zantufa/jbo

From Lojban
Revision as of 12:45, 25 August 2015 by Guskant (talk | contribs)
Jump to navigation Jump to search
banjubu'o / français / 日本語 / English
zantufa farvi

jo'au zantufa xi pipaci ni'o

la zantufa cu mo

  • .i la zantufa cu me lo so'o vrici be lo genturfa'i be lo jufra be fi la lojban
  • .i la zantufa cu se jicmu lo na'e ca'irselzau gerna poi ke'a zabna lo ka ge ce'u sampu gi lo si'o pairnu'i cu mukti ce'u kei la guskant

ni'o

lo ba'a steci be la zantufa

ni'o

la zantufa tai ma srana lo drata noi klesi la lojban

ni'o

ma se pacna

.i lo nu ma'a cliva lo gerna poi se ciksi fo La Bangu ku'o gi'e xabju pe'a lo zabna gerna .i .a'o zanfu'a la zantufa

ni'o

jo'au zantufa xi pa do'u

mulno

i la zantufa xi za'upa cu se steci pi so'a lo ka se djica la guskant

i ba'a sarcu fa po'o lo nu vimcu lo cfila kei je lo nu jmina lo cnino cmavo be lo ca'a selma'o

i e'o jungau la guskant lo da'i du'u do sanji da poi cfila ja cu raktu

i lo flalu be lo nu cuxna lo gerna selci kei la zantufa cu frica lo se mukti po lo lojbo irci bangu ge'u noi se ciksi fo La Bangu

i zu'u to'u lo lojbo irci bangu cu jai djica lo nu plixau lo so'i lo irci kuku no'u lo se ke ropno bangu ja lo crexalbo be lo skami (to no'e kampu toi)

i zu'unai la zantufa cu jai djica lo nu lo ba'e gerna cu sampu kei je lo nu vimcu lo ka to'e pairnu'i kei kei je lo nu gau vajni fa lo nu sarxe lo logji saske

i tezu'e lo se go'i cu radycru so'o lo klesi be lo nu plixau

i lo di'u flalu cu mutce co se jicmu lo si'o melbi kei be la guskant

i zu'u ma'i la guskant lo gerna be lo lojbo irci bangu cu fegli dacti pe'a noi jalge lo nu cunso jmina lo simlu co plixau lo tolni'o dinju pe'a (to lo catni lojban toi) noi co'u ru'e plixau

i to'u claxu lo mulno ka melbi

i zu'unai lo stura be la zantufa cu simsa lo tcaci gugdejupu dinju

i va'i lo kumfa be lo tcaci gugdejupu dinju cu na se zukte fi lo tinsa gi'e ka'e se pilno fi lo vrici

i tai ku la zantufa cu se pagbu lo so'u mei be lo gerna selci be'o noi se pilno fi lo vrici mutce ku'o se mu'i lo nu kakne lo nu skicu fo lo vrici mutce

i di'e liste lo steci be la zantufa xi pa

i ku'i la cipra ilmentufa ja la altatufa cu ka'e cpacu so'i lo pagbu be la'e di'e la zantufa ija'ebo ka'e na'e steci la zantufa ku po'o

i pi so'a la zasni gerna ku noi se stidi la xorxes cu se cerda
i va'i so'u va'e co frica la iocixes ne la zasni gerna peg ge'u (to xai de'a gubni toi) noi cerda pi ro la zasni gerna
i sa'unai tu'e
lo nu vimcu lo ga'e zei lerfu poi sinxa lo tsali se bacru cu na se cerda
i ki'u bo la guskant na kakne lo nu stika tu'a la'o zoi preproc.js zoi ja'e lo nu basti lo gerna pe lo ga'e zei lerfu
i lo slaka zunsna zo'u na'e se stika
i mu'i bo pe'i lo nu stika cu ka'e rinka lo nu na genturfa'i lo so'i pu lojbo
i ku'i la da'i zantufa traji cu ka'e cerda la'e di'u vau u'i
i zo ke joi zo ke'e cu za'o kuspe lo sumti ja lo brirebla
i pe'i lo nu go'i cu no'e sarcu i ku'i va'o lo nu ma'oi KE fa'u ma'oi KEhE basti ma'oi NUhI fa'u ma'oi NUhU kei radycru ei lo go'i
i gijoi ma'oi LAU gi ma'oi TEI gi ma'oi FOI cu za'o pagbu lo gerna
i mu'i bo ma'oi TEI joi ma'oi FOI cu plixau tezu'e lo nu cusku lo anji ta'i lo jungo ja lo ponjo (to zoizoi 部首 zoi toi)
i mu'a lu tei remna bu sanli bu foi li'u cu dunli lu zoizoi 位 zoi bu li'u lo ka smuni
i lo simsa be di'u cu fadni fi lo jungo ja ponjo se bacru ja lo jungo ke samci'a ciste
i lo nu ma'oi TEI jo'u ma'oi FOI frica ma'oi BY lo ka gerna cu se jalge lo nu frili fa lo nu te frica lo pa anji lo vanbi
(to ma'oi LAU cu no'e se nitcu ma'i lo jungo ja lo ponjo i ku'i na'e vimcu lo go'i ma'i lo si'o simsa ma'oi TEI lo ka te pilno toi)
tu'u
i pi so'a la mekso gerna ku noi se stidi la xorxes cu se cerda
i ku'i stika lo ka ce'u ce'u srana kei ne lo fancu joi lo namcu ma'i lo si'o plixau
i lo jonma'o ciste cu se jicmu lo se stidi be la xorxes je la selpa'i
i ku'i la zantufa cu se steci lo ka se dirba lo li'erla'i jonma'o
i ji'a la zantufa cu se steci lo ka se dirba lo jufra noi jbini ma'oi NU ce ma'oi KEI
i va'i ra noi jufra cu ka'e se steci lo ka prane ke logji jufra kei mu'u lu
([CU {du'u «(¹[da de] zo'u¹) (¹da [CU {broda «de VAU»}]¹) (¹i je [de {CU «brode da VAU²)»}]¹)» kei} VAU] IAU)
li'u
i lo nu go'i cu sarcu ma'i lo pijyske ne la kuuain
i ma'oi FA pe la zantufa cu se jicmu lo pa sidbo be fi lo ponjbogri
i sa'u si'o na'e sarcu fa lo nu te frica ma'oi FA noi sumtcita ku'o ma'oi SE noi selbri ja jonma'o ja tcita tcita
i ganai da'i prane lo ka sarji lo sidbo gi ei ma'oi FA basti ma'oi SE
i mu'a lu seva'u li'u fa'u lu segu ra gi ri li'u cu ei se basti lu feva'u li'u fa'u lu fegu ra gi ri li'u
i ku'i ma'i la camxes lo se go'i cu se stura lu ([{fe KU} {va'u KU}] VAU) li'u fa'u lu ([fe {gu ra gi ri}] VAU) li'u
i ganai da'i prane co sarji ra noi sidbo gi lo jalge cu so'i roi frica lo jalge be tu'a la camxes lo ka stura lo lojbo jufra [2]
i la'e di'u krinu lo nu la zantufa cu sarji pi so'o po'o lo sidbo
i ku'i la da'i zantufa traji cu ka'e sarji piro lo sidbo vau u'i
(to va'o da'i la'e di'u lo sance no'u zo fy cu no'e melbi ma'i lo si'o so'i roi bacru kei i se mu'ibo la'a lo sance no'u lo'u sa se si so su le'u jonai lo drada cu basti lo sance no'u lo'u fa fe fi fo fu le'u toi)
i genai cu zbasu ginai cu ponse ginai cu bevri iau lo selma'o no'u ma'oi ZOhOI ja ma'oi MEhOI ja ma'oi DOhOI
i ri noi selma'o cu se pilno fi lo nu sitsku lo na'e lojbo noi sepli ga fi canlu bu ja denpa bu fe lo lerfu porsi gi fi lo nu vokterplo ganlo ja lo nu denpa ku fe lo bacru porsi
i ri ve ctuca fu La Bangu ja la'o zoi Lojban Wave Lessons zoi fi lo du'u plixau xo'o (to fe lo se ke ropno bangu ja lo crexalbo be lo skami toi) lo nu sitsku lo pa na'e lojbo valsi
i ri mutce lo ka se nelci lo se ke lojbo xo'o cecmu
i ku'i la zantufa cu tolcru tu'a ri mu'i lo nu tu'a ri toltinbe lo flalu sedi'o la'e di'e i tu'e
fegli fi'o te steci lo gerna stura fa lo nu lo nu snada lo nu sitsku cu se sarcu tu'a lo se ckaji be lo na'e lojbo bangu po lo se sitsku be'o noi ka lo pa valsi cu sepli fi canlu bu ja denpa bu ja lo nu vokterplo ganlo ja lo nu denpa
i to'e pairnu'i tu'a lo bangu po lo se sitsku fa lo nu
ra noi selma'o cu na'e ka'e se pilno tezu'e tu'a lo polno bangu noi bau ke'a lo pa valsi cu ka'e se pagbu lo nu vokterplo ganlo ku'o kei
je lo nu sepi'o ra ka'e sitsku lo pi ro cukta be bau lo banzuxe'o ja lo banjupunu vu'o noi bau ke'a no me canlu bu jo'u denpa bu cu se nitcu
tu'u
i ji'e lo ni kakne kei lo cnino cmavo cu gau cmima lo slabu selma'o
i na zukte lo nu cuxna fi lo cmavo ma'i lo si'o plixau
i va'i ro lo cmavo cu se cuxna i ki'u bo lo nu jmina makau noi cmavo ku'o lo slabu selma'o cu na'e xlura lo nu stura melbi fa lo gerna
i mu'a lo so'i lo cnino cmavo noi se finti la'o zoi Curtis W Franks zoi ku'o noi se cmene zo kurtyvla lo se cecmu cu gau cmima lo slabu selma'o
i lo so'i la kurtyvla cu cmavo noi srana lo mekso
i lo so'i lo go'i cu se kansa lo nu stidi tu'a lo cnino selma'o
i ku'i fi'o se pensi lo nu pilno cu crutcini va'o lo mekso stura po la zantufa fa lo nu jmina ra noi cmavo ku'o lo slabu selma'o
i lo'u i JOI le'u je lo'u i (BAI) BO le'u cu stura noi jorne lo jufra jenai lo jufspi (no'u mu'a lo sumsmi je lo jonma'o je lo namcu mu'anai)
i lo jufspi cu ka'e sepli fi zo i i ku'i lo jufspi cu na ckaji lo ka jei jetnu i ku'i nai lo go'i cu na fa ja fe jorne fi lo jonma'o ma'i lo logji saske
i lo nu da'i lo jufspi cu fa ja fe jorne fi lo jorne stura po lo jufra kei cu toltinbe lo pa lo flalu po la zantufa kukuku no'u lo nu gau vajni fa lo nu sarxe lo logji saske
i ki'u lo dunli be la'e di'u lo nu curmi tu'a lo jonma'o po ma'oi NIhO noi te sepli lo porsi be lo jufra ja lo jufspi
i ki'u lo nu go'i kei la zantufa xi su'e pa cu na curmi tu'a lo jonma'o po ma'oi NIhO
i ku'i va'o lo nu da'i ma'a sanji lo nu ma'oi NIhO cu na logji selci kei kei
no da ka'e se tcica fi lo nu na'e te frica lo jonma'o po ma'oi NIhO lo jonma'o po lo logji saske
i ku'inai sedi'o lo ba ve farvi la zantufa cu ka'e curmi tu'a lo jonma'o po ma'oi NIhO
i va'o lo nu go'i kei lo so'i pagbu be la'au lo se manci te makfa pe la .oz. li'u cu se genturfa'i la zantufa
(to na'e lo ro pagbu cu co'e i ri'a bo
so'o pagbu cu na sarxe lo gerna po la zantufa mu'u lo du'u
lo'u i ba bo le'u ka'e te jorne lo jufspi kei
je lo du'u lo'u nu'i nu'u le'u je lo'u ge gi le'u cu se ke mixre pilno toi)


ni'o

klesi la zantufa

i la zantufa cu se klesi la zantufa jo'u la maltufa jo'u la cekitaus

i sa'unai tu'e

la zantufa

i la zantufa cu ralju fi lo ka genturfa'i lo se cusku be la guskant

i

la maltufa

i la maltufa cu co'a se finti seva'u xo'o lo te mabla be fi la zantufa[3]

i ku'i ce'o la maltufa cu se galfi tezu'e lo nu genturfa'i lo puzu xamgu lojbo no'u mu'a la'au la teris po'u lo tirxu cu vitke zi'o le barda tcadu li'u

noi la cipra ilmentufa je la camxes ilmentufa vu'o poi se detri li 20150810 U'yTyCy cu na genturfa'i ke'a
(to la camxes je la jbofi'e cu xamgu genturfa'i ki'u lo nu na'e stika tu'a lo cnino javni toi)
(to si'a zu'u la zantufa cu genturfa'i lo cnino ve farvi no'u la'au la .teris. ku noi tigra cu stuvi'e lo barda tcadu li'u ije zu'unai la cipra ilmentufa je la camxes ilmentufa je la camxes je la jbofi'e vu'o noi se detri li 20150810 U'yTyCy cu na genturfa'i lo se go'i [4]toi)

i

la cekitaus

i la zantufa je la maltufa cu se klesi so'o la cekitaus noi se finti tezu'e lo nu genturfa'i so'i lo cekitaus jufra

i mu'a la'au ka càtra lo vèrba li'u cu se genturfa'i la zantufa xi piso cekitaujoibus (to clani mutce isemu'ibo tezu'e lo nu genturfa'i kei ko fendi fi lo re pagbu toi)

i pi so'i lo sidbo ne la cekitaus cu se sarji i ku'i ma'i lo si'o ma'oi GA dirba kei lo'u (mo'oi ge) (i'au go) (zo'u go) (moi'oi gei ge'i) le'u mu'a cu na'e ka'e se sarji la zantufa

i ganai da'i do te sidbo lo drata cmavo lo si'o basti simxu kei gi e'u jungau la guskant noi ka'e finti lo cnino klesi be la cekitaus zantufa ja maltufa seva'u do

tu'u

ni'o

notci

  1. to zo voi noi cnino cu ja'e nenri la cekitaus jenai la zantufa ku noi ralju ku'o ki'u lo nu zo poi'i basti toi
  2. to va'o lo nu ma'oi FA basti ma'oi SE kei tezu'e lo nu jalge fa tu'a lo stura noi dunli lu ([fe {gu ra gi ri}] VAU) li'u ne la camxes kei gau jmina zo ke i sa'unai lu ([fe {ke «gu ra gi ri¹) GIhI» KEhE}] VAU) li'u (to lo nu zo ke za'o kuspe lo sumti cu plixau fi ti ji'a toi) i ja'o lo nu ma'oi FA basti ma'oi SE cu na'e rinka lo nu lo bangu cu jdika lo ka skicu kakne toi
  3. to la zantufa cu mutce lo ka mabla fi lo so'a irci ja lo so'a cafne jbopli (to va'i lo finti be La Bangu be'o jo'u lo se ke irci jbobau noi jicmu La Bangu toi) i lo se cusku be lo te mabla be fi la zantufa cu za'a dukse lo ka to'e logji ma'i la guskant kei ja'e lo nu gy na'e ke junri spuda i la zantufa cu po'o pa mei lo so'o klesi be lo genturfa'i be lo lojbo jufra i lo nu lo irci cu so'iroi cusku lo se du'u la zantufa cu mabla cu simsa lo nu lo merko se glico cu mabla tavla fi lo xindo glico iau ionai toi
  4. to mu'u la'e di'u la zantufa cu genturfa'i lo so'i lojbo jufra noi na se genturfa'i la cipra ilmentufa i ku'i lo te mabla be fi la zantufa cu cafne cusku lo se du'u la zantufa cu co'u lojbo i je'u lo nu go'i cu jarco lo ka ganlo cinmo kei no'u va'i la'o zoi egocentrism zoi ge'u po lo lojbo xo'o cecmu i va'o lo nu la zantufa noi genturfa'i la teris cu na lojbo kei la cipra ilmentufa noi na genturfa'i la teris cu mo paunai toi


ni'o

liste lo zantufa papri