zdilisri: Difference between revisions

From Lojban
Jump to navigation Jump to search
mNo edit summary
m (Gleki moved page jbocre: zdilisri to zdilisri without leaving a redirect: Text replace - "jbocre: ([a-z])" to "$1")
(No difference)

Revision as of 14:56, 23 March 2014

sirsunla kosta

lo patfu be ko'a goi lo cmalu nanla cu terve'u lo kargu ke sirsunla kosta seva'u lo mamta be ko'a ku goi fo'o

.i ko'a cusku fi fo'o fe lu xu do doi mamta cu djuno le du'u le vi sirsunla kosta cu jalge lo pu'u lo danlu .uu cu xlafri li'u

.i fo'o cusku spuda ko'a lu .ue do doi bersa cu ka'e tavla fi le patfu be do tai ti li'u

denpesxu

lo cmalu nixli goi ko'a cu reisku fi lo mamta be vo'a fe lu

doi mamta do djuno xu lo du'u lo denpesxu poi nenri pa tubnu cu klani makau

li'u .i le mamta cu cusku lu

na'e djuno

li'u .i ko'a go'i lu

.iku'i mi ba'e djuno .i mitre li ci

li'u

rijno smuci

lo famti cu reisku lu

xu do roroi sidju lo mamta be do

li'u .i le verba cu spuda fi lu

go'isai .imu'a mi bilga lo nu kancu lo'i rijno smuci kei ba ro nu do cliva

terpa lo tirxu

A: doi patfu do terpa xu lo tirxu

B: na go'i

A: xu go'i lo cinfo

B: si'a na go'i

A: je'e .ija'o do terpa le mamta po'o

xalbebna

py. goi lo patfu ge'u joi by. goi lo bersa be py. cu zvati lo gusta

B: .a'u doi patfu da jimpe lo du'u de xalbebna kei ta'i ma

P: xu do viska ta po'u re ninmu .i ganai ta simlu lo ka vomei ninmu kei da gi .e'e da xalbebna

B: .iku'i .ue doi patfu ta du pa ninmu

xabyterspe

A: mi xabyterspe bersa

B: na cumki .i ro prenu zo'u gonai terspe panzi gi nalterspe panzi

A: .iku'i mi xabyterspe bersa .isa'e lo mamta be mi cu tolspeni .ije lo patfu be mi cu speni

vondei

A: mi prami do doi macas.

B: zo .macas. ue .i mi'e .anas.

A: zo .anas. uesai .i le cabdei na vondei xu .uesai

prami jbixa'u

pa nanmu ku joi lo speni be ri ku goi ko'a cu catlu lo bartu pa'o lo canko .i ko'a cu cusku lu

ko catlu .i le jbixa'u cu cinba le fetspe be vo'a ca ro nu vo'a xruti le zdani .iku'i do noroi zukte la'e di'u

li'u .i lo speni be ko'a cu spusku lu

mi zukte ta'i ma .ue .isu'anai mi mulno na'e slabu le va ninmu

mentu li mu

lo fetspe noi cliva le zdani cu cpedu cusku fi lo speni be vo'a fe lu

mi cliva tezu'e lo nu vitke la lenas. gi'e tavla ri ze'i lo mentu be li mu .i doi dirba .e'o ko jicla ne'i le juptansi pa roi ro cacra xadba

pinde nakspe

lo ninmu cu cusku fi lo speni be vo'a fe lu

.oi ro nanmu poi mi spebi'o fitytoltu'i pu lo za'i mi speni do ku'o ca cfumau do

li'u .i le nakspe cu spusku fi lu

.u'i .uenai

gusta cidja

A: doi tolci'o tolspe do pu suksa spebi'o mu'i ma

B: lo du'u mi pu co'u ctinei lo gusta cidja

A: .i caku mo

B: .i caku mi co'a nelci ri

srera cusku

re ninmu cu simxu tavla .i le pamoi ninmu cu cusku lu

puzaku mi co'a so'iroi srera cusku .imu'a mi pu djica lo nu cusku lu .au mi pinxe loi vanju li'u le speni be mi gi'e ku'i srera cusku lu .au mi vasxu loi pinji li'u .u'i

li'u .i le remoi ninmu cu spusku lu

.ie mi si'a co'a srera cusku .imu'a mi pu djica lo nu cusku lu doi dirba ko dunda .e'o le kabri be lo ckafi mi li'u le speni be mi gi'e ku'i srera cusku lu doi selgle malganxo do ba'o daspo lo nunji'e be mi li'u

fonxa tavla

lo nakspe cu cusku fi le speni be vo'a fe lu

doi dirba do ba'o fonxa tavla ze'i .ue lo mentu be li reno .i go'i ma .a'u

li'u .i spusku fa le ninmu lu

lo batkyci'a be lo srera fonjudri

vitke le mamta

lo ninmu: doi dirba ca lo bavlamdei mi cliva tezu'e lo nu vitke le mamta be mi .i xu mi kakne lo nu zenba zukte tu'a do

lo nanmu: ki'e na go'i .i lo du'u go'u cu banzu

karce snasni

A: mu'i ma do terpa lo nu tirna lo karce snasni

B: ca lo purci jeftu lo fetspe be mi cu mipri cliva fi'o kansa lo karce sazri .i caku mi terpa lo nu ky. ba'o xrubei fy. ti

glico nobli

ko'a goi lo tolci'o ke glico nobli cu xrukla le zdani ca lo lerci vanci .i lo selfu be ko'a cu cusku fi ko'a fe lu

xu .a'u doi tolci'o bebna do za'u re'u ba'o malpinxe lo xalka gi'e vitke loi gleve'u

li'u .i spusku fa ko'a lu

na go'i doi djan. .i mi pu cliva tezu'e lo nu terve'u lo tirna cabra

xejykre

lo tadypre cu penmi lo velcli gi'e reisku fi vy. fe lu

.a'u doi velcli ga'inai ca lo nu do co'a sipna kei do punji lo xejykre be do ga'u je'i ni'a lo ckagai

li'u .i le velcli cu spusku lu

.a'unai mi na djuno

li'u .i ba lo jeftu be li re le velcli ca lo nu penmi le tadypre cu mutce fengu cusku lu

doi malpre mi ca na ka'e sipna .o'unai .isa'e ca lo nu mi punji le xejykre ga'u lo ckagai kei mi na kufra .ije si'abo ca lo nu mi punji le xejykre ni'a lo ckagai kei mi na kufra

xebro rindo

ni'o lisri le bi'u ci rindo .i la geronovits. patfu .i la pokaientas. mamta .i la mini'orovits. tixnu .i ca le djedi la mini'orovits. klama le zdani gi'e cusku lu doi mam. mi ba speni li'u la pokaientas.

.i la pokaientas. cusku lu .ui do makcu nalspe .o'ocu'i .i do ca nanca li paxa .i ma bavyspe? li'u

.i la mini'orovits. cusku lu .ua doi mam. mi tolcri le nanmu! .i clani je vrude .i melbi je tsali li'u

—ma cmene?

—lu zugdze bakni li'u

—sinma ko'a do'e ma?

—ko'a selsi'a sai! .i ko'a se patfu la fenki xirma noi jatna ro le siksika

.i la pokaientas. cusku lu xamgu .i ma'a ba spesla fi le banli .i .oi

—mo .oidai?

—nabmi ma'a

—ma nabmi?

—le kapyzda na barda co banzu le nu vasru ro le vitke be fi le spenunsla be'o no'u ro le siksika .e ro le nienke'a .e ro le selylanzu

.i la pokaientas. kixsku lu doi geronovits. ko mo'u zutse fi le zargu gi'e kalte seva'u mi lo visnda li'u

.i la geronovits. cusku lu do djica lo nu mo lo visnda? li'u

—mi ka'e zbasu lo kukte ke jaurgapci seljukpa visnda stasu lo visnda rectu .i mi ka'e bramaugau le kapydi'u sepi'o lo visnda skapi .i mi'o ba ka'e vi'ecpe le spenunsla piro le munje

.i mo'ize'o se klama la geronovits .i djedi li pa ce'o li re ce'o li ci .ijenai la geronovits. zvati .i bazu le jeftu la geronovits. xruti ri fi'o xance le kunti .i la pokaientas. kixsku lu doi juxybebna le mi visnda cu zvati ma? li'u

—do .e le do visnda stasu cu zvati le lumbaktu

—ki'u ma .i ma fasnu

—ca le pamoi djedi mi viska le visnda .iku'i na banzu xamgu le stasu gi'e na banzu barda seva'u le kapydi'u .i ca le remoi djedi mi viska le drata je barda visnda noi se skapi lo tercivla ku'i .i mi na ze'epu viska lo mleme'a visnda .i ca le za'umoi djedi mi tolcri le visnda .i melbi je plana je barda .i prane visnda .ua

—.ibabo mo?

—.ibabo mo paunai .i mi pu'o catra le visnda .i mi sisku fi le mi dakli .i do djuno ma paunai .i bebna fa mi .i mi lebna le ladru ka'amru