ca lo nu ny barkla .i ku'i ja'a ru'e fliba lo nu darxi

ni'o la .alis. cu milxe nandu kavbu lo cifnu ki'u lo nu cizra seltai ke cmalu danlu gi'e tengau lo birka jo'u lo tuple fo ro da .i «lu tai lo mumbircurnu —sei la .alis. cu pensku— li'u» .i lo cmalu uu cu zbisnava'u tai lo jacfebmatra ca lo nu .abu kavbu .i cy za'o sezyplo jo'u sezytolplo .i se ki'u bo ze'a lo pa moi mentu be li ji'i re .abu ja'a ru'e kakne lo nu jgari

ni'o .abu zi ba lo nu facki lo du'u ma kau drani tadji lo nu kurji (to no'u lo nu tongau cy ja'e lo jgena gi'e tagji jgari lo cy pritu kerlo jo'u lo cy zunle jamfu ja'e lo nu rivbi lo nu cy sezytolplo toi) cu bevri cy lo bartu vacri .i «lu da va'o lo nu mi na lebna lo vi cifnu —sei la .alis. cu pensi— cu ba catra cy za lo djedi be li ji'i re .i xu na zekri fa lo nu cliva cy li'u» .i .abu cladu cusku lo ro moi valsi .i lo cmalu cu spuda cmoni (to cy pu co'u senci toi) .i «lu ko na cmoni —sei la .alis. cu cusku— .i na sai drani tadji lo nu cusku li'u»

ni'o lo cifnu cu za'u re'u cmoni .i la .alis. cu xanka mutce catlu lo flira be cy te zu'e lo nu facki lo du'u cy mo kau .i ju'o cy se nazbi lo gapselfa'a noi lo xajyzbi cu zmadu lo re'azbi lo ka ke'a simsa ce'u .i ji'a lo kanla be cy ca'o binxo lo mutce cmalu lo cifnu kanla .i to'u la .alis. na sai nelci lo jvinu be lo dacti .i «lu ku'i ju'o cu'i ti kakcmo po'o —sei .abu pensi— li'u» .i .abu cu za'u re'u catlu lo cy kanla te zu'e lo nu facki lo du'u xu kau lo dirgo ba'o se klaku

ni'o na co'e .i no dirgo ba'o se klaku .i «lu ga nai do binxo lo xarju doi dirba —sei la .alis. cu junri cusku— gi .o'i mi do co'u srana li'u» .i lo se kecti cmalu za'u re'u kakcmo (to go'i gi'a xajycmo .i na cumki fa lo nu jdice toi) .i lo re mei di'a co'e ze'a lo smaji

ni'o la .alis. co'a pensi sezysku «lu .ei mi zukte mo sera'a lo vi danlu ca lo nu mi tolcliva lo zdani li'u» ca lo nu cy cu za'u re'u cmoni se kai lo ka tai vlile ja'e lo nu .abu xalni milxe catlu lo cy flira .i ca ku na senpi .i cy zmadu na je nai mleca lo xarju .i .abu jinvi lo du'u fenki mutce fa lo nu za'o bevri cy

alis-1book21.jpg

ni'o ki'u ku .abu punji lo danlu lo loldi gi'e co'a mutce tolxanka lo nu viska lo nu dy smaji bajra fa'a ne'i lo ricfoi .i «lu lo cifnu va'o lo nu banro —sei .abu sezysku— cu tolmelbi mutce verba .i ku'i pe'i tu ca'a melbi xarju li'u» .i .abu co'a pensi lo drata verba noi ke'a slabu .abu gi'e se xamgu da'i lo nu ke'a xarju .i .abu sezysku «lu .au djuno lo du'u ma kau drani tadji lo nu galfi da li'u» ca lo nu .abu milxe se spaji lo nu viska la tcicymlatu noi zutse lo jimca be lo tricu va lo mitre be li su'o

alis-1book22-a.jpg
alis-1book22-b.jpg

ni'o la mlatu cu cisma po'o ca lo nu viska la .alis. .i my simlu lo ka xendo —sei .abu pensi— .i ku'i my se jgalu lo clani mutce gi'e se denci lo so'i sai mei .i se ki'u bo .abu jinvi lo du'u .ei sinma my .i «lu doi tcicymlatu li'u» .i .abu toldarsi co'asku ki'u lo nu na sai djuno lo du'u xu kau my nelci lo cmene .i ku'i my ganze'a cisma po'o .i «lu ua ta ca se pluka —sei la .alis. cu pensi— li'u» .i .abu di'a cusku «lu .e'o ko mi jungau lo du'u .ei mi klama zo'e ti ma kau li'u»

ni'o «lu la'e di'u jalge lo du'u do djica lo nu klama ma kau —sei la mlatu cu cusku— li'u»

ni'o «lu na'e mutce vajni mi fa lo nu klama ma kau kei —sei la .alis. cu cusku— li'u»

ni'o «lu va'o la'e di'u na vajni fa lo nu do klama fo ma kau —sei la mlatu cu cusku— li'u»

ni'o «lu va'o lo nu mi ca'a klama ba'e da —sei la .alis. cu ciksi jmina— li'u»

ni'o «lu ua ju'o do ca'a co'e —sei la mlatu cu cusku— va'o lo nu do cadzu ze'a lo banzu li'u»

ni'o la .alis. cu jinvi lo du'u la'e di'u na ka'e te darlu .i se ki'u bo .abu troci tu'a lo drata preti .i «lu lo mo prenu cu xabju lo vi sruri li'u»

ni'o «lu vu fa'a tu —sei la mlatu cu pritu xance desku cusku— cu xabju la mapypre .i vu fa'a tu —sei drata xance desku— cu xabju la cibmasti cicyractu .i ko vitke lo se nelci be do .i ro lo re da fenki li'u»

ni'o «lu ku'i mi na djica lo nu jbini lo fenki —sei la .alis. cu te pinka— li'u»

ni'o «lu .o'o do na ka'e rivbi —sei la mlatu cu cusku— .i bu'u ti ro ma'a fenki .i mi fenki .i do fenki li'u»

ni'o «lu do jinvi lo du'u mi fenki kei fo ma li'u»

ni'o «lu ju'o do co'e —sei la mlatu cu cusku— .i ja do na ba'o klama ti li'u»

ni'o la .alis. na sai jinvi lo du'u la'e di'u cu je'urja'o .i ku'i di'a cusku «lu do jinvi lo du'u do fenki kei fo ma li'u»

ni'o «lu pa mai —sei la mlatu cu cusku— lo gerku na fenki .i ie pei li'u»

ni'o «lu ie ru'e —sei la .alis. cu cusku— li'u»

ni'o «lu ka'u —sei la mlatu cu di'a cusku— lo gerku cu fe'ucmo ca lo nu fengu kei gi'e rebla deskygau ca lo nu gleki .i zu'u nai ba'e mi fe'ucmo ca lo nu gleki kei gi'e rebla deskygau ca lo nu fengu .i se ni'i bo mi fenki li'u»

ni'o «lu mi te cmene fi zo latcmo .e nai zo fe'ucmo —sei la .alis. cu cusku— li'u»

ni'o «lu ko te cmene fi lo do se nelci —sei la mlatu cu cusku— .i xu do kansa la noltruni'u lo nu kelcrkroke ca lo cabdei li'u»

ni'o «lu mi mutce lo ka nelci la'e di'u —sei la .alis. cu cusku— .i ku'i mi za'o na te friti li'u»

ni'o «lu do mi ba bu'u viska —sei la mlatu cu cusku— li'u» .i my canci

ni'o la .alis. na mutce se spaji la'e di'u ki'u lo nu .abu ca'o co'a se tcaci lo nu lo cizra cu fasnu .i la mlatu ca lo nu .abu catlu lo pu se zvati be my cu za'u re'u tolcanci

ni'o «lu ta'o lo cifnu cu mo —sei la mlatu cu cusku— .i mi na ru'e tolmo'i lo nu te preti li'u»

ni'o «lu ba'o binxo lo xarju —sei la .alis. tai lo da'i nu my fadni xruti cu lauble cusku— li'u»

ni'o «lu mi pu jinvi lo du'u go'i —sei la mlatu cu cusku— li'u» .i za'u re'u canci

ni'o la .alis. ze'i denpa gi'e xadba pacna lo nu za'u re'u viska my .i ku'i my na tolcanci .i baku .abu za lo mentu be li ji'i re cu di'a cadzu fa'a lo se cusku se xabju be la cibmasti cicyractu .i «lu mi pu viska lo mapypre —sei .abu sezysku— .i la cibmasti cicyractu cu mutce zmadu fi lo ka cinri .i la'a cu'i cycy ki'u lo nu ca mumymasti cu na tcetce fenki .i do'a na tai fenki du'i lo nu ja'a no'a ca lo cibmasti li'u» .i .abu ca lo nu cusku di'u cu fa'a ga'u catlu .i la mlatu cu za'u re'u zvati gi'e zutse lo jimca be lo tricu

ni'o «lu pau do cusku zo xarju ji zo narju —sei la mlatu cu cusku— li'u»

ni'o «lu mi pu cusku zo xarju —sei la .alis. cu spuda— .i .au do na za'o suksa canci je tolcanci .i do gasnu lo nu mutce lo ka se cfipu li'u»

ni'o «lu vi'o —sei la mlatu cu cusku— li'u» .i ca ku my masno mutce canci co'a lo fanmo be lo rebla co'u lo nu cisma noi ze'a renvi ba lo nu lo drata pagbu ba'o canci

alis-1book23.jpg

ni'o «lu ue mi so'i roi viska lo mlatu pe se cau lo nu cisma —sei la .alis. cu pensi— .i ku'i ua lo nu cisma pe se cau lo mlatu .i traji lo ka cizra kei lo se viska be mi bei ze'a lo nu mi jmive li'u»

ni'o .abu ze'u nai klama pu lo nu viska lo zdani be la cibmasti cicyractu .i .abu jinvi lo du'u drani zdani kei fo lo du'u ge lo damtu'u cu tarmi lo kerlo gi lo drudi cu se gacri lo skapi .i lo zdani cu tai barda ja'e lo nu .abu na nelci lo nu jbikla pu lo nu ge citka pi so'u lo zunle spisa be lo gumri gi gasnu lo nu .abu banro lo mitre be li ji'i pi mu .i se va'o ji'a sai bo .abu milxe toldarsi cadzu fa'a zy gi'e sezysku «lu ru'a cycy ca'a tcetce fenki .i .au nai ru'e mi se ba'i pu klama lo nu viska la mapypre li'u» ni'o ni'o ze mo'o

fenki tcati bo kansi'u

ni'o lo jubme cu bredi ni'a lo tricu ca'u lo zdani .i la cibmasti cicyractu jo'u la mapypre cu pinxe lo tcati .i la sipsmacu cu zutse jbini lo re mei gi'e carmi sipna .i lo re mei cu pilno sy lo nu kicne kei gi'e vregau lo bircidni sy gi'e simxu lo ka tavla ga'u lo sy stedu .i «lu mutce tolkufra fa la sipsmacu —sei la .alis. cu pensi— .i ku'i pe'i sy va'o lo nu sipna cu na se vajni li'u»

ni'o lo jubme cu barda .i ku'i lo ci mei cu tagji jmaji lo kojna be jy .i «lu canlu no mei .i canlu no mei —sei lo re mei ca lo nu viska lo nu la .alis. cu klama cu krixa— li'u» .i «lu canlu ba'e za'u rau mei —sei la .alis. cu fengu cusku— li'u» .i .abu tsebi'o lo barda birstizu bu'u lo fanmo be lo jubme

ni'o «lu .e'e ko cpacu lo vanju —sei la cibmasti cicyractu cu zanru cusku— li'u»

ni'o la .alis. cu catlu pi ro lo jubme .i ku'i no na'e tcati jy cpana .i «lu mi na viska lo vanju —sei .abu piksku— li'u»

ni'o «lu no vanju cu zvati —sei la cibmasti cicyractu cu cusku— li'u»

ni'o «lu .o'o nai va'o la'e di'u do na clite lo nu friti —sei la .alis. cu fengu cusku— li'u»

ni'o «lu do na clite lo nu tsebi'o se cau lo nu se zvacpe —sei la cibmasti cicyractu cu cusku— li'u»

ni'o «lu mi na pu djuno lo du'u lo jubme cu me ba'e do moi —sei la .alis. cu cusku— .i jy bredi tu'a lo za'u sai ci mei li'u»

ni'o «lu lo do kerfa cu nitcu lo nu se katna —sei la mapypre cu cusku— li'u» .i my pu ze'u mutce kucli catlu la .alis. gi'e ca pa re'u tavla

ni'o «lu .ei do cilre fi lo nu na cusku lo prenu pinka —sei la .alis. cu junri cusku— .i mutce tolclite li'u»

ni'o la mapypre cu kargau lo kanla ja'e lo nu mutce ganra kei ca lo nu tirna di'u .i ku'i my cusku «lu lo korvo lo ciska jubme cu simsa ma li'u» po'o

ni'o «lu ui mi ze'a ba se zdile —sei la .alis. cu pensi— .i mi gleki lo nu co'a retsku lo zdifanza nabmi .i mi jinvi lo du'u mi ka'e smadi la'e di'u —sei .abu bacru jmina— li'u»

ni'o «lu xu do skudji lo du'u do jinvi lo du'u do ka'e facki lo danfu be di'u —sei la cibmasti cicyractu cu cusku— li'u»

ni'o «lu go'i sai —sei la .alis. cu cusku— li'u»

ni'o «lu .ei do cusku lo do se skudji —sei la cibmasti cicyractu di'a cusku— li'u»

ni'o «lu mi go'i —sei la .alis. cu sutra spuda— .i .y ju'o ru'e .y do'a nai mi skudji lo mi se cusku .i ka'u la'e di'u mintu li'u»

ni'o «lu na mintu —sei la mapypre cu cusku— .i do du'i ka'e cusku lo se du'u «lu mi viska lo mi se citka li'u» mintu «lu mi citka lo mi se viska li'u» li'u»

ni'o «lu do du'i ka'e cusku —sei la cibmasti cicyractu cu jmina— lo se du'u «lu mi nelci lo mi se cpacu li'u» mintu «lu mi cpacu lo mi se nelci li'u» li'u»

ni'o «lu do du'i ka'e cusku —sei la sipsmacu noi simlu lo ka sipna tavla cu jmina— lo se du'u «lu mi vasxu ze'a lo nu sipna li'u» mintu «lu mi sipna ze'a lo nu vasxu li'u»

ni'o «lu ja'a mintu sera'a do —sei la mapypre cu cusku— li'u» .i ca bo lo nu casnu cu ve denpa .i lo kansi'u cu smaji zutse ze'a lo mentu ca'o lo nu la .alis. cu pensi pi ro da poi .abu morji ke'a lo korvo .a lo ciska jubme zi'e noi na mutce

alis-1book24.jpg

ni'o la mapypre cu pa moi lo co'u smaji

ni'o «lu lo xo moi be lo masti djedi cu detri —sei my fa'a la .alis. cu cusku— li'u» .i my lo junla ba'o cpacu lo daski gi'e ca'o xanka catlu gi'e di'i nai desygau gi'e jbipu'i lo my kerlo

ni'o la .alis. ze'i pensi gi'e cusku «lu lo vo moi li'u»

ni'o «lu .oi ri'e srera la'u lo djedi be li re —sei la mapypre cu cusku— .i mi do pu jungau lo du'u lo matne na mapti lo minji —sei my jmina— li'u» .i my fengu catlu la cibmasti cicyractu

ni'o «lu ra ba'e xagrai lo matne —sei la cibmasti cicyractu cu cumla spuda— li'u»

ni'o «lu go'i .i ku'i la'a lo ji'a nanba spisa cu nerbi'o —sei la mapypre cu fegmli pante— .i .ei do ra na pu setca se pi'o lo nanba dakfu li'u»

ni'o la cibmasti cicyractu lo junla cu jgari gi'e tolgei catlu gi'e jirgau lo kabri tcati gi'e re re'u catlu .i ku'i cycy na kakne lo nu pensi lo se cusku poi xagmau lo pa moi pinka no'u «lu ga'i cu'i ra ba'e xagrai lo matne li'u»

ni'o la .alis. pu ca'o kucli catlu ga'u lo cycy janco .i «lu .a'u xajmi junla —sei .abu te pinka— .i ue jy sinxa lo du'u lo xo kau moi be lo masti djedi cu detri .e nai ku'i lo du'u ma kau tcika li'u»

ni'o «lu .ei ki'u ma ja'a go'i —sei la mapypre cu cusku— .i xu lo ba'e do junla cu sinxa lo du'u lo xo kau moi nanca cu detri li'u»

ni'o «lu li'a na go'i —sei la .alis. cu mutce sutra spuda— .i ku'i la'e di'u se krinu lo nu ze'u stali fa lo nanca be li pa li'u»

ni'o «lu mintu sa'e lo me ba'e mi moi —sei la mapypre cu cusku— li'u»

ni'o la .alis. cu cinmo lo ka mutce se cfipu .i lo pinka be fi la mapypre cu simlu lo ka no da smuni ke'a kei gi'e ku'i ja'a lojbo .i «lu mi na mulno jimpe —sei .abu se rai lo ka clite cu cusku— li'u»

ni'o «lu la sipsmacu za'u re'u sipna —sei la mapypre cu cusku— li'u» .i my falcru pi so'u lo glare tcati lo sy nazbi

ni'o la sipsmacu cu tolsurla desygau lo stedu gi'e cusku se cau lo nu kargau lo kanla kei «lu li'a li'a .i di'u sai pu'o pinka fi mi li'u»

ni'o «lu xu do ba'o smadi tu'a lo zdifanza nabmi —sei la mapypre fi la .alis. cu cusku— li'u»

ni'o «lu na go'i .i mi te jinga —sei la .alis. cu spuda— .i ma danfu li'u»

ni'o «lu mi na te sidbo la'e di'u lo cmarai ji'a sai —sei la mapypre cu cusku— li'u»

ni'o «lu mi go'i —sei la cibmasti cicyractu cu cusku— li'u»

ni'o la .alis. cu tatpi patyva'u .i «lu pe'i do ka'e se prali lo temci —sei .abu cusku— ta'i lo xagmau be lo nu xaksu ty ta'i lo nu preti fa lo zdifanza nabmi poi na se danfu li'u»

ni'o «lu do va'o lo nu se slabu la temci du'i lo nu mi no'a —sei la mapypre cu cusku— cu na pilno zo lo lo nu cmene ty .i zo la mapti li'u»

ni'o «lu mi na jimpe lo du'u do skudji ma kau —sei la .alis. cu cusku— li'u»

ni'o «lu li'a do na go'i —sei la mapypre cu stedu muvgau tolsi'a cusku— .i la'a do no roi tavla ji'a sai la temci li'u»

ni'o «lu ie ru'e —sei la .alis. cu kajde spuda— .i ku'i ju'o .ei mi darxi do'e lo temci ca lo nu mi cilre lo nu se zgike li'u»

ni'o «lu ua la'e di'u ve ciksi —sei la mapypre cu cusku— .i ty na nelci lo nu darxi .i ty va'o lo nu se pendo do cu gasnu so'a se nelci be do ri'i lo junla .i mu'a da'i li so ca tcika lo nu co'a tadni .i lo nu do ja'a ru'e stidi fi ty cu banzu lo nu lo junla mo'u ze'i cukli'u .i uo li pa ci pi'e ci no ca tcika lo nu citka li'u» (to «lu .au go'i —sei la cibmasti cicyractu cu lauble sezysku— li'u» toi)

ni'o «lu la'e di'u da'i banli ju'o —sei la .alis. cu pensi cusku— .i ku'i va'o ku mi na xagji li'u»

ni'o «lu ie ru'e go'i ca lo cfari —sei la mapypre cu cusku— .i ku'i .e'e li pa ci pi'e ci no za'o tcika ze'u lo do se djica li'u»

ni'o «lu xu la'e di'u tadji lo nu ba'e do zukte —sei la .alis. cu retsku— li'u»

ni'o la mapypre cu tolgei desygau lo stedu .i «lu na go'i —sei my spuda— .i mi'a da'arsi'u ca lo pu zi cibmasti .i ba zi bo ba'e tu fenki binxo za'a dai —sei my lo tcati smuci lo nu farja'o la cibmasti cicyractu cu pilno— .i fasnu ca lo banli ke zgike se tigni be la noltruni'u pe lo risna .i mi bilga lo nu sanga di'e

.i gu'irgu'i doi volratcu.i .u'e .a'u do ma klatcu

.i .a'u xu lo selsanga do slabu li'u»

ni'o «lu mi pu tirna lo simsa —sei la .alis. cu cusku— li'u»

alis-1book25.jpg

ni'o «lu di'a co'e —sei la mapypre di'a cusku— di'e

.i do munje gapru voflitcatypalne simsa trofli

.i gu'irgu'i——

li'u»

ni'o ca ku la sipsmacu cu desyzu'e gi'e co'a sanga ca lo nu sipna «lu gu'irgu'i gu'irgu'i li'u» gi'e ze'u za'o co'e ja'e lo nu sarcu fa lo nu tunta sy kei lo nu stigau sy

ni'o «lu no'i mi pu zi ba'o mulgau lo pa moi pempau —sei la mapypre cu cusku— ca lo nu la noltruni'u cu zunti gi'e krixa «lu ta catra lo temci .i ko lo stedu ta vimcu li'u» li'u»

ni'o «lu .oi selte'a cilce —sei la .alis. cu ki'asku— li'u»

ni'o «lu co'a la'e di'u —sei la mapypre di'a tolgei cusku— ty zukte no se cpedu be mi .i ca ze'e ru'i tcika fa li xa li'u»

ni'o lo carmi sidbo cu se pensi la .alis. .i «lu ua xu la'e di'u krinu lo nu so'i ue tcati dacti cu zvati —sei .abu retsku— li'u»

ni'o «lu ja'a go'i —sei la mapypre cu va'urpante cusku— .i ru'i tcika lo tcati sanmi .i mi'a no roi kakne lo nu lumci lo dacti ca lo jbini li'u»

ni'o «lu ja'o ru'a do za'o muvdu fo lo cukla —sei la .alis. cu cusku— li'u»

ni'o «lu go'i sa'e —sei la mapypre cu cusku— ca lo nu so'o lo dacti mo'u se xaksu li'u»

ni'o «lu ku'i ma fasnu ca lo nu do xruti lo cfari —sei la .alis. cu retsku darsi— li'u»

ni'o «lu .e'u mi'o galfi lo se casnu —sei la cibmasti cicyractu cu zunti je sipfru— .i mi ti tatpi .i mi sarji lo nu da lisri zo'e lo citno ninmu mi'a li'u»

ni'o «lu .u'u no da mi slabu —sei la .alis. noi xanka lo se stidi cu cusku— li'u»

ni'o «lu va'o la'e di'u la sipsmacu ba co'e —sei lo re mei cu krixa— .i ko cikybi'o doi sipsmacu li'u» .i lo re mei cu tunta sy lo re mlana ca lo mintu .i la sipsmacu cu masno kargau lo kanla .i «lu mi na pu sipna —sei se pi'o lo rufsu je ruble voksa sy cusku— .i mi pu tirna ro valsi poi do doi ci mei ca'o cusku li'u»

ni'o «lu ko te lisri fo mi'a —sei la cibmasti cicyractu cu cusku— li'u»

ni'o «lu .e'o go'i pe'u —sei la .alis. cu cpesku— li'u»

ni'o «lu ji'a ko sutra —sei la mapypre cu jmina— .i se va'o nai bo do ba sipna pu lo nu mulno li'u»

ni'o «lu pu zu vu ku lo ci cmalu mensi zo'u: —sei la sipsmacu cu mutce sutra tolsisti— zo .elsis. fa'u zo .lesis. fa'u zo .tilis. cu cmene .i my xabju lo loldi be lo jintyke'a li'u»

ni'o «lu ma my cidja —sei la .alis. noi ro roi se cinri lo du'u citka je pinxe ma kau cu cusku— li'u»

ni'o «lu lo satyjisra my cidja —sei la sipsmacu ba lo nu pensi ze'a lo mentu be li ji'i re cu cusku— li'u»

ni'o «lu ka'u na ka'e go'i —sei la .alis. cu xendo te pinka— .i va'o da'i ku my bilma li'u»

ni'o «lu ja'a go'i —sei la sipsmacu cu cusku— .i ba'e mutce lo ka bilma li'u»

ni'o la .alis. cu troci lo nu se xanri lo nu lo tai tolfadni ke jmive tadji cu simsa ma kau .i ku'i dukse lo ka cfipu .abu .i se ki'u bo .abu di'a cusku «lu .i ku'i ki'u ma my xabju lo loldi be lo jintyke'a li'u»

ni'o «lu ko za'u re'u pinxe lo tcati —sei la cibmasti cicyractu fi la .alis. cu mutce junri cusku— li'u»

ni'o «lu mi no roi pu pinxe —sei la .alis. cu cnicro spuda— .i se ni'i bo mi na ka'e za'u re'u go'i li'u»

ni'o «lu do skudji lo du'u do na ka'e ba'e me'i re'u pinxe —sei la mapypre cu cusku— .i frili fa lo nu za'u no re'u go'i li'u»

ni'o «lu no da cpedu lo ba'e do se jinvi —sei la .alis. cu cusku— li'u»

ni'o «lu ma cusku lo prenu pinka ca ku —sei la mapypre cu jinga reisku— li'u»

ni'o la .alis. na kakne lo nu spuda la'e di'u .i se ki'u bo .abu selfu vo'a lo nu cpacu lo tcati jo'u lo nanba joi matne kei gi'e ba bo re re'u te preti fo la sipsmacu fi «lu ki'u ma my xabju lo loldi be lo jintyke'a li'u»

ni'o la sipsmacu za'u re'u pensi ze'a lo mentu be li ji'i re gi'e ba bo cusku «lu jy satyjisra jintyke'a li'u»

ni'o «lu .o'o nai no go'i cu zasti —sei la .alis. co'a fengu cusku— li'u» .i ku'i la mapypre jo'u la cibmasti cicyractu cu bacru zoi sance c c sance .i la sipsmacu cu pante te pinka fi «lu .e'e do se'a dai mulgau lo lisri va'o lo nu do na ka'e clite li'u»

ni'o «lu na go'i .i .e'o do ja'a di'a go'i —sei la .alis. cu mutce cumla cusku— .i mi na ba za'u re'u zunti .i .i'a cumki fa lo nu lo ba'e pa go'a cu zasti li'u»

ni'o «lu zasti ju'o —sei la sipsmacu cu se si'arxai fengu cusku— li'u» .i ku'i sy nalpro fi lo nu di'a co'e .i «lu lo bi'u nai ci cmalu mensi noi ca'o crebi'o lo nu te pixra li'u»

ni'o «lu pixra ma my —sei la .alis. noi ca'o tolmorji lo se nupre cu cusku— li'u»

ni'o «lu lo satyjisra —sei ca ku la sipsmacu se cau lo nu pensi cu cusku— li'u»

ni'o «lu mi djica lo jinsa kabri —sei la mapypre cu zunti— .i .e'u ro mi'o muvdu lo lamji stuzi li'u»

ni'o my muvdu ca lo nu cusku .i la sipsmacu my jersi .i la cibmasti cicyractu cu muvdu lo pu se zvati be la sipsmacu .i la .alis. noi banzu naldjica cu basti la cibmasti cicyractu lo ka ce'u zvati ma kau .i la mapypre po'o cu se prali da lo nuncenba .i la .alis. cu se tolprali lo mutce ki'u lo nu la cibmasti cicyractu pu zi falcru lo ladru botpi lo cycy palta

ni'o la .alis. na djica lo nu za'u re'u cnixai la sipsmacu gi'e se ki'u bo kajde ke tolsti cusku «lu mi na jimpe .i my cpacu lo satyjisra ma li'u»

ni'o «lu ka'u ka'e cpacu lo djacu lo djacu jintyke'a —sei la mapypre cu cusku— .i si'a li'a ka'e cpacu lo satyjisra lo satyjisra jintyke'a vau ie pei doi bebna li'u»

ni'o «lu ku'i my ba'e nenri lo jintyke'a —sei la .alis. fi la sipsmacu cu cusku co naljundi be lo ro moi pinka— li'u»

ni'o «lu li'a go'i —sei la sipsmacu cu cusku— .i nenri lo jintyke'a li'u»

ni'o lo danfu tai mutce cfipu la .alis. uu ja'e lo nu curmi lo nu la sipsmacu ca'o co'e ze'a lo nu .abu na zunti

ni'o «lu my ca'o crebi'o lo nu te pixra —sei la sipsmacu di'a co'e— li'u» .i sy sipfru gi'e mosra lo kanla ki'u lo nu co'a sipydji .i «lu my te pixra so'i klesi be lo dacti .i ro da poi zo my pa moi lo cmene be ke'a lerfu li'u»

ni'o «lu ki'u ma zo my —sei la .alis. cu cusku— li'u»

ni'o «lu ki'u ma na ku da'i —sei la cibmasti cicyractu cu cusku— li'u»

ni'o la .alis. cu smaji

ni'o la sipsmacu ba'o ga'orgau lo kanla ca la'e di'u gi'e ca'o co'a sipna .i ku'i sy ca lo nu se tunta la mapypre cu za'u re'u cikybi'o gi'e cmalu krixa gi'e di'a cusku «lu li'o ro da poi zo my pa moi lo cmene be ke'a lerfu .i mu'a lo mirli terkavbu .e lo mluni .e lo mojrango .e lo mutce .i ka'u da ka'e mutce .i xu do su'o roi viska lo pixra be lo mutce li'u»

ni'o «lu je'u ua ru'e —sei la .alis. cu mutce se cfipu cusku— .i pe'i na go'i li'u»

ni'o «lu .ei va'o la'e di'u do na tavla —sei la mapypre cu cusku— li'u»

ni'o lo di'u se tolclite cu zmadu lo sarji selka'e be la .alis. .i .abu selrigni gi'e sa'irbi'o gi'e to'o cadzu .i la sipsmacu cu zi sipybi'o .i no lo re drata cu jundi lo nu .abu cliva .i .abu ji'i re roi trixe catlu fau lo nu xadba pacna lo du'u lo re mei cu xrucpe .abu .i lo re mei ca lo nu ro moi se viska .abu cu troci lo nu setca la sipsmacu lo tcati patxu

alis-1book26.jpg

ni'o «lu ta'o nai .ai mi no roi za'u re'u klama ba'e tu —sei la .alis. ca lo nu pluta sisku pa'o lo ricfoi cu cusku— .i traji lo kambebna lo tcati kansi'u poi mi pagbu ca lo nu mi jmive li'u»

ni'o .abu ca lo nu cusku di'u cu co'a sanji lo nu pa lo tricu cu ve vorme lo ty nenri .i «lu cizra —sei .abu pensi— .i ku'i ro da cizra ca lo cabdei .i pe'i .ai mi ca zi nerkla li'u» .i .abu nerkla

ni'o .abu cu za'u re'u zvati lo clani kumfa gi'e jibni lo cmalu ke blaci jubme

ni'o «lu .e'e mi xagmau snada ca lo ca krefu —sei .abu sezysku— li'u» .i pa mai .abu jgari lo cmalu ke solji ckiku gi'e telcaugau lo vorme be lo purdi .i re mai .abu co'a citka lo gumri noi pu punji lo spisa be ke'a lo daski ku'o co'u lo nu .abu centre li ji'i ci no .i ci mai .abu cadzu pa'o lo cmalu vorlu'a .i ba'e ro mai uo .abu zvati lo melbi purdi gi'e jbini lo carmi ke xrula zdani .e lo lenku milxe je'erjinto ni'o ni'o bi mo'o

me la noltruni'u moi kelcrkroke bo foldi

ni'o lo barda ke rozgu tricu cu jibni lo vorme be lo purdi .i lo rozgu poi xrula ty cu blabi .i ku'i ci purdykurji cu ca'o punji lo xunre cinta ry .i la .alis. cu pensi jinvi lo du'u mutce cizra kei gi'e jbize'a te zu'e lo nu catlu .i .abu ca lo nu ba'o klama cu tirna lo nu pa lo purdykurji cu cusku «lu .o'i doi .mum. ko na renro lo cinta mi li'u»

ni'o «lu .oi mi pu na ka'e rivbi —sei la .mum. cu cusku— .i la .zel. pu catke lo mi bircidni li'u»

ni'o ca la'e di'u la .zel. cu galcatlu gi'e cusku «lu .e'e doi .mum. ko ro roi fuzgau lo drata li'u»

ni'o «lu .ei ba'e do na tavla —sei la .mum. cu cusku— .i ti'e la noltruni'u cu xusra ca lo purlamdei lo du'u .ei vimcu lo stedu do li'u»

ni'o «lu ma krinu —sei lo tavla pa moi cu cusku— li'u»

ni'o «lu la'e di'u ba'e do na cuntu doi .rel. —sei la .zel. cu cusku— li'u»

ni'o «lu ba'e ja'a go'i —sei la .mum. cu cusku— .i .ai mi ta jungau .i krinu fa lo nu sabji lo tujli genja .e nai ba'i bo lo sluni lo jukpa li'u»

ni'o la .zel. cu bikre'o lo burcu lo cnita gi'e co'a cusku «lu ua ve rai lo ro toldra li'u» .i ca bo lo zy kanla cu cunso se farna la .alis. noi sanli gi'e catlu lo purdykurji .i zy ze'i sezydicra .i lo drata ji'a cu catlu lo trixe .i lo ro mei cu dizlo krobi'o

alis-1book27.jpg

ni'o «lu .e'o do mi jungau —sei la .alis. cu toldarsi milxe cusku— lo du'u ki'u ma kau do punji lo cinta lo va rozgu li'u»

ni'o la .mum. .e la .zel. cu cusku no da gi'e catlu la .rel. .i la .rel. co'a kandi voksa cusku «lu je'u sa'u doi citni'u ti ba'e xunre .ei rozgu tricu .i mi'a pu srera lo nu sombo lo blabi .i ro mi'a va'o lo nu la noltruni'u cu facki la'e di'u cu ba katna te vimcu lo stedu .i to'u sa'u doi citni'u mi'a zukte lo mi'a xagrai pu lo nu ny klama li'u» .i ca ku la .mum. noi pu ca'o xanka catlu lo purdi cu krixa «lu la noltruni'u .i la noltruni'u li'u» .i lo ci purdykurji cu sezre'o ja'e lo nu lo flira cu cpana lo loldi .i sance so'i nu stapa .i la .alis. cu catlu lo sruri gi'e djica lo nu viska la noltruni'u

ni'o klama pa moi fa lo pa no sonci noi bevri lo xacyga'a .i sy mintu lo purdykurji lo ka ma kau tarmi ce'u .i clani kurfa gi'e plita gi'e se kojna lo xance jo'u lo jamfu .i jersi fa lo pa no nolkansa noi ricfu se jadni lo tabjme gi'e re mei cadzu du'i tu'a lo sonci .i jersi fa lo noltru panzi noi pa no mei .i lo cmalu dirba cu gleki plipe klama co xance jgari re mei .i ro lo panzi cu se jadni lo risna .i jersi fa lo vitke .i so'e ri noltrunau ja noltruni'u .i la .alis. cu sajbi'o la blabi ractu noi jbini vy .i ry sutra je xanka tavla gi'e cisma frati ro se cusku gi'e zo'a klama se cau lo nu sanji .abu .i jersi fa la nolse'u pe lo risna zi'e noi bevri lo noltrunau mapku se pi'o lo zirxu'e ranbu'u kicne .i fanmo lo banli dzupoi fa ba'e fu'e LA NOLTRUNAU JO'U LA NOLTRUNI'U VU'O PE LO RISNA fu'o

ni'o la .alis. cu senpi lo du'u xu kau .ei cnita flira vreta tai tu'a lo ci purdykurji .i ku'i .abu na morji lo du'u ti'e la'e di'u dzupoi javni .i «lu ji'a ma ma prali lo dzupoi —sei .abu pensi— va'o lo nu .ei ro da cnita flira vreta ja'e lo nu na ka'e viska dy li'u» .i se ki'u bo .abu sanli lo se zvati gi'e denpa

ni'o ro da ca lo nu lo dzupoi cu crane la .alis. cu sisti gi'e catlu .abu .i la noltruni'u cu junri cusku «lu ti mo li'u» .i ny di'u cusku la nolse'u pe lo risna zi'e noi spuda fi lo po'o nu krobi'o je cisma

ni'o «lu doi bebna —sei la noltruni'u cu sutydji cusku— li'u» .i fa'a la .alis. ny di'a cusku «lu ma do cmene doi verba li'u»

ni'o «lu zo .alis. mi cmene doi banli nobli —sei la .alis. cu clite mutce cusku— li'u» .i ku'i .abu jmina sezysku «lu ua ta bakfu lo karda ga'i .i .ei mi ta na terpa li'u»

ni'o «lu ba'e ti mo li'u» se cusku la noltruni'u noi farja'o lo ci purdykurji noi vreta ru'u lo rozgu tricu .i ny ca lo nu py cnita flira vreta kei ki'u lo nu lo trixe morna cu mintu lo me ro drata moi cu na ka'e djuno lo du'u py purdykurji ji kau sonci ji kau nolkansa ji kau panzi be ny ci mei

ni'o «lu .a'u cu'i —sei la .alis. noi se spaji lo nu darsi cu cusku— .i na cuntu ba'e mi li'u»

ni'o la noltruni'u cu binxo lo zirxu'e ri'a lo nu fengu .i ny ba lo nu catlu .abu ze'i lo mokca tai tu'a lo cilce danlu cu krixa «lu ko lo stedu ta vimcu .i ko - li'u»

alis-1book28.jpg

ni'o «lu nonselsmu —sei la .alis. cu cladu je birti cusku— li'u» .i la noltruni'u cu smaji

ni'o la noltrunau cu punji lo xance lo birka be la noltruni'u gi'e toldarsi cusku «lu ko pensi doi dirba lo nu ta verba po'o li'u»

ni'o la noltruni'u cu carna to'o la noltrunau gi'e cusku «lu ko ta fa'ergau li'u» la nolse'u

ni'o la nolse'u cu kurji mutce fa'ergau se pi'o lo jamfu

ni'o «lu ko sanli —sei la noltruni'u cu cpina je cladu voksa cusku— li'u» .i lo ci purdykurji ze'i sa'irbi'o gi'e co'a korcu rinsa la noltrunau .e la noltruni'u .e lo noltru panzi .e ro lo drata

ni'o «lu ko ta sisti —sei la noltruni'u cu krixa— .i do mi tolylaxygau li'u» .i fa'a lo rozgu tricu ny di'a cusku «lu do ma ca'o vi zukte li'u»

ni'o «lu doi banli nobli —sei la .rel. ca lo nu cpanygau lo cidni lo loldi cu cumla mutce tonga cusku— .i mi'a troci .y li'u»

ni'o «lu je'e li'a —sei la noltruni'u noi pu ca'o lanli lo rozgu cu cusku— .i ko lo stedu ta vimcu li'u» .i lo dzupoi cu di'a muvdu .i ci lo sonci cu stali mu'i lo nu selmi'ecatra lo se malfu'a purdykurji noi bajra fa'a la .alis. mu'i lo nu se marbi

ni'o «lu do lo stedu na ba te vimcu —sei la .alis. cu cusku— li'u» .i .abu cu punji py lo barda ke xrula patxu noi vi zvati .i lo ci sonci cu sruri klama je sisku ze'a lo mentu be li ji'i re gi'e ba bo smaji jersi lo drata

ni'o «lu xu lo stedu ba'o se vimcu —sei la noltruni'u cu krixa— li'u»

ni'o «lu lo stedu ba'o canci doi banli nobli —sei lo sonci cu spuda krixa— li'u»

ni'o «lu .i'e —sei la noltruni'u cu krixa— .i xu do kelcrkroke li'u»

ni'o lo sonci cu smaji gi'e catlu la .alis. ki'u lo nu li'a di'u preti fo .abu

ni'o «lu go'i —sei la .alis. cu krixa— li'u»

ni'o «lu ja'o .e'e —sei la noltruni'u cu camki'a— li'u» .i la .alis. cu jorne lo dzupoi gi'e kucli lo du'u ma kau ba fasnu

ni'o «lu .y melbi .i .y melbi donri —sei lo mutce toldarsi se voksa ne'a .abu cusku— li'u» .i .abu ca'o cadzu ne'a la blabi ractu noi ze'i catlu lo .abu flira

ni'o «lu mutce —sei la .alis. cu cusku— .i la noltroni'u ma zvati li'u»

ni'o «lu .o'i .o'i —sei la ractu cu lauble je sutra tonga cusku— li'u» .i ry xanka catlu ga'u lo janco ca lo nu tavla kei gi'e sezgalgau co cpana lo jmadegji gi'e jbigau lo moklu lo .abu kerlo gi'e lauble cusku «lu ri ba se selmi'ecatra li'u»

ni'o «lu ma krinu —sei la .alis. cu cusku— li'u»

ni'o «lu xu do pu cusku «lu mi kecti li'u» —sei la ractu cu retsku— li'u»

ni'o «lu na go'i —sei la .alis. cu cusku— .i mi na sai kecti .i mi pu cusku «lu ma krinu li'u» li'u»

ni'o «lu ny darxi lo kerlo be la noltruni'u —sei la ractu co'a cusku— li'u» .i la .alis. cu cmila krixa .i «lu .o'i —sei la ractu cu terpa tonga laurblesku— .i la noltruni'u do ba tirna .i no'i ny pu lerci klama .i la noltruni'u cu cusku - li'u»

ni'o «lu ko zvati lo me do moi —sei la noltruni'u cu lidvru voksa cusku— li'u» .i lo prenu co'a bajra fa'a ro da gi'e jalsi'u .i ku'i bredi zi lo mentu be li ji'i re .i lo nu kelci cu cfari .i la .alis. cu jinvi lo du'u no roi lo nunji'e pu viska lo tai kelcrkroke foldi .i tolku'o jo'u skuro .i lo bolci cu jmive jesymabru .i lo mruli cu jmive fagycpi .i lo sonci cu krosa'ibi'o fi lo xance jo'u lo jamfu ja'e lo nu bargu

alis-1book29.jpg

ni'o lo ralju be lo nandu be la .alis. ca lo cfari cu nu jitro lo fagycpi .i .abu snada lo nu kufra banzu punji lo fy xadni noi lo tuple cu dandu ku'o lo cnita be lo .abu birka .i ku'i ta'e ku fy ca lo nu ge lo cnebo mo'u sirji gi .abu bredi lo nu darxi lo jesymabru lo fy stedu cu torni gi'e catlu fa'a lo .abu flira gi'e se cfipu frumu ja'e lo nu .abu na ka'e rivbi lo nu spoja cmila .i ca lo nu .abu ba'o punji lo fy stedu lo dizlo gi'e pu'o za'u re'u co'a co'e cu xajmi mutce fa lo nu facki lo du'u lo jesymabru pu nalbolbi'o gi'e ca'o klama lo darno .i ji'a ta'e ku lo tolku'o .a lo skuro cu zunti ca lo nu .abu djica lo nu benji lo jesymabru .i la .alis. ki'u lo nu lo korcu sonci ro roi sa'irbi'o gi'e dzukla lo drata pagbu be lo foldi cu jivbi'o lo du'u lo nunkei ja'a mutce lo ka nandu

ni'o ro lo kelci cu kelci ca lo mintu gi'e na denpa lo kelka'u be ky gi'e ru'i dausnu gi'e damba fi lo jesymabru .i ba zi ku la noltruni'u cu fengu cinmo gi'e ca'o marxa cadzu gi'e krixa «lu ko lo stedu ta vimcu li'u» .a «lu ko lo stedu tu vimcu li'u» ji'i pa roi ro mentu

ni'o la .alis. co'a cinmo lo ka tolkufra .i .i'a .abu za'o na damba la noltruni'u gi'e ku'i djuno lo du'u ka'e ba zi fasnu .i «lu va'o la'e di'u —sei .abu pensi— mi mo .i bu'u nelci lo nu vimcu lo stedu lo prenu .i manci mutce fa lo nu da stali lo ka jmive li'u»

ni'o .abu sisku lo tadji be lo nu zi'erbi'o kei gi'e pensi lo du'u xu kau ka'e cliva se cau lo nu se viska .i ca bo .abu co'a sanji lo cizra tolcanci be lo vacri .i ty cfipu .abu ca lo cfari .i ku'i .abu ba lo nu catlu ty ze'a lo mentu be li ji'i re cu facki lo du'u ty nu cisma kei gi'e sezysku «lu ua la tcicymlatu .i ca ku mi da ka'e tavla li'u»

ni'o «lu do mo —sei la mlatu ca lo nu lo ni moklu cu banzu lo nu tavla cu cusku— li'u»

ni'o la .alis. cu denpa lo nu lo kanla cu tolcanci .i ba bo .abu tu'ifru .i «lu na prali fi lo nu tavla ta kei —sei .abu pensi— pu lo nu zvati fa lo kerlo .a do'a nai su'o ri li'u»

ni'o za lo drata mentu lo stedu cu mo'u tolcanci .i la .alis. cu toljgari lo fagycpi gi'e co'a te lisri lo nunkei gi'e cinmo lo ka gleki lo nu da .abu tirna .i la mlatu cu simlu lo ka jinvi lo du'u pi rau ri ca se viska .i no drata pagbu be my cu tolcanci

ni'o «lu mi na jinvi lo du'u tu ca'o stace kelci —sei la .alis. co'a pante tonga cusku— .i ro tu da'arta'a ja'e lo nu na ka'e tirna lo nu tavla .i tu simlu lo ka na steci javni fi ce'u .i ja do'a nai no da va'o lo nu de ja'a javni cu jundi de .i do na se xanri lo du'u tai ma kau cfipu fa lo du'u ro lo dacti cu jmive .i mu'a lo bargu poi .ei mi ca pagre cu co'a cadzu lo drata fanmo be lo foldi .i mi pu'o kroke lo jesymabru pe la noltruni'u .i je ku'i ue jy to'o bajra ca lo nu viska lo nu lo me mi moi cu jbikla li'u»

ni'o «lu xu do nelci la noltruni'u —sei la mlatu cu lauble voksa cusku— li'u»

ni'o «lu na sai go'i —sei la .alis. cu cusku— .i ny mutce .y li'u» .i ca ku .abu sanji lo nu la noltruni'u cu jibni trixe .abu gi'e tirna .i se ki'u bo di'a cusku «lu lo ka lakne fa lo nu ce'u jinga .i se ki'u bo na vamji lo temci fa lo nu mo'u kelci li'u»

ni'o la noltruni'u cu cisma gi'e pagre

ni'o «lu do ma tavla —sei la noltrunau cu cusku— li'u» .i ny klama la .alis. gi'e mutce se cinri catlu lo stedu be la mlatu

ni'o «lu ta mi pendo .i ta tcicymlatu —sei la .alis. cu cusku— .i .e'a pei mi do ta pengau li'u»

ni'o «lu mi na sai nelci lo nu ta simlu ma kau —sei la noltrunau cu cusku— .i ku'i .e'a ta cinba lo mi xance va'o lo nu pluka ta li'u»

ni'o «lu mi zmanei lo nu na go'i —sei la mlatu cu te pinka— li'u»

ni'o «lu ko na tolsi'a —sei la noltrunau cu cusku— .i ko mi na catlu tai ta li'u» .i ny klama lo trixe be la .alis. ca lo nu tavla

ni'o «lu lo mlatu ka'e catlu lo noltrunau —sei la .alis. cu cusku— .i mi pu tcidu di'u lo cukta .i ku'i mi na morji lo du'u cy mo kau li'u»

ni'o «lu .ei ta se vimcu —sei la noltrunau cu jdice cusku— li'u» .i ny cusku fi la noltruni'u noi ca jibni pagre ku'o fi «lu .au doi dirba do da vicygau lo vi mlatu li'u»

ni'o la noltruni'u cu cikre ta'i pa da ro nabmi noi barda ja cmalu .i «lu ko lo stedu ta vimcu —sei ny se cau lo nu fa'a catlu cu cusku— li'u»

ni'o ba'e mi klagau lo selmi'ecatra —sei la noltrunau cu sutydji cusku— li'u» .i ny sutra klama

ni'o la .alis. cu jdice lo du'u xruti gi'e viska lo nu lo nunkelci cu mo kau .i ca bo .abu tirna lo darno voksa be la noltruni'u noi cinmo krixa .i .abu ba'o tirna lo nu ny minde lo nu ci kelci cu se catra ki'u lo nu ky na kelci ca lo kelka'u be ky .i .abu na'e nelci lo jvinu be lo cuntu ki'u lo nu lo nunkelci cu mutce lo ka cfipu kei ja'e lo nu .abu no roi djuno lo du'u xu kau ca .ei kelci .i se ki'u bo .abu co'a sisku lo .abu jesymabru

ni'o lo jesymabru ca'o damba lo drata jesymabru .i la .alis. cu jinvi lo du'u la'e di'u xautce lo nu kroke lo se drata lo drata .i lo po'o nabmi cu nu lo .abu fagycpi ba'o klama lo drata fanmo be lo purdi gi'e bu'u fliba troci ga'a la .alis. lo nu volkla lo tricu

ni'o ca lo nu .abu lo fagycpi ba'o kavbu gi'e xrugau kei ge lo nundamba cu mulno gi lo re jesymabru na se viska .i «lu ku'i na vajni mutce —sei la .alis. cu pensi— .i ro lo dargu cu canci lo vi mlana be lo foldi li'u» .i .abu punji fy lo cnita be lo .abu birka ja'e lo nu na ka'e za'u re'u cliva kei gi'e xruti lo nu jmina tavla lo pendo

ni'o .abu ca lo nu ba'o xruti tu'a la tcicymlatu cu se spaji lo nu facki lo du'u lo prenu so'i mei ba'o jmaji lo sruri be ty .i da'arsi'u fa lo selmi'ecatra jo'u la noltrunau jo'u la noltruni'u vu'o noi ro ke'a cu tavla ca lo mintu ca lo nu ro drata cu smaji mutce gi'e tolkufra simlu

ni'o la .alis. ca lo nu tolcliva cu te cpedu lo nu jdice lo cuntu kei ro lo ci mei .i ku'i .abu ki'u lo nu ro ri tavla ca lo mintu cu mutce lo ka se nandu lo nu jimpe lo du'u ma kau se cusku

alis-1book30.jpg

ni'o lo seldau be lo selmi'ecatra zo'u: na ka'e katna vimcu lo stedu se cau lo nu da poi xadni zo'u: ka'e katna vimcu lo stedu da .i sy no roi pu zukte lo simsa .i .ai na co'a go'i ca lo sy ca nunjmive pagbu

ni'o lo seldau be la noltrunau zo'u: ro da poi ke'a se stedu zo'u: da ka'e se sedycaugau .i .ei na cusku lo nonselsmu

ni'o lo seldau be la noltruni'u zo'u: ga da se zukte sera'a lo cuntu zi lo mleca be lo temci pi no si'e gi ny ba minde fi lo nu ro de se catra (to lo ro moi pinka cu rinka lo nu pi ro lo kansi'u cu simlu lo ka mutce lo ka junri je xanka toi)

ni'o la .alis. na ka'e pensi lo nu cusku na'e bo «lu ta se ponse la noltroni'u .i .e'u preti ta ko ba'e ny li'u»

ni'o «lu ny pinfu —sei la noltruni'u fi lo selmi'ecatra cu cusku— .i ko ny ti klagau li'u» .i lo selmi'ecatra cu klama tai tu'a lo danti

ni'o lo stedu be la mlatu co'a kadze'a ca lo nu sy cliva kei gi'e ba'o mu'o canci ca lo nu sy xruti co kansa la noltroni'u .i se ki'u bo la noltrunau .e lo selmi'ecatra cu cilce bajra gi'e sisku my ca lo nu lo drata cu di'a kelci ni'o ni'o so mo'o

lisri fi la jitfa cakyrespa

ni'o «lu do na ka'e pensi lo nu se la'u ma kau mi gleki lo nu mi do za'u re'u viska doi dirba slabu —sei la noltroni'u cu cusku— li'u» .i ny xendo tagygau lo ny birka lo me la .alis. moi .i ny jo'u .abu kansi'u lo nu cadzu cliva

ni'o la .alis. cu mutce gleki lo nu zgana lo nu ny pluka tarti .i .abu pensi lo du'u ju'o cu'i lo cpinytsapi cu rinka lo nu ny cilce ca lo nu .abu penmi ny lo jupku'a

ni'o «lu ca lo nu ba'e mi noltroni'u kei —sei .abu (to se pi'o nai ku'i lo pacna mutce tonga toi) sezysku— no sai cpinytsapi ba zvati lo mi jupku'a .i lo stasu cu xamgu se cau ku .i cumki fa lo nu ro roi ku lo cpinytsapi cu rinka lo nu lo prenu cu cpina tarti —sei .abu mutce se pluka be lo nu facki lo cnino javni— .i lo sarvanju cu rinka lo nu py slari tarti .i lo spatrkamomili cu rinka lo nu py kurki tarti .i .y .i lo bavmi sakta .e lo simsa cu rinka lo nu lo verba cu titla tarti .i .au lo prenu cu djuno la'e ba'e di'u ja'e lo nu py na mobdu'a ra li'u»

ni'o ca ku .abu nalmo'i fi la noltroni'u gi'e milxe se spaji ca lo nu tirna lo ny voksa noi jibni lo .abu kerlo .i «lu do da pensi doi dirba .i la'e di'u rinka lo nu do tolmo'i lo nu .ei tavla .i mi na ka'e ca cusku lo se du'u la'e di'u ma kau madni'i .i ku'i mi ba zi morji li'u»

ni'o «lu ju'o cu'i madni'i no da —sei la .alis. cu darsi te pinka— li'u»

ni'o «lu .e'i doi verba —sei la noltroni'u cu cusku— ro da de madni'i .i sarcu fa lo nu facki li'u» .i ny la'irze'a la .alis. ca lo nu tavla

ni'o la .alis. na mutce nelci lo nu tai jibni ny ge pa mai ki'u lo nu la noltroni'u cu mutce lo ka tolmelbi gi re mai ki'u lo nu ny satci ke galtu mapti lo nu vregau lo firji'o lo .abu janco .i se tolkufra kinli firji'o .i ku'i .abu na nelci lo nu tolclite .i se ki'u bo .abu renvi se rai lo ka se kakne

ni'o «lu lo nunkei ca'o xagze'a —sei .abu se ta'i lo nu stogau lo nunsnu cu cusku— li'u»

ni'o «lu ie go'i —sei la noltroni'u cu cusku— .i la'e di'u madni'i la'e «lu .u'e nu prami .i lo nu prami cu rinka lo nu lo munje cu carna li'u» li'u»

ni'o «lu ti'e rinka —sei la .alis. cu lauble cusku— fa lo nu ro da jundi lo cuntu be da li'u»

ni'o «lu .i'a .a'u nai mintu fi lo ka smuni —sei la noltroni'u noi ca'ergau lo kinli je cmalu firji'o lo janco be la .alis. cu cusku— .i la'e di'u madni'i la'e «lu ko kurji lo smuni .i se va'o bo lo sance cu kurji vo'a li'u» li'u»

ni'o «lu ua ti nelci lo nu facki lo du'u ro da ma kau madni'i —sei la .alis. cu pensi— li'u»

ni'o «lu ju'o do pensi sezretsku lo se du'u ma kau krinu lo nu mi na srupunji lo mi birka lo do xadmidju —sei ba lo nundenpa la noltroni'u cu cusku— .i krinu fa lo nu mi na'e lacri lo do fagycpi lo nu tarti .i .e'u pei mi troci lo nu cipra li'u»

ni'o «lu cumki fa lo nu fy batci —sei la .alis. noi na sai xankydji lo nu troci lo nu cipra cu spuda— li'u»

ni'o «lu je'u sai —sei la noltroni'u cu cusku— ge lo fagycpi gi lo sansrmustardo cu batci .i la'e di'u madni'i la'e «lu lo cipni poi pimdu'i ckaji cu ro roi jmaji li'u» li'u»

ni'o «lu ku'i lo sansrmustardo na cipni —sei la .alis. cu te pinka— li'u»

ni'o «lu drani ue cu'i —sei la noltroni'u cu cusku— .i .i'o lo nu do cusku cu klina lo nu jimpe li'u»

alis-1book31.jpg

ni'o «lu sy kunra ba'e pe'i —sei la .alis. cu cusku— li'u»

ni'o «lu li'a go'i —sei la noltroni'u noi simlu lo ka bredi lo nu tugni la .alis. ro da cu cusku— .i lo barda ke sansrmustardo terkunra vi jibni .i la'e di'u madni'i la'e «lu lo nu lo me mi moi cu zenba cu panra lo nu lo me do moi cu jdika li'u» li'u»

ni'o «lu ua ka'u —sei la .alis. noi na jundi lo ro moi pinka cu krisku— .i sy stagi .i sy lo ka go'i cu na simlu gi'e ku'i ja'a ckaji li'u»

ni'o «lu mi do ja'a sai tugni —sei la noltroni'u cu cusku— .i la'e di'u madni'i la'e «lu ko ckaji lo se simlu be do li'u» .i va'i sa'u «lu ko no roi se xanri lo nu do na ckaji na'e bo da poi do simlu fi lo drata fe lo ka de poi do ca'a ja nu'o ckaji ke'a na drata di poi do simlu ke'a lo drata lo drata li'u» li'u»

ni'o «lu pe'i mi ka'e xagmau jimpe la'e di'u —sei la .alis. cu clite mutce cusku— va'o lo nu ciska .i ku'i mi na ka'e jimpe ca lo nu do cusku li'u»

ni'o «lu di'u no va'e ci'u lo mi ka'e se cusku be va'o lo nu mi cuxna —sei la noltroni'u cu se pluka tonga spuda— li'u»

ni'o «lu .e'o ko ko na raktu lo nu cusku se pi'o lo clamau —sei la .alis. cu cusku— li'u»

ni'o «lu .o'a na raktu —sei la noltroni'u cu cusku— .i mi dunda ro ca ba'o se cusku be mi do li'u»

ni'o «lu tolkargu seldunda —sei la .alis. cu pensi— .i mi gleki lo nu na ta'e tai dunda ca lo jbedetri te salci li'u» .i ku'i .abu na darsi lo nu cladu cusku

ni'o «lu xu za'u re'u pensi —sei la noltroni'u ca lo nu za'u re'u ca'ergau lo kinli je cmalu firji'o cu te preti— li'u»

ni'o «lu mi zifre lo nu pensi —sei la .alis. noi co'a xanka cu kinli cusku— li'u»

ni'o «lu du'i lo nu zifre —sei la noltroni'u cu cusku— fa lo xarju lo nu vofli .i la'e di'u madni'i .y li'u»

ni'o ca ku la .alis. cu mutce se spaji lo nu lo voksa be la noltroni'u cu canci ca ji'a sai lo midju be lo ny se nelrai valsi no'u zo madni'i .i lo birka poi jorne lo .abu birka cu co'a desku .i la .alis. cu catlu .i la noltruni'u cu ca'u sanli .i ny se polje se birka gi'e lindi vilti'a simsa frumu

ni'o «lu xamgu donri doi nolba'i —sei la noltroni'u co'a cmato'a je ruble voksa cusku— li'u»

ni'o «lu .o'i pa'e —sei la noltruni'u ca lo nu darxi lo loldi lo jamfu cu krixa— do .a lo stedu be do cu .ei se vimcu .i go'i ze'i pi mu lo no temci .i ko cuxna li'u»

ni'o la noltroni'u cu cuxna gi'e zi ba'o cliva

ni'o «lu .e'u mi'o di'a kelci —sei la noltruni'u fi la .alis. cu cusku— li'u» .i la .alis. cu dukse lo ka terpa kei gi'e cusku no valsi gi'e ku'i masno jersi ny fa'a lo kelcrkroke foldi

ni'o lo nu surla bu'u lo ctino cu prali lo drata vitke lo nu la noltruni'u cu nalzvati .i ku'i vy ca lo nu viska ny cu zi sutra lo nu xruti lo nu kelci .i la noltruni'u cu te pinka fi lo po'o du'u lo mokca nunlerci cu se jdima lo vy nunjmive

ni'o ze'a pi ro lo nunkei la noltruni'u no roi de'a damba lo drata kelci gi'e no roi de'a krixa «lu ko lo stedu ta vimcu li'u» .a «lu ko lo stedu tu vimcu li'u» .i lo se dapma be ny cu se pifygau lo sonci noi li'a de'a bargu .i ba za lo cacra be li ji'i pi mu ge no bargu cu zvati gi ro lo kelci po'u na'e bo la noltrunau .a la noltruni'u .a la .alis. cu pinfu gi'e se dapma fi lo nu se selmi'ecatra .i ba bo la noltruni'u cu tatpi cliva gi'e cusku fi la .alis. fe «lu xu do pu viska la jitfa cakyrespa li'u»

ni'o «lu na go'i —sei la .alis. cu cusku— .i mi na djuno ji'a sai lo du'u ma kau jitfa cakyrespa li'u»

ni'o «lu te zbasu lo jitfa cakyrespa bo stasu —sei la noltruni'u cu cusku— li'u»

ni'o «lu mi pu no roi ga viska cy gi se tavla fi cy —sei la .alis. cu cusku— li'u»

ni'o «lu .e'e mi'o klama —sei la noltruni'u cu cusku— .i ba lisri cy ri do li'u»

ni'o la .alis. ca lo nu cliva cadzu cu tirna lo nu la noltrunau cu lauble voksa cusku fi lo zvati fe «lu ca'e ro do se fraxu li'u» .i «lu ri'e la'e ba'e di'u xamgu —sei .abu sezysku— .i .abu pu cinmo lo nu tolgei lo nu la noltruni'u cu minde xo kau nuncatra

alis-1book32.jpg

ni'o ba zi ku penmi la cpicinfo noi sipna mutce vreta lo se solgu'i (to .e'u ko va'o lo nu na djuno lo du'u ma kau cpicinfo cu catlu lo pixra toi) .i «lu ko sanli doi lazni —sei la noltruni'u cu cusku— .i ko klagau lo vi citno ninmu lo nu viska la jitfa cakyrespa gi'e tirna lo cy lisri .i .ei mi xruti gi'e jitro so'o nuncatra noi mi pu minde li'u» .i ny cadzu cliva la .alis. noi stali la cpicinfo .i la .alis. na mutce lo ka nelci lo jvinu be lo vi danlu .i ku'i .abu pensi lo du'u se snura dunli fa lo nu stali cy kei lo nu jersi lo cilce noltruni'u .i se ki'u bo .abu denpa

ni'o la cpicinfo cu tsebi'o gi'e mosra lo kanla gi'e ba bo catlu la noltruni'u co'u lo nu ny na ka'e se viska kei gi'e ba bo cmila .i «lu zdile —sei la cpicinfo cu cusku— se'i se'i nai li'u»

ni'o «lu ba'e ma zdile —sei la .alis. cu cusku— li'u»

ni'o «lu ue ba'e tu —sei la cpicinfo cu cusku— .i ro da tu xanri .i ju'o no roi selmi'ecatra da .i .ei klama li'u»

ni'o «lu ro da bu'u cusku zo .ei —sei la .alis. ca lo nu masno jersi cy cu pensi— .i mi pu tai se minde no roi lo mi nunji'e li'u»

ni'o lo re mei pu lo nu ve'u klama cu viska la jitfa cakyrespa noi zu badri je nonkansa zutse lo cmalu ke rokci ctebi .i la .alis. ca lo nu jbize'a cu tirna lo nu jycy vruva'u tai lo nu mutce badri .i .abu carmi lo ka kecti jycy .i «lu tu ma badri —sei .abu fi la cpicinfo cu retsku— li'u» .i la cpicinfo cu spuda se pi'o lo valsi poi jibni mintu lo pu valsi ku'o «lu ro da tu xanri .i ju'o tu node badri .i .ei klama li'u»

ni'o lo re mei cu klama la jitfa cakyrespa noi catlu se pi'o lo barda je selkakclu kanla gi'e ku'i cusku no da

ni'o «lu lo vi citno ninmu zo'u: —sei la cpicinfo cu cusku— ti djica lo nu djuno fi lo do lisri .i go'i li'u»

ni'o «lu mi ta ly tavla —sei la jitfa cakyrespa cu condi je kunti tonga cusku— .i .e'u lo re do tsebi'o gi'e nai cusku lo valsi pu lo nu mi mo'u co'e li'u»

ni'o lo re mei cu tsebi'o .i no da tavla ze'a lo mentu be li so'o .i la .alis. cu pensi «lu mi na jimpe lo du'u ta ka'e mo'u co'e ta'i ma kau va'o lo nu ta na co'a co'e li'u» gi'e ku'i tolxanka denpa

ni'o «lu pu ku —sei la jitfa cakyrespa cu condi vruva'u cusku— mi jetnu cakyrespa li'u»

alis-1book33.jpg

ni'o lo di'u valsi cu se jersi lo nu ze'u smaji noi zunti ke'a fa po'o lo ru'i nai me zo xyjyckryrx se krixa be la cpicinfo be'o .e lo ru'i tilju nunvruva'u be la jitfa cakyrespa .i la .alis. pu'o sa'irbi'o je cusku «lu ki'e doi prenu mi do ckire lo do cinri lisri li'u» gi'e ku'i na ka'e rivbi lo nu pensi lo du'u .ei da ji'a jersi .i se ki'u bo .abu smaji zutse gi'e cusku no da

ni'o «lu ca lo nu mi'a cmalu —sei la jitfa cakyrespa noi ca surla zenba gi'e ku'i ru'i nai za'o milxe vruva'u cu di'a cusku— mi'a ve ckule lo xamsi .i lo ralju cu junri je tolcitno cakyrespa gi'e se cmene «lu ractu cafmi'a li'u» mi'a li'u»

ni'o «lu ki'u ma do'o te cmene ra «lu ractu cafmi'a li'u» va'o lo nu ra ge nai ractu gi nai cafmi'a —sei la .alis. cu te preti— li'u»

ni'o «lu mi'a te cmene ra «lu ractu cafmi'a li'u» ki'u lo nu ra ctuca mi'a —sei la jitfa cakyrespa cu fengu cusku— .i je'u do bebna mutce li'u»

ni'o «lu .ei do ckeji lo nu cusku lo tai sampu preti —sei la cpicinfo cu jmina cusku— li'u» .i ba bo lo re mei cu smaji zutse gi'e catlu la .alis. uu noi cinmo lo nu bredi lo nu se tunlo lo terdi .i ba zu bo la cpicinfo cu cusku fi la jitfa cakyrespa fe «lu .e'e doi slabu ko na co'e ze'a pi ro lo donri li'u» .i jycy di'a cusku di'e

ni'o «lu ke'u mi'a te ckule lo xamsi .i ju do la'e di'u na krici li'u»

ni'o «lu mi no roi cusku lo se du'u mi na krici —sei la .alis. cu zunti— li'u»

ni'o «lu do ja'a go'i —sei la jitfa cakyrespa cu cusku— li'u»

ni'o «lu ko ri'urgau lo tance —sei la cpicinfo pu lo nu la .alis. ka'e za'u re'u tavla cu jmina cusku— li'u» .i la jitfa cakyrespa cu di'a co'e

ni'o «lu mi'a cilre fu lo xagrai .i je'u mi'a zvati lo ckule ca ro donri li'u»

ni'o «lu mi ji'a zvati lo donri ckule —sei la .alis. cu cusku— .i .ei do na tai jgira li'u»

ni'o «lu xu do se ctuca fo lo seljmina tercli —sei la jitfa cakyrespa cu xanka milxe retsku— li'u»

ni'o «lu go'i —sei la .alis. cu cusku— .i mi'a cilre fi lo fasybau .e lo zgike li'u»

ni'o «lu xu go'i fi lo nu lumci —sei la cakyrespa cu cusku— li'u»

ni'o «lu li'a na go'i —sei la .alis. cu fengu cusku— li'u»

ni'o «lu ua lo me do moi na mutce lo ka xamgu ckule —sei la jitfa cakyrespa cu surbi'o mutce tonga cusku— .i lo dejnoi be fi lo me mi'a moi cu se fanmo «lu lo fasybau .e lo zgike ba'e .e lo nu lumci cu seljmina li'u» li'u»

ni'o «lu do na mutce lo ka nitcu ly —sei la .alis. cu cusku— va'o lo nu xabju lo xamsi loldi li'u»

ni'o «lu mi na kakne lo nu pleji —sei la jitfa cakyrespa cu vruva'u cusku— .i mi cilre lo fadni po'o li'u»

ni'o «lu ri mo —sei la .alis. cu retsku— li'u»

ni'o «lu li'a pa mai nu ctidu'e gi'e ci'iska —sei la jitfa cakyrespa cu spuda— .i re mai lo vo pagbu be lo nacycmaci be'o no'u lo nu jmina'e .e lo nu vimcu'a .e lo nu pilji'e .e lo nu fende'a li'u»

ni'o «lu mi na jimpe fi zo jmina'e —sei la .alis. cu cusku darsi— .i ki'a li'u»

ni'o la cpicinfo cu spaji lafti lo re xance .i «lu ue pau nai xu na jimpe fi zo jmina'e —sei cy ki'asku— .i ru'a je'u pei do jimpe fi zo natfe li'u»

ni'o «lu go'i —sei la .alis. cu senpi cusku— .i lo du'u da de natfe cu se smuni lo du'u da .o nai de ka'e jetnu li'u»

ni'o «lu ja'o —sei la cpicinfo di'a cusku— do natfe jimpe .i do ja'a bebna va'o lo nu do na jimpe natfe jimpe li'u»

ni'o la .alis. na darsi lo nu za'u re'u te preti la'e di'u .i .abu fa'a la jitfa cakyrespa cu cusku «lu do cilre fi ma ji'a li'u»

ni'o «lu lo cridyske —sei la jitfa cakyrespa noi kancu lo seltadni se pi'o lo limna'i cu cusku— .i lo cridyske no'u lo prutce jo'u lo cabna ge'u .e lo xasyske .i ji'a lo nu pixra'i zo'u: lo pixra'i ctuca cu tolci'o sincyfi'e noi zvati pa roi ro jeftu .i ba'e ra ctuca fo lo nu pixra'i gi'e grasu'u cintai finti li'u»

ni'o «lu .a'u la'e di'u mo —sei la .alis. cu cusku— li'u»

ni'o «lu ba'e mi na ka'e jarco —sei la jitfa cakyrespa cu cusku— .i mi dukse lo ka tinsa .i ji'a la cpicinfo no roi cilre li'u»

ni'o «lu claxu lo temci —sei la cpicinfo cu cusku— .i mi zvati lo dzeklu ctuca .i ri tolci'o cakyjukni .i ba'e ri go'i li'u»

ni'o «lu mi ri no roi zvati —sei la jitfa cakyrespa cu vruva'u cusku— .i ri ctuca fo ti'e lo clacmo jo'u lo geisto li'u»

ni'o «lu go'i .i go'i —sei la cpicinfo noi ji'a vruva'u cu cusku— li'u» .i lo re danlu cu gairgau lo vo'a xance lo vo'a flira

ni'o «lu pau do cilre ca ro donri ze'a lo cacra be li xo —sei la .alis. noi djica lo nu sutra galfi lo selsnu cu cusku— li'u»

ni'o «lu ze'a lo cacra be li pa re ca lo pa moi donri .e lo re moi donri —sei la jitfa cakyrespa cu cusku— .i li so ca lo ci moi .e lo vo moi .i li xa ca lo mu moi .e lo xa moi .i si'a li'o li'u»

ni'o «lu cinri selpla —sei la .alis. cu ki'asku— li'u»

ni'o «lu la'e di'u krinu lo nu zo cilre cu cmene .i jdika lo ka temci kei lo cacra be li ba'e ci ca ro djedi be li ba'e re li'u»

ni'o lo sidbo cu mutce cnino la .alis. .i .abu ze'a pensi pu lo nu te pinka fi «lu ja'o je'u pei ca lo so moi donri .e lo pa no moi donri cu zifre li'u»

ni'o «lu je'u li'a go'i —sei la jitfa cakyrespa cu cusku— li'u»

ni'o «lu mo ca lo pa pa moi donri —sei la .alis. di'a kucli cusku— li'u»

ni'o «lu la'e di'u banzu sera'a lo nu ckule —sei la cpicinfo cu jditce tonga zunti— .i ca ku ko ti tavla lo nu kelci li'u» ni'o ni'o pa no mo'o

xasyjukni vonseldansu

ni'o la jitfa cakyrespa cu condi vruva'u gi'e mosra lo trixe be pa lo limna'i lo kanla gi'e catlu la .alis. gi'e troci lo nu tavla .i ku'i ze'a lo mentu be li ji'i re lo nu vruva'u cu dicra lo voksa .i «lu mintu lo nu lo bongu cu zunti lo galxe —sei la cpicinfo cu cusku— li'u» .i cy co'a gunka lo nu desygau gi'e darxi fo lo trixe .i ba za bo la jitfa cakyrespa cu xruti lo ka se voksa kei gi'e di'a selklaku flira cusku -

ni'o «lu ju'o cu'i do na ze'u xabju lo xamsi cnita (to sa'a «lu mi na go'i —sei la .alis. cu cusku— li'u» toi) .i ju'o cu'i do no roi penmi lo xasyjukni (to sa'a la .alis. co'a cusku «lu mi pa roi vu'irga'e li'u» gi'e ku'i sutra sezydicra gi'e cusku «lu no roi go'i li'u» toi) .i se ki'u bo do na ka'e se xanri lo nu lo xasyjukni vonseldansu cu mo kau kukte li'u»

ni'o «lu ie na go'i —sei la .alis. cu cusku— .i ri mo seldansu li'u»

alis-1book34.jpg

ni'o «lu ta'a do'u —sei la cpicinfo cu cusku— .i pa mai lo dansu pa da se linji pa'a lo xamsi korbi - li'u»

ni'o «lu ba'e re da —sei la jitfa cakyrespa cu krixa— .i lo pinpedi ce'o lo cakyrespa ce'o lo salmone ce'o zo'e si'a li'o .i ba bo ba lo nu mo'u vimcu ro mivjdu lo jvinu - li'u»

ni'o «lu la'e di'u ta'e ze'u co'e —sei la cpicinfo cu zunti— li'u»

ni'o «lu .e'e re roi crakla li'u»

ni'o «lu ro da kansa lo xasyjukni —sei la cpicinfo cu krixa— li'u»

ni'o «lu li'a —sei la jitfa cakyrespa cu cusku— .i .e'e re roi crakla .i .e'e penmi lo kansa li'u»

ni'o «lu .e'e cajysi'u lo xasyjukni .i .e'e xruti po'i lo mintu —sei la cpicinfo cu di'a co'e— li'u»

ni'o «lu baku ju'i do'u —sei la jitfa cakyrespa di'a cusku— .i .e'e renro li'u»

ni'o «lu fe lo xasyjukni —sei la cpicinfo noi plipe lo vacri cu krixa— li'u»

ni'o «lu fi lo xamsi se rai lo selka'e ka darno li'u»

ni'o «lu .e'e limna jersi lo xasyjukni —sei la cpicinfo cu krixa— li'u»

ni'o «lu .e'e pipcarna ne'i lo xamsi —sei la jitfa cakyrespa cu krixa— li'u»

ni'o «lu .e'e za'u re'u cajysi'u lo xasyjukni —sei la cpicinfo cu voksa cladu traji krixa— li'u»

ni'o «lu .e'e xruti lo tumla .i mo'u pa moi morna —sei la jitfa cakyrespa noi suksa jdikygau lo voksa cu cusku— li'u» .i lo re danlu noi pu ru'u plipe ze'a la'e di'u tai lo nu fenki cu badri je smaji tsebi'o gi'e catlu la .alis.

ni'o «lu ju'o da'i melbi seldansu —sei la .alis. cu toldarsi cusku— li'u»

ni'o «lu .a'u pei do viska lo mupli —sei la jitfa cakyrespa cu cusku— li'u»

ni'o «lu .a'u sai go'i —sei la .alis. cu cusku— li'u»

ni'o «lu .e'e mi'o troci lo nu pa moi morna —sei la jitfa cakyrespa fi la cpicinfo cu cusku— .i mi'o se'a kakne se cau lo xasyjukni .i ma sanga li'u»

ni'o «lu .i'e ba'e do go'i —sei la cpicinfo cu cusku— .i mi tolmorji lo valsi li'u»

ni'o co'a junri dansu ru'u la .alis. .i ru'i nai stapa lo .abu jmadegji ca lo nu dukse jbikla .i sligau lo xance te zu'e lo nu sinxa lo rilti .i ze'a bo la jitfa cakyrespa cu masno je badri mutce sanga «lu.e'o sutra doi cakcurnu .i ko ti'a zgana ua paxajyfi'e noi jbitrixe gi'e me mi rebla stapa

.i ui .a'a ro lo jukni .e lo respa ca se gansegi'e denpa mi lo canre .i pei do ba kansa dansu

.i .ai pei nai pei .ai pei nai pei .ai pei do ba dansu.i .ai pei nai pei .ai pei nai pei nai pei do ba dansu

.i do na ka'e se xanri lo nu pluka co mo kauca lo nu mi'o se renro fi lo xamsi .i'a .au

.i dardukse .i dardukse —sei cy spuda tolselmansa—doi merlanu ki'e ku'i .i mi na ba kansa dansu

.i .ai nai .ei nai .ai nai .ei nai .ai nai mi ba dansu.i .ai nai .ei nai .ai nai .ei nai .ei nai mi ba dansu

.i na selvai lo ni darno —sei lo pendo ze'i frati—.i ia sai lo drata korbi ca'a drata mlana zvati

.i lo ni darno lo glico cu ni jibni be la .frans..i ko virnu doi cakcurnu .i .ei do ba kansa dansu

.i .ai pei nai pei .ai pei nai pei .ai pei do ba dansu.i .ai pei nai pei .ai pei nai pei nai pei do ba dansuli'u»

ni'o «lu ki'e .i lo nu dansu zo'u: mutce cinri fa lo nu catlu —sei la .alis. noi mutce gleki lo nu uo mulno cu cusku— .i mi ja'a sai nelci lo cinri selsanga be sera'a lo merlanu li'u»

ni'o «lu .a'a lo merlanu zo'u: —sei la jitfa cakyrespa cu cusku— do my pu ca'a viska li'a pei li'u»

ni'o «lu go'i —sei la .alis. cu cusku— .i mi my so'i roi viska lo sairpaln- —sei .abu sutra sezydicra— li'u»

ni'o «lu mi na djuno lo du'u ma kau stuzi la .sairpaln. —sei la jitfa cakyrespa cu cusku— .i ku'i do va'o lo nu tai so'i roi viska my cu se slabu li'a lo nu ma kau my jvinu li'u»

ni'o «lu ia —sei la .alis. cu pensi spuda— lo my rebla cu nenri lo my moklu .i my cpana lo nabyspi li'u»

ni'o «lu do srera tu'a lo nabyspi —sei la jitfa cakyrespa cu cusku— .i lo nabyspi cu se jisybi'o va'o lo nu jinru lo xamsi .i ku'i lo my rebla ja'a nenri lo my moklu .i krinu la'e di'u fa - —sei ca ku la jitfa cakyrespa cu sipfru ke kanla ga'orgau— .i ko ta tavla lo krinu .e ro srana —sei fi la cpicinfo cu cusku— li'u»

ni'o «lu krinu —sei la cpicinfo cu cusku— fa lo nu my ba'e ja'a kansa lo xasyjukni lo nu dansu .i se ki'u bo my se renro fi lo xamsi .i se ki'u bo my farlu lo darno .i se ki'u bo my carmi setca lo rebla lo moklu .i se ki'u bo my na ka'e tolsetca .i uo li'u»

ni'o «lu ki'e —sei la .alis. cu cusku— .i cinri mutce .i mi pu no roi djuno lo tai mutce lo merlanu li'u»

ni'o «lu do'a mi do ka'e tavla lo se jmina —sei la cpicinfo cu cusku— .i xu do djuno lo du'u ma kau krinu lo nu zo labyfi'e cmene lo merlanu li'u»

ni'o «lu mi la'e di'u no roi pensi —sei la .alis. cu cusku— .i ma krinu li'u»

ni'o «lu my kurji lo jufra .e lo selsku —sei la cpicinfo cu junri spuda— li'u»

ni'o la .alis. cu mulno lo ka se cfipu .i «lu ua nai kurji lo jufra .e lo selsku —sei .abu preti tonga rapsku— li'u»

ni'o «lu .a'a do ma pilno lo nu kurji lo do selsku —sei la cpicinfo cu cusku— .i va'i ma cipra lo ka gendra li'u»

ni'o la .alis. ze'a pensi pu lo nu danfu .i «lu la jbofi'e cu go'i pe'i li'u»

ni'o «lu ie la lobyfi'e va'i nai .i lo gendra ni'a lo xamsi —sei la cpicinfo cu di'a condi voksa cusku— cu se cipra lo labyfi'e .i ka'udai li'u»

ni'o «lu mi va'o lo nu da'i mi merlanu cu cusku —sei la .alis. noi za'o pensi lo selsanga cu cusku— fi lo xajyfi'e fe «lu fi'i nai do'u .e'o darsta .i mi'a na djica lo nu do mi'a kansa li'u» li'u»

ni'o «lu bilga lo nu xy kansa —sei la jitfa cakyrespa cu cusku— .i no clite finpe cu rivbi lo xajyfi'e li'u»

ni'o «lu ue je'u pei —sei la .alis. cu spaji mutce tonga cusku— li'u»

ni'o «lu li'a go'i —sei la jitfa cakyrespa cu cusku— .i mu'a mi va'o lo nu lo finpe cu te preti cu cusku «lu do ma friti lo do xajyfi'e li'u» li'u»

ni'o «lu xu do skudji zo xasyvi'e —sei la .alis. cu cusku— li'u»

ni'o «lu mi skudji lo se cusku be mi —sei la jitfa cakyrespa cu jgicro tonga spuda— li'u» .i la cpicinfo cu minsku «lu .e'e do mi'a tavla su'o lo do selfri li'u»

ni'o «lu mi do ka'e tavla lo mi selfri pe co'a lo zi cerni —sei la .alis. cu toldarsi milxe cusku— .i ku'i na prali fi lo nu peixru lo purlamdei .i ki'u bo mi drata prenu ca py li'u»

ni'o «lu ko ciksi pi ro la'e di'u —sei la jitfa cakyrespa cu cusku— li'u»

ni'o «lu .o'o nai na go'i .i pa mai lo selfri —sei la cpicinfo cu sutydji tonga cusku— .i lo velcki cu ze'u .oi co'e li'u»

ni'o la .alis. co'a tavla fi lo .abu selfri pe co'a lo nu pa re'u viska la blabi ractu .i .abu milxe lo ka xanka la'e di'u kei ca lo cfari .i lo re danlu .abu mutce jibni gi'e mlana .i dy ganra mutce kargau lo kanla .e lo moklu .i ku'i .abu zenba lo ka darsi ca lo nu ca'o co'e .i lo tirna cu prane smaji co'u lo nu .abu tolyli'a lo pagbu pe sera'a lo nu .abu sitsku «lu do tolcitno doi .paf.uiliam. li'u» la ciftoldi fau lo nu lo valsi cu ficybi'o .i ca ku la jitfa cakyrespa cu ze'u sakyva'u gi'e cusku «lu la'e di'u mutce lo ka cizra li'u»

ni'o «lu traji lo ka cizra kei fo lo cizra —sei la cpicinfo cu cusku— li'u»

ni'o «lu ro da fricybi'o —sei la jitfa cakyrespa re re'u pensi cusku— .i mi djica lo nu tirna lo nu ta ca troci lo nu sitsku da .i ko ta skumi'e lo nu co'a co'e li'u» .i jycy catlu la cpicinfo tai lo nu jinvi lo du'u cy catni la .alis.

ni'o «lu ko sa'irbi'o gi'e sitsku «lu lazni se voksa li'u» —sei la cpicinfo cu cusku— li'u»

ni'o «lu ue lo danlu cu mutce minde gi'e gasnu lo nu sitsku lo selcli —sei la .alis. cu pensi— .i dunli lo nu mi ve ckule li'u» .i ku'i .abu sa'irbi'o gi'e co'a sitsku .i ku'i lo .abu menli cu culno lo xasyjukni vonseldansu ja'e lo nu .abu ja'a ru'e djuno lo du'u .abu cusku ma kau .i lo valsi ca'a cizra mutce barkla .i «lu

xasyjukni se voksa .i cusku ia ti'e«lu do mi za'o jukpa .i .ei gau kresi'e

li'u» gi'e zbipilno lo nu vo'a cnicilo ka dasri joi batke .e ro si'a vrici

alis-1book35.jpg

.i ca lo nu lo canre cu sudga cu cmilagi'e tavla co ckasu brafi'e se cfila

.i ii ku'i ca lo nu lo xamsi cu banrokei lo voksa cu binxo lo sance tolkanro

li'u»

ni'o «lu di'u frica lo ta'e se cusku be mi bei ca lo nu mi verba —sei la cpicinfo cu cusku— li'u»

ni'o «lu ju'a mi di'u pu no roi tirna —sei la jitfa cakyrespa cu cusku— .i ku'i simlu lo ka nalfadni nonselsmu li'u»

ni'o la .alis. no da cusku .i .abu ca'o zutse (to lo flira cu se sarji lo xance toi) gi'e kucli lo du'u xu kau ca de ba za'u re'u rarna fasnu

ni'o «lu mi djica lo nu ciksi fi mi —sei la jitfa cakyrespa cu cusku— li'u»

ni'o «lu ti na ka'e ciksi —sei la cpicinfo cu sutra cusku— .i .e'e di'a co'e lo jersi pempau li'u»

ni'o «lu ku'i lo batke xu —sei la jitfa cakyrespa cu za'o co'e— .i ta'i ba'e ma pilno lo nazbi lo nu cnici li'u»

ni'o «lu pa moi be lo nundansu stapa —sei la .alis. cu cusku— li'u» .i ku'i .abu mutce se cfipu pi ro lo cuntu gi'e djica lo nu lo selsnu cu cenba

ni'o «lu .e'e di'a co'e lo jersi pempau —sei la cpicinfo re re'u naldenpa cusku— .i co'a co'e «lu mi pagre lo purdi li'u» li'u»

ni'o la .alis. na darsi lo nu na tinbe .i .abu birti lo du'u ba srera barkla gi'e di'a desku voksa cusku «lu

mi pagre lo purdi .i .i'e se funjdi.i lo ctecpi lo tirxu vi kansa lo nuncti

.i ty lo se snuji .e ia lo te snujicu citka ca lo nu cy cpacu lo smuci

.i ba lo nu mulno uo kei cy te dundalo palta noi ke'a cy ka'e se tunta

.i ca lo nuncabna lo tirxu cu brejbilo nu pilno lo dakfu –

li'u»

ni'o «lu ma prali fi lo nu sitsku ro di'u —sei la jitfa cakyrespa cu zunti— va'o lo nu do na ca'o ciksi .i traji lo ka cfipu kei fo lo mi se tirna li'u»

ni'o «lu go'i .i pe'i .ei sisti —sei la cpicinfo cu cusku— li'u» .i la .alis. cu mutce lo ka gleki lo nu tai zukte

ni'o «lu .e'u pei mi'a troci lo drata nu morna fi lo xasyjukni vonseldansu —sei la cpicinfo cu di'a cusku— .i ji .au pei la jitfa cakyrespa cu sanga da do li'u»

ni'o «lu .a'e .e'o sanga pe'u doi jitfa cakyrespa —sei la .alis. cu spuda— li'u» .i lo nu .abu tai sutra spuda cu rinka lo nu la cpicinfo cu cusku se pi'o lo jgicro tonga «lu .i'a na ka'e jimpe lo nu ma kau pluka .i ko sanga «lu cakyrespa stasu li'u» ta vau .ai pei doi slabu li'u»

ni'o la jitfa cakyrespa cu condi vruva'u gi'e co'a sanga di'e se pi'o lo voksa noi so'o roi dicra .i «lu melbi bo stasu ricfu je crino

denpa fi lo vaurcnino

.i pronalka'e kukselzbasu

stasu co vanci melbi bo stasu

stasu co vanci melbi bo stasume–elbi bo sta–asume–elbi bo sta–asu

sta–asu co va–a–ancimelbi bo melbi bo stasu

melbi bo stasu .i ro da kecti

lo re'ucti ja fi'ecti

.i no da xanka lo nu ckasu

da lo nu djica lo melbi bo stasu

da lo nu djica lo melbi bo stasume–elbi bo sta–asume–elbi bo sta–asu

sta–asu co va–a–ancimelbi bo melbi – BO STAsuli'u»

ni'o «lu .e'e krefu —sei la cpicinfo cu krixa— li'u» .i la jitfa cakyrespa pu zi co'a re re'u sanga ca lo nu lo selki'a no'u «lu lo nunpai cu cfari li'u» darno se tirna

ni'o «lu .e'e —sei la cpicinfo cu krixa— li'u» .i cy jgari la .alis. fo lo xance gi'e sutra cliva gi'e na denpa lo nu mo'u sanga

ni'o «lu lo nunpai cu mo —sei la .alis. ca lo nu bajra cu vaxselnandu cusku— .i ku'i la cpicinfo cu spusku zo .e'e po'o gi'e sutyze'a bajra ca'o lo nu bleze'a (to se bevri lo brife poi jersi vo'a toi) fa lo badri valsi po'u di'e .i «lu

sta–asu co va–a–ancimelbi bo melbi bo stasu

li'u» ni'o ni'o pa pa mo'o

ma zerle'a lo rutytisna

ni'o la noltrunau jo'u la noltruni'u vu'o pe lo risna cu zutse lo vo'a nolstizu ca lo nu la .alis. jo'u la cpicinfo cu tolcliva .i lo barda so'i mei cu jmaji lo sruri .i ro klesi be lo cmalu cipni jo'u danlu be'o jo'u ji'a lo karda ro mei .i la nolse'u cu sanli ca'u lo re mei gi'e rinju lo linsi gi'e jbini lo sonci re mei noi fanta .i jibni la noltrunau fa la blabi ractu noi jgari ge lo tabra lo xance gi lo skapi te ciska slanu lo drata .i satci midju lo kumfa fa lo jubme noi se cpana lo barda palne be lo rutytisna noi tai xamgu se jvinu ja'e lo nu la .alis. cu xagji ri'a lo nu catlu .i «lu .au mulgau lo nunpai —sei .abu pensi— gi'e fairgau lo cidja li'u» .i ku'i la'e di'u simlu lo ka na lakne .i se ki'u bo .abu co'a catlu ro sruri be .abu te zu'e lo nu lo temci cu culno

ni'o la .alis. pu no roi zvati lo nunpai kumfa gi'e ku'i pu ca'a tcidu lo srana be ky lo cukta gi'e se pluka lo nu facki lo du'u djuno lo du'u ma kau cmene so'a zvati .i «lu tu pajni —sei .abu sezysku— ki'u lo nu tu dasni lo barda krebasti li'u»

ni'o ta'o lo pajni cu me la noltrunau noi dasni lo nolmapku lo cpana be lo krebasti (to ko catlu lo craxra va'o lo nu do djica lo nu viska lo nu dasni ta'i ma kau toi) gi'e nai sai simlu lo ka kufra .i ju'o na melbi mapti

ni'o «lu tu pairkamni tsina —sei la .alis. cu pensi— .i lo vu pa re jmive (to .ei .abu cusku zo jmive ki'u lo nu ge su'o ri mabru gi su'o ri cipni toi) cu pairkamnycmi pe'i li'u» .i .abu ji'i ci roi cusku lo ro moi valsi gi'e jgira mutce ki'u lo nu jinvi (to drani toi) lo du'u so'u sai cmalu nixli be lo me .abu moi cu djuno lo du'u ma kau smuni .i ku'i zo paicmi ji'a mapti banzu

ni'o ro lo pa re pairkamnycmi cu zuktce ciska fi lo tanbo .i «lu tu ma zukte —sei la .alis. fi la cpicinfo cu tolylau cusku— .i tu na ka'e ciska da pu lo nu lo nunpai cu cfari li'u»

ni'o «lu tu ciska lo tu cmene —sei la cpicinfo cu tolylau spuda— ki'u lo nu terpa lo nu tolmorji pu lo fanmo be lo nunpai li'u»

ni'o «lu ue bebna —sei la .alis. co'a cladu je fengu voksa cusku— li'u» .i ku'i .abu sutra sisti ki'u lo nu la blabi ractu cu krixa «lu .ei smaji bu'u lo kumfa li'u» .i la noltrunau co'a dasni lo vistci gi'e xanka catlu lo sruri te zu'e lo nu facki lo du'u ma kau tavla

alis-1book36.jpg

ni'o la .alis. ka'e viska (to frili tai lo nu da'i catlu ga'u lo janco be py toi) lo nu ro lo pairkamnycmi cu ciska «lu ue bebna li'u» lo py tanbo kei gi'e ji'a sai ka'e tilvi'a lo nu pa me py na se slabu lo lerfu pe zo bebna gi'e nitcu lo nu cpedu lo nu se jungau kei lo lamji .i «lu ba melbi kalsa fa lo tanbo pu lo nu lo nunpai cu mulno —sei la .alis. cu pensi— li'u»

ni'o pa lo pairkamnycmi cu pilno lo pinsi noi vrumli cupra .i li'a la .alis. na ka'e renvi la'e di'u gi'e klama fo lo sruri be lo kumfa gi'e ti'erbi'o py gi'e ba zi kakne lo nu lebna lo pinsi py .i .abu tai sutra ja'e lo nu lo selkecti ke cmalu pairkamnycmi no'u lo rebyrespa po'u la .bil. na ka'e facki lo du'u lo pinsi ma kau binxo .i se mu'i bo by ba lo nu ve'u sisku py ro sruri cu bilga lo nu ciska se pi'o lo degji ze'a lo djedi velvi'u .i la'e di'u tolmutce lo ka prali kei ki'u lo nu no da se ja'e barna lo tanbo

ni'o «lu doi noisku ko tcidu lo zerfuzyxu'a selsku —sei la noltrunau cu cusku— li'u»

ni'o ca ku la blabi ractu cu ci roi tolsakci pa'o lo tabra gi'e tolgurgau lo skapi te ciska slanu gi'e tcidu bacru «lu

la noltruni'u pe lo risna cu zbasu lo rutytisnaze'a lo crisa djedi

.i la nolse'u pe lo risna cu zerle'a lo rutytisnagi'e darbevri bredi

li'u»

ni'o «lu ko pensi lo do se paijdi —sei la noltrunau fi lo pairkamni cu cusku— li'u»

ni'o «lu .ei za'o na go'i .i .ei za'o na go'i —sei la ractu cu sutra zunti— .i .ei lo mutce cu purci la'e di'u li'u»

ni'o «lu ko klagau lo pa moi zgana —sei la noltrunau cu cusku— li'u» .i la blabi ractu cu ci roi tolsakci pa'o lo tabra gi'e krixa «lu ju'i pa moi zgana li'u»

ni'o lo pa moi zgana cu me la mapypre noi nerkla gi'e jgari ge lo tcati kabri lo xance gi lo nanba joi matne lo drata .i «lu ko mi fraxu doi nolba'i —sei my co'a cusku— lo nu mi ti nerbevri .i ku'i mi na mo'u pinxe lo tcati ca lo nu mi se klagau li'u»

ni'o «lu .ei do pu mo'u go'i —sei la noltrunau cu cusku— .i ca ma do co'a go'i li'u»

ni'o la mapypre cu catlu la cibmasti cicyractu noi pu klaje'i my lo kumfa gi'e kansa la sipsmacu .i «lu lo pa vo moi pe lo cibmasti pe'i —sei cy cusku— li'u»

ni'o «lu pa mu moi —sei la cibmasti cicyractu cu cusku— li'u»

ni'o «lu pa xa moi —sei la sipsmacu cu jmina— li'u»

ni'o «lu ko ciska la'e di'u —sei la noltrunau fi lo pairkamni cu cusku— li'u» .i lo pairkamni cu sutra ciska lo ci detri lo py tanbo gi'e sujykanji fi dy gi'e galfi lo se kanji lo rupnu jo'u fepni

ni'o «lu ko vimcu lo do mapku —sei la noltrunau fi la mapypre cu cusku— li'u»

ni'o «lu ti na me mi moi —sei la mapypre cu cusku— li'u»

ni'o «lu zerle'a —sei la noltrunau fa'a lo pairkamni cu ki'asku— li'u» .i py zi notci'a lo fatci

ni'o «lu mi ti vecnu —sei la mapypre cu jmina ciksi— .i mi no ti ponse .i mi mapypre li'u»

ni'o ca ku la noltruni'u co'a dasni lo vistci gi'e co'a ze'a catlu la mapypre noi labybi'o gi'e xanka tarti

ni'o «lu ko dunda lo do datni —sei la noltrunau cu cusku— .i ko na xanka .i ja mi da do nau catrymi'e li'u»

ni'o la'e di'u na sai simlu lo ka darsygau lo zgana noi za'o slilu fi lo nu sanli fi lo jamfu fa'u lo drata kei gi'e xanka catlu la noltruni'u gi'e se cfipu batyvi'u lo barda spisa lo tcati kabri .e nai lo nanba joi matne

ni'o ca ku la .alis. cu ganse lo cizra noi cfipu .abu co'u lo nu facki lo du'u ma kau fasnu .i .abu ca'o co'a za'u re'u barda banro gi'e pa mai jdice lo nu cliva lo kumfa kei gi'e ku'i re mai jdice lo nu stali ze'a lo nu lo canlu cu banzu

ni'o «lu .au do na tai catke —sei la sipsmacu noi zutse lamji .abu cu cusku— .i mi ka'e ru'e vasxu li'u»

ni'o «lu mi na ka'e rivbi —sei la .alis. cu cumla cusku— .i mi ca'o banro li'u»

ni'o «lu .ei do na bu'u banro —sei la sipsmacu cu cusku— li'u»

ni'o «lu ko na bebna tavla —sei la .alis. cu darsyze'a cusku— .i ju'o do ji'a ca'o banro li'u»

ni'o «lu go'i .i ku'i mi banro se kai lo ka racli sutra —sei la sipsmacu cu cusku— .i na tai ckasu go'i li'u» .i sy tolgei mutce sa'irbi'o gi'e pagre lo kumfa lo drata fanmo

ni'o ze'a la'e di'u la noltruni'u no roi sisti lo nu catlu la mapypre kei gi'e cusku ca lo nu la sipsmacu cu pagre lo kumfa kei fi pa lo nunpai pulji «lu ko bevri lo liste be lo sanga pe lo ro moi ke zgike se tigni li'u» .i la mapypre cu tai desku ja'e lo nu lo re cutci cu nalseldasybi'o

ni'o «lu ko dunda lo do datni —sei la noltrunau re re'u fengu cusku— .i ja do te catrymi'e gi'u xanka li'u»

ni'o «lu mi pindi doi nolba'i —sei la mapypre cu co'a desku voksa cusku— .i mi pu zi co'a pinxe lo mi tcati (to zi lo jeftu be li ji'i su'e pa toi) .i lo nanba joi matne ca'o cinlyze'a .i lo tcati cu tergu'i li'u»

ni'o «lu lo mo cu tergu'i —sei la noltrunau cu cusku— li'u»

ni'o «lu ty pa moi lo go'i —sei la mapypre cu spuda— li'u»

ni'o «lu li'a ty pa moi zo tergu'i —sei la noltrunau cu kinli cusku— .i xu do jinvi lo du'u mi bebna .i .e'e di'a co'e li'u»

ni'o «lu mi pindi —sei la mapypre cu di'a co'e— .i so'e da cu tergu'i ba la'e di'u .i ku'i la cibmasti cicyractu cu cusku - li'u»

ni'o «lu mi na go'i —sei la cibmasti cicyractu cu sutra zunti— li'u»

ni'o «lu do ja'a go'i —sei la mapypre cu cusku— li'u»

alis-1book37.jpg

ni'o «lu mi tolxu'a —sei la cibmasti cicyractu cu cusku— li'u»

ni'o «lu tu tolxu'a —sei la noltrunau cu cusku— .i ko tolju'i lo di'u pagbu li'u»

ni'o «lu no'i la sipsmacu cu cusku - —sei la mapypre cu di'a co'e— li'u» .i my xanka ke sruri catlu te zu'e lo nu zgana lo nu xu kau sy ji'a tolxu'a .i ku'i sy tolxu'a no da gi'e carmi sipna

ni'o «lu baku —sei la mapypre cu di'a cusku— mi za'u re'u katna lo nanba joi matne li'u»

ni'o «lu ku'i la sipsmacu ma cusku —sei pa lo pairkamnycmi cu te preti— li'u»

ni'o «lu mi na morji —sei la mapypre cu cusku— li'u»

ni'o «lu .ei do morji —sei la noltrunau cu piksku— .i ja mi da do catrymi'e li'u»

ni'o la mapypre noi dunku mutce cu falcru lo tcati kabri jo'u lo nanba joi matne gi'e sanli fi pa lo cidni .i «lu mi pindi doi nolba'i —sei my co'a co'e— li'u»

ni'o «lu do pindi lo ka tavla certu —sei la noltrunau cu cusku— li'u»

ni'o ca ku pa lo smacrkobaiu cu geirki'a gi'e ba zi rinju lo nunpai pulji (to zo rinju cu rufsu valsi .i mi ciksi lo nu ta'i ma kau zukte .i py ponse lo barda ke bukpu dakli noi ka'e ganlo se pi'o lo dasri .i py lo smacrkobaiu cu setca dy gi'e zutse toi)

ni'o «lu mi gleki lo nu mi viska la'e di'u —sei la .alis. cu pensi— .i mi so'i roi tcidu fi lo karni ca lo mo'u nunpai «lu troci lo nu xanvruzau noi ba zi rinju lo nunpai pulji li'u» gi'e pu no roi jimpe lo du'u ma kau smuni li'u»

ni'o «lu .e'a do va'o lo nu la'e di'u cu pi ro si'e lo do se djuno be fi lo cuntu cu nitkla —sei la noltrunau cu di'a cusku— li'u»

ni'o «lu mi na ka'e klama lo nitmau —sei la mapypre cu cusku— .i mi cpana lo loldi li'u»

ni'o «lu .e'a va'o la'e di'u do nitytse —sei la noltrunau cu spuda— li'u»

ni'o ca ku lo drata smacrkobaiu cu geirki'a gi'e rinju

ni'o «lu .a'u mo'u smacrkobaiu —sei la .alis. cu pensi— .i ca ku mi'a xagmau li'u»

ni'o «lu mi zmanei lo nu mo'u tcati pinxe —sei la mapypre cu cusku— li'u» .i my xanka catlu la noltruni'u noi tcidu lo liste be lo sanga

ni'o «lu .e'a klama —sei la noltrunau cu cusku— li'u» .i la mapypre cu sutra cliva lo kumfa se cau lo nu denpa ji'a sai lo nu dasni lo cutci

alis-1book38.jpg

ni'o «lu .i je ko lo stedu tu vimcu bu'u lo bartu —sei la noltruni'u fi pa lo pulji cu jmina cusku— li'u» .i ku'i la mapypre na ka'e se viska pu lo nu lo pulji cu tolcliva lo vorme

ni'o «lu ko klagau lo jersi zgana —sei la noltrunau cu cusku— li'u»

ni'o lo jersi zgana cu me lo jukpa pe la noltroni'u .i jy jgari lo cpinytsapi tanxe lo xance .i la .alis. cu smadi lo du'u jy me ma kau kei pu lo nu jy klama lo kumfa kei ki'u lo nu ro lo prenu poi jibni lo vorme cu co'a senci

ni'o «lu ko dunda lo do datni —sei la noltrunau cu cusku— li'u»

ni'o «lu na go'i —sei lo jukpa cu cusku— li'u»

ni'o la noltrunau cu xanka catlu la blabi ractu noi tolylau voksa cusku «lu .ei lo nolba'i cu kuclanli lo vi zgana li'u»

ni'o «lu .i'a .o'o .i'a —sei la noltrunau cu tolgleki— li'u» .i ny ba lo nu kucysimgau lo birka gi'e frumu fa'a lo jukpa co'u lo nu lo ny kanla cu jibni lo nu na ka'e se viska cu condi voksa cusku «lu ma te zbasu lo rutytisna li'u»

ni'o «lu lo cpinytsapi ra'u —sei lo jukpa cu cusku— li'u»

ni'o «lu lo satyjisra —sei lo sipna voksa noi trixe jy cu cusku— li'u»

ni'o «lu ko selkarlygau la vu sipsmacu —sei la noltruni'u cu krixa— .i ko lo stedu tu vimcu .i ko tu barklagau lo kumfa .i ko tu se rinju .i ko tu tunta .i ko lo zbikre cu vimcu li'u»

ni'o ze'a lo mentu be li so'o lo kumfa cu kalsa ca'o lo nu la sipsmacu gau barkla .i ca lo nu cnici xruti kei lo jukpa ba'o canci

ni'o «lu na vajni —sei la noltrunau cu surla mutce cusku— .i ko klagau lo jersi zgana li'u» .i ny tolylau tonga jmina cusku fi la noltruni'u fe «lu .i'u doi dirba .ei ba'e do kuclanli lo jersi zgana .i lo nu go'i cu mutce corgau mi lo sedycra li'u»

ni'o la .alis. cu catlu la blabi ractu noi juxre co'e lo liste ku'o gi'e mutce kucli lo du'u lo jersi zgana cu mo kau .i «lu za'o na mutce lo ka datni —sei .abu sezysku— li'u» .i ko se xanri lo nu spaji fa lo nu la blabi ractu se pi'o lo kinli je cmalu voksa cu bacru tcidu lo cmene po'u zo .alis. ni'o ni'o pa re mo'o

la .alis. cu sabji lo datni

ni'o «lu mi zvati —sei la .alis. cu krixa— li'u» .i .abu ze'i tolmorji lo du'u .abu ba'o banro lo mo kau barda ze'a lo pu zi mentu be li so'u .i .abu tai sutra plipe ja'e lo nu falgau lo pairkamni tsina se pi'o lo skaci korbi gi'e renro ro lo pairkamnycmi lo stedu be lo cnita prenu .i lo pairkamnycmi cu kalsa preja .i la'e di'u morjygau la .alis. fi lo nu .abu se snuti lo nu falgau lo slofi'e tanxe ca lo purlamjeftu

alis-1book39.jpg

ni'o «lu .u'u .i .e'o sai ko mi fraxu —sei .abu dunku tonga ki'asku— li'u» .i .abu co'a crepu lo pairkamnycmi lo loldi se rai lo kamsutra ki'u lo nu lo slofi'e snuti za'o stali lo .abu menli .i .abu tolsatci te sidbo fi lo du'u ga .ei ze'i crepu gi'e punji py lo pairkamni tsina gi py ba mrobi'o

ni'o «lu lo nunpai na ka'e di'a fasnu —sei la noltrunau cu junri mutce voksa cusku— pu lo nu ro lo pairkamnycmi cu xruti lo drani selzva .i ba'e ro ra —sei ny re re'u basna mutce cusku— li'u» .i ny catlu la .alis. ca lo nu cusku

ni'o la .alis. cu catlu lo pairkamni tsina gi'e viska lo nu .abu pu punji se ja'e lo nu sutra kei lo rebyrespa ja'e lo nu lo ry stedu cu cnita .i lo se kecti cu sligau lo rebla tai lo nu tolgei kei gi'e na sai ka'e muvdu .i .abu ra bargau gi'e drani punji .i «lu na mutce lo ka vajni —sei .abu sezysku— .i pe'i lo fatne lo se fatne cu dunli lo ka ma kau prali lo nunpai ce'u li'u»

ni'o lo pairkamni ca lo nu ge py ba'o ru'e xruti fi lo jenca po'u lo nu se dicra gi ro lo tanbo jo'u ro lo pinsi cu se tolcri gi'e se dunda fi py cu co'a tolylazni ciska lo lisri be lo fasnu .i go'i fa ro me na'e bo lo rebyrespa noi simlu lo ka dukse lo ka se sfasa kei lo nu zukte lo drata be lo nu kalri moklu zutse gi'e gapru catlu lo drudi be lo kumfa

ni'o «lu do ma djuno lo cuntu —sei la noltrunau fi la .alis. cu cusku— li'u»

ni'o «lu no da —sei la .alis. cu cusku— li'u»

ni'o «lu xu no sai da —sei la noltrunau cu za'o co'e— li'u»

ni'o «lu no sai da —sei la .alis. cu cusku— li'u»

ni'o «lu la'e di'u cu mutce lo ka vajni —sei la noltrunau fa'a lo pairkamni cu cusku— li'u» .i py co'a ciska di'u lo tanbo ca lo nu la blabi ractu cu zunti .i «lu li'a zo tolvajni cu se skudji do doi nolba'i —sei ry sinma mutce tonga cusku— li'u» .i ku'i ry frumu gi'e flira snigau ca lo nu tavla

ni'o «lu li'a mi skudji zo tolvajni —sei la noltrunau cu sutra cusku— li'u» .i ny ca'o tolylau sezysku «lu vajni .i tolvajni .i tolvajni .i vajni li'u» tai lo nu cipra lo ka ma kau sance zanrai kei lo valsi

ni'o so'o lo pairkamnycmi cu ciska zo vajni .i so'o drata cu go'i zo tolvajni .i la .alis. ka'e viska ki'u lo nu jibni co banzu lo nu catlu lo py tanbo .i «lu ku'i na sai vajni —sei .abu pensi sezysku— li'u»

ni'o ca ku la noltrunau noi pu ze'a zukte ciska fi lo ny notci cukta cu cusku «lu .ei smaji li'u» gi'e bacru tcidu fi cy fe «lu lo vo re moi javni zo'u: ro prenu poi galtu minli li za'u pa cu bilga lo nu cliva lo kumfa li'u»

ni'o ro da catlu la .alis.

ni'o «lu mi na galtu minli li pa —sei la .alis. cu cusku— li'u»

ni'o «lu do go'i —sei la noltrunau cu cusku— li'u»

ni'o «lu go'i li ji'i re —sei la noltruni'u cu jmina— li'u»

ni'o «lu .i se ju .ai mi na cliva —sei la .alis. cu cusku— .i ji'a jy na fadni javni .i do jy ca zi finti li'u»

ni'o «lu jy tolcitrai lo javni pe lo cukta —sei la noltrunau cu cusku— li'u»

ni'o «lu ga nai go'i gi .ei jy pa moi —sei la .alis. cu cusku— li'u»

ni'o la noltrunau cu labybi'o gi'e sutra polje lo notci cukta .i «lu ko pensi lo do se paijdi —sei la noltrunau fi lo pairkamni cu lauble je desku voksa cusku— li'u»

ni'o «lu lo drata datni za'o ba se jarco pe'u doi nolba'i —sei la blabi ractu noi sutra plipe cu cusku— .i lo vi pelji pu zi se cpacu li'u»

ni'o «lu ma se ciska fi ta —sei la noltruni'u cu cusku— li'u»

ni'o «lu mi ti za'o na kargau —sei la blabi ractu cu cusku— .i ku'i ti simlu lo ka xatra fi lo pinfu fe .y da li'u»

ni'o «lu ju'o go'i —sei la noltrunau cu cusku— .i jo nai ti xatra lo no da .i ku'i ka'u la'e di'u rirci li'u»

ni'o «lu ma se judri —sei pa lo pairkamnycmi cu cusku— li'u»

ni'o «lu na sai se judri —sei la blabi ractu cu cusku— .i je'u no da se ciska fi lo bartu li'u» .i ry tolplo lo pelji ca lo nu tavla kei gi'e jmina «lu pa'e ti na xatra .i ti pempau selcmi li'u»

ni'o «lu xu lo ciska tarmi cu me lo pinfu moi —sei lo drata pairkamnycmi cu te preti— li'u»

ni'o «lu na go'i —sei la blabi ractu cu cusku— .i la'e di'u cu traji lo ka cizra li'u» (to ro lo pairkamnycmi cu simlu lo ka se cfipu toi)

ni'o «lu ja'o py fukygau ta lo ciska tarmi pe lo drata —sei la noltrunau cu cusku— li'u» (to ro lo pairkamnycmi cu xruti lo ka cikygei toi)

ni'o «lu pe'u doi nolba'i —sei la nolse'u cu cusku— mi tu na ciska .i ji'a no da ka'e je'urja'o lo du'u mi ja'a go'i .i no cmene cu zvati lo fanmo be tu li'u»

ni'o «lu lo cuntu cu xlaze'a va'o lo nu do na ciska lo do cmene —sei la noltrunau cu cusku— .i ba'e ju'o do zukte fi lo nu palci .i bo do va'o lo nu na go'i cu ja'a pu ciska lo do cmene tai tu'a lo stace li'u»

ni'o kampu fa lo nu xanvruzau la'e di'u noi pa moi co tolbebna selsku la noltrunau ca lo cabdei

ni'o «lu la'e di'u cu je'urja'o lo du'u tu zerzu'e —sei la noltruni'u cu cusku— li'u»

ni'o «lu la'e di'u cu je'urja'o no da poi simsa —sei la .alis. cu cusku— .i ua do na djuno ji'a sai lo du'u ma kau se ciska li'u»

ni'o «lu ko tcidu —sei la noltrunau cu cusku— li'u»

ni'o la blabi ractu co'a dasni lo vistci .i «lu .ei mi go'i co'a ma pe'u doi nolba'i —sei ry retysku— li'u»

ni'o «lu co'a lo krasi —sei la noltrunau cu junri cusku— ko ca'o go'i co'u lo fanmo .i ba bo ko sisti li'u»

ni'o di'e penmi co se tcidu la blabi ractu

.i ti'e do ta vitke ca'a.i do tu tavla mi

.i cu'u ta ge mi preza'agi nai mi limna di

.i cu'u tu mi pu vi sanli(to mi'o djuno toi

.i ga nai ta za za'o lanligi ma do dimna .oi

.i dunda fa mi pa da ta.i go'i re da tu

.i do se xruti lo ro danoi me mi moi za pu

.i ga nai ga mi gi ta iuse cuntu lo vi fasnu

gi ia tu lacri do lo nudo zifre xruti gasnu

.i pe'i do pu lo nu tcinilo nu se fengu ta

cu fanta zunti gi'e jbiniuo tu joi mi joi ra

.i tu na djuno .ei gau kolo du'u ta ru zmanei

.i .ei se mipri mi joi doro drata lo nu ca nei

ni'o «lu la'e di'u cu vajrai lo datni poi se tirna ca lo cabdei —sei la noltrunau noi simymosra lo xance cu cusku— .i se ki'u bo .ei lo pairkanmi li'o li'u»

alis-1book40.jpg

ni'o «lu mi va'o lo nu py di'u ka'e ciksi —sei la .alis. cu cusku (to .abu banro lo tai barda ze'a lo pu zi mentu be li so'u ja'e lo nu .abu na sai terpa lo nu zunti ny toi)— cu dunda lo rupnu py .i ba'e mi na jinvi lo du'u lo smuni selci ji'a sai cu zvati di'u li'u»

ni'o ro lo pairkamnycmi cu ciska fi lo tanbo fe «lu ba'e ta na jinvi lo du'u lo smuni selci ji'a sai cu zvati di'u li'u» gi'e nai ku'i troci lo nu ciksi lo pelji

ni'o «lu lo nu no da smuni di'u —sei la noltrunau cu cusku— cu fanta lo barda raktu ki'u lo nu .ei nai mi'a troci lo nu facki lo smuni .i ku'i ju'o cu'i —sei ny noi ke'a lo pempau cu pejgau lo cidni gi'e catlu se pi'o pa kanla cu di'a cusku— .i pe'i mi viska lo smuni .i «lu nai mi limna di li'u» .i ju'i do'u je'u pei do na ka'e limna di —sei ny fa'a la nolse'u cu jmina— li'u»

ni'o la nolse'u cu badri desygau lo stedu .i «lu xu mi simlu lo ka ka'e go'i —sei ny cusku— li'u» (to ju'o sai ny noi marji lo jarple cu na simlu toi)

ni'o «lu .i'e —sei la noltrunau cu cusku— li'u» .i ny di'a tolylau bacru lo pempau .i «lu «lu (to mi'o djuno toi) li'u» mapti li'a lo pairkamni .i «lu .i dunda fa mi pa da ta .i go'i re da tu li'u» .i ua ju'o la'e di'u nu ta fairgau lo rutytisna li'u»

ni'o «lu ku'i di'a co'e «lu .i do se xruti lo ro da li'u» —sei la .alis. cu cusku— li'u»

ni'o «lu ua ry zvati tu —sei la noltrunau noi jarco lo rutytisna noi cpana lo jubme cu jinga cusku— .i no da ka'e klimau la'e di'u .i ku'i «lu pu lo nu tcini lo nu se fengu ta li'u» .i do no roi fengu doi dirba pe'i je'u pei —sei ny fi la noltruni'u cu cusku— li'u»

ni'o «lu no roi —sei la noltruni'u cu fengu mutce cusku— li'u» .i ny renro lo xinmo vasru lo rebyrespa ca lo nu tavla .i (to la .bil. uu pu de'a ciska fi lo tanbo lo degji .i mu'i bo dy na mornygau .i ku'i by ca zi di'a co'e se pi'o lo xinmo noi carvi lo by flira ku'o ze'a lo nu xy renvi toi)

ni'o «lu ja'o lo valsi do na mapti —sei la noltrunau cu cusku— li'u» .i ny cisma catlu lo sruri .i morsi smaji

ni'o «lu mi pu vlakei —sei la noltrunau cu jgicro tonga jmina— li'u» .i ro da cmila

ni'o «lu .e'i lo pairkamni cu pensi lo se paijdi —sei la noltrunau ji'i re no re'u lo djedi cu cusku— li'u»

ni'o «lu na go'i .i na go'i —sei la noltruni'u cu cusku— .i lo se sfami'e cu pa moi .i lo se paijdi cu za'u moi li'u»

ni'o «lu bebna je nonselsmu —sei la .alis. cu cladu cusku— .i io nai .oi pa moi fa lo se sfami'e li'u»

ni'o «lu ko ri'urgau lo do tance —sei la noltruni'u noi zirpu binxo cu cusku— li'u»

ni'o «lu .ai mi na go'i —sei la .alis. cu cusku— li'u»

ni'o «lu ko lo stedu tu vimcu —sei la noltruni'u cu voksa launrai krixa— li'u» .i no da muvdu

ni'o «lu ma do terpa —sei la .alis. noi ca ba'o banro lo .abu ta'e barda cu cusku— .i ga'i do na'e drata lo bakfu be lo karda li'u»

alis-1book41.jpg

ni'o ca ku pi ro lo bakfu cu tolfarlu lo vacri gi'e ba bo farlu la .alis. .i .abu milxe krixa ri'a lo nunterpa zu'u .e lo nunfengu zu'u nai gi'e troci lo nu rivbi ky ta'i lo nu darxi .i .abu facki lo du'u .abu vreta lo rirxe korbi fau lo nu lo stedu cu cpana lo galtupcra be lo mensi noi xendo vimcu lo morsi pezli noi ba'o farlu lo .abu flira lo tricu

ni'o «lu ko cikna doi .alis. doi dirba —sei lo mensi cu cusku— .i ue do ze'u sipna li'u»

ni'o «lu .u'e mi senva lo tai cizra —sei la .alis. cu cusku— li'u» .i .abu tavla lo mensi ro lo cizra se lifri poi do ke'a pu zi ca'o tcidu .i lo mensi ca lo nu mo'u go'i cu cinba .abu gi'e cusku «lu je'u ju'o cizra se senva doi dirba .i ku'i ko ca bajra klama tu'a lo tcati .i ca'o lerci binxo li'u» .i la .alis. cu sa'irbi'o gi'e bajra gi'e ca bo pensi lo du'u pa'e lo se senva cu se manci

ni'o ku'i lo mensi cu zutse za'o lo nu .abu cliva kei gi'e vregau lo stedu lo xance gi'e catlu lo nu lo solri cu farlu kei gi'e pensi lo cmalu no'u la .alis. ge'u jo'u ro lo .abu se manci se lifri .i lo mensi ji'a co'a senva sa'e nai .i senva la'e di'e

ni'o pa mai my senva la .alis. .i lo .abu cmalu xance cu za'u re'u ca'o jgari lo my cidni .i lo .abu carmi selci'i kanla cu catlu lo me my moi .i my ka'e tirna lo satci tonga be fi lo .abu voksa gi'e viska lo cizra nu stedu desku noi se rinju lo kerfa lo nu gacri lo kanla .i ca lo nu my tirna gi'a simlu lo ka tirna cu jmive binxo ru'u sai my fa lo cizra tigni be lo se senva be lo my cmalu mensi

ni'o lo clani srasu cu vruvricypra bu'u lo my jamfu ca lo nu la blabi ractu cu sutra klama .i la smacu noi terpa cu jacre'o pagre lo jibni la'ucma .i my tirna lo sance be lo tcati kabri ca lo nu la cibmasti cicyractu cu kansa lo cycy pendo lo ze'e nu sanmi .i lo cpina voksa be la noltruni'u cu minde fi lo nu lo malselfu'a vitke cu se catra .i lo xarju cifnu cu za'u re'u senci ga'u re'o lo cidni be la noltroni'u ca lo nu lo palta jo'u lo palne cu sruri porpi .i za'u re'u ku lo selkrixa be la cpicinfo lo snamli be lo tanbo pinsi pe lo rebyrespa lo se zunva'u be lo smacrkobaiu zo'u: lo ro mei cu se tisna lo vacri gi'e jorne lo darno kaksna be la jitfa cakyrespa noi tolgeitce

ni'o my za'o zutse (to lo kanla cu ganlo toi) gi'e xadba krici lo du'u my zvati la selmacygu'e .i ku'i my djuno lo du'u lo nu kargau ky cu banzu lo nu ro da binxo lo tolzdi fatci .i lo srasu cu vruvricypra gau lo brife .i lo la'ucma cu se boxna gau lo jauspa .i lo sance be lo tcati kabri cu binxo lo se lanjanbe

ni'o lo cpina se krixa be la noltruni'u cu binxo lo voksa be lo lankurji nanla .i lo nunsenci be lo cifnu lo selkrixa be la cpicinfo ro lo drata ke cizra savru zo'u: lo ro mei cu binxo —sei my djuno— lo mixre sance be lo zukcfu cange .i lo se cmoni be lo zu bakni cu basti lo tilju kaksna be la jitfa cakyrespa

ni'o ro mai my se xanri lo nu lo my cmalu mensi ca lo balvi cu makcu ninmu gi'e ralte ze'a lo makcu nanca lo sampu je prami risna pe lo vercedra gi'e jajgau lo cymy cmalu panzi gi'e gasnu lo nu lo ba'e ri kanla cu carmi se cinri so'i cizra lisri jo'u ju'o cu'i ji'a sai lo se senva pe la pu zu selmacygu'e kei gi'e cnikansa ra lo ra sampu se tolgei gi'e se pluka lo ra sampu se gleki gi'e morji lo cymy verba nunji'e jo'u lo selgei ke crisa djedi

fa'o