lo se manci te makfa pe la .oz.

lo se mànci te màkfa pe la .oz. sei la'o gy. L. Frank Baum .gy fìnti sei la selpà'i cu fànva ni'o ni'o pa mo'o lo vilcarbì'e
	ni'o la .dòrotis. cu xàbju lo mìdju be lo gànra sastù'a pe la .kànzas. fi'o kànsa la nakfàmti .xènris. ku noi te cànge ku'o .e la fetfàmti .em. ku noi spèni lo te cànge .i lo zdàni cu cmàlu ki'u lo nu lo mùdri poi ke'a zy te zbàsu cu jai sàrcu fai lo nu lo càrce cu bèvri ve'a lo mìnli be li so'i .i zy se pàgbu lo vo bìtmu .e lo lòldi .e lo drùdi vu'o noi sùmji fa lo pa kùmfa .i ky vàsru lo furtìrse se jvìnu tòknu .e lo kajnytà'e be lo pàlta be'o .e lo jùbme .e lo ci ji'i vo stìzu .e lo ckàna .i la nakfàmti .xènris. jo'u la fetfàmti .em. cu pònse lo bàrda ckàna be bu'u pa lo kòjna .i je la .dòrotis. cu go'i lo cmàlu ckàna be bu'u lo dràta kòjna .i zàsti fa no sai drùsro je no lolnitkù'a po'u na'e bo lo cmàlu kèvna poi pu te kàkpa lo lòldi zi'e poi se cmène «lu vilcarbì'e lolnitkù'a li'u» noi lo lànzu ka'e klama la'e ke'a va'o lo nu pa lo bàrda carbì'e cu tolcànci fau lo nu tsàli bànzu lo nu da'i màrxa ro lo dìnju pe lo ra ve mùvdu .i plùta lo kèvna fo lo lòlvro be bu'u lo lòldi mìdju be'o poi lo rajysèrti cu cnìta ve klàma lo cmàlu je mànku kèvna
ni'o la .dòrotis. ca lo nu sànli bu'u lo zdàni vòrme gi'e ru'u càtlu cu ka'e vìska fa'a ro da no na'e bo lo gànra je grùsi sastù'a .i je no trìcu je no zdàni cu zvàti lo gànra je pìnta tùmla poi kùspe lo kòrbi be lo tsàni bu'u ro lo fàrna .i lo sòlri nu glàre cu ba'o rìnka lo nu lo se plìxa tùmla cu bìnxo lo grùsi pèsxu poi se fènra lo cmàlu .i lo sràsu ku ji'a sai na crìno .i ki'u bo lo solgù'i cu ba'o jèlgau lo jìpno be lo clàni sràsu co'u lo nu sy cu skàri lo mìntu grùsi se skàri poi se vìska bu'u ro da .i pa roi ku lo zdàni cu pu se cintypù'i .i ku'i lo sòlri cu gàsnu lo nu lo cìnta cu vàsru lo vàrboi .i je lo càrvi cu lùmci vìmcu .i je ca ku lo zdàni cu kàndi gi'e grùsi kei du'i tu'a ro dràta ni'o la .em. ca lo nu klàma ti te zu'e lo nu bu'u xàbju cu cìtno je mèlbi spèni .i lo sòlri jo'u lo brìfe cu cnègau .ebu ji'a .i crìgau lo kànla lo ka càrmi kei ja'e lo nu lo kànla cu sàmpu grùsi .i crìgau lo mòlmla .e lo ctèbi lo ka xùnre kei ja'e lo nu grùsi fa vo'e ji'a .i .ebu cìnla gi'e ca no roi cìsma .i ca lo nu la .dòrotis. noi rìrcau cu pa re'u klama .ebu kei .ebu tai se spàji lo nu cmila pe lo vèrba ja'e lo nu krìxa gi'e da'èrgau lo xànce lo rìsna ca ro nu tìrna lo glèki vòksa be la .dòrotis.i .ebu za'o càtlu lo cmàlu nìxli fau lo nu mànci lo nu zàsti fa da poi jai mu'i cmìla fai ny ni'o la nakfàmti .xènris. cu no roi cmìla .i xy to'e làzni gùnka co'a lo cèrni co'u lo nìcte gi'e na djùno lo du'u lo si'o glèki cu mo kau .i xy ji'a cu grùsi fe'e co'a lo ri clàni xèjykre fe'e co'u lo rùfsu cùtci gi'e se jvìnu lo jùrsa .e lo jùnri gi'e so'u roi tàvla

ni'o du la .tòtos. fa lo jai gau cmìla be fai la .dòrotis .i ty boi dy nùrgau lo nu bìnxo lo grùsi dùnli be lo dràta vànbi .i la .tòtos. na grùsi .i ty cmàlu ke xèkri gèrku gi'e se kèrfa lo clàni ke sìlka sìmlu gi'e se kànla lo cmàlu xèkri poi glèki kalga'òsli bu'u lo re mlàna be lo xàjmi je cmàtce nàzbi .i la .tòtos. cu kèlci ze'a lo mùlno djèdi .i je la .dòrotis. cu kelkànsa gi'e mùtce lo ka se dìrba ty

ni'o ku'i ca lo càbdei cu na kèlci .i la nakfàmti .xènris. cu zùtse lo vòrme sèrti gi'e xànka càtlu lo tsàni noi grùsi ba'e zmàdu lo fàdni .i la .dòrotis. cu sànli bu'u lo vòrme fau lo nu jgàri la .tòtos. lo bìrka kei gi'e si'a càtlu lo tsàni .i la fetfàmti .em. ca'o lùmci lo pàlta ni'o ra'i lo dàrno bèrti cu tìrna lo dìzlo tònga se pàtcmo pe lo brìfe .i je la nakfàmti .xènris. .e la .dòrotis. cu vìska lo nu lo sràsu cu se krorì'a lo jbibì'o viltì'a tai tu'a lo bòxna .i ba bo lo kìnli nu sìclu bu'u lo vàcri ra'i lo snànu cu cfàri .i je lo re da ca lo nu fa'a càtlu cu vìska lo cmàlu bòxna be lo sràsu bei ra'i lo di'u fàrna ku ji'a ni'o ca bo sùksa fa lo nu la nakfàmti .xènris. cu sa'irbì'o ni'o «lu lo vilcarbì'e ti mùvdu doi .em. —sei xy fi lo spèni cu clàdu cùsku— .i mi ba kùrji lo dànlu li'u» .i ba bo bàjra fa'a lo ta'òzda noi lo bàkni jo'u lo xìrma cu se sètca fi ke'a ni'o la fetfàmti .em. cu co'u gùnka gi'e klàma lo vòrme .i .ebu ca lo nu ze'i pa re'u càtlu cu djùno lo du'u ma kau ckàpe ni'o «lu ko sùtra doi. dòrotis. —sei .ebu krìxa— .i ko bàjykla lo lolnitkù'a li'u» ni'o la .tòtos. cu plipe fi lo bìrka be dy gi'e sezymìpri ni'a lo ckàna .i je lo nìxli cu co'a cpàcu klàma .i la fetfàmti .em. fau lo nu tèrpa mùtce cu kàrgau lo lòlvro be bu'u lo lòldi gi'e fa'a ni'a cpàre lo rajysèrti se ka'a lo cmàlu je mànku kèvna .i la .dòrotis. cu ro mai kàvbu la .tòtos. gi'e co'a jèrsi lo fetfàmti .i ca lo nu ba'o xàdba pàgre lo kùmfa cu se sànce lo clàdu sàvru fa lo brìfe .i je lo zdàni cu tai rùfsu slìlu ja'e lo nu dy gau co'u sànli gi'e jai suksa fai lo nu tsebì'o lo lòldi ni'o ba bo lo cìzra cu fàsnu ni'o lo zdàni cu re ji'i ci roi càrna gi'e màsno lo nu galzè'a pa'o lo vàcri .i la .dòrotis. cu cìnmo lo sìmsa be lo ka galzè'a fau lo nu nènri lo vartìsyboi ni'o lo bèrti fa'u snànu brìfe cu pensì'u lo stìzu be lo zdàni ja'e lo nu zy bìnxo lo sàtci mìdju be lo vilcarbì'e .i bu'u lo mìdju be lo vilcarbì'e lo vàcri cu tà'e bìfcau .i ku'i lo bàrda ni lo brìfe cu dànre bu'u ro lo mlàna be lo zdàni cu rìnka lo nu lo zdàni cu zènba je zènba lo ka gàltu kei co'u lo nu zvàti lo pràne galràipau be lo vilcarbì'e .i je stàli gy gi'e to'o se bèvri ve'a lo mìnli be lo so'i se kai lo ka frìli dùnli lo nu bèvri lo pìmlu ni'o mùtce lo ka mànku .i je lo brìfe cu màbla cmòni ru'u la .dòrotis .i ku'i dy co'a sànji lo du'u se màrce se frìli .i ba lo pa moi be lo su'o mei co nu ru'u càrna .e lo pa drata jai ca nu lo zdàni cu mùtce lo ka mlàpau càrna cu cìnmo lo ka toljùrsa se slìgau tai tu'a lo cìfnu pe bu'u lo slìcka

ni'o la .tòtos. na nèlci .i bàjra ru'u bu'u lo kùmfa fau lo nu zvàti nu'i ge ca pa da ti nu'u gi ca pa de ta fau lo nu clàdu cmòni .i ku'i la .dòrotis. cu smàji zùtse lo lòldi gi'e dènpa te zu'e lo nu zgàna lo da'i ba fàsnu ni'o pa roi ku la .tòtos. cu bìnxo lo dùkse be lo ka jìbni lo kàlri lòlvro kei gi'e pa'o fàrlu .i pa mai lo cmàlu nìxli cu jìnvi lo du'u ba'o cìrko ty .i ku'i ba zi vìska lo nu pa lo kèrlo cu pàgre lo vòrme .i ki'u bo lo bàrda ni dànre pe lo vàcri cu stògau ty lo ka gàltu kei ja'e lo nu na ka'e fàrlu .i ny cpàre fi lo vòrme gi'e co'a jgàri la .tòtos. fo lo kèrlo gi'e làcpu ty fa'a lo nènri be lo kùmfa gi'e ba bo ga'òrgau lo lòlvro te zu'e lo nu no se jmìna snùti ka'e fàsnu

ni'o so'i lo càcra cu se fànmo .i je màsno fa lo nu la .dòrotis. cu bìnxo lo ka co'u tèrpa .i ku'i dy cìnmo lo ka sèpcni mùtce .i je lo brìfe cu tai clàdu se sànce ja'e lo nu dy na ru'e bìnxo lo tinynalkà'e .i ca lo cfàri dy kùcli lo du'u xu kau dy ba se màrxa ja'e lo so'i spìsa va'o lo nu lo zdàni cu di'a fàrlu .i ku'i fau lo nu lo càcra cu se fànmo .e lo nu no xlàtce cu fàsnu kei dy co'u xànka gi'e jdìce lo nu smàcni dènpa gi'e fàcki lo du'u lo bàlvi cu mo kau .i ro mai dy cpàre lo dèsku lòldi lo vo'a ckàna gi'e vrebì'o lo gàpru .i je la .tòtos. cu jèrsi gi'e vrebì'o lo jìbni be dy

ni'o to'e ki'u nai lo nu lo zdàni cu slìlu .e lo nu sàvru se sànce fa lo brìfe kei la .dòrotis. cu ba zi ga'òrgau lo kànla gi'e sipybì'o

ni'o ni'o re mo'o lo nu pènmi lo màxpre
ni'o la .dòrotis. cu se cikyrì'a lo jènca poi tai sùksa gi'e tai jùrsa vau ja'e lo nu da'i la .dòrotis. va'o lo nu na cpàna lo rànti ckàna cu se xràni .i da'i nai lo jènca cu rìnka lo nu dy cu bàrda vàsxu gi'e kùcli lo du'u ma kau pu fàsnu .i je la .tòtos. cu pùnji lo ri lènku ke cmàlu nàzbi lo flìra be dy gi'e bàdri pàtcmo .i la .dòrotis. cu tsebì'o gi'e sajbì'o lo nu ge nai lo zdàni cu mùvdu gi na'e mànku ki'u lo càrmi solgù'i cu pàgre lo cànko fau lo nu cùlgau lo cmàlu kùmfa .i dy plìpe fi lo ri ckàna gi'e bàjra fau lo nu la .tòtos. cu jìbni jèrsi kei gi'e kàrgau lo vòrme
ni'o lo cmàlu nìxli cu mànci krìxa gi'e ru'u càtlu fau lo nu lo kànla cu bànro je bànro se ja'e lo nu vìska lo tai se mànci ni'o lo vilcarbì'e pu toljùrsa mùtce pùnji (to ma'i lo vilcarbì'e toi) lo zdàni lo mìdju be lo se mànci mèlbi gùgde .i zvàti fa lo kùkte sastù'a pe lo mèlbi trìcu poi se dàndu lo rìcfu je kùkte grùte .i lo fòldi be lo mlècai xrùla cu zvàti ro lo mlàna .i je lo cìpni pe lo rìrci je càrmi pìmlu cu sànga gi'e na'irsùtyvoi ne'i lo trìcu .e lo dèmspa .i va lo tòrdu mìlxe da cmàlu rìrxe gi'e mùvdu je mìrcai pàgre lo jbìni be lo crìno sastù'a gi'e kàndi bàcru se pi'o lo vòksa poi mùtce lo ka jai te ckìre fi lo cmàlu nìxli poi xàbju ze'a lo tai clàni lo sùdga je grùsi sastù'a ni'o la .dòrotis. ca lo nu ca'o kùcli càtlu lo cìzra joi mèlbi vànbi cu co'a sànji lo poi fa'a dy klàma ku'o gùnma be lo cìzrai be lo ro prènu poi dy ke'a ba'o vìska .i lo prènu cu cmàmau lo màkcu poi dy ke'a se slàbu .i ku'i ji'a na mùtce lo ka cmàlu .i je'u py sìmlu lo ka cladù'i la .dòrotis. ku noi bànro sùtra ma'i lo na'àsmi vèrba kei gi'e ku'i jvìnu sìmlu lo ka na'àzma dy li so'i

ni'o gùnma lo ci nànmu .e lo pa nìnmu .i je ro se go'i cu dàsni lo cìzra .i dàsni lo cùkla màpku poi kònju fi lo cmàlu poi gùtci li pa lo ni gàpru lo stèdu ku'o ku'o zi'e pe lo màpku srùri ke cmàlu jànbe poi jabysèlsna lo tìtla ca lo nu mùvdu .i lo màpku pe lo nànmu cu blànu .i je lo màpku pe lo cmàlu nìnmu cu blàbi .i je ny cu dàsni lo blàbi pàstu poi cìnje dàndu lo jànco .i py se bàrna lo so'i tàrci poi càrmi bu'u lo solgù'i tai tu'a lo tàbjme .i lo nànmu cu dàsni lo blànu pe lo mìntu selskàlei pe lo màpku gi'e dàsni lo xàmgu se spàli cùtci poi lo blànu bòlci cu jòrne ke'a lo jìpci .i lo nànmu (to la .dòrotis. cu jìnvi toi) cu kàijbi lo ka dùnli la nakfàmti .xènris. lo ka tolcì'o .i ki'u bo lo re mei cu se xèjykre .i ku'i lo cmàlu ke tolcì'o nìnmu cu ju'o sai tolcì'o zmàdu mùtce .i lo flìra be ny cu se gàcri lo cìnje .i lo kèrfa be ny cu na ru'e blàbi .i je ny cu tìnsa nàlmli càdzu

ni'o lo bi'u nai prènu ca lo nu jbibì'o lo zdàni noi la .dòrotis. cu sànli lo ke'a vòrme cu klàsti gi'e làuble càsnu vau tai lo nu tèrpa lo nu zènba lo ka jìbni .i ku'i lo cmàlu ke tolcì'o nìnmu cu klàma la .dòrotis. gi'e krobì'o rìnsa gi'e cùsku se pi'o lo tìtla vòksa ni'o «lu do zanvì'e doi nòbli te màkfa lo gùgde ba la màxpre .i mi'a do tai ckìre lo nu do ba'o càtra la pàlci termafyfè'i pe la stùna kei .e lo nu tolpìfygau lo mi'a se gùgde li'u» ni'o la .dòrotis. cu tinjù'i lo se cùsku fau lo nu se cfìpu .i ki'u ma lo cmàlu nìnmu cu te cmène dy «lu te màkfa li'u gi'e xùsra lo du'u dy càtra la pàlci termafyfè'i pe la stùna .i la .dòrotis. cu zernalfù'e je nalckàpe ke cmàlu nìxli gi'e se bèvri lo vilcarbì'e ve'a lo mìnli be li so'i .i je ze'a pi ro lo nunjì'e dy no roi càtra da ni'o ku'i lo cmàlu nìnmu cu za'a kànpe lo nu dy cu spùda .i se ki'u bo la .dòrotis. se cau lo nu dènpa cu cùsku «lu do mùtce lo ka xèndo .i ku'i ju'o da se srèra .i mi no da càtra li'u»

ni'o «lu se ju lo do zdàni cu co'e —sei lo cmalu ke tolcì'o nìnmu fau lo nu cìsma cu cùsku— .i je la'e di'u mìntu .i ko càtlu —sei ny fau lo nu degjà'o lo kòjna be lo zdàni cu di'a co'e— .i lo re jàmfu be ty cu za'o bàncu fi lo cnìta be lo mùdri blìku li'u» ni'o la .dòrotis. cu càtlu gi'e krìxa co tèrpa .i je'u va ku lo cnìta be lo kòjna be lo bàrda kàmju poi lo zdàni cu se sàrji ke'a cu kràsi lo re jàmfu poi dàsni lo rìjno cùtci pe lo kìnli cràpauụ

ni'o «lu ĭi ĭi —sei la .dòrotis. cu tèrpa krìxa be fau lo nu xànce jalsìmgau— .i ju'o lo zdàni pu fàrlu ta .i .ei mi'o mo li'u» ni'o «lu no da se bìlga —sei lo cmàlu nìnmu cu nalselrà'u cùsku— li'u» ni'o «lu ku'i ta mo —sei la .dòrotis. cu rètsku— li'u» ni'o «lu ke'u ta me la pàlci te màkfa pe la stùna —sei lo cmàlu nìnmu cu spùsku— .i se pìnfu ro la màxpre ze'a lo nànca be li so'i fau lo nu la màxpre cu sèlfu ze'a lo nìcte .e lo dònri .i ca ku ro la màxpre cu zìfre gi'e ckìre do lo nu xagzù'e li'u» ni'o «lu la màxpre cu mo —sei la .dòrotis. cu te prèti— li'u» ni'o «lu vy se gùgde lo vi gùgde pe la stùna ge'u noi la pàlci termafyfè'i pu tùrni li'u» ni'o «lu xu do màxpre —sei la .dòrotis. cu rètsku— li'u» ni'o «lu na go'i .i ku'i mi pèndo my to'e ki'u nai lo nu mi xàbju lo gùgde pe la bèrti .i la màxpre ca lo nu vìska lo nu lo te màkfa pe la stùna cu mòrsi cu bènji lo nòtybei mi .i je mi klama zi .i mi'e la te màkfa pe la bèrti li'u» ni'o «lu ŭe sai —sei la .dòrotis. cu krìxa— .i xu do jètnu termafyfè'i li'u» ni'o «lu je'u go'i —sei lo cmàlu nìnmu cu spùsku— .i ku'i mi vrùde termafyfè'i .i je lo prènu mi pràmi .i mi vlìpa mlèca la pàlci termafyfè'i ku poi vi tùrni .i se va'o nai bo da'i ba'emi pu tolpìfygau lo prènu li'u» ni'o «lu ku'i mi pu srùma lo du'u ro termafyfè'i cu pàlci —sei lo nìxli noi xàdba tèrpa lo nu jìkca lo jètnu termafyfè'i cu cùsku— li'u» .i «lu la'e di'u se srèra .i pu zàsti fa lo vo po'o termafyfè'i bu'u lo mùlno gùgde pe la .oz .i re boi ty poi xàbju la bèrti fa'u la snànu cu vrùde termafyfè'i .i mi djùno lo du'u jètnu kei ki'u lo nu mi me lo vo mei .i lo xàbju be la stùna be'o .e lo xàbju be la stìci cu je'u pàlci termafyfè'i .i ku'i ca lo càbna poi nu do ba'o càtra pa boi ty cu zvàti lo mùlno gùgde pe la .oz. fa pa po'o pàlci termafyfè'i no'u la xàbju be la stìci li'u» ni'o «lu ku'i —sei la .dòrotis. ba lo nu ze'i pènsi cu cùsku— la fetfàmti .em. mi pu jùngau lo du'u lo ro termafyfè'i cu mrobì'o pu za lo nànca be li so'i so'i li'u» ni'o «lu la fetfàmti .em. cu mo —sei lo cmàlu ke tolcì'o nìnmu cu te prèti— li'u» ni'o «lu .ebu fetfàmti mi gi'e xàbju la .kànzas. ku noi mi pu klàma fi ke'a li'u» ni'o la termafyfè'i pe la bèrti cu sìmlu lo ka ze'a pènsi kei fau lo nu lo vo'a stèdu cu nitsàlpo joi lo nu lo kànla cu se fàrna lo lòldi .i ba bo ty cu fa'a ga'u càtlu gi'e cùsku «lu mi na djùno lo du'u ma kau stùzi la .kànzas .i ki'u bo mi pu no roi tìrna lo nu lo bi'u nai gùgde cu te tàvla .i ku'i ko mi jùngau .i xu ky cu lùjyklu gùgde li'u» ni'o «lu ja'a go'i —sei la .dòrotis. cu spùsku— li'u» ni'o «lu ja'o la'e di'u krìnu .i ĭa bu'u lo lùjyklu gùgde no termafyfè'i cu za'o jmìve .i je nai su'o màfcre ja su'o màfpli ja su'o te màkfa cu go'i .i ku'i lo gùgde pe la .oz. pu no roi se lujyklùgau .i ki'u bo mi'a sèpli pi ro lo ve vìmcu be fi lo mùnje .i se ki'u bo za'o me mi'a fa lo termafyfè'i .e lo te màkfa li'u» ni'o «lu te màkfa fa ma —sei la .dòrotis. cu rètsku— li'u» ni'o «lu la .oz. cu du la bànli te màkfa —sei la termafyfè'i fau lo nu laurjdìkygau lo vòksa ja'e lo nu toncaubà'u cu spùsku— .i .obu vlìpa zei zmàdu lo ro mi'a poi gùnma .i .obu xàbju la ri'òjme tcàdu li'u» ni'o la .dòrotis. cu pu'o da'i te prèti fi lo se jmìna .i ku'i ca ku la màxpre ku noi pu ca'o pu ca'o ne'a smàji sànli cu clàdu cmòni gi'e degjà'o lo kòjna be lo zdàni be'o noi la pàlci termafyfè'i pu ca'o vrèta ni'o «lu mo li'u» se rètsku lo cmàlu ke tolcì'o nìnmu noi càtlu gi'e co'a cmìla .i lo jùbme be lo mòrsi termafyfè'i cu ba'o mo'u cànci .i je no da po'u na'e bo lo rijyska cùtci cu ve vìmcu

ni'o «lu ty pu tai tolcì'o —sei la termafyfè'i pe la bèrti cu cìksi— ja'e lo nu sùtra lo nu sudbì'o bu'u lo solgù'i .i lo càbna cu fànmo ty .i ku'i lo rìjno cùtci ca me do moi .i je .ei do dàsni li'u» .i ty tèngau lo bìrka gi'e lèbna lo cùtci .i je ba lo nu dèsygau vìmcu lo lo pùlce lo nènri be cy cu dùnda cy la .dòrotis. ni'o «lu la termafyfè'i pe la stìci pu jgìra tu'a lo va cùtci —sei pa la màxpre cu cùsku— .i je cy cu vàsru da poi màkfa .i ku'i lo du'u ma kau màkfa zo'u: mi'a pu no roi djùno li'u»

ni'o la .dòrotis. cu bèvri lo cùtci lo nènri be lo zdàni gi'e pùnji cy lo jùbme .i ba bo dy cu bàrtu xrùti la màxpre gi'e cùsku ni'o «lu mi càrmi lo ka djìca lo nu xrùti lo mi fetfàmti .e lo mi nakfàmti .i ki'u bo mi bìrti lo du'u ra xànka tu'a mi .i xu do mi ka'e sìdju lo nu mi fàcki lo du'u ma kau plùta li'u» ni'o la màxpre joi la termafyfè'i cu càtlu sìmxu gi'e ba bo càtlu la .dòrotis. gi'e ba bo dèsygau lo vo'a stèdu ni'o «lu na'e vu bu'u la stùna —sei pa boi my cu cùsku— cu bàrda kutytù'a .i je no da ka'e pàgre li'u» ni'o «lu mìntu bu'u la snànu —sei lo dràta cu cùsku— .i ki'u bo mi ba'o zvàti gi'e ba'o vìska .i la snànu cu gùgde la vònpre li'u» ni'o «lu ti'e —sei lo ci moi be lo nànmu cu cùsku— mìntu bu'u la stìci .i je lo va gùgde noi la .ŭìnkis. cu xàbju cu se tùrni la pàlci termafyfè'i pe la stìci ge'u ku noi sèfygau do va'o lo nu da'i do lampàgre li'u» ni'o la bèrti cu zdàni mi —sei lo tolcì'o nìnmu cu cùsku— .i je se kòrbi lo mìntu ke bàrda kutytù'a poi srùri lo vi gùgde pe la .oz .i ŭu ru'a doi pe mi dìrba do bi'ai xàbju kànsa mi'a li'u» ni'o la .dòrotis. cu co'a klàku fi la'e di'u .i ki'u bo dy cu cìnmo lo ka nonkànsa bu'u lo ro vi fànge prènu .i lo se klàku be dy cu sìmlu lo ka drìgau la xèndo màxpre .i ki'u bo my cu ba zi lèbna lo vo'a zbibù'u gi'e si'a co'a klàku .i lo cmàlu ke tolcì'o nìnmu zo'u: ny toldasybì'o lo ri màpku gi'e lànxe cpànygau lo te kònju lo vo'a nàzbi ca lo nu kàncu cùsku «lu pa .i re .i ci li'u» se pi'o lo jùnri vòksa .i ba zi bo lo màpku cu bìnxo lo tànbo noi te cìska se pi'o lo bàrda je blàbi ke bàkri lèrfu KÒ CÙRMI LO NU LA. DÒROTIS. CU KLÀMA LA RI'ÒJME TCÀDU li'u» ni'o lo cmàlu ke tolcì'o nìnmu cu lèbna lo tànbo lo ra nàzbi gi'e rètsku ca lo nu ba'o tcìdu lo vàlsi kei «lu xu do se cmène zo .dòrotis. doi dìrba li'u» ni'o «lu go'i —sei lo vèrba fau lo nu fa'a ga'u càtlu gi'e sùdgau lo se klàku cu spùsku— li'u» ni'o «lu va'o ku do klàma .ei la ri'òjme tcàdu .i ju'o cu'i la .oz. do ba sìdju li'u» ni'o «lu ma stùzi lo tcàdu —sei la .dòrotis. cu rètsku— li'u» ni'o «lu lo pràne mìdju be lo gùgde .i se tùrni la .oz. no'u la bànli te màkfa poi mi pu tàvla do ke'a li'u» ni'o «lu xu .obu xàmgu nànmu —sei lo nìxli cu xànka te prèti— li'u» ni'o «lu .obu xàmgu te màkfa .i lo du'u xu kau nànmu cu na ka'e se djùno mi .i ki'u bo mi no roi vìska .obu li'u» ni'o «lu ta'i ma mi ka'e klàma —sei la .dòrotis. cu rètsku— li'u» ni'o «lu .e'i do càdzu .i clàni nu lìtru pa'o lo gùgde poi su'o roi jai plùka gi'e su'o roi mànku joi màbla .i ku'i mi ba pìlno ro lo màkfa làrcu poi mi se slàbu ku'o te zu'e lo nu do se bàndu fi lo ckàpe li'u» ni'o «lu xu na ku do mi klàma kànsa —sei lo nìxli noi pu co'a jìnvi lo du'u lo cmàlu ke tolcì'o nìnmu ku po'o pèndo cu cpèdu cùsku— li'u» ni'o «lu na go'i .i mi na kàkne —sei ny spùda— .i ku'i mi do ba cìnba .i no da dàrsi lo nu crògau lo prènu poi ba'o se cìnba la termafyfè'i pe la bèrti li'u» ni'o ny jbìkla la .dòrotis. gi'e toljùrsa cìnba dy lo mèbri .i tolcànci lo ve pèncu be lo nìxli bei lo ctèbi fa lo pa cùkla je càrmi bàrna (to la .dòrotis. cu ba za fàcki toi) ni'o «lu lo dàrgu be la ri'òjme tcàdu cu se gàcri lo pèlxu kìtybli —sei la termafyfè'i cu cùsku— .i se ki'u bo frìli fa lo nu tòlcri .i ko ca lo nu do tolclìva la .oz. cu na tèrpa tu'a .obu gi'e cpèdu lo nu .obu do sìdju .i co'o pe mi dìrba li'u» ni'o lo ci màxpre cu dìzlo krobì'o fa'a dy gi'e zandàpma dy lo plùka nunlì'u gi'e ba bo to'o càdzu pa'o lo trìcu .i la termafyfè'i cu xèndo ke stèdu mùvdu fa'a la .dòrotis. gi'e ci roi càrna fi'o te sànli lo jmatì'e gi'e jai sùksa fai lo nu cànci .i la'e di'u fànza zei mùtce la .tòtos. ku noi fa'a clàdu gèrcmo ca lo nu ba'o cànci kei ki'u lo nu ty pu tèrpa lo nu gèrcmo ca lo nu la termafyfè'i cu ca'o zvàti ni'o ku'i la .dòrotis. ki'u lo nu djùno lo du'u ty cu termafyfè'i cu kànpe lo nu ty cu cànci du'i la'e di'u .i je dy na sai se spàji

ni'o ni'o ci mo'o lo nu la .dòrotis. cu nùrgau la cpitèpygau
	ni'o la .dòrotis. ca lo nu no dràta cu zvàti cu co'a xàgji .i ja'e bo dy cu klàma lo kajnytà'e gi'e se va'u kàtna lo nànba noi dy pùnji lo màtne ke'a .i dùnda lo pi su'o si'e la .tòtos. gi'e lèbna lo bàktu lo kàjna gi'e bèvri by lo cmàlu rìrxe gi'e tìsygau by lo klìna je càrmi djàcu .i la .tòtos. cu bàjra klàma lo trìcu gi'e co'a bàtci fa'a lo cìpni poi zùtse ty .i la .dòrotis. cu klàma te zu'e lo nu cpàcu la .tòtos. kei gi'e vìska lo tai kùkte grùte poi dàndu lo jìmca ku'o ja'e lo nu jàjgau lo pi so'u si'e fau lo nu jìnvi lo du'u pràne lo ka màpti lo nu jmìna fi lo cèrsai
ni'o ba bo dy cu xrùti lo zdàni .i je ca lo nu ba'o gàsnu lo xàmgu nu vo'a .e la .tòtos. cu pìnxe lo lènku je klìna djàcu cu co'a zùkte lo nu brebì'o lo nu lìtru se ka'a la ri'òjme tcàdu ni'o la .dòrotis. cu pònse pa po'o tàxfu .i ku'i je'u ty jìnsa gi'e dàndu lo gràna be ne'a lo ckàna .i ty marji lo gingàmu ne lo blàbi jo'u blànu kùrfa .i je ty. to'e ki'u nai gi lo blànu cu ba'o milxe lo ka kadbì'o gi'a'a mèlbi tàxfu .i lo nìxli cu srerivzù'e sezlù'i gi'e dasybì'o lo jìnsa gingàmu bo tàxfu gi'e làsna lo xunblàbi solmàpku lo stèdu be ny .i ny lèbna lo cmàlu lànka gi'e clùgau ly lo nànba pe lo kajnytà'e fau lo nu pùnji lo blàbi bùkpu lo gàpru .i ba bo ny. fa'a ni'a càtlu lo ny. jàmfu gi'e sajbì'o lo du'u ma kau ni lo cùtci pe ny cu làldo ni'o «lu ju'o ti na bànzu lo clàni nunlì'u doi. tòtos. —sei dy cùsku— li'u» .i je la .tòtos. cu fa'a ga'u càtlu lo flìra be dy te ga'a lo vo'a cmàlu ke xèkri kànla gi'e dèsygau lo rèbla te zu'e lo nu jàrco lo ka djùno lo du'u dy ma kau skùdji ni'o ca bo la .dòrotis. cu vìska lo nu cpàna lo lòldi fa lo rìjno cùtci poi pu se pònse la termafyfè'i pe la stùna ni'o «lu mi kùcli lo du'u xu kau cy mi màpti —sei dy fi la .tòtos. cu cùsku— .i cy màpti ju'o lo bàrda nu càdzu se pi'o cy .i ki'u bo da'i cy cu no roi selplidù'e li'u» ni'o dy co'u dàsni lo ri tolcì'o ke skàpi cùtci gi'e tròci co dàsni lo rìjno cùtci noi màpti zei pràne dy tai lo nu da'i cy pu se zbàsu te zu'e tu'a dy ni'o ro mai làfti lo lànka ni'o «lu ko klàma doi. tòtos. —sei dy cùsku— .i mi'o ba klàma la ri'òjme tcàdu gi'e rètsku fi la bànli .oz. fe lo se du'u ta'i ma kau xrùti la .kànzas. li'u» ni'o dy ga'òrgau lo vòrme gi'e tèlgau gi'e ràlci sètca lo ckìku lo dàski be lo tàxfu .i ja'e bo fau lo nu la .tòtos. cu cìkcni ke càdzu jèrsi co co'a lìtru ni'o so'o da jìbni dàrgu .i ku'i la .dòrotis. na nìtcu lo clàni se dìtcu lo nu tòlcri lo dàrgu poi se gàcri lo pèlxu kìtybli .i ba zi lo tòrdu dy ca'o càdzu sùtra fa'a la ri'òjme tcàdu fau lo nu lo vo'a rìjno cùtci cu glèki jabysèlsna do'e lo jdàri je pèlxu ke dàrgu sèfta .i lo sòlri cu càrmi te gùsni .i je lo cìpni cu tìtla sànga .i je la .dòrotis. cu na sai xlàli cìnmo du'i lo noi ju'o cu'i do ke'a kànpe ku'o nu lo nìxli poi pu jai sùksa fai lo nu se vìmcu fi lo zdàni gùgde gi'e se pùnji fi lo mìdju be lo fànge gùgde cu ja'a no'a

ni'o dy se spàji ca lo nu ca'o càdzu kei lo nu lo srùri gùgde cu tai mèlbi .i lo cnìci bìtmu cu zvàti lo re mlàna be lo dàrgu gi'e zilcintypù'i lo kùkte blànu .i je ze'o lo bìtmu cu fòldi lo gùrni .e lo te stàgi fa lo so'i rau mei .i za'a la màxpre cu cèrtu te cànge gi'e kàkne lo ka kùrji lo bàrda te crèpu .i di'i ru'e ku la .dòrotis. cu lampàgre lo zdàni .i je lo prènu cu bàrkla te zu'e lo nu càtlu dy gi'e krobì'o fa'a dy ca lo nu dy cu lampàgre .i ki'u bo ro da djùno lo du'u dy pu tùtci lo nu dàspo la pàlci termafyfè'i gi'e sefselfàmgau my .i lo zdàni pe la màxpre cu cizyseljì'u dìnju .i ni'i bo zy cu slànu .i je drùdi fa lo bolxàdba .i ro boi zy cu zilcintypù'i fa lo blànu .i ki'u bo bu'u lo vi gùgde pe la stùna lo blànu cu selneirai skàri

ni'o ca lo nu co'a vànci noi nu la .dòrotis. co'a tàtpi lo nu ve'u càdzu kei gi'e co'a kùcli lo du'u .ei dy ma kau zvàti ze'a lo nìcte zo'u: dy tolclìva lo zdàni poi nàlmli lo ka bràmau lo dràta .i bu'u lo crìno sastù'a be ca'u zy cu dànsu fa lo so'i nànmu .e lo so'i nìnmu .i lo mu cmàlu vèrba cu kèlci se rai lo ka clàdu .i je lo prènu cu cmìla gi'e sànga .i fau bo lo ne'a jùbme cu cùlno lo kùkte grùte fa'u nàrge .e lo pèsxu .e lo titnànba .e lo so'i dràta ke xàmgu cìdja

ni'o lo prènu cu xèndo rìnsa la .dòrotis. gi'e frìti lo nu dy cu kànsa py lo nu vàcysai cìtka .i ki'u bo ti zdàni lo pa cmima be lo cfurai be la màxpre ku pe lo gùgde .i je lo pèndo be cy cu jmàji cy te zu'e lo nu sàlci lo nu zìfre lo ka na sèlfu la pàlci termafyfè'i ni'o la .dòrotis. cu cìtka lo kùkte vàcysai gi'e se sèlfu lo rìcfu màxpre noi se cmène zo .bok .i ba bo dy cu tsebì'o lo sfòfa gi'e càtlu lo nu lo prènu cu dànsu ni'o ca lo nu la .bok. cu vìska lo rìjno cùtci pe la .dòrotis. cu cùsku «lu ju'o ru'a do bànli te màkfa li'u» ni'o «lu ki'u ma —sei lo nìxli cu rètsku— li'u»

ni'o «lu ki'u lo nu do dàsni lo rìjno cùtci gi'e pu càtra la pàlci termafyfè'i .i ji'a lo do tàxfu cu vàsru lo blàbi .i je no na'e bo lo termafyfè'i cu dàsni lo blàbi li'u» ni'o «lu lo mi tàxfu cu se prìna lo blànu jo'u blàbi kùrfa —sei la .dòrotis. fau lo nu xùlgau vìmcu lo cìnje be ty— li'u» ni'o «lu do xèndo lo nu dàsni ta —sei la .bok. cu cùsku— .i blànu fa lo skàri pe la màxpre .i je blàbi fa lo skàri pe lo termafyfè'i .i ja'o mi'a djùno lo du'u do xèndo termafyfè'i li'u» ni'o la .dòrotis. cu na djùno lo du'u .ei spùda la'e di'u ma kau .i ki'u bo ro lo prènu cu sìmlu lo ka jìnvi lo du'u dy termafyfè'i .i je dy cu ja'a sai djùno lo du'u sa'u dy fàdni ke cmàlu nìxli gi'e fùnca klàma ri'a lo vilcarbì'e lo cìzra gùgde ni'o ca lo nu dy ba'o co'a tàtpi lo nu càtlu lo nundànsu kei la .bok. cu klagì'a dy lo zdàni nènri noi bu'u ke'a by dùnda fi dy fe lo kùmfa poi vàsru lo mèlbi ckàna .i lo ckàgai cu màrji lo blànu bùkpu .i je la .dòrotis. cu pànpi sìpna se ru'u cy co'u lo cèrni

ni'o dy cìtka lo rìcfu cèrsai gi'e càtlu lo cmàlu ke màxpre cìfnu noi kèlci la .tòtos. gi'e làcpu lo rèbla gi'e ge krìxa gi cmìla vau tai da poi la .dòrotis. cu mùtce lo ka se zdìle ke'a .i la .tòtos. cu xàmgu cìnri lo ro prènu .i ki'u bo py cu pu no roi vìska lo gèrku

ni'o «lu ma ni dàrno la ri'òjme tcàdu —sei lo nìxli cu te prèti— li'u» ni'o «lu mi na djùno —sei la .bok. cu jùnri spùda— .i ki'u bo mi no roi zvàti ty .i xàgmau fi lo prènu fa lo nu dàrno la .oz. va'o lo nu na se cùntu fa py joi .obu .i ku'i clàni ve klàma la ri'òjme tcàdu .i je lo djèdi be li so'i ba dìtcu .i lo vi gùgde cu rìcfu gi'e plùka .i ku'i do nìtcu lo nu pàgre lo rùfsu je ckàpe stùzi pu lo nu do tolclìva lo fànmo be lo do nunlì'u li'u» ni'o la'e di'u mìlxe se xànka la .dòrotis. .i ku'i dy djùno lo du'u no na'e bo la .oz. cu ka'e sìdju dy lo nu xrùti la .kànzas. .i se mu'i bo dy cu vìrnu jdìce lo du'u na ba tolselfarbì'o ni'o dy tolrìnsa lo pèndo be dy gi'e za'u re'u co'a lìtru lo pèlxu kìtybli dàrgu .i ca lo nu ba'o klàma ve'a lo mìnli be li so'i cu jdìce lo nu klàsti te zu'e lo nu sùrla .i ja'e bo pàrkla lo gàpru be lo bìtmu poi jìbni lo klàji ku'o gi'e tsebì'o .i lo bàrda grùfoi cu ràgve lo bìtmu .i je lo naldàrno zo'u dy vìska lo cpitèpygau noi gàltu zvàti lo gràna te zu'e lo nu fànta lo nu lo cìpni cu jbibì'o lo màkcu gùrni

ni'o la .dòrotis. cu cpànygau lo xejnì'a lo xànce gi'e pènsi càtlu la cpitèpygau .i stèdu cy fa lo cmàlu dàkli noi tersè'a lo sudysràsu zi'e noi lo kànla .e lo nàzbi .e lo mòklu cu pu te zu'e lo nu sìnxa lo flìra .i lo tolcì'o ke kiljì'o je blànu màpku poi pa la màxpre pu pònse ke'a cu ba'o se pùnji fi lo gàpru be lo stèdu be cy .i je lo te zilvì'u be lo prènu cu màrji lo blànu tàxfu noi ba'o selplidù'e gi'e ba'o kadbì'o ku'o gi'e ji'a tersè'a lo sudysràsu .i lo jùbme cu dàsni lo tolcì'o cùtci ne lo blànu jìpno (to dùnli lo se dàsni be lo ro prènu poi xàbju lo vi gùgde toi) .i je lo bi'u nai prènu cu gau gàltu fi lo stàni be lo gùrni se pi'o lo gràna poi pàgre lo trìxe be py ni'o ca lo nu la .dòrotis. cu ca'o jùnri càtlu lo cìzra je se cintypù'i flìra be la cpitèpygau kei dy se spàji lo nu vìska lo nu pa lo kànla cu màsno kalgaislìgau lo kànla .i dy ca lo cfàri cu jìnvi lo du'u ju'o dy srèra .i ki'u bo no lo cpitepygàu pe la .kànzas. cu su'o roi kalgaislìgau lo kànla .i ku'i nau ku lo prènu cu sedyfarmù'u fa'a dy tai lo te xèndo .i ba bo dy nitpàrkla lo bìtmu gi'e càdzu fa'a py fau lo nu la .tòtos. cu ru'u lo gràna cu bàjra gi'e gèrcmo

ni'o «lu coi —sei la cpitèpygau cu sùdga vòksa cùsku— li'u» ni'o «lu xu do pu tàvla —sei lo nìxli fau lo nu mànci cu rètsku— li'u» ni'o «lu ju'o —sei la cpitèpygau cu spùda— .i ma do li'i càbna li'u» ni'o «lu lo xàmgu ki'e do'u —sei la .dòrotis. cu clìte spùsku— .i ma do li'i càbna li'u» ni'o «lu mi na cìnmo lo plùka —sei la cpitèpygau fau lo nu cìsma cu cùsku— .i ki'u bo mùtce lo ka tòlzdi kei fa lo nu ca ge lo nìcte gi lo dònri cu tèpygau lo kòrvo li'u» ni'o «lu xu na kàkne lo nu fa'a ni'a klàma —¬¬sei la .dòrotis. cu rètsku— li'u» ni'o «lu na go'i .i ki'u bo lo vi gràna cu pàgre lo mi trìxe .i .e'o va'o gi do vìmcu lo gràna gi mi mùtce lo ka ckìre do li'u» ni'o la .dòrotis. cu pèjgau lo re bìrka gi'e viclàfti lo prènu lo gràna .i ki'u bo py ri'a lo nu tersè'a lo sudysràsu cu lìnto tcèmli ni'o «lu ki'e sai do —sei la cpitèpygau ca lo nu ba'o pùnji lo lòldi cu cùsku— .i mi cìnmo lo ka cnìno prènu li'u» ni'o la .dòrotis. cu se spàji la'e di'u .i ki'u bo sìmlu lo ka cìzra kei fa lo nu tìrna lo nu lo tersè'a nànmu cu tàvla kei kei .e lo nu vìska lo nu ny cu krobì'o rìnsa gi'e kànsa càdzu pa'a tu'a dy ni'o «lu do me ma —sei la cpitèpygau ca lo nu ba'o pèjgau lo sèvzi gi'e ba'o ta'irvà'u cu rètsku— .i je do ma ca'o klàma li'u» ni'o «lu mi se cmène zo .dòrotis. —sei lo nìxli cu cùsku— gi'e ca'o klàma la ri'òjme tcàdu te zu'e lo nu cpèdu fi la bànli .oz. fe lo nu xrùgau mi la .kànzas. li'u» ni'o «lu ma stùzi la ri'òjme tcàdu —sei te prèti— .i ji'a la .oz. cu mo li'u» ni'o «lu ŭe xu do na djùno —sei dy se spàji spùda— li'u» ni'o «lu je'u na go'i .i mi na djùno su'o da .i za'a dai mi tersè'a .i se ki'u bo mi na sai se bèsna —sei bàdri spùsku— li'u» ni'o «lu ŭa —sei la .dòrotis. cu cùsku— .i mi do kècti zei mùtce li'u» ni'o «lu ba'a pei —sei rètsku— va'o lo nu mi do kànsa lo nu klàma la ri'òjme tcàdu zo'u: la .oz. cu dùnda lo bèrsa mi li'u» ni'o «lu mi na ka'e djùno —sei dy xrùgau— .i ku'i do zìfre lo nu kànsa mi .i ga nai la .oz. na dùnda lo bèrsa do gi no da do to'e pràli li'u» ni'o «lu jètnu —sei la cpitèpygau cu cùsku— .i je'u —sei sìvni co'u nai co'e— mi na se nàbmi lo nu lo tùple .e lo bìrka .e lo xàdni vu'o pe mi cu sudysràsu telsè'a .i ki'u bo mi na ka'e còrtu .i lo nu da'i da stàpa pa lo mi jmadègji gi'a tùnta mi se pi'o lo jèsni cu na vàjni .i ki'u bo mi na kàkne lo nu gànse .i ku'i mi na djìca lo nu lo prènu mi te cmène zo bèbna .i je va'o lo nu lo mi stèdu cu stòdi lo ka cùlno lo po'o sudysràsu jo'u nai lo bèsna zo'u: ta'i ma mi ka'e djùno su'o da li'u» ni'o «lu mi jìmpe lo du'u do ma kau cìnmo —sei lo cmàlu nìxli noi jè'u kècti cu cùsku— .i va'o lo nu do klàma kànsa mi kei mi ba cpèdu fi la .oz. fe lo nu gàsnu ro lo se kàkne be se va'u do li'u» ni'o «lu ki'e do'u —sei ckìre spùda— li'u»

ni'o lo re mei cu xrùti lo klàji .i la .dòrotis. cu sìdju la cpitèpygau lo nu ràvykla lo bìtmu .i je lo re mei cu co'a lìtru lo pèlxu kìtybli dàrgu se ka'a la ri'òjme tcàdu ni'o la .tòtos. ca lo nùncfa na nèlci lo vi ziljmìna be lo bènde .i ty ru'u lo tersè'a nànmu cu sumnyzù'e tai lo nu da'i srùma lo du'u cùmki fa lo nu lo ràtcu zdàni cu zvàti lo sudysràsu .i je ty cu so'i roi fe'ùcmo tai lo te nalxè'o fa'a la cpitèpygau

ni'o «lu ko na se nàbmi tu'a la .tòtos. —sei la .dòrotis. fi lo ri cnìno pèndo cu cùsku— .i ty cu no roi bàtci li'u» ni'o «lu mi na tèrpa —sei la cpitèpygau cu spùda— .i ty na ka'e crògau lo sudysràsu .i .e'o ko cùrmi lo nu mi bèvri lo va lànka se va'u do .i mi na ba se nàbmi .i ki'u bo mi na ka'e tàtpi .i jai mi do jùngau fo lo se mìpri —sei cy fau lo nu càdzu cu di'a co'e— .i zàsti fa pa po'o da poi mi tèrpa ke'a li'u» ni'o «lu ma co'e —sei la .dòrotis. cu te prèti— .i xu lo màxpre te cànge poi zbàsu do li'u» ni'o «lu na go'i —sei la cpitèpygau cu spùsku— .i lo jèlca sàcki cu co'e li'u»

ni'o ni'o vo mo'o lo plùta poi pàgre lo rìcfoi
	ni'o ba za lo càcra be li su'o lo plùta cu co'a rùfsu .i je lo nu càdzu cu co'a tai nàndu ja'e lo nu la cpitèpygau cu so'i roi tàpfli lo pèlxu kìtybli noi vi mùtce lo ka rùfsu .i je'u su'o roi ku ky ba'o pòrpi gi'o nai ji'a sai mùlno se clàxu fau lo nu zvàti fa lo kùnti noi la .tòtos. cu plipe lo ràgve zi'e noi la .dòrotis. cu càdzu ru'u kè'a .i la cpitèpygau zo'u fau lo nu na se bèrsa cu sìrji càdzu ja'e lo nu stàpa lo kùnti gi'e cpàna fàrlu lo jdàri kìtybli .i ku'i no roi còrtu .i je la .dòrotis. cu làfti gi'e sa'ìrgau cy fau lo nu cy boi dy kànsa lo ka glèki cmìla lo dy. malfu'a
ni'o lo vi cànge cu na sai sìmsa lo fe'e pu cànge lo ka xàmgu se kùrji .i zàsti me'i zdàni je me'i grùte trìcu .i je pa'a gi lo lìtru cu klama gi lo gùgde cu zènba lo ka seldriseljì'u

ni'o ca lo dormìdju cu tsebì'o ne'a lo cmàlu rìrxe .i je la .dòrotis. cu kàrgau lo lànka gi'e lèbna pi su'o lo nànba .i frìti lo pa spìsa la cpitèpygau .i ku'i cy fàpro ni'o «lu mi no roi xàgji —sei cy cùsku— .i je zanfù'a mi fa lo nu na go'i kei ki'u lo nu lo mi mòklu cu pìxra po'o .i va'o lo nu mi sràku my ja'e lo nonsèlsfe te zu'e lo nu mi ka'e cìtka zo'u: lo sudysràsu poi mi tersè'a ke'a cu mùvdu lo bàrtu .i je da'i la'e di'u cu dàspo lo tàrmi be lo mi stèdu li'u» ni'o la .dòrotis. cu zi vìska lo nu la'e di'u jètnu .i se ki'u bo tu'ìfru po'o gi'e di'a cìtka lo nànba ni'o «lu ko mi jùngau da do jo'u lo do te klàma —sei la cpitèpygau ca lo nu dy cu ba'o cìtka lo vàcysai cu cùsku— li'u» .i dy boi cy jùngau ro da la .kànzas .e lo nu ro de bu'u grùsi .e lo nu lo vilcarbì'e cu bèvri dy lo vi cìzra gùgde pe la .oz.

ni'o la cpitèpygau cu ràlci tinjù'i gi'e cùsku «lu mi na jìmpe lo du'u mu'i ma kau do djìca lo nu clìva lo vi mèlbi gùgde gi'e xrùti lo sùdga je grùsi stùzi poi do ke'a te cmène zo .kànzas. li'u» ni'o «lu krìnu la'e di'u fa lo nu do na se bèsna —sei lo nìxli cu spùda— .i se ja'e nai lo nu ma kau ni lo mi'a zdàni cu jàdycau gi'e grùsi zo'u: mi'a noi rèctu je cìblu prènu cu zmànei lo nu xàbju zy kei lo ro me lo dràta gùgde moi va'o ji'a sai lo nu gy. mèlbi tràji .i no stùzi cu sìmsa lo zdàni li'u» ni'o la cpitèpygau cu patyvà'u ni'o «lu li'a mi na jìmpe kàkne —sei cy cùsku— .i va'o lo nu da'i lo do stèdu cu tersè'a lo sudysràsu tai tu'a lo me mi moi cu la'a xàbju fa ro do'o lo mèlbi stùzi .i je va'o ku la .kànzas. cu se zvàti no sai prènu .i zanfù'a la .kànzas. fa lo nu do se bèsna li'u» ni'o «lu .au pei do te lìsri fi da mi ze'a lo nu ma'a sùrla —sei lo vèrba cu rètsku— li'u» ni'o la cpitèpygau cu tòlzau càtlu vy gi'e spùsku «lu ni'o lo mi ba'o nunjmìve cu tai tòrdu ja'e lo nu mi ca'a djùno no da .i mi se zbàsu ca lo prulàmdei be lo prulàmdei .i lo nu ma kau fàsnu bu'u lo mùnje pu la'e di'u cu na sai se djùno mi .i fu'au ca lo nu lo te cànge cu zbàsu lo mi stèdu kei pa lo pa moi se zùkte cu nu pirfì'i lo mi kèrlo kei ja'e lo nu mi tìrna lo nu ma kau bu'u fàsnu .i zvàti fa lo ji'a dràta màxpre .i lo pa moi se tìrna be mi cu nu lo te cànge cu cùsku «lu do ma jìnvi lo vi kèrlo li'u» ni'o «lu ky na cnìci —sei lo dràta cu cùsku— li'u» ni'o «lu na nàbmi —sei lo te cànge cu cùsku— .i to'e ki'u nai kèrlo li'u» noi la'e ke'a je'a jètnu ni'o «lu ca ku mi fìnti lo kànla —sei lo te cànge cu cùsku— li'u» .i tai ku cy pirfì'i lo mi prìtu kànla .i je co'a lo nu co'i mùlno kei mi càtlu .u'e cy je ro lo srùri be mi fau lo nu mùtce lo ka kùcli kei ki'u lo nu pa re'u nu mi vìska lo mùnje ni'o «lu ta mèlbi kànla —sei lo màxpre noi ca'o zgàna lo te cànge cu te nòtci— .i lo blànu cu ja'a màpti se skàri lo kànla li'u» ni'o «lu .ai mi fìnti lo dràta poi bràmau mìlxe —sei lo te cànge cu cùsku— li'u» .i ca lo nu lo re moi kànla ba'o se fìnti kei mi ka'e vìska se mau lo pùrci .i ba bo cy fìnti lo mi nàzbi .e lo mi mòklu .i ku'i mi na'e tàvla ki'u lo nu ca ku mi na djùno lo du'u ma kau te pìlno lo mòklu .i mi se zdìle lo nu càtlu lo nu xai zbàsu lo mi bìrka .e lo mi tùple .i ca lo nu lo mi stèdu cu se làsna kei mi jgìra mùtce ki'u lo nu pe'i mi dùnli ro lo dràta lo ka rèmna ni'o «lu lo vi nànmu ba bànzu tèpygau lo kòrvo —sei lo te cànge cu cùsku— .i se jvìnu lo mìntu be lo rèmna li'u» ni'o «lu ju'o .i ca'a rèmna —sei lo dràta cu cùsku— li'u» .i je mi mùtce lo ka tùgni dy .i lo te cànge mi bèvri fau lo nu mi jbìni lo bìrka jo'u lo xàdni kei gi'e pùnji fi lo clàni gràna noi do mi ke'a tòlcri .i cy .e lo ri pèndo cu ba zi to'o càdzu ja'e lo nu mi nonkànsa ni'o mi na nèlci lo nu mi tai nonkànsa .i se ki'u bo mi tròci lo ka càdzu jèrsi xai .i ku'i lo mi jàmfu na làmji lo lòldi .i je mi jai se bàpli fai lo nu stàli lo gràna .i sèicni nunjmìve ki'u lo nu zàsti fa no da poi mi ka'e pènsi ke'a ku'o ki'u lo nu mi pu tai zi se zbàsu .i so'i kòrvo je so'i dràta cìpni cu vòfli fa'a ne'i lo gùrni fòldi .i ku'i zi ca lo nu vìska mi cu to'o vòfli fau lo nu jìnvi lo du'u mi màxpre .i la'e di'u plùka mi gi'e gàsnu lo nu mi cìnmo lo ka vàjni mùtce prènu .i ba za bo pa tolcì'o kòrvo cu vòfli jbibì'o mi .i je ba lo nu ràlci càtlu mi cu tsebì'o lo mi jànco gi'e cùsku di'e

ni'o «lu mi kùcli lo du'u xu kau lo te cànge pu jinvi lo du'u tcìca be mi kàkne fau lo nu tai jùxre .i ro kòrvo poi na bèbna cu vìska lo nu do ke po'o sudysràsu tersè'a nànmu li'u» .i ba bo ky cu fa'a ni'a plìpe lo mi jàmfu gi'e cìtka ro lo gùrni poi ky djìca .i lo dràta cìpni fau lo nu vìska lo nu ky na se xràni mi cu klàma te zu'e lo nu cy. ji'a cìtka lo gùrni .i ja'e bo ba za lo cmàlu lo bàrda gùnma be ky cu srùri mi

ni'o mi pu bàdri la'e di'u .i ki'u bo jàrco lo du'u je'u mi na tai xàmgu cpitèpygau .i ku'i lo tolcì'o kòrvo cu kùfygau mi fau lo nu cùsku «lu va'o lo nu do se bèsna kei do xagdù'i ro dràta rèmna gi'e xàgmau su'o boi ry .i lo bèsna cu seltè'i lo ka lo nu da pònse ce'u cu se vàmji kei fi'o nàlvai lo du'u da kòrvo gi'i kau rèmna li'u» ni'o ca lo nu lo kòrvo ba'o clìva kei mi pènsi la'e di'u gi'e jdìce lo du'u .ai tròci lo ka cpàcu lo bèsna .i zanfù'a fa lo nu do lampàgre gi'e vìcycpu mi lo gràna .i je lo se cùsku be do cu bìtygau mi lo du'u la bànli .oz. ba dùnda lo bèsna mi ca lo nu mi'o tolclìva la ri'òjme tcàdu li'u»

ni'o «lu mi pàcna lo nu ja'a co'e kei —sei la .dòrotis. cu stàce cùsku— ki'u lo nu do sìmlu lo ka djìce càrmi li'u» ni'o «lu ĭe mi ja'a djìca —sei la cpitèpygau cu xrùgau cùsku— .i da tai tolkùfra lo nu da djùno lo du'u da bèbna li'u» ni'o «lu ja'o —sei lo nìxli cu cùsku— mi'o klàma .e'u li'u» .i je dùnda lo lànka la cpitèpygau ni'o fe'e ca ku no bìtmu cu jibni lo klàji mlàna .i je lo gùgde cu rùfsu gi'e nalzilplìxa .i ca lo nu lo vànci cu jìbni cu tolclìva fa lo lìtru lo bàrda rìcfoi noi bu'u ke'a lo trìcu cu bàrda gi'e zvajbisì'u vau tai ja'e lo nu lo jìmca be ty cu pensì'u lo gàpru be lo pèlxu kìtybli dàrgu .i ni'a lo trìcu cu na ru'e mànku .i ri'a bo lo jìmca cu fànta lo nu lo solgù'i cu nerbì'o .i ku'i lo lìtru cu na klàsti gi'e ca'o klàma lo nènri be lo rìcfoi ni'o «lu ga nai lo vi dàrgu cu nerbì'o gi dy bi'ai barbì'o —sei la cpitèpygau cu cùsku— .i je ki'u lo nu la ri'òjme tcàdu cu se stùzi lo dràta fànmo be lo dàrgu kei mi'o bìlga lo ka klàma ro da poi dy mi'a da klagì'a li'u» ni'o «lu da'i ro da la'e di'u djùno —sei la .dòrotis. cu cùsku— li'u» ni'o «lu ju'o .i la'e di'u krìnu lo nu mi djùno —sei la cpitèpygau cu spùda— .i ga nai sàrcu lo nu fàcki kei fa lo nu se bèrsa gi da'i mi no roi cùsku de'u li'u» ni'o ba za lo càcra be li ji'i pa lo gùsni cu cànci kadbì'o .i je lo lìtru ca tapflìkla ne'i lo mànku .i la .dòrotis. na sai ka'e vìska .i ku'i la .tòtos. ja'a ka'e go'i .i ki'u bo lo gèrku cu cèrtu lo ka vìska ne'i lo mànku .i je la cpitèpygau cu xùsra lo du'u cy kàkne lo ka vìska du'i lo nu co'e ca lo dònri .i se mu'i bo dy cu jgàri lo bìrka be cy gi'e snàda lo ka xàmgu bànzu klàma ni'o «lu ko va'o lo nu vìska da poi ma'a kàkne lo nu sìpna bu'u ke'a ze'a lo nìcte —sei dy cùsku— cu jùngau mi .i ki'u bo lo nu càdzu bu'u lo mànku cu mùtce lo ka to'e se kùfra li'u» ni'o ba za bo la cpitèpygau cu klàsti

ni'o «lu mi vìska lo cmàlu cmàzda fa'a lo prìtu be mi'o —sei cùsku— .i zìlzba lo tànbo jo'u lo jìmca .i .au pei mi'o klàma li'u» ni'o «lu .au ja'ai —sei lo vèrba cu spùda— .i mi ja'a sai tàtpi li'u» ni'o tai ku la cpitèpygau cu gìdva pa'o lo trìcu co'u lo nu tolcliva lo cmàzda .i je la .dòrotis. cu nèrkla gi'e tòlcri lo ckàna poi sùdga pèzli se zbàsu ku'o bu'u pa kòjna .i ba zi cpàna bìnxo .i je fau lo nu la .tòtos. cu mlàna jìbni cu zi co'a còndi sìpna .i la cpitèpygau noi no roi tàtpi cu sànli bu'u lo dràta kòjna gi'e depyjdàri dènpa co'u lo cèrni

ni'o ni'o mu mo'o lo nu nùrgau la tìnci mùdypre
	ni'o ca lo nu la .dòrotis. cu cikybì'o kei lo solgù'i cu ca'a pàgre lo trìcu .i je la .tòtos. cu xa'o bàrtu gi'e ru'u jèrsi lo cìpni jo'u lo ricyràctu .i dy tsebì'o gi'e ru'u càtlu .i va ku la cpitèpygau cu za'o depyjdàri sànli bu'u lo kòjna gi'e dènpa tu'a dy ni'o «lu .ei ma'a klàma gi'e sìsku lo djàcu —sei dy fi cy cu cùsku— li'u» ni'o «lu do nìtcu lo djàcu ma —sei cy rètsku— li'u» ni'o «lu lo nu lùmci lo mi flìra ba tu'a lo pùlce be lo plùta kei .e lo nu lo nànba na snìpa lo mi gàlxe li'u» ni'o «lu ru'a lo nu da rèctu cu na'e se kùfra da —sei la cpitèpygau cu pènsi cùsku— .i ki'u bo da bìlga lo ka sìpna gi'e cìtka gi'e pìnxe .i ku'i do se bèrsa .i je se vàmji lo bàrda ràktu fa lo nu kakne lo nu dràni pènsi li'u» ni'o lo gùnma cu clìva lo cmàzda gi'e càdzu pa'o lo trìcu co'u lo nu tòlcri lo cmàlu jìnto be lo klìna djàcu be'o poi bu'u ke'a la .dòrotis. cu pìnxe gi'e jìnru gi'e cìtka lo cèrsai .i dy vìska lo nu lo nànba ve vìmcu pe lo lànka cu na mùtce kei gi'e ckìre zi'o lo nu la cpitèpygau na nìtcu lo nu cìtka su'o da kei ki'u lo nu lo ve vìmcu cu ja'a ru'e bànzu lo nu dy jo'u la .tòtos. ka'e cìtka ca lo càbdei
ni'o dy ca lo nu mo'u cìtka lo sànmi gi'e pu'o xrùti lo pèlxu kìtybli klàji cu se spàji lo nu tìrna lo dìzlo se cmòni poi jìbni ni'o «lu ta mo —sei dy toldàrsi rètsku— li'u» ni'o «lu mi na ka'e se xànri —sei la cpitèpygau cu spùda— .i ku'i ma'a ka'e klàma gi'e fàcki li'u» ni'o ca zi bo lo dràta se cmòni cu se tìrna gi'e sìmlu lo ka se kràsi lo trìxe be xai .i xy càrna gi'e càdzu pa'o lo rìcfoi ve'a lo jai ve'a su'o roi stàpa .i ca bo la .dòrotis. cu vìska lo nu da càrmi ne'i lo gùsni poi pàgre lo jbìni be lo trìcu .i dy bàjra fa'a lo stùzi gi'e ba bo sùksa klàsti fau lo nu se spàji krìxa lo cmàlu ni'o pa lo bàrda trìcu cu su'o si'e se kàtna .i je fau lo nu sànli ne'a ty fau lo nu jgàri lo se làfti ka'àmru lo re xànce zo'u: lo nànmu poi mùlno lo ka tìnci .i lo stèdu .e lo bìrka .e lo tùple cu jòrne lo xàdni .i ku'i ny pràne lo ka mùvdycau kei tai lo nu na sai ka'e mùvdu ni'o la .dòrotis. cu càtlu ny fau lo nu mànci kei .i je la cpitèpygau ji'a cu go'i ca lo nu la .tòtos. cu kìnli cmòni gi'e zùkte lo nu bàtci lo tìnci tùple kei noi crògau lo ra dènci ni'o «lu xu do pu cmòni —sei la .dòrotis. cu rètsku— li'u» ni'o «lu go'i —sei lo tìnci nànmu cu spùsku— .i mi pu cmòni ze'u lo nànca be li za'u pa se cau lo nu da tìrna mi gi'a klàma te zu'e lo nu sìdju li'u» ni'o «lu mi do ta'i ma ka'e sìdju —sei dy rànti tònga te prèti be ki'u lo nu lo bàdri vòksa poi lo nànmu cu se vòksa ke'a cu pèncu lo ruxsè'i be dy— li'u» ni'o «lu ko cpàcu lo ctìle lànte gi'e ctìle sàbji lo mi te jòrne —sei ny spùsku— .i jy tai furtìrse se pàgbu ja'e lo nu mi na sai ka'e mùvgau jy .i mi va'o lo nu te sàbji lo ctìle cu ba zi di'a se xàmgu .i do ba tòlcri lo ctìle lànte lo kàjna be ne'i lo mi cmàzda li'u» ni'o la .dòrotis. cu zi bàjra xrùti lo cmàzda gi'e tòlcri lo ctìle lànte gi'e ba bo xrùti gi'e xànka rètsku «lu lo do te jòrne ma zvàti li'u» ni'o «lu ko sàbji fi lo mi cnèbo —sei la tìnci mùdypre cu spùsku— li'u» .i ja'o dy sàbji .i je ki'u lo nu furtìrse mùtce kei la cpitèpygau cu co'a jgàri lo stèdu gi'e toljùrsa mùvgau sy fau lo nu zùnle fa'u prìtu càrgau kei co'u lo nu mùvdu zìfre .i je ba bo lo nànmu cu kàkne lo nu mùvgau sy zu'e ny po'o li'u» ni'o «lu ca ku ko ctìle sàbji fi lo mi bìrka —sei ny cùsku— li'u» .i la .dòrotis. cu sàbji .i je la cpitèpygau cu toljùrsa krògau by co'u lo nu xàmgu clàxu lo furtìrse gi'e cnìno dùnli ni'o la tìnci mùdypre cu gèicmo gi'e dzize'àgau lo ri ka'àmru noi my ke'a sa'òrgau fo lo trìcu

ni'o «lu ti bàrda se kùfra —sei my cùsku— .i mi pu jgàri lo va ka'àmru co'a lo nu mi fùrtìrse sèlpau .i je mi glèki lo nu ro mai to'e làfti .i ca ku zo'u va'o lo nu do ctìle sàbji fi lo mi tùple te jòrne kei mi di'a se xàmgu li'u» ni'o se ki'u bo xai ctìle sàbji fi lo tùple co'u lo nu mùvdu zìfre .i je my cu so'i roi kìrsku fi lo nu ba'o se nùrgau .i ki'u bo my sìmlu lo ka mùtce lo ka clìte .e lo ka ckìre ni'o «lu da'i mi va'o lo nu do na klàma cu ze'e va sànli —sei my cùsku— .i ja'o ju'o do nùrgau lo mi nunjmìve .i lo nu do ti zvàti cu jàlge ma li'u»

ni'o «lu mi'a klàma la ri'òjme tcàdu te zu'e lo nu pènmi la bànli .oz. —sei dy spùsku— .i je mi'a klàsti bu'u lo do cmàzda te zu'e lo nu zvàti ze'a lo nìcte li'u» ni'o «lu ki'u ma do djìca lo nu pènmi la .oz. —sei my rètsku— li'u» ni'o «lu .au .obu mi xrùgau bènji la .kànzas. .i je la cpitèpygau cu djìca lo nu .obu dùnda lo bèsna cy —sei dy spùsku— li'u» ni'o la tìnci mùdypre cu sìmlu lo ka ze'i còndi pèndi .i ba bo cùsku: ni'o «lu ba'a pei la .oz. cu dùnda lo rìsna mi li'u» ni'o «lu .y ru'a —sei la .dòrotis. cu spùsku— .i da'i la'e di'u frìli dùnli lo nu dùnda lo bèsna la cpitèpygau li'u» ni'o «lu jètnu —sei la tìnci mùdypre cu spùda— .i ja'o mi ji'a va'o lo nu do cùrmi lo nu mi kànsa do cu klàma la ri'òjme tcàdu te zu'e lo nu cpèdu lo nu la .oz. mi sìdju li'u»

ni'o «lu .e'a ko kànsa —sei la cpitèpygau cu xèndo cùsku— li'u» .i je la dòrotis. cu jmìna cùsku lo se du'u da'i glèki lo nu se kànsa my .i ja'e bo la tìnci mùdypre cu vrègau lo ri ka'àmru lo jànco .i je bo xai pàgre lo rìcfoi co'u lo nu tolclìva lo klàji poi se gàcri lo pèlxu kìtybli ni'o la tìnci mùdypre pu cpèdu fi la .dòrotis. fe lo nu pùnji lo ctìle lànte lo lànka pe dy .i «lu .i ki'u bo —sei my cùsku— mi va'o lo nu mi zilkàvbu lo nuncàrvi gi'e za'u re'u furtirfàrvi cu ba mùtce nìtcu lo ctìle lànka li'u»

ni'o ja'a zanfù'a fa lo nu lo cnìno pèndo cu cmibì'o lo bènde .i ki'u bo za ba lo nu za'u re'u cfàgau lo nunlì'u kei by tolclìva lo stùzi noi lo trìcu .e lo jìmca cu bànro lo tai ròtsu ja'e lo nu lo lìtru na ka'e pàgre .i ku'i la tìnci mùdypre cu co'a gùnka se pi'o lo ri ka'àmru gi'e tai xàmgu kàtna ja'e lo nu ba za ba'o gàsnu tu'a lo vòrme se va'u lo mùlno bènde
ni'o la .dòrotis. cu ca lo nu by ca'o càdzu cu tai jùnri pènsi ja'e lo nu dy na sànji ca je fe lo nu la cpitèpygau cu taplifà'u fi lo kèvna gi'e gùnro fa'a lo dràta mlàna be lo dàrgu .i je'u cy bìlga lo ka cpèsku fi dy fe lo nu sìdju fi lo nu sa'irbì'o

ni'o «lu ki'u ma do na càdzu ru'u lo kèvna —sei la tìnci mùdypre cu rètsku— li'u» ni'o «lu mi na djùno rau da —sei la cpitèpygau cu glèki spùda— .i lo mi stèdu cu te sètca lo sudysràsu .i la'e di'u krìnu lo nu mi klàma la .oz. te zu'e lo nu cpèdu fi .obu fe tu'a lo bèsna li'u»

ni'o «lu ŭa —sei la tìnci mùdypre cu cùsku— .i ku'i je'u lo bèsna na xàgrai lo ro da pe lo mùnje li'u» ni'o «lu xu do se bèsna —sei la cpitèpygau cu te prèti— li'u» ni'o «lu na go'i .i lo mi stèdu cu kùnti mùtce —sei la mùdypre cu spùsku— .i ku'i pu ku mi se bèsna gi'e se rìsna ji'a .i ja'o mi fau lo ba'o nu tròci tu'a ro lo re mei cu da'i mùtce lo ka zmànei lo rìsna li'u» ni'o «lu ma krìnu la'e di'u —sei la cpitèpygau cu rètsku— li'u» ni'o «lu mi ba te lìsri fi lo me mi moi do .i je ba bo do djùno li'u» ni'o tai ku ze'a lo nu xai càdzu pàgre lo rìcfoi kei la tìnci mùdypre cu te lìsri fi lo di'e lìsri ni'o «lu mi bèrsa lo mùdypre poi kàtna lo trìcu bu'u lo rìcfoi gi'e ba bo jìbri vècnu lo mùdri .i ca lo nu mi bìnxo lo màkcu kei mi ji'a bìnxo lo mudykà'a .i je ba lo nu lo mi pàtfu cu mrobì'o kei mi kùrji lo mi tolcì'o màmta ze'a lo nu my cu jmìve .i ba bo mi jdìce lo nu mi se ba'i lo nu nonkànsa lo nu jmìve cu ba spebì'o te zu'e lo nu na bìnxo lo ka sèicni ni'o pa lo nìxli pe la màxpre pu tai mèlbi ja'e lo nu mi ba za bìnxo lo ka mùtce lo ka pràmi ny .i ny zu'u nai pu nùpre lo nu spèni mi ca lo nu mi te plèji lo bànzu be lo nu zbàsu lo xàgmau zdàni se va'u ny .i se mu'i bo mi pu zùkte lo nu gùnka fi'o se càmzma ro lo me lo pùrci moi .i ku'i lo bi'u nai nìxli cu xàbju fi'o kànsa lo tolcì'o nìnmu poi na djìca lo nu vo'a da spèni .i ki'u bo ny tai làzni ja'e lo nu djìca lo nu lo nìxli cu stàli gi'e jùkpa gi'e nìcygau lo zdàni .i se mu'i bo lo tolcì'o nìnmu cu klàma la pàlci termafyfè'i pe la stùna gi'e nùpre lo nu dùnda lo re lànme .e lo pa bàkni va'o lo nu fànta lo nùnspe .i ja'e bo la pàlci termafyfè'i cu malmàfpli lo mi ka'àmru .i je ca pa djèdi poi nu mi xàgrai selkà'e kàtna mu'i lo nu djìca lo nu cpàcu lo cnìno zdàni .e lo mi spèni ca lo cabjbicùmrai zo'u: lo ka'àmru cu malmù'u gi'e ka'arvì'u lo mi zùnle tùple ni'o ca lo nùncfa la'e di'u sìmlu lo ka bàrda malfùnca .i ki'u bo mi pu djùno lo du'u lo nànmu poi se tùple pa da cu na ka'e xàmgu mùtce mudykà'a .i se ki'u bo mi pu klàma lo tìncyzba gi'e gàsnu lo nu ty se va'u mi zbàsu lo cnìno tùple co tìnci .i lo tùple cu xàmgu gùnka co'a lo nu mi frisèlsau tu'a ty .i ku'i lo mi selzù'e cu rìnka lo nu la pàlci termafyfè'i pe la stùna cu fèngu .i ki'u bo ty pu nùpre fi lo bi'u nai tolcì'o nìnmu fe lo nu mi ba na spèni lo mèlbi ke màxpre nìxli .i ca lo nu mi za'u re'u co'a kàtna kei lo mi ka'àmru cu malmù'u gi'e ka'arvì'u lo mi prìtu tùple .i za'u re'u ku mi klàma lo tìncyzba .i je za'u re'u ku ty zbàsu se va'u mi lo tùple co tìnci .i ba la'e di'u lo se màfpli ka'àmru cu ka'arvì'u lo mi bìrka (to lo pa moi pu tu'a lo re moi toi) .i je by se bàsti lo tìnci bìrka .i ba bo la pàlci termafyfè'i cu gàsnu lo nu lo ka'àmru cu malmù'u gi'e ka'arvì'u lo mi stèdu .i ca lo nùncfa mi jìnvi lo du'u la'e di'u mi fànmo .i ku'i lo tìncyzba cu fùnca lampàgre .i je ty zbàsu se va'u mi lo cnìno stèdu co tìnci

ni'o mi pu jìnvi lo du'u mi ca ba'o jìnga fi la pàlci termafyfè'i kei gi'e gùnka fi'o càmzma ro lo me lo pùrci moi .i ku'i mi pu na te sìdbo lo du'u ma kau ni lo mi bràdi ka'e pàlci .i by fìnti lo cnìno tàdji be lo nu càtra lo mi za'i pràmi lo mèlbi ke màxpre nìxli kei gi'e za'u re'u gàsnu lo nu lo ka'àmru cu kàtna pàgre lo mi xàdni ja'e lo nu mi zilkà'a lo re xàdba .i za'u re'u ku lo tìncyzba cu sìdju mi gi'e zbàsu se va'u mi lo xàdni co tìnci fau lo nu làsna lo mi tìnci bìrka jo'u lo mi tìnci tùple jo'u lo mi tìnci stèdu xy lo cidyterjò'e te zu'e lo nu mi kàkne lo ka ru'u mùvdu tai lo xagdù'i be lo me lo pùrci moi .i ku'i ŭi nai ca ku mi na se bèsna .i ja'e bo mi ba'o cìrko pi ro lo mi ka pràmi lo bi'u nai màxpre nìxli .i je mi pu na se vàjni lo du'u xu kau mi spebì'o ny .i ru'a ny za'o xàbju fi'o kànsa lo làldo nìnmu gi'e fau bo dènpa lo nu mi klàma ny

ni'o «lu lo mi xàdni cu pu tai gùsycai bu'u lo solgù'i .i ja'e bo mi pu jgìra zei mùtce xy .i je ca ku na vàjni fa lo nu da'i lo mi ka'àmru cu malmù'u .i ki'u bo na ka'e kàtna mi .i zàsti fa pa po'o ckàpe be mi be'o noi nu lo mi cidyterjò'e cu furtirfàrvi .i ku'i mi ràjgau lo nu mi ràlte lo ctìle lànte pe bu'u lo mi cmàzda kei gi'e kùrji lo nu mi ca ro nu nìtcu cu ctilypù'i mi .i ku'i ca pa djèdi poi nu mi mo'ìfli lo nu zùkte la'e di'u cu sùksa zvàti fa mi lo càrvi viltì'a .i pu lo nu mi pènsi lo ckàpe kei lo mi cidyterjò'e ba'o furtirfàrvi .i je mi jai se bàpli fai lo nu sànli stàli ne'i lo rìcfoi je co'u lo nu do klàma gi'e sìdju mi .i lo xlàtce mi pu li'i lìfri la'e di'u .i ku'i ze'a lo nànca noi nu mi bu'u sànli cu zìfre lo ka pènsi lo du'u lo bràrai be lo mi nùncri be'o poi mi pu lìfri cu nu cìrko lo mi rìsna .i mi ca lo nu ca'o pràmi cu tràji lo ka glèki kei lo ro rèmna pe lo tèrdi .i ku'i no prènu poi na se rìsna cu ka'e pràmi .i se ki'u bo mi zu'èjdi lo nu mi ba cpèdu fi la .oz. fe lo nu dùnda pa boi ry mi .i va'o lo nu .obu ja'a co'e kei mi ba xrùti lo màxpre nìxli gi'e spebì'o ny

ni'o ge la .dòrotis. gi la cpitèpygau pu ca'o mutce lo ka se cìnri lo lìsri be la tìnci mùdypre kei gi'e ca djùno lo du'u ma kau krìnu lo nu my tai djìca lo nu cpàcu lo cnìno rìsna ni'o «lu to'e ki'u nai ku —sei la cpitèpygau cu cùsku— zo'u: .ai mi cpèdu tu'a lo bèsna je nai lo rìsna .i ki'u bo da'i lo bèbna na djùno lo du'u .ei pìlno ry ma kau va'o lo nu se rìsna li'u» ni'o «lu .ai mi cùxna lo rìsna —sei la tìnci mùdypre cu spùda— .i ki'u bo lo nu da se bèsna cu na se jàlge lo nu da glèki .i je lo nu glèki cu xàgrai lo ro da pe lo mùnje li'u» ni'o la .dòrotis. cu cùsku no da .i ki'u bo dy cu se cfìpu lo du'u ma kau poi me lo re pèndo cu dràni kei gi'e jdìce lo du'u va'o lo nu do'a nai dy ka'e xrùti la .kànzas. .e la fetfàmti .em. cu na vàjni mùtce fa lo du'u ji kau gi'e gi la mùdypre na se bèsna gi la cpitèpygau na se rìsna gi lo re da cu cpàcu lo se djìca ni'o tràji lo ka se xànka dy kei fa lo nu ge lo nànba cu na ru'e ba'o se xàksu gi lo ziljmìna sànmi cu jai se jàlge lo nu lo lànka cu kùnti .i ju'o ge nai la mùdypre gi nai la cpitèpygau cu su'o roi cìtka da .i ku'i dy màrji ge nai lo tìnci gi nai lo sudysràsu .i je na ka'e jmìve va'o lo nu na se djasàbji

ni'o ni'o xa mo'o la tolvìrnu cìnfo
	ni'o ze'a ku la .dòrotis .e lo ri kànsa cu càdzu pa'o lo dènmi rìcfoi .i lo klàji cu fe'e za'o se gàcri lo pèlxu kìtybli .i ku'i ky se gàcri lo sudbì'o ricyjìmca jo'u lo mòrsi pèzli vu'o pe lo trìcu .i je lo nu càdzu na sai plùka
ni'o so'u cìpni cu zvàti lo vi pàgbu be lo rìcfoi .i ki'u bo lo cìpni cu pràmi lo kùnti nùrma noi ke'a se solgù'i mùtce .i ku'i ca da fa'u de lo dìzlo se cmòni be lo dànlu poi se mìpri lo trìcu cu se cmòni .i lo di'u sàvru cu gàsnu lo nu lo rìsna be lo cmàlu nìxli cu sùtra slìlu ki'u lo nu ny na djùno lo du'u ma kau kràsi vo'a .i ku'i la .tòtos. cu djùno gi'e càdzu ne'a la .dòrotis. gi'e na spùda fi lo nu cmòni ji'a sai ni'o «lu ma tèmci —sei lo vèrba fi la tìnci mùdypre cu rètsku— fi lo nu ma'a bàrtu lo rìcfoi li'u» ni'o «lu mi na ka'e djùno —sei te spùda— .i ki'u bo mi pu no roi zvàti la ri'òjme tcàdu .i ku'i lo mi pàtfu pu pa roi klàma ca lo nu mi nànla .i je py cu cùsku lo se du'u ge clàni nu lìtru pa'o lo ckàpe gùgde gi ku'i bu'u lo zmàdu be fi lo ka jìbni lo tcàdu poi la .oz. cu xàbju zo'u lo gùgde cu mèlbi .i ku'i mi ze'a lo nu mi tòlcau lo mi tìnci lànte cu na tèrpa .i je no da ka'e crògau la cpitèpygau .i je do zu'u nai bèvri bu'u lo mèbri lo bàrna pe lo nuncìnba pe la vrùde termafyfè'i .i je la'e di'u do bàndu lo ckàpe li'u» ni'o «lu ku'i la .tòtos. zo'u —sei lo nìxli cu xànka cùsku— ma ba bàndu ty li'u» ni'o «lu .ei ma'a jai bàndu va'o lo nu ty cu se ckàpe —sei la tìnci mùdypre cu spùda— li'u»

ni'o zi ca lo nu my cu tàvla kei lo màbla clàdu bo sèlcmo cu sànce ra'i lo rìcfoi .i je ca lo bavlàmji mòkca lo bàrda cìnfo cu plìpe lo klàji .i cy fau lo nu pa roi dàrxi fi lo xànce cu gàsnu lo nu la cpitèpygau fau lo nu so'i roi sezycàrna cu vòfli fa'a lo kòrbi be lo klàji kei gi'e ba bo dàrxi la tìnci mùdypre fi lo kìnli jgàlu .i ku'i se ri'a lo nu la cìnfo cu se spàji kei lo jgàlu cu te prìna lo tìnci no da .i ku'i la mùdypre cu fàrlu lo klàji gi'e mùvycau cpàna ni'o la .tòtos. ku noi cmàlu ku'o ca lo càbna noi nu da bràdi cu gèrcmo bàjra fa'a la cìnfo .i je lo bàrda dànlu ba'o kàrgau lo mòklu te zu'e lo nu bàtci lo gèrku .i ca bo la .dòrotis. fau lo nu xànka lo nu da'i la .tòtos. cu se càtra kei .e lo nu na sànji lo ckàpe cu fa'a ca'u bàjra gi'e xancradà'i se rai lo kàmtsa gi'e ca bo krìxa:

ni'o «lu ko na sai dàrsi lo nu bàtci la .tòtos .i .ei do ckèji lo nu do noi bàrda dànlu cu bàtci lo ŭu cmàlu gèrku li'u» ni'o «lu mi pu na bàtci gy —sei la cìnfo fau lo nu sàtre lo ve dàrxi be fi lo ri nàzbi cu cùsku— li'u» ni'o «lu go'i .i ku'i do pu tròci —sei dy xrùgau— .i do du no na'e bo lo tolvìrnu mùtce li'u» ni'o «lu mi djùno —sei la cìnfo fau lo nu lo stèdu cu ckèji dàndu cu cùsku— .i mi pu ro roi djùno .i ku'i .ei mi mo kau li'u» ni'o «lu ju'o mi na djùno .i ŭe sai do dàrxi lo tersè'a prènu ne mu'u la ŭu cpitèpygau li'u» ni'o «lu xu tersè'a fa cy —sei la cìnfo cu rètsku be fau lo nu se spàji bei ca lo nu càtlu lo nu dy làfti la cpitèpygau gi'e sa'ìrgau fo lo jàmfu fau lo nu seltàmgau cy lo dràni tàrmi ni'o «lu li'a cy tersè'a —sei la .dòrotis. ku noi za'o fèngu cu spùda— li'u» ni'o «lu la'e di'u krìnu lo nu tai frìli vòfli —sei la cìnfo cu te nòtci— .i pu spàji mi fa lo nu cy cu tai ru'u càrna .i xu lo dràta ku ji'a tersè'a li'u» ni'o «lu na go'i —sei la .dòrotis. cu cùsku— .i ri màrji lo tìnci li'u» .i dy cu sìdju la mùdypre lo nu di'a sànli ni'o «lu la'e di'u krìnu lo nu ri na ru'e kilcrìgau lo mi jgàlu —sei la cìnfo cu cùsku— .i ca lo nu jy. sràku lo tìnci kei lo lènku nundèsku cu ri'a fa'a ni'a mùvdu fo lo mi trìxe .i lo va cmàlu dànlu poi do tai nèlci zei mùtce cu mo li'u»

ni'o «lu me la .tòtos. ku noi gèrku me mi moi —sei la .dòrotis. cu spùsku— li'u» ni'o «lu pau ty màrji lo tìnci gi'i tersè'a —sei la cìnfo cu rètsku— li'u» ni'o «lu na gi'e nai .i ty .y .y .y rèctu gèrku —sei lo nìxli cu cùsku— li'u» ni'o «lu ŭa sai .i ty cìnri dànlu gi'e sìmlu lo ka cmàlu mùtce kei mi pe ca lo nu nau ba'o càtlu ty .i no da po'u na'e bo lo tolvìrnu be mu'u mi cu su'o mu'ei pènsi lo nu bàtci lo tai cmàlu —sei la cìnfo cu di'a bàdri cùsku— li'u»

ni'o «lu ki'u ma do tolvìrnu —sei la .dòrotis. fau lo nu mànci càtlu lo bàrda dànlu ki'u lo nu cy cu bradù'i lo cmàlu xìrma cu rètsku— li'u» ni'o «lu na ka'e te djùno —sei la cìnfo cu spùsku— .i ru'a mi tai jbèna .i ro lo dràta dànlu pe lo rìcfoi cu li'a kànpe lo nu mi vìrnu kei ki'u lo nu lo cìnfo bu'u ro da cu jai se jìnvi fai lo nu me la nòltru be lo dànlu .i mi pu cìlre lo du'u ca lo nu mi clàdu mùtce cmòni kei ro lo jmìve cu tèrpa gi'e to'o klàma .i ca ro nu mi pènmi lo rèmna kei mi pu mùtce lo ka tèrpa .i ku'i sa'u mi clàdu cmòni fa'a ry .i je ry cu ro roi to'o bàjra se rai lo ka sùtra .i va'o lo nu da'i lo xànto .a lo tìrxu .a lo crìbe cu su'o roi tròci lo ka dàmba mi zo'u ju'o mi si'a to'o bàjra .i mi tai tolvìrnu .i ku'i zi sai ca lo nu xai tìrna lo nu mi cmòni zo'u ro boi xy cu tròci lo ka bìnxo lo dàrno be mi .i je li'a mi cùrmi lo nu xy klàma li'u» ni'o «lu ku'i la'e di'u na dràni .i la nòltru be lo dànlu cu .ei na tolvìrnu —sei la cpitèpygau cu cùsku— li'u»

ni'o «lu mi djùno —sei la cìnfo cu spùda be fau lo nu vìmcu lo pa se klàku lo kànla se pi'o lo jìpno be lo rèbla— .i bàrda se bàdri gi'e se jàlge lo nu mi tòlgei lo mi nunjmìve .i ku'i ca ro nu ckàpe kei lo mi rìsna cu co'a sùtra slìlu li'u» ni'o «lu ju'o cu'i do rìsna bìlma —sei la tìnci mùdypre cu cùsku— li'u» ni'o «lu cùmki —sei la cìnfo cu cùsku— li'u» ni'o «lu va'o lo nu ja'a co'e kei —sei la tìnci mùdypre cu di'a co'e— do glèki .ei .i ki'u bo je'urjà'o lo du'u do se rìsna .i mi zo'u mi na se rìsna .i se ki'u bo mi na ka'e rìsna bìlma li'u» ni'o «lu ju'o cu'i —sei la cìnfo cu pènsi cùsku— mi va'o lo nu da'i na se rìsna cu na tolvìrnu li'u» ni'o «lu xu do se bèsna —sei la cpitèpygau cu rètsku— li'u» ni'o «lu ru'a go'i .i mi pu no roi càtlu zùkte fi lo nu fàcki —sei la cìnfo cu spùsku— li'u»

ni'o «lu mi klàma la bànli .oz. te zu'e lo nu cpèdu fi .obu fe lo nu dùnda lo bèsna mi —sei la cpitèpygau cu te nòtci— .i ki'u bo lo mi stèdu cu cùlno lo sudysràsu li'u» ni'o «lu je mi ba cpèdu fi .obu fe lo nu dùnda lo rìsna mi —sei la mùdypre cu cùsku— li'u» ni'o «lu je mi ba cpèdu fi .obu fe lo nu xrùgau bènji .i je la .tòtos. la .kànzas. —sei la .dòrotis. cu jmìna cùsku— li'u» ni'o «lu xu do srùma lo du'u la .oz. cu ka'e dùnda lo kamvìrnu mi —sei la tolvìrnu cìnfo cu rètsku— li'u» ni'o «lu frìli dùnli lo nu da'i .obu dùnda lo bèsna mi —sei la cpitèpygau cu cùsku— li'u» ni'o «lu si'a lo nu da'i dùnda lo rìsna mi —sei la tìnci mùdypre cu cùsku— li'u» ni'o «lu si'a lo nu da'i xrùgau bènji mi la .kànzas. —sei la .dòrotis. cu cùsku— li'u» ni'o «lu va'o ku mi va'o lo nu do na se nàbmi cu klàma kànsa do —sei la cìnfo cu cùsku— .i ki'u bo lo mi nunjmìve cu sa'u na ka'e se jdàri se cau lo nu vìrnu mìlxe do'a nai li'u» ni'o «lu da'i do zankànsa —sei la .dòrotis. cu spùsku— .i ki'u bo do ba sìdju fi lo nu dàrgau lo dràta cìlce bo dànlu .i dy sìmlu fi mi fe lo ka ce'u do zmàdu lo ka tolvìrnu kei gi'a nai tèpygau zei cùrmi fau lo nu do tai se frìli li'u» ni'o «lu dy ca'a co'e —sei la cìnfo cu cùsku— .i ku'i la'e di'u na gàsnu lo nu mi zènba lo ka vìrnu kei lo cmàrai .i je mi ze'a lo nu mi djùno lo du'u mi tolvìrnu cu ju'o tòlgei li'u» ni'o ja'e bo lo cmàlu bènde cu za'u re'u co'a lìtru .i la cìnfo cu bàrda stàpa càdzu ne'a la .dòrotis. .i la .tòtos. ca lo nùncfa cu na zànru lo bi'u nai cnìno kànsa .i ki'u bo ty na ka'e tolmò'i lo du'u ty pu na ru'e se màrxa fi'o se jbìni lo bàrda xànce be la cìnfo .i ku'i ba za lo tèmci ty zènba lo ka kùfra .i je ca ku la .tòtos. jo'u la tolvìrnu cìnfo ba'o bìnxo lo xàmgu pedysì'u ni'o ze'a lo djèdi se vìmcu cu fasnu fa no se jmìna ckàpe poi zùnti lo nu pànpi pe lo ra nu lìtru .i pa roi ku je'u la tìnci mùdypre cu stàpa lo cakcìnki poi cpàre lo klàji ku'o gi'e càtra lo ŭu cmàlu .i la'e di'u gàsnu lo nu la tìnci mùdypre cu bàdri mùtce .i ki'u bo my cu ro roi kùrji jùndi lo nu na crògau su'o jmìve .i je fau lo nu càdzu cu klàku lo so'i kakydìrgo pe lo ka bàdri .e lo ka xènru .i lo bi'u nai kakydìrgo cu màsno nitmù'u fo lo flìra gi'e nitmù'u fo lo cidyterjò'e pe lo xèdja noi bu'u ke'a ky furtirfàrvi .i ca lo ca nu la .dòrotis. cu rètsku da ty my kei la tìnci mùdypre na kàkne lo ka kàrgau lo ri mòklu .i ri'a bo lo ra xèdja cu sìmxu lo ka klùza snìpa ri'a tu'a lo furtìrse .i ty my mùtce lo ka tèrpa la'e di'u kei gi'e mùvgau lo bìrka fa'a la .dòrotis. tai so'i da te zu'e lo nu sìnxa lo du'u .ei la .dòrotis. cu sìdju .i ku'i dy na jìmpe .i la cìnfo ku ji'a se cfìpu lo du'u ma kau ca'o màlfau .i ku'i la cpitèpygau cu lèbna lo ctìle lànte lo lànka pe la .dòrotis. gi'e ctilypù'i lo xèdja be la mùdypre ja'e lo nu ba za lo so'u mòkca my di'a kàkne lo ka tàvla ni'o «lu ja'o pu nùnctu fi mi —sei ty my cùsku— lo du'u .ei mi jùndi lo du'u mi ma kau stàpa .i ki'u bo mi va'o lo nu da'i mi càtra lo ziljmìna cìnki cu ju'o ba za'u re'u fantynalkà'e lo nu klàku .i je lo nu klàku cu rìnka lo nu lo mi xèdja cu furtirfàrvi ja'e lo nu mi na ka'e tàvla li'u» ni'o ba bo ty my càdzu se kai lo ka capyjù'i mùtce kei fau lo nu lo kànla cu càtlu lo dàrgu .i je ca ro nu ty my vìska lo cmàlu mànti poi camgù'a cpàre lampàgre cu ravystàpa te zu'e lo nu na xràni my .i la tìnci mùdypre cu ja'a djùno lo du'u na se rìsna kei gi'e se ki'u bo kùrji zei mùtce lo nu no roi kùsru da ni'o «lu do no'u lo prènu poi se rìsna —sei my cùsku— cu tòlcau da poi gìdva do ku'o gi'e no roi nìtcu lo ka srèra .i ku'i mi na se rìsna .i se ki'u bo mi bìlga lo ka jùndi mùtce .i ca lo nu la .oz. ba'o dùnda lo rìsna mi zo'u: li'a na sàrcu fa la'e di'u li'u»

ni'o ni'o ze mo'o lo nu lìtru se ka'a la bànli .oz.
	ni'o lo ro da cu bìlga lo ka gìnka bu'u lo bàrtu ca lo ca nìcte ni'a lo bàrda trìcu poi nènri lo rìcfoi .i ki'u bo no dìnju cu jìbni .i lo tròci cu xàmgu ke ròtsu gàcri co bàndu fi lo lùnsa .i je la tìnci mùdypre cu kàtna fi lo bàrda dèrxi se pi'o lo ka'àmru .i je la .dòrotis. cu zbàsu lo bànli fàgri poi glàgau dy gi'e se jàlge lo nu dy jdìka lo ka sèicni .i dy jo'u la .tòtos. cu cìtka lo ro moi be lo vo'a nànba .i je ca ku dy na djùno lo du'u lo re mei ba mo kau te zu'e tu'a lo cèrsai li'u» ni'o «lu va'o lo nu do djìca zo'u —sei la cìnfo cu cùsku— mi ba nèrkla lo rìcfoi gi'e càtra lo mìrli se va'u do .i do ka'e jùkpa se pi'o lo fàgri (to mùkti fa lo nu do zmànei lo se glajùkpa cìdja toi) gi'e ba bo tòlcau lo xàmgu mùtce cèrsai li'u»
ni'o «lu .e'o ko na co'e pe'u do'u —sei la mùdypre cu cpèdu— .i ju'o mi klàku fi lo nu da'i do càtra lo ŭu mìrli .i je ba bo lo mi xèdja cu za'u re'u furtirfàvri li'u»

ni'o ku'i la cìnfo cu clìva klàma lo nènri be lo rìcfoi gi'e tòlcri lo sèvzi vàcysai .i je no da ca su'o da cu djùno lo du'u vy mo kau .i ki'u bo cy na tàvla fi ri .i je la cpitèpygau cu tòlcri lo trìcu poi cùlno lo nàrge ku'o gi'e clùgau lo lànka pe la .dòrotis. ny te zu'e lo nu dy ze'u na xàgji .i dy jìnvi lo du'u la'e di'u zo'u: la cpitèpygau cu mùtce lo ka xèndo gi'e xàgypei .i ku'i dy càrmi cmìla ri'a lo jùxre nu cy. làfti lo nàrge .i lo kìcne xànce cu tai jùxre .i je lo nàrge cu tai cmàlu .i ja'e bo ny poi cy ke'a fàlcru cu ja'a ru'e se zmàmei ny poi cy ke'a pùnji lo lànka .i ku'i la cpitèpygau na se nàbmi gi'e na se vàjni lo du'u ma kau dìtcu lo nu clùgau lo lànka .i ki'u bo cumrì'a lo nu cy cu stàli lo dàrno be lo fàgri .i je cy cu xànka lo nu lo fagykà'u cu zvabì'o lo cy. sudysràsu gi'e jèlgau cy .i se mu'i bo stàli lo dàrno be lo fàgri gi'e klàma lo jìbni ca lo po'o pa nu la .dòrotis. cu vrebì'o te zu'e lo nu sìpna kei kei te zu'e lo nu selgàigau dy lo sùdga pèzli .i py gàsnu lo nu dy. glàre je tàgji kùfra .i je dy. còndi sìpna co'u lo cèrni

ni'o ca lo dònri lo nìxli cu jìrgau lo ri flìra lo cmàlu ke se cìnje cmarì'e .i je ba za bo lo ro da cu co'a lìtru fa'a la ri'òjme tcàdu ni'o lo lìtru pu'o lìfri lo djèdi poi ca ke'a so'i da fàsnu .i ly ja'a ru'e ba'o càdzu ze'a lo càcra .i ca bo ly. vìska lo cràne be ly. be'o poi bàrda fènra poi pàgre lo dàrgu gi'e fèndi lo rìcfoi bu'u ro lo re mlàna .i gànra mùtce fènra .i je ca lo nu pàrkla lo kòrbi gi'e càtlu lo cnìta cu vìska lo nu mùtce lo ka còndi ji'a .e lo nu so'i bàrda je kilsèlkoi ròkci cu zvàti lo lòldi .i lo re mlàna cu tai nitsàlpo ja'e lo nu no lo lìtru ka'e cnìta cpàre .i ze'a lo mòkca cu sìmlu lo ka nu lo nunlì'u cu na ka'e na tòlcfa

ni'o «lu .ei ma'a mo —sei la .dòrotis. cu tolpàcna cùsku— li'u» ni'o «lu mi na te sìdbo fi lo cmàrai —sei la tìnci mùdypre cu cùsku be fau lo nu la cìnfo cu dèskygau lo ri kàlsa ne'òkre gi'e pènsi sìmlu— li'u» ni'o ku'i la cpitèpygau cu cùsku «lu mi'o na ka'e vòfli .i la'e di'u se bìrti .i ji'a na ka'e cpàre fa'a ni'a lo vi bàrda fènra .i se ki'u bo mi'o ga nai na ka'e ràgve plìpe gi .ei sìsti bu'u lo ca se zvàti be mi'o li'u» ni'o «lu pe'i mi ka'e ràgve plìpe —sei la tolvìrnu cìnfo ba lo nu ràlci mènli bo mèrli lo nildàrno cu cùsku li'u»

ni'o «lu va'o ku mi'o na se nàbmi —sei la cpitèpygau cu spùda— .i ki'u bo do ka'e bèvri ro mi'a lo ràgve ca pa dràta li'u» ni'o «lu .i'a .i mi ba tròci —sei la cìnfo cu cùsku— .i ma pa moi li'u» ni'o «lu mi —sei la cpitèpygau cu jdìce— .i ki'u bo va'o lo nu do fàcki lo du'u na snàda zei kàkne lo nu ràgve plìpe zo'u: la .dòrotis. cu mrobì'o .i fa'u la tìnci mùdypre cu màbla selkevbì'o ri'a tu'a lo ni'a ròkci .i ku'i va'o lo nu mi cpàna lo do trìxe cu na tai nàbmi .i ki'u bo lo nu fàrlu cu na sai crorì'a mi li'u» ni'o «lu mi ji'a mùtce lo ka tèrpa lo nu fàrlu —sei la tolvìrnu cìnfo cu cùsku— .i ku'i ru'a sàrcu fa lo nu tròci .i ja'o ko tsebì'o lo mi trìxe .i ba ku mi'o tròci li'u» ni'o la cpitèpygau cu tsebì'o lo trìxe be la cìnfo .i je lo bàrda dànlu cu càdzu klàma lo kòrbi be lo brafè'a gi'e dzibì'o ni'o «lu ki'u ma na ku do bàjra gi joi plìpe —sei la cpitèpygau cu rètsku— li'u» ni'o «lu ki'u lo nu la'e di'u na se tàrti mi'a noi cìnfo ku'o lo tàmsmi —sei spùda— li'u» .i ba bo la cìnfo fau lo nu bànli plìpe cu cècla vòfli pàgre lo vàcri gi'e snùra zvabì'o lo ràgve .i lo dràta cu mùtce lo ka glèki lo nu vìska lo nu tai frìli la cìnfo .i je cy ca lo nu la cpitèpygau ba'o co'u zùtse lo trìxe cu za'u re'u plìpe lo ràgve be lo brafè'a

ni'o la .dòrotis. cu jdìce lo nu re moi .i se ki'u bo bìrka jgàri la .tòtos. gi'e cpàre lo trìxe be la cìnfo fau lo nu tàgji jgàri lo ne'òkre lo pa xànce .i ca lo bavlà'i mòkca cu sìmlu lo ka nu la .dòrotis. cu vòfli pa'o lo vàcri .i je ba zi bo dy pu lo nu ka'e pènsi lo fàsnu cu snùra tolclìva lo ràgve .i la cìnfo cu ci re'u xrùti gi'e lèbna la tìnci mùdypre .i je lo ro da tsebì'o ze'a lo tèmci te zu'e lo nu la cìnfo ka'e sùrla .i ki'u bo lo bàrda nunplìpe pe cy cu rìnka lo nu tolcòndi vàsxu gi'e ta'irvà'u tai tu'a lo bàrda gèrku poi ba'o bàjra ze'a lo dùkse

ni'o lo gùnma cu fàcki lo du'u lo rìcfoi bu'u lo vi mlàna cu dènmi mùtce gi'e mànku je bàdri se jvìnu .i ca lo nu la cìnfo ba'o sùrla kei gy co'a lìtru ve ka'a lo pèlxu kìtybli dàrgu fau lo nu smàji kùcli lo du'u xu kau ca da tolclìva lo fànmo be lo rìcfoi gi'e di'a zvàti lo càrmi solgù'i .i zèngau lo lìtru lo kamtolkùfra fa lo ba za nu tìrna lo cìzra sàvru be ra'i lo còndi rìcfoi .i je la cìnfo fi lo dràta cu laurblèsku lo se du'u lo vi gùgde pàgbu cu jai bu'u xàbju fai la .kalidàs.

ni'o «lu la .kalidàs. cu mo —sei lo nìxli cu rètsku— li'u» ni'o «lu ky cu xlàli maldà'u .i se xàdni lo crìbe sìmsa xàdni gi'e se stèdu lo tìrxu sìmsa stèdu —sei la cìnfo cu spùsku— gi'e se jgàlu da poi tai clàni gi'e kìnli vau ja'e lo nu ka'e vlikà'a mi lo re mei fi'o frìli dùnli lo nu da'i mi ka'e càtra la .tòtos .i mi mùtce lo ka tèrpa la .kalidàs. li'u» ni'o «lu mi na se spàji lo du'u do go'i —sei la .dòrotis. cu spùda— .i ju'o ru'a ky màbla dànlu li'u» ni'o la cìnfo cu pu'o spùsku ca lo nu sùksa fa lo nu tolclìva lo dràta brafè'a be lo dàrgu .i ku'i lo vi brafè'a cu tai gànra gi'e còndi vau ja'e lo nu la cìnfo cu ba zi sai djùno lo du'u na ka'e plìpe lo ràgve ni'o se ki'u bo lo gùnma cu tsebì'o te zu'e lo nu pènsi lo nu .ei mo kau .i je ba lo jùnri nu pènsi kei la cpitèpygau cu cùsku ni'o «lu vi bàrda trìcu gi'e jìbni lo brafè'a .i mi'o va'o lo nu la tìnci mùdypre ka'e kàtna lo trìcu ja'e lo nu fàrlu lo ràgve cu ka'e se frìli lo nu ve ka'a càdzu li'u» ni'o «lu la'e di'u klèsi pa moi sìdbo —sei la cìnfo cu cùsku— .i da'i da na ru'e srùma lo du'u nènri lo do stèdu fa lo bèsna je nai lo sudysràsu li'u» ni'o la mùdypre cu ba zi co'a gùnka .i je ka'àmru cu tai kìnli ja'e lo nu lo trìcu cu ba zi jìbni lo ka se kàtna .i ba bo la cìnfo cu pùnji lo ri tsàli ke cràne tùple lo trìcu gi'e càtke se rai lo ka vlìpa .i lo trìcu cu màsno lo ka sàlpo bìnxo kei gi'e fàrlu fi'o sànce lo làutce lo se ràgve fau lo nu lo galràipau jìmca cu cpàna lo ràgve

ni'o lo lìtru cu co'a ràgve klàma lo vi cìzra crìpu ca lo nu lo kìnli sèlcmo cu gàsnu lo nu vo'a fa'a ga'u càtlu .i je se ri'a lo nu tèrpa càrmi cu vìska lo nu lo re bàrda dànlu poi crìbe se xàdni gi'e tìrxu se stèdu cu fa'a bàjra ni'o «lu .kalidàs. —sei la tolvìrnu cìnfo fau lo nu co'a tepydèsku cu cùsku— li'u» ni'o «lu ko sùtra —sei la cpitèpygau cu krìxa— .i je'u mi'o ràgve klàma li'u»

ni'o ja'e bo la .dòrotis. cu pa moi lo klàma fau lo nu bìrka jgàri la .tòtos .i la tìnci mùdypre cu se lìdne .i la cìnfo to'e ki'u nai lo nu je'a tèrpa cu càrna te zu'e lo nu fàpro la .kalidàs. kei gi'e ba bo cmòni lo tai clàdu je màbla ja'e lo nu la .dòrotis. cu krìxa .e lo nu la cpitèpygau cu trìxe càrna fàrlu .e lo nu lo ji'a sai tsàli maldà'u cu klàsti gi'e se spàji càtlu la cìnfo ni'o ku'i la .kalidàs. se ja'e lo nu ge vìska lo nu bràmau la cìnfo gi mòrji lo du'u ge re mei fa vo'a gi pa mei fa la cìnfo cu di'a fa'a bàjra .i je la cìnfo cu klàma lo dràta fànmo be lo trìcu gi'e càrna te zu'e lo nu vìska lo nu ky ba zi mo kau .i lo ji'a tsàli maldà'u se cau lo nu klàsti ze'i lo mòkca cu co'a co'e ve ka'a lo trìcu .i je la cìnfo fi la .dòrotis. cu cùsku: ni'o «lu mi'o se maldìmna .i ki'u bo ju'o ta ba vlikà'a mi'o se pi'o lo ra kìnli jgàlu .i ku'i ko sànli ne'a ti'a mi .i je mi ta ba dàmba ze'a lo nu mi jmìve li'u»

ni'o «lu ko ze'i dènpa —sei la cpitèpygau cu clàdu cùsku— li'u» .i cy pu ca'o pènsi lo du'u ma kau se zùkte xàgrai .i ca cpèdu fi lo mùdypre fe lo nu kàtna vìmcu lo trìcu fànmo poi cpàna lo vo'a ràgve be lo brafè'a .i la tìnci mùdypre ba zi co'a pìlno ri ka'àmru .i je ca sai lo nu la .kalidàs. cu na ru'e ba'o tolclìva lo trìcu fànmo kei lo trìcu cu fàrcu fi'o sànce lo làutce fo lo brafè'a fau lo nu bèvri lo tòlmle je fe'ùcmo maldà'u .i je ro lo re da cu vlìle se màrxa bu'u lo kìnli ròkci be bu'u lo lolràipau

ni'o «lu ja'o —sei la tolvìrnu cìnfo fau lo nu clàni ke co'urdù'u vàsxu cu cùsku— .i za'a mi'o ba za'o jmìve ze'a lo se jmìna .i je mi la'e di'u je'a glèki .i ki'u bo ju'o ru'a mùtce lo ka to'e se kùfra kei fa lo nu na jmìve .i lo va dànlu mi pu tai tèpygau zei mùtce ja'e lo nu lo mi rìsna cu za'o slìlu sùtra li'u» ni'o «lu ŭi nai —sei la tìnci mùdypre cu bàdri cùsku— .i .au mi se rìsna lo ka'e slìlu li'u» ni'o lo pu zi sèlfri cu se jàlge lo nu lo lìtru se mau ro lo pùrci cu djìca lo ka barbì'o lo rìcfoi .i tai sùtra lo ka càdzu .i ja'e bo la .dòrotis. cu bìnxo lo ka tàtpi kei gi'e nìtcu lo ka se màrce bu'u lo trìxe be la cìnfo .i mùtce lo ka se glèki ly kei fa lo nu lo trìcu cu jdìka lo ka dènmi kei pa'a lo nu ly. zènba lo ka klàma ze'a ma kau .i je ca lo dormijbà'i cu sùksa fa lo nu tolylì'a lo gànra rìrxe noi sùtra flècu ne'a ca'u ly .i vìska lo nu bi'u lo ràgve be lo rìrxe lo pèlxu kìtybli dàrgu cu pàgre lo mèlbi nùrma ne lo crìno sastù'a poi se bàrna lo sorskàri xrùla ku'o fau lo nu pi ro lo dàrgu cu se kòrbi lo trìcu poi mùlno se dàndu lo kùkte grùte .i ly mùtce lo ka selpù'a lo ka vìska lo bi'u nai kùkte gùgde noi cràne ni'o «lu ta'i ma mi'o ràvykla lo rìrxe —sei la .dòrotis. cu rètsku— li'u» ni'o «lu frìli se zùkte —sei la cpitèpygau cu spùda— .i la tìnci mùdypre cu bìlga lo ka zbàsu lo pìnblo se va'u ma'a ja'e lo nu ma'a kàkne lo ka fùlta se ka'a lo ràgve li'u»

ni'o ja'e bo la mùdypre cu lèbna lo ri ka'àmru gi'e co'a kàtna lo cmàlu trìcu te zu'e lo nu zbàsu lo pìnblo .i ca lo nu my ca'o gùnka kei la cpitèpygau cu tòlcri fi lo rìrxe kòrbi fe lo trìcu poi cùlno lo xàmgu grùte .i la'e di'u plùka la .dòrotis. ku noi pu ze'a pi ro lo djèdi cu cìtka no na'e bo lo nàrge zi'e noi ca jùkpa lo bànli sànmi lo màkcu grùte ni'o ku'i lo nu da zbàsu lo pìnblo cu se dìtcu va'o ji'a sai lo nu da to'e làzni gi'e na'e ta'irbì'o vau du'i tu'a la tìncu mùdypre .i ca lo nu co'a nìcte zo'u: lo nu gùnka na mùlno .i se ki'u bo tòlcri lo se kùfra stùzi be ni'a lo trìcu be'o noi bu'u ke'a co'u lo cèrni cu sìpna .i la .dòrotis. cu sènva la ri'òjme tcàdu jo'u la vrùde te màkfa .oz. ku noi ba za xrùgau bènji dy lo zdàni be dy

ni'o ni'o bi mo'o lo mrockàpe ke makpàpi fòldi
	ni'o lo ma'a cmàlu bènde be lo lìtru cu cikybì'o ca lo za'u moi cèrni fau lo nu di'a se lìvla gi'e cùlno lo ka pàcna .i je la .dòrotis. cu cèrsai cìtka tai tu'a lo noltrutì'u lo najysmèla jo'u lo zirsmèla vu'o pe lo trìcu poi jìbni lo rìrxe .i ti'a lo gùnma cu zvàti fa lo mànku rìcfoi poi gy ba'o pàgre ke'a gi'e ku'i xlàfri lo so'i nu se toldàrsygau .i ku'i ca'u ku zvàti fa lo mèlbi je se solgù'i gùgde poi sìmlu lo ka xlùra fi tu'a la ri'òjme tcàdu ni'o li'a lo gànra rìrxe cu ca se ràgve lo gùnma lo va mèlbi gùgde .i ku'i lo pìnblo cu na ru'e mùlno .i je ca lo nu la tìnci mùdypre cu ba'o kàtna lo su'o se jmìna mùdyspi gi'e làsna ri lo dràta lo mùdri pìjne kei lo gùnma cu brèdi lo nu tòlsti .i la .dòrotis. cu tsebì'o bu'u lo mìdju be lo pìnblo gi'e jgàri la .tòtos. lo bìrka .i ca lo nu la tolvìrnu cìnfo cu stàpa lo pìnblo kei py cu sàlpo mùtce bìnxo ki'u lo nu cy cu bàrda gi'e tìlju .i ku'i la cpitèpygau jo'u la tìnci mùdypre cu sànli lo dràta fànmo te zu'e lo nu stògau by .i je jgàri lo clàni gràna lo xànce te pi'o lo nu càtke mùvgau lo pìnblo fu lo djàcu
ni'o lo gùnma ca lo nùncfa cu xàmgu snàda .i ku'i ca lo nu tolclìva lo mìdju be lo rìrxe kei lo sùtra flècu cu càtke lo pìnblo fa'a lo dzìfle ja'e lo nu dàrmau je dàrmau lo klàji pe lo pèlxu kìtybli .i je lo djàcu cu bìnxo lo ka tai còndi kei ja'e lo nu lo clàni gràna cu na ka'e làmji lo lòldi

ni'o «lu ti xlàli —sei la tìnci mùdypre cu cùsku— .i ki'u bo mi'o va'o lo nu na snàda lo nu tolclìva lo tùmla cu ba se bèvri fi lo gùgde pe la pàlci termafyfè'i pe la stìci .i je ty ba màfyxlu mi'o gi'e gasnu lo nu mi'o ty cu sèlfu li'u»

ni'o «lu se va'o bo mi na te dùnda lo bèsna —sei la cpitèpygau cu cùsku— li'u» ni'o «lu si'a mi na te dùnda lo ka vìrnu —sei la tolvìrnu cìnfo cu cùsku— li'u» ni'o «lu si'a mi na te dùnda lo rìsna —sei la tìnci mùdypre cu cùsku— li'u» ni'o «lu si'a mi no roi xrùti la .kànzas. —sei la .dòrotis. cu cùsku— li'u» ni'o «lu .ei sai mi'o tolclìva la ri'òjme tcàdu va'o lo nu kàkne —sei la cpitèpygau cu di'a co'e— li'u» .i càtke se kai lo tai ka tsàli kei ja'e lo nu lo clàni gràna cu selvicyjdàri fi lo derpèsxu pe lo rìrxe lòldi .i ba bo pu lo nu cy ka'e làcpu vìmcu gi'a toljgàri kei lo pìnblo cu vlìle se bèvri to'o .i je la ŭu cpitèpygau cu stàli fau lo nu jgàri lo gràna kei lo mìdju be lo rìrxe ni'o «lu co'o li'u» se krìxa cy fa'a lo dràta noi mùtce lo ka kècti fi lo nu clìva cy .i je'u la tìnci mùdypre cu co'a klàku gi'e ku'i fu'au mòrji lo du'u ka'e furtìrse kei ja'e lo nu sùdgau lo se klàku se pi'o lo jisystotà'u pe la .dòrotis. ni'o li'a la'e de'u xlàli la cpitèpygau

ni'o «lu mi ca selxlàmau mi pe lo nu pa re'u pènmi la .dòrotis. —sei cy pènsi— .i pu jòrne lo gràna be bu'u lo gùrni fòldi noi bu'u ke'a mi kàkne lo nu tèpygau lo kòrvo kei do'a nai .i ku'i ju'o no da pràli fi lo nu lo cpitèpygau cu jòrne lo gràna be bu'u lo mìdju be lo rìrxe .i ŭi nai ba'a mi ro mai ba no roi se bèsna li'u» ni'o lo pìnblo cu mùvdu fa'a lo dzìfle .i je la cpitèpygau ŭu cu dàrno mùtce bìnxo .i ba bo la cìnfo cu cùsku: ni'o «lu .ei sai da se zùkte fi lo nu nùrgau mi'o .i pe'i mi kàkne lo nu lìmna se ka'a lo rìrxe kòrbi gi'e làcpu lo pìnblo kei lo nu do tàgji jgàri lo jìpno be lo mi rèbla li'u»

ni'o ja'e bo cy cu plìpe lo djàcu .i je la tìnci mùdypre cu tàgji jgàri lo ra rèbla .i ba bo la cìnfo cu co'a lìmna klàma se rai lo kamvlìpa fa'a lo rìrxe kòrbi .i nàndu se gùnka to'e ki'u nai lo du'u cy tai bàrda .i ku'i ba za se làcri to'o ne'i lo flècu .i je ba bo la .dòrotis. cu jgàri lo clàni gràna pe la tìnci mùdypre gi'e sìdju fi lo nu càtke lo pìnblo fa'a lo tùmla ni'o lo ro da mùtce lo ka tàtpi kei ca lo nu tolclìva lo rìrxe kòrbi gi'e te ka'a stàpa lo mèlbi ke crìno sràsu .i je djùno lo ji'a du'u lo flècu pu bèvri vo'a ve'a lo clàni lo dàrno be lo pèlxu kìtybli dàrgu noi plùta la ri'òjme tcàdu ni'o «lu .ei mi'o ca mo —sei la tìnci mùdypre cu rètsku be ca lo nu la cìnfo cu tsebì'o lo sràsu te zu'e lo nu cùrmi lo nu lo solgù'i cy sùdgau— li'u» ni'o «lu mi'o nìtcu lo nu xrùti lo dàrgu ta'i da —sei la .dòrotis. cu cùsku— li'u» ni'o «lu xàgrai lo se plàtu fa lo nu càdzu re'o lo rìrxe kòrbi co'u lo nu mi'o di'a zvàti lo dàrgu —sei la cìnfo cu te nòtci— li'u»

ni'o ca lo nu lo gùnma ba'o mo'u sùrla zo'u: la .dòrotis. cu lèbna lo ri lànka .i je gy co'a co'e re'o lo sràsu ri'èrkoi fa'a lo dàrgu poi lo rìrxe pu bèvri gy ke'a .i mèlbi gùgde .i tòlcau lo so'i xrùla .e lo so'i grùte trìcu .e lo so'i solgù'i vu'o poi gekyzèngau .i je lo lìtru va'o lo nu da'i na tai kècti la cpitèpygau cu ka'e glèki mùtce ni'o ly càdzu se rai lo kamsùtra fau lo nu la .dòrotis. cu pa po'o roi klàsti te zu'e lo nu crèpu lo pa mèlbi xrùla .i je ba lo tèmci la tìnci mùdypre cu krìxa «lu ko càtlu li'u» ni'o ba ku lo ro da cu càtlu lo rìrxe gi'e vìska lo nu la cpitèpygau cu zvàti lo ri gràna bu'u lo mìdju be lo djàcu fau lo nu sìmlu lo ka sèicni je bàdri mùtce ni'o «lu ta'i ma mi'o ta ka'e sìdju —sei la .dòrotis. cu rètsku— li'u» ni'o la cìnfo .e la mùdypre cu stèdu dèsygau ki'u lo nu na djùno .i se ki'u bo tsebì'o lo ri'èrkoi gi'e càucni càtlu la cpitèpygau co'u lo nu vòfli jbibì'o fa lo kiknòia poi ca lo nu vìska vo'a cu klàsti lo djàcu kòrbi te zu'e lo nu sùrla ni'o «lu do me ma gi'u'e klàma ma —sei la kiknòia cu rètsku— li'u» ni'o «lu mi'e .dòrotis. —sei lo nìxli cu spùda— .i je ti mi pèndo .i la tìnci mùdypre .i la tolvìrnu cìnfo .i mi'a klàma la ri'òjme tcàdu li'u» ni'o «lu ti na dràni dàrgu —sei la kiknòia cu cùsku be fau lo nu se tòrni lo ri clàni cnèbo gi'e kìnli càtlu lo cìzra bènde ni'o «lu mi djùno —sei la .dòrotis. cu xrùgau— .i ku'i mi'a pu cìrko la cpitèpygau gi'e kùcli lo nu ta'i ma kau cpàcu cy li'u»

ni'o «lu cy ma zvàti —sei la kiknòia cu rètsku— li'u» ni'o «lu lo va rìrxe —sei lo cmàlu nìxli cu spùsku— li'u» ni'o «lu mi va'o lo nu cy na tai ge bàrda gi tìlju cu cpàcu cy se va'u do —sei la kiknòia cu te nòtci— li'u» ni'o «lu cy na sai tìlju —sei la .dòrotis. cu djìca cùsku— .i ki'u bo cy cu te sètca lo sudysràsu .i je va'o lo nu do bèvri cy mi'a zo'u: mi'a do ze'e ba tai ckìre zei mùtce li'u» ni'o «lu .i'a mi ba tròci —sei la kiknòia cu cùsku— .i ku'i mi va'o lo nu fàcki lo du'u tìlju dùksu cu ba fàlcru cy lo rìrxe li'u»

ni'o ja'e bo lo bàrda cìpni cu mo'i ga'u vòfli gi'e vòìkla ga'u lo djàcu lo jai bu'u gràna jòrne be fai la cpitèpygau .i ba bo la kiknòia fi lo ri bàrda jgàlu cu co'a jgàri la cpitèpygau lo bìrka gi'e bèvri cy lo ga'u vàcri je ba bo lo ri'èrkoi noi bu'u ke'a la .dòrotis. .e la cìnfo .e la tìnci mùdypre .e la .tòtos. cu zùtse ni'o la cpitèpygau ca lo nu sànji lo nu di'a zvàti lo ri pèndo cu tai glèki ja'e lo nu pàmjai ro boi py (to ji'a sai la cìnfo .e la .tòtos. toi) .i je ca lo nu càdzu cu sànga «lu .tolderide'òs. li'u» ca ro nu stàpa .i tai gèicni

ni'o «lu mi pu tai tèrpa lo nu bi'ai ro roi stàli lo rìrxe —sei la cpitèpygau cu cùsku— .i ku'i lo xèndo kiknòĭa mi nùrgau .i je mi va'o lo nu ca da mi se bèsna cu .ai tòlcri lo bi'u nai kiknòĭa gi'e dùnda fi cy fe lo nu mi xèndo cy li'u» ni'o «lu na sàrcu —sei la kiknòia ku noi vòfli jìbni kànsa cu cùsku— .i mi ro roi glèki lo nu sìdju lo se ràktu .i ku'i nìtcu lo nu cliva ca .i ki'u bo lo mi cìfnu mi dènpa bu'u lo cpìzda .i mi pàcna lo nu ge do ba tòlcri la ri'òjme tcàdu gi la .oz. do ba sìdju li'u» ni'o «lu ki'e do —sei la .dòrotis. cu spùda— li'u» .i je ba bo la xèndo kiknòia cu mo'i ga'u vòfli gi'e ba zi bo co'u se vìska ni'o lo gùnma cu ca'o càdzu fau lo nu tinjù'i lo se sànga be la sòrska cìpni gi'e càtlu lo mèlbi xrùla noi fe'e ca bìnxo lo tai ròtsu ja'e lo nu lo lòldi cu se gàcri xy .i zvàti fa lo bàrda ke pèlxu fa'u blànu fa'u zìrpu xrùla je ji'a lo bàrda gìrzu co fàgri xùnre makpàpi noi tai càrmi skàri ja'e lo nu na ru'e dazzle! lo kànla be la .dòrotis. ni'o «lu xu ta na mèlbi —sei lo nìxli cu rètsku be fau lo nu vàsxu lo cpìna pànci be lo càrmi xrùla— li'u» ni'o «lu ru'a ja'a go'i —sei la cpitèpygau cu spùsku— .i mi ca lo nu se bèsna cu nèlci zènba la'a li'u» ni'o «lu mi va'o lo .au nu se rìsna cu pràmi ta —sei la tìnci mùdypre cu jmìna cùsku— li'u» ni'o «lu mi pu ro roi nèlxi lo xrùla —sei la cìnfo cu cùsku— .i xy sìmlu lo ka tai seldjùcau je rùble .i ku'i no lo xrùla pe lo rìcfoi cu càrmi dùnli ta li'u» ni'o lo gùnma co'a lampàgre lo se jmìna je se jmìna ke bàrda makpàpi je me'i je me'i lo dràta xrùla .i je ba zi zvàti lo mìdju be lo bàrda makpàpi bo fòldi .i ka'u mìsno fàtci fa lo du'u va'o lo nu lo tai xrùla cu tai so'i mei kei lo pànci cu tai tsàli ja'e lo nu ro da poi vàsxu py cu sipybì'o .i je lo sìpna va'o lo nu na to'o se bèvri cu ze'e be sìpna .i ku'i la .dòrotis. na djùno la'e di'u .i je nai dy ka'e darbì'o lo càrme je xùnre xrùla noi fe'e ro roi ru'u zvàti .i ja'e bo lo kànla be dy cu ca'o tìlju bìnxo .i je dy cìnmo lo ka nìtcu lo nu tsebì'o te zu'e lo nu sùrla gi'e sìpna ni'o ku'i la tìnci mùdypre cu na cùrmi la'e di'u

ni'o «lu .ei mi'o sùtra ja'e lo nu xrùti lo pèlxu kìtybli dàrgu pu lo nu mànku —sei ty my cùsku— li'u» .i je la cpitèpygau cu tùgni .i ja'e bo ca'o càdzu co'u lo nu la .dòrotis. na za'o ka'e sànli .i lo ri kànla cu ga'orbì'o to'e ki'u nai tu'a dy .i je dy cu tolmò'i lo du'u zvàti ma kau kei gi'e fàrlu lo jbìni be lo makpàpi fau lo nu còndi sìpna

ni'o «lu .ei mi'o mo —sei la tìnci mùdypre cu rètsku— li'u» ni'o «lu va'o lo nu mi stàcru ta ti kei ta ba mrobì'o —sei la cìnfo cu cùsku— .i lo pànci be lo xrùla cu càtra ro mi'o .i mi ja'a ru'e ka'e stògau lo kànla lo ka kàlri .i je lo gèrku cu xa'o sìpna li'u» ni'o jètnu .i la .tòtos. pu fàrlu ne'a lo ri cmàlu jìtro .i ku'i la cpitèpygau .e la tìnci mùdypre vu'o noi na màrji lo rèctu cu na se ràktu tu'a lo pànci be lo xrùla

ni'o «lu ko bàjra sùtra —sei la cpitèpygau fi la cìnfo cu cùsku— gi'e bàrkla lo vi mrorì'a ke xlùra fòldi se rai lo kamsùtra .i mi'o ba bèvri lo cmàlu nìxli .i ku'i va'o lo nu da'i do sìpybi'o zo'u: do dùkse lo ka bàrda kei lo nu se bèvri li'u» ni'o ja'e bo la cìnfo cu sa'irbì'o gi'e cràne bàjra se rai lo kamsùtra .i ba lo mòkca cu co'u se vìska

ni'o «lu .e'u mi'o zbàsu lo stìzu lo mi'o xànce gi'e bèvri ta —sei la cpitèpygau cu cùsku— li'u» .i ja'e bo làfti la .tòtos. gi'e pùnji lo gèrku lo tsetùpyzbe be la .dòrotis. gi'e ba bo zbàsu lo stìzu lo vo'a xànce poi stìzu ku'o jo'u lo vo'a bìrka poi stìzu bìrka ku'o gi'e bèvri lo sìpna nìxli pa'o lo xrùla ni'o càdzu joi càdzu .i je lo bàrda lòlgai co mrorì'a xrùla poi srùri cu sìmlu lo ka se fànmo no da .i lo lìtru cu jèrsi lo krùvi be lo rìrxe gi'e ro mai pènmi lo vo'a pèndo no'u la cìnfo zi'e noi còndi sìpna vrèta lo jbìni be lo makpàpi .i lo xrùla pu dùkse lo ka tsàli kei tu'a lo bàrda mùtce dànlu .i je dy pu rànda ca lo fànmo gi'e fàrlu lo lòldi vi lo cmàlu ki lo kòrbi be lo makpàpi fòldi be'o noi fe'e co'a ke'a lo kùkte sràsu cu prè.a lo mèlbi ke crìno fòldi ca'u lo lìtru

ni'o «lu —sei la tìnci mùdypre cu bàdri cùsku— .i ki'u bo dùkse lo ka tìlju kei lo nu se làfti .i mi'o nìtcu lo nu stàgau ta ti ja'e lo nu ze'e sìpna gi'e ju'o cu'i sènva lo nu ba'o tòlcri lo ka vìrnu ro mai li'u» ni'o «lu mi kècti —sei la cpitèpygau cu cùsku— .i la cìnfo pu xàmgu mùtce pèndo ma'i lo tai tolvìrnu .i ku'i .e'u mi'o di'a klàma li'u» ni'o bèvri lo sìpna nìxli lo mèlbi stùzi poi jìbni lo rìrxe zi'e noi lo ni dàrno lo makpàpi fòldi cu bànzu lo nu fànta lo nu ny cu vàsxu lo se jmìna ke vìndu pe lo xrùla .i je bu'u ku toljùrsa pùnji ny lo rànti sràsu gi'e dènpa lo nu lo blebì'e cu cìkygau ny

ni'o ni'o so mo'o la noltrufè'i be lo tùmla smàcu
	ni'o «lu mi'o ca na ka'e dàrno lo klàji pe lo pèlxu kìtybli —sei la cpitèpygau cu te nòtci be fau lo nu sànli re'o lo nìxli— .i ki'u bo mi'o ba'o na ru'e klàma ve'a lo jai ve'a fardùkti se bèvri be lo rìrxe li'u»

ni'o la tìnci mùdypre cu spùda pu'o lo nu tìrna lo dìzlo se cmòni .i je my fau lo nu càrgau lo stèdu kei (to noi mèlbi se snàda va'o tu'a lo cìdni toi) cu vìska lo nu lo fànge dànlu cu plìpe bàjra lo sràsu fa'a xai .i je'u dy du lo pèlxu cicmlàtu .i je la tìnci mùdypre cu pènsi lo du'u ju'o cy cu jèrsi da kei ki'u lo nu lo kèrlo be cy cu vrèta jìbni lo stèdu kei .e lo nu lo mòklu cu gànra kàlri fau lo nu jàrco lo re tòlmle dènci lìnji ca lo nu lo xùnre kànla cu càrmi tai lo fàgri bòlci .i ca lo nu ca'o jìbni bìnxo kei la tìnci mùdypre cu vìska lo nu ca'u lo dànlu cu bàjra fa lo cmàlu fòldi bo smàcu kei gi'e djùno to'e ki'u nai lo nu na se rìsna kei lo du'u tòldra fa la cicmlàtu lo ka tròci lo ka càtra lo tai mèlbi je tolckàpe dànlu

ni'o se ki'u bo la mùdypre cu làfti lo ri ka'àmru .i je ca lo nu la cicmlàtu cu jìbni bìnxo cu slìgau sùtra dàrxi cy se ri'a lo nu lo stèdu be lo dànlu cu klìna kàtna se vìmcu fi lo xàdni .i je dy cu gànro bu'u lo jàmfu be my ja'e lo re spìsa ni'o lo tùmla smàcu mu'i lo nu ca ba'o se nùrgau fi tu'a lo bràdi cu klàsti .i je fau lo nu klàma zei màsno la mùdypre cu cùsku se pi'o lo galtò'a ke cmàlu vòksa di'e ni'o «lu .i'o ki'e do'u .i ki'e sai .i do nùrgau lo mi nunjmìve li'u» ni'o «lu .e'o ko na tàvla fi la'e di'u —sei la mùdypre cu spùsku— .i mi na se bèsna .i se ki'u bo mi ràcli jùndi lo ro nu da'i da nìtcu lo pèndo .i ju sai lo da'i pèndo cu smàcu !po'o li'u» ni'o «lu le'o smàcu po'o —sei lo cmàlu dànlu cu se fànza krixa— .i je'u mi noltrufè'i .i noltrufè'i lo ro tùmla smàcu li'u» ni'o «lu ŭa je'e —sei la mùdypre cu cùsku be fau lo nu krorìnsa— li'u»

ni'o «lu ki'u ku do ba'o zùkte lo bànli je ji'a lo se vìrnu ta'i lo nu nùrgau lo mi nunjmìve —sei la noltrufè'i cu jmìna cùsku— li'u» ni'o ca bo lo so'o smàcu cu ca'o fa'a bàjra se rai lo sùtra se jìmte be lo nu lo tùple ka'e bèvri sy .i je ca lo nu vìska la noltrufè'i cu clàdu cùsku di'e ni'o «lu doi ga'i nai nòltru mi'a pu jìnvi lo du'u do ba se càtra .i ta'i ma do snàda lo nu rènvi tu'a la bàrda cicmlàtu li'u» .i ro lo smàcu cu tai dìzlo krobì'o fa'a lo cmàlu noltrufè'i ja'e lo nu sy na ru'e sànli fi lo stèdu ni'o «lu lo vi xàjmi tìnci bo nànmu —sei ny spùsku— pu càtra la cicmlàtu gi'e nùrgau lo mi nunjmìve .i se ki'u bo co'a lo càbna lo ro do cu sèlfu .ei gi'e tìnbe lo cmàrai ku ji'a sai li'u»

ni'o «lu mi'a ja'a co'e —sei lo ro smàcu cu galtò'a krìxa kànsi'u .i ba bo sy cu prèja fa'a ro da .i ki'u bo la .tòtos. pu ba'o cikybì'o gi'e ca glèki gèrcmo mu'i lo nu vìska lo vi so'i smàcu kei gi'e plìpe lo mìdju be lo gùnma .i la .tòtos. pu ro roi pràmi lo ka jèrsi lo smàcu kei ca lo nu xàbju la .kànzas. kei gi'e jìnvi lo du'u na nàbmi ni'o ku'i la tìnci mùdypre cu kàvbu lo gèrku lo ra bìrka gi'e tàgji jgàri ze'a lo nu làusku fi lo smàcu fe «lu ko xrùti .i ko xrùti .i la .tòtos. do na ba crògau li'u» ni'o fau ku la smàcu noltrunì'u cu bàrgau lo ri stèdu lo cnìta be lo sràsu gìrzu gi'e rètsku se pi'o lo toldàrsi vòksa «lu xu do bìrti lo du'u ty mi'a na ba bàtci li'u» ni'o «lu mi ba na cùrmi —sei la mùdypre cu cùsku— .i se ki'u bo ko na tèrpa li'u» ni'o lo smàcu cu pòrci ke cpàre xrùti .i je la .tòtos. cu na za'u re'u gèrcmo .i to'e ki'u nai bo ty cu tròci lo ka clìva lo bìrka be la mùdypre kei gi'e bàcti da'i my va'o lo nu na dràni djùno lo du'u my tìnci .i ro mai pa lo bràrai be lo smàcu cu cùsku ni'o «lu pau mi'a ma do ka'e plèji —sei sy rètsku— lo nu do nùrgau lo nunjì'e be lo mi'a notrunì'u li'u» ni'o «lu no da poi mi djùno fi ke'a —sei la mùdypre cu spùsku— li'u» .i ku'i la cpitèpygau ku noi pu ca'o pènsi tròci gi'e ku'i na'e snàda ki'u lo nu lo ri stèdu cu te sètca lo sudysràsu cu cùsku zei sùtra «lu ŭa ĭe se'i .i do ka'e nùrgau lo mi'a pèndo no'u la tolvìrnu cìnfo zi'e noi ca'o sìpna ne'i lo makpàpi ckàna li'u» ni'o «lu ŭe ĭi lo cìnfo —sei lo cmàlu noltrunì'u cu krìxa— .i ju'o ba'a cy ro mi'a ba cìtka li'u» ni'o «lu ĭe nai —sei la cpitèpygau cu jdìce cùsku— .i lo bi'u nai cìnfo cu tolvìrnu li'u» ni'o «lu je'u pei —sei la smàcu cu rètsku— li'u» ni'o «lu cy cu xùsra la'e di'u —sei la cpitèpygau cu spùsku— .i je ju'o cy no roi crògau da poi pèndo mi'a .i va'o lo nu do mi'a sìdju lo nu nùrgau cy zo'u: nu'e do cy do ba xèndo zei mùtce li'u» ni'o «lu .i'a je'e —sei la noltrunì'u cu cùsku— .i mi'a do làcri .i ku'i .ei mi'a mo li'u» ni'o «lu xu zàsti fa lo so'i tai smàcu poi ke'a do tèrcme zo noltrunì'u gi'e djìca lo nu tìnbe fi do li'u» ni'o «lu go'i .i zàsti fa lo su'o ki'o mei —sei ny spùsku— li'u» ni'o «lu ko va'o mìnde lo ro da lo nu klàma ti se rai lo kamsùtra kei gi'e gàsnu lo nu ro vo'e bèvri lo clàni ke cìlta spìsa li'u» ni'o la noltrunì'u cu selfarbì'o lo smàcu poi jbìzva ny gi'e ba zi minde sy lo nu klàcpe ro lo dràta smàcu .i zi sai ba lo nu tìrna lo nu mìnde cu to'o bàjra se rai lo kamsùtra fa'a ro da ni'o «lu ca ku zo'u: —sei la cpitèpygau fi la tìnci mùdypre cu cùsku— .ei do klàma lo trìcu be ne'a lo rìrxe kòrbi gi'e zbàsu lo màrce poi ba bèvri la cìnfo li'u» ni'o la mùdypre cu ba zi klàma lo trìcu gi'e co'a gùnka .i je ba za zbàsu lo màrce lo jìmca be lo trìcu be'o noi vo'a fi ke'a cu kàtna vìmcu ro lo pèzli je ro lo jìmca jìmca .i simlà'a lo ro mei lo mùdri pìjne gi'e zbàsu lo vo xìslu lo tòrdu spìsa be lo bàrda ke trìcu stàni .i tai sùtra je xàmgu gùnka ja'e lo nu ca lo nu lo smàcu co'a tolylì'a cu mùlno brèdi ri fa lo màrce

ni'o sy klàma fi ro lo se fàrna .i je so'i ki'o mei fa sy .i lo bàrda smàcu .e lo cmàlu smàcu .e lo nùtli smàcu .i je ro boi sy bèvri lo spìsa be lo cìnlysko se pi'o lo mòklu .i ca la'e di'u la .dòrotis. cu cikybì'o fi'o se sìsti lo ka ze'u sìpna gi'e kàrgau lo kànla .i dy mùtce lo ka se spàji lo nu dy. vrèta lo sràsu fau lo nu so'i ki'o smàcu cu ne'a sànli gi'e toldàrsi càtlu dy .i ku'i la cpitèpygau cu jùngau dy ro da gi'e cùsku fau lo nu selfarbì'o lo se sìnma ke cmàlu me la smàcu kei: ni'o «lu ko cùrmi lo nu mi do selsàugau la ĭo ga'i nai noltrunì'u li'u» ni'o la .dòrotis. cu jùnri tu'ìfru .i je la noltrunì'u cu tupkrògau gi'e ba bo bìnxo lo mùtce be lo ka xèndo lo cmàlu nìxli

ni'o la cpitèpygau .e la mùdypre cu ca co'a làsna lo smàcu lo màrce lo cìlta poi sy pu bèvri .i pa lo fànmo be lo cìlta cu se jòngau fi lo smàcu lo cnèbo .i je lo dràta fànmo cu go'i fi lo màrce .i li'a lo màrce cu bràmau ro lo smàcu pio pu'o làcpu my ku'o fo lo pìlji be li ki'o .i ku'i lo smàcu ca lo nu ro vo'a ba'o se jòngau cu se frìli lo nu làcpu my .i ca lo nu ji'a sai la cpitèpygau jo'u la tìnci mùdypre cu zùtse my kei my se làcpu zei sùtra lo cìzra ke cmàlu xìrma fa'a lo jai bu'u sìpna be fai la cìnfo

ni'o ba lo bàrda je nàndu nu gùnka (to ki'u lo nu la cìnfo cu tìlju toi) cu snàda lo nu cpànygau cy lo màrce .i ba bo la noltrunì'u cu sùtra lo nu mìnde lo ri smàcu lo nu tòlsti .i ki'u bo ny cu xànka lo nu lo smàcu va'o lo nu ze'a lo dùkse cu stàli lo jbìni be lo makpàpi cu sipybì'o

ni'o ca lo nùncfa lo cmàlu dànlu to'e ki'u nai lo nu so'i mei cu ja'a ru'e ka'e làcpu lo tìlju se cpàna màrce .i ku'i la mùdypre joi la cpitèpygau cu càtke fi lo trìxe .i je snàda zènba .i ba za bo gùrgau mùvgau la cìnfo lo bàrtu be lo makpàpi fòldi be'o no'u lo crìno fòldi noi bu'u ke'a cy ka'e za'u re'u vàsxu lo tìtla je vìfne vàcri je nai lo vìndu pànci be lo xrùla

ni'o la .dòrotis. cu jbìkla te zu'e lo nu pènmi kei gi'e xèndo kìrsku lo smàcu lo nu nùrgau lo vo'a pèndo lo nu mrobì'o .i dy pu bìnxo lo tai nèlci be la cìnfo ja'e lo nu glèki lo nu cy ba'o se nùrgau ni'o ba bo lo smàcu cu se toljòngau fi lo màrce gi'e prèja klàma pa'o lo sràsu lo zdàni .i la smàcu noltrunì'u cu ro moi lo clìva ni'o «lu va'o lo nu ca da do mi'a za'u re'u nìtcu zo'u: —sei ny cùsku— ko klàma lo fòldi gi'e krìxa .i se va'o bo mi'a do ba tìrna gi'e sìdju .i co'o li'u» ni'o «lu co'o —sei lo ro da cu spùda— li'u» .i je la noltrunì'u cu to'o bàjra .i ca bo la .dòrotis. cu tàgji jgàri la .tòtos. se va'o nai lo nu ty cu bàjri jèrsi gi'e tepygau ny ni'o ba ku lo ro da cu tsebì'o ne'a la cìnfo co'u lo nu cy cu cikybì'o .i je la cpitèpygau fi la .dòrotis. cu bèvri lo grùte pe lo ne'a trìcu ge'u noi dy cìtka ke'a poi vàcysai

ni'o ni'o pa no mo'o lo bàdypre pe lo bravrògai
	ni'o lo naltòrdu cu tèmci fi lo nu la tolvìrnu cìnfo cu cikybì'o .i ri'a bo cy pu ze'u vrèta ne'i lo makpàpi fau lo nu vàsxu lo mrorì'a pànci .i ku'i cy ca lo nu ca'a kàrgau lo kànla gi'e gùnro te ka'a lo màrce cu mùtce lo ka glèki lo nu za'o jmìve ni'o «lu mi pu bàjra se rai lo kamsùtra —sei cy fau lo nu zùtse gi'e ta'irvà'u cu cùsku— .i ku'i lo xrùla pu dùkse lo ka tsàli kei mi .i ta'i ma do snàda lo nu vìmcu mi li'u»
ni'o ba bo lo dràta cu te lìsri lo tùmla smàcu .e lo nu sy cu xèndo nùrgau cy lo nùnmro .i je la tolvìrnu cìnfo cu cmìla gi'e cùsku: ni'o «lu mi pu ro roi jìnvi lo du'u mi bàrda gi'e tsàli .i to'e se ki'u bai bo lo tai cmàlu dàcti be mu'u lo xrùla mi na ru'e mrògau .i je lo tai cmàlu dànlu be mu'u lo smàcu cu nùrgau lo mi nunjì'e .i cìzra mùtce .i ku'i doi pèndo mi'o ca mo .ei li'u» ni'o «lu .ei mi'o lìtru co'u lo nu tòlcri lo pèlxu kìtybli dàrgu —sei la .dòrotis. cu cùsku— .i je ba bo mi'o ka'e klàma la ri'òjme tcàdu li'u» ni'o lo gùnma fau lo nu la cìnfo cu di'a kànro mùlno gi'e di'a cìnmo lo ka sèvzi cu co'a lìtru fau lo nu se plùka zei mùtce lo nu càdzu lo rànti je crìno sràsu .i je ba za lo na clàni cu tolclìva lo pèlxu kìtybli dàrgu gi'e zazu re'u se fàrna la ri'òjme tcàdu ku noi la bànli .oz. cu xàbju li'u» ni'o lo dàrgu cu xùtla gi'e xàmgu ke blìku se gàcri .i je lo gùgde cu mèlbi .i ja'e bo lo lìtru cu se plùka lo nu clìva lo rìcfoi .e lo ri ckàpe poi ly ke'a pu lìfri bu'u lo ra mànku ctìno .i za'u re'u ku ly vìska lo se zbàsu bìtmu poi se jbìni lo dàrgu .i ku'i by pe vi cu crìno se cintypù'i .i je lo zdàni poi lo lìtru cu lampàgre zi'e noi za'a lo te cànge cu xàbju ku ji'a crìno se cintypù'i .i ly lampàgre lo so'o tai zdàni ze'a lo lecydò'i .i je su'o roi ku lo prènu cu klàma lo vòrme gi'e càtlu ly tai lo nu djìca lo nu rètsku .i ku'i no boi py cu jbibì'o gi'a tàvla vau ly .i ki'u bo la cìnfo cu dùksu lo ka jai se tèrpa py .i ro lo prènu cu dàsni lo kùkte ri'òjme crìno tàxfu .e lo kònju màpku noi sìmsa lo me la màxpre moi ni'o «lu ja'o ti gùgde la .oz. —sei la .dòrotis. cu cùsku— .i je ju'o mi'o bìnxo lo jìbni be la ri'òjme tcàdu li'u» ni'o «lu ĭe —sei la cpitèpygau cu spùda .i vi ku ro da crìno .i ku'i bu'u lo gùgde be la màxpre lo blànu cu tràji skàri .i ku'i lo vi prènu na sìmlu lo ka xèndo dùnli la màxpre .i je mi xànka lo nu mi'o ba na tòlcri lo stùzi poi mi'o ka'e sìpna ze'a lo nìcte li'u» ni'o «lu .au mi cìtka na'e bo lo grùte —sei lo nìxli cu cùsku— .i je mi bìrti lo du'u la .tòtos. cu na ru'e ba'o djacàumro .i je'u mi'o klàsti lo se li'erlà'i zdàni gi'e tàvla lo prènu li'u»

ni'o ja'e bo ca lo nu tolclìva lo na'e cmàlu cànge bo zdàni kei la .dòrotis. cu vìrnu klàma lo vòrme gi'e dàrxi ni'o lo nìnmu cu kàrgau vy .i lo ni kàlri cu ja'a ru'e bànzu lo nu càtlu lo bàrtu .i ny cùsku «lu do ma djìca doi vèrbe .i je ki'u ma lo va cìnfo do kànsa li'u»

ni'o «lu mi djìca lo nu stàli do ze'a lo nìcte va'o lo nu do cùrmi —sei la .dòrotis. cu spùsku— .i je lo cìnfo cu pèndo mi gi'e na crògau do va'o lo nu ji'a sai lo mùlno mùnje cu se plèji li'u» ni'o «lu xu ta tolcìlce —sei lo nìnmu cu rètsku be fau lo nu gàsnu lo nu lo vòrme cu kàlri zènba mìlxe— li'u» ni'o «lu ja'a go'i —sei lo nìxli cu cùsku— .i je ji'a cy bànli lo ka tolvìrnu .i cy do ba tèrpa se mau lo nu do cy cu no'a li'u» ni'o «lu ja'o —sei lo nìnmu ba lo nu pènsi gi'e za'u re'u càtlu la cìnfo cu cùsku— va'o lo nu jètnu zo'u: .e'a do nèrkla .i je mi ba dùnda lo vàcysai .e lo sìpna stùzi li'u»

ni'o ja'e bo lo ro da nèrkla lo zdàni noi se xàbju lo po'o nai nìnmu .e lo re vèrba .e lo nànmu .i lo nànmu pu se crorì'a fi lo tùple gi'e ca vrèta lo sfòfa be bu'u lo kòjna .i lo lànzu cu sìmlu lo ka mùtce lo ka se spàji lo nu vìska lo tai cìzra kansì'u .i je ca lo nu lo nìnmu cu ca'o tolcàndo lo nu brègau lo jùbme zo'u: lo nànmu cu rètsku: ni'o «lu ro do ma klàma li'u» ni'o «lu la ri'òjme tcàdu —sei la .dòrotis. cu cùsku— te zu'e lo nu pènmi la bànli .oz. li'u» ni'o «lu ŭa sai —sei lo nànmu cu clàdu cùsku— .i xu do bìrti lo du'u la .oz. ba cùrmi li'u» ni'o «lu da'i ki'u ma na co'e —sei dy spùda— li'u»

ni'o «lu ti'e .obu cu no roi cùrmi lo nu da .obu pènmi .i mi pu zvàti la ri'òjme tcàdu so'i roi .i mèlbi je se mànci stùzi .i ku'i mi no roi jai se cùrmi fai lo nu vìska la bànli .oz .i je nai mi se slàbu su'o jmìve prènu poi pu vìska .obu li'u» ni'o «lu xu .obu cu no roi bàrkla —sei la cpitèpygau cu rètsku— li'u» ni'o «lu no roi .i .obu zùtse ca ro djèdi ne'i lo bàrda ke nolstìzu kùmfa pe lo noldì'u .i je lo ji'a sai sèlfu be .obu bei lo nu bèvri lo sànmi .obu cu na vìska .obu li'u» ni'o «lu .obu mo prènu —sei lo nìxli cu rètsku— li'u» ni'o «lu nàndu fa lo nu djùno la'e di'u —sei lo nànmu cu pènsi cùsku— .i sa'u nai la .oz. cu bànli te màkfa gi'e kàkne lo nu se tàrmi ro se djìca .i ja'e bo su'o prènu cu xùsra lo du'u .obu vìnsmi lo cìpni .i je su'o prènu cu xùsra lo du'u vìnsmi lo xànto .i je su'o prènu cu xùsra lo du'u vìnsmi lo mlàtu .i ga'a su'o dràta .obu vìnsmi lo mèlbi crìda .a lo burnànba .a lo dràta poi .obu se plùka .i ku'i lo du'u ma kau jètnu tàrmi la .oz. ca lo nu se tàrmi lo sèvzi zo'u: no jmìve prènu ka'e djùno li'u» ni'o «lu la'e di'u mùtce lo ka cìzra —sei la .dòrotis. cu cùsku— .i ku'i mi'a nìtcu lo nu tròci ta'i da lo nu vìska .obu kei kei se va'o nai lo nu mi'a ba ba'o lìtru fi'o pràli no da li'u» ni'o «lu mu'i ma do djìca lo nu pènmi la xlàli .oz. —sei lo nànmu cu rètsku— li'u» ni'o «lumi djìca lo nu .obu dùnda lo bèsna mi —sei la cpitèpygau cu pàcna cùsku— li'u» ni'o «lu .o'u .i da'i la .oz. cu se frìli —sei lo nànmu cu xùsra— .i .obu pònse lo bèsna se mau lo se nìtcu li'u» ni'o si'a mi djìca lo nu .obu dùnda lo rìsna mi —sei la tìnci mùdypre cu cùsku— li'u» ni'o «lu .obu ba na se ràktu —sei lo nànmu cu di'a co'e— .i ki'u bo .obu pònse lo so'i rìsna pe lo ro nìlbra .e lo ro tàrmi li'u» ni'o «lu si'a mi djìca lo nu .obu dùnda lo kamvìrnu mi —sei la tolvìrnu cìnfo cu cùsku— li'u» ni'o «lu la .oz. cu ràlte lo bàrda pàtxu pe lo kamvìrnu zi'e pe bu'u la nolstìzu kùmfa —sei lo nànmu cu cùsku— zi'e poi se gàcri lo sòlji pàlta te zu'e lo nu fànta lo nu se tìsna .i .obu ba glèki lo nu dùnda lo su'o si'e do li'u» ni'o «lu si'a mi djìca lo nu .obu mi xrùgau bènji la .kànzas. —sei la .dòrotis. cu cùsku— li'u» ni'o «lu ma stùzi la .kànzas. —sei lo nànmu cu se spàji rètsku— li'u» ni'o «lu mi na djùno —sei la .dòrotis. cu xànka spùda— .i ku'i zdàni mi .i je mi bìrti lo du'u da stùzi ky li'u» ni'o «lu làkne mùtce .i sa'u la .oz. cu kàkne ro da .i se ki'u bo ru'a .obu ba tòlcri la .kànzas. se va'u do .i ku'i pa mai do nìtcu lo nu snàda lo nu pènmi .obu .i ba nàndu .i ki'u bo la bànli te màkfa cu na djìca lo nu pènmi su'o da .i .obu ta'e zùkte lo se djìca be .obu .i ku'i ba'e do ma djìca —sei di'a co'e be fau lo nu tàvla la .tòtos. — li'u» .i la .tòtos. cu po'o dèsygau lo rèbla .i ki'u bo .u'e ty na kàkne lo nu tàvla

ni'o lo nìnmu ca jùngau lo dràta lo du'u lo vàcysai cu brèdi .i ja'e bo jmàji lo srùri be lo jùbme .i je la .dòrotis. cu cìtka lo kùkte mavypèsxu .e lo sànmi be lo se jìcla sòvda .e lo mèlbi ke blàbi nànba gi'e selpù'a lo ka cìtka .i la cìnfo cu cìtka lo su'o si'e be lo mavypèsxu gi'e ku'i nèlci na'e mùtce fau lo nu cùsku lo se du'u màrji lo màvji kei .e lo du'u lo màvji cu cìd.a lo xìrma je nai lo cìnfo .i la cpitèpygau .e la tìnci mùdypre cu cìtka no sai da .i la .tòtos. cu cìtka lo so'u si'e pe ro da gi'e glèki lo ka za'u re'u te dùnda lo xàmgu vàcysai

ni'o lo nìnmu ca dùnda lo ckàna poi ka'e sìpna ku'o la .dòrotis .i je la .tòtos. cu vrèta re'o dy ze'a lo nu la cìnfo cu bàndu lo vòrme lo nu da'i da dìcra dy .i je la cpitèpygau .e la tìnci mùdypre cu sànli bu'u lo kòjna gi'e smàji ze'a pi ro lo nìcte .i ku'i li'a lo go'i na kà'e sìpna ni'o ca lo bavlà'i cèrni co'a lo mu'e lo sòlri cu ba'o galzè'a cu co'a lìtru gi'e ba za bo vìska lo mèlbi ke crìno blegù'i pe bu'u lo tsàni zi'e poi cràne lo lìtru ni'o «lu ju'o ru'a tu me la ri'òjme tcàdu —sei la .dòrotis. cu cùsku— li'u» ni'o ze'a lo nu ca'o fa'a càdzu kei lo crìno blegù'i cu zènba je zènba lo ka càrmi .i je si'au lo lìtru cu ro mai jbibì'o lo ka mùlno lo ka lìtru .i to'e ki'u nai bo lerdò'i pu lo nu tolclìva lo bàrda bìtmu poi srùri la tcàdu .i by gàltu gi'e ròtsu gi'e càrmi crìno skàri ni'o ca'u lo lìtru bu'u lo fànmo be lo pèlxu kìtybli dàrgu cu zvàti fa lo bàrda vrògai noi fe'e ro roi jàdni lo ri'òjme poi tai càrmi bu'u lo solgù'i ja'e lo nu lo ji'a sai cìnta kànla be la cpitèpygau ri'a lo nu càrmi cu ze'i na ka'e vìska ni'o jìbni lo vrògai fa lo jànbe .i la .dòrotis. cu càtke lo bàtke gi'e tìrna lo rìjno sànce poi se kràsi lo nènri .i ba bo lo bàrda vrògai cu màsno lo nu kàrbi'o slìlu .i je lo ro da cu pàgre gi'e zvàti lo galsèldru ke bàrgu kùmfa noi lo ke'a bìtmu cu se gàcri lo ci'i ri'òjme

ni'o ca'u lo lìtru cu sànli fa lo cmàlu nànmu poi bàrda dunjì'i la màxpre .i dàsni zei mùlno lo crìno fe'e co'a lo stèdu fe'e co'u lo jàmfu .i je lo ji'a sai pìlka cu crìno mìlxe .i zvàti lo mlàna be ny fa lo bàrda ke crìno tànxe ni'o ca lo nu ny cu vìska la .dòrotis. .e lo ri pèndo kei lo nànmu cu rètsku «lu do djìca lo nu mo bu'u la ri'òjme tcàdu li'u» ni'o «lu mi'a pu klàma ti te zu'e lo nu pènmi la bànli .oz. —sei la .dòrotis. cu cùsku— li'u» ni'o lo nànmu cu tai se spàji lo di'u te spùda ja'e lo nu tsebì'o te zu'e lo nu pènsi

ni'o «lu ba'o nànca li so'i fa lo nu da cpèdu lo nu pènmi la .oz. —sei ny cùsku be fau lo nu se spàji dèsygau lo stèdu— .i .obu tsàli gi'e xlàtce .i je va'o lo nu do klàma te zu'e lo to'e plìxau .a lo bèbna ja'e lo nu dìcra lo prìje nùnpei be la bànli te màkfa zo'u: cùmki fa lo nu .obu. fèngu gi'e dàspo ca pa mòkca ro do li'u»ni'o «lu ku'i na bèbna selzù'e .i je nai tolpràli co'e —sei la cpitèpygau cu spùsku— .i vàjni .i ji'a mi'a ba'o se jùngau fi lo du'u la .oz. cu xàmgu te màkfa li'u» ni'o «lu .obu ja'a co'e —sei lo crìno nànmu cu cùsku— .i je .obu prìje je xàmgu tùrni la ri'òjme tcàdu .i ku'i lo na stàce .a lo kùli be tu'a .obu zo'u: .obu mùtce lo ka xlàli .i je so'u da ba'o su'o roi dàrsi lo nu cpèdu lo nu vìska lo flìra be .obu .i .i je la bàdypre be lo vrògai .i je mi ki'u lo nu do cpèdu lo nu pènmi la bànli .oz. cu bìlga lo ka klagì'a do la noldì'u ku pe .obu .i ku'i .ei pa mai do dasybì'o lo vi vìstci li'u» ni'o «lu ki'u ma —sei la .dòrotis. cu rètsku— li'u» ni'o «lu ki'u lo nu va'o lo nu da'i do na dàsni lo vìstci kei lo nu la ri'òjme tcàdu cu càrmi gi'e bànli cu rìnka lo nu do na ka'e vìska .i lo ji'a sai xàbju be la tcàdu cu nìtcu lo ku dàsni lo vìstci .i ro boi vy cu se stèla ze'a ro nìcte je ro dònri .i ki'u bo la .oz. pu mìnde fi la'e di'u ca lo nu la tcàdu cu co'a se zbàsu .i je mi pònse lo pa ckìku poi ke'a po'o ka'e toltèlgau vy li'u»

ni'o kàrgau lo bàrda tànxe .i je la .dòrotis. cu vìska lo nu ty cu cùlno lo vìstci pe ro nìlbra je ro tàrmi .i ro boi vy vàsru lo crìno blàci .i la bàdypre be lo vrògai cu tòlcri lo vìstci poi da'i pràne lo ka màpti la .dòrotis. ku'o gi'e pùnji vy lo kànla be dy .i re sòlji dàsri cu se làsna fi vy gi'e srùri lo trìxe be lo stèdu be'o noi bu'u ke'a seltèlgau se pi'o lo cmàlu ckìku poi dàndu lo fànmo be lo lìnsi poi la bàdypre be lo vrògai cu cnèbo dàsni .i ca lo nu vy mo'u se làsna kei la .dòrotis. va'o lo nu da'i djìca lo nu vìmcu lo vìstci cu na kàkne .i ku'i li'a dy na djìca lo nu visnalkà'e ri'a lo nuncàrmi be la ri'òjme tcàdu .i se mu'i bo dy cu cùsku no da

ni'o ba bo lo crìno nànmu cu tòlcri lo vìstci be se va'u la cpitèpygau .e la cìnfo je ji'a sai la .tòtos. ku noi cmàlu .i je ro boi vy tàgji se tèlgau se pi'o lo ckìku ni'o ba bo la bàdypre be lo vrògai cu dasybì'o lo sèvzi vìstci gi'e jùngau lo dràta lo du'u brèdi lo nu klagì'a dy la noldì'u .i fau lo nu lèbna lo bàrda ke sòlji ckìku lo pìjne pe lo bìtmu cu kàrgau lo dràta vòrme .i je lo ro da cu jèrsi by pa'o lo vòrme be lo klàji pe la ri'òjme tcàdu

ni'o ni'o pa pa mo'o lo se mànci tcàdu pe la .oz.
ni'o to'e ki'u nai lo nu lo kànla cu se bàndu tu'a lo crìno vìstci kei la .dòrotis. .e lo ri pèndo ca lo cfàri cu visnalkà'e ri'a lo cargù'i pe lo se mànci tcàdu .i lo klàji cu jbìni lo mèlbi dìnju poi ro ke'a zìlzba lo crìno marmàro gi'e fe'e ro roi jàdni lo càrmi ri'òjme .i lo litru cu càdzu lo dàgysfe pe lo mìntu ke crìno marmàro .i je lo se jonsì'u be lo blìku cu se zvàti lo lìnji be lo ri'òjme poi jbisì'u zi'e poi mìrcai ri'a lo nu lo sòlri cu càrmi .i lo cànko kàjna cu màrji lo crìno blàci .i lo ji'a sai tsàni be la tcàdu cu mìlxe lo ka crìno .i je lo sòlri guslì'i cu crìno
ni'o zvàti fa lo so'i prènu (to lo nànmu .e lo nìnmu .e lo vèrba toi) poi ru'u càdzu .i je ro lo go'i cu dàsni lo crìno tàxfu gi'e se pìlka lo crìno mìlxe .i càtlu la .dòrotis. .e lo ri cìzra vrìci kànsa se pi'o lo kùcli kànla .i je ro lo vèrba ca lo nu vìska la cìnfo cu to'o bàjra gi'e mìpygau lo sèvzi lo trìxe be lo màmta .i ku'i no da tàvla lo lìtru .i so'i zàrci cu zvàti lo klàji .i je la .dòrotis. cu vìska lo nu ro poi nènri zy cu crìno .i lo crìno tìtspi .e lo crìno selpo'àzmu cu jai se frìti fai lo ka vècnu .i je go'i fa ji'a lo crìno cùtci .e lo crìno màpku .e lo crìno tàxfu pe ro klèsi .i bu'u pa stùzi lo nànmu cu vècnu lo crìno nimrysòdva .i je ca lo nu lo vèrba cu te vècnu ny kei la .dòrotis. cu vìska lo nu ny. plèji lo crìno sìcni ni'o sìmlu lo ka no xìrma je no dànlu pe su'o klèsi cu zvàti .i lo nànmu cu ru'u bèvri lo dàcti se pi'o lo cmàlu ke crìno màrce noi ny ke'a càtke .i ro lo prènu cu sìmlu lo ka glèki gi'e se mànsa gi'e rìcfu

ni'o la bàdypre pe la bàlvro cu klagì'a lo lìtru pa'o lo klàji co'u lo nu tolclìva lo bàrda dìnju poi mìdju zei pràne lo tcàdu zi'e no'u lo noldì'u pe la .oz. ku no'u la bànli te màkfa .i cràne lo vòrme fa lo pa sònci noi dàsni lo crìno tàxfu zi'e noi se xèjykre lo clàni je crìno ni'o «lu lo fànge ba'o tolylì'a —sei la bàdypre pe la bàlvro fi sy cu cùsku— .i fy djìca lo nu pènmi la .oz. li'u» ni'o «lu ko nèrkla —sei lo sònci cu spùsku— .i se va'o bo mi ba bèvri lo do nòtci .obu li'u» ni'o ja'e bo lo lìtru cu pàgre lo noldì'u vòrme gi'e se klagì'a lo bàrda kùmfa pe lo crìno lòlgai .e lo kùkte ke crìno nìlce pe ri'òjme .i lo sònci cu gàsnu lo nu lo lìtru cu jìsygau sàtra lo màtci lo cùtci pu lo nu nèrkla lo bi'u nai kùmfa .i je ca lo nu ly cu ba'o stìzu tsebì'o kei sy cu clìte cùsku: ni'o «lu .e'o do kùfra ze'a lo nu mi klàma lo vòrme be la nolstìzu kùmfa gi'e jùngau la .oz. lo du'u do ti zvàti li'u» ni'o lo lìtru cu bìlga lo ka ze'u dènpa pu lo nu lo sònci cu xrùti .i ca lo nu ro mai sy xrùti kei la .dòrotis. cu rètsku: ni'o «lu xu do pu vìska la .oz. li'u» ni'o «lu na go'i —sei lo sònci cu spùda— .i mi .obu pu no roi vìska .i ku'i pu tàvla .obu fau lo nu ca gi .obu zùtse ti'a lo sepybì'u gi mi dùnda lo do nòtci .obu .i .obu cùsku lo se du'u ba cùrmi lo nu do .obu tàva kei va'o lo nu do djìca .i ku'i ro do bìlga lo ka nonkànsa lo nu pènmi .obu .i je .obu ba cùrmi lo nu ca ro djèdi pa po'o do cu klàma .i se ki'u bo ki'u lo nu do nìtcu lo nu stàli la noldì'u ze'a lo djèdi be li so'o zo'u: mi ba gàsnu lo nu da do klagì'a lo kùmfa poi do ka'e sùrla ba lo do nunlì'u li'u» ni'o «lu ki'e —sei lo nìxli cu spùda— .i .obu mùtce lo ka xèndo li'u»

ni'o lo sònci ca bifcà'e lo crìno sìltci .i je ba zi sai bo lo cìtno nìxli noi dàsni lo mèlbi ke crìno pàstu cu nèrkla lo kùmfa .i ny se kèrfa lo mèlbi crìno gi'e se kànla lo mèlbi crìno .i ny krobì'o fa'a ca'u la .dòrotis. gi'e fau bo cùsku «lu ko mi jèrsi .i se va'o bo mi fi do ba jàrco lo do kùmfa li'u»

ni'o ja'e bo la .dòrotis. cu cùsku zo co'o ro lo ri pèndo po'u na'e bo la .tòtos. gi'e jèrsi fau lo nu bìrka jgàri bèvri lo gèrku kei lo cnìno nìxli pa'o lo ze vorlù'a je ve ka'a lo ci sèrti co'u lo nu tolclìva lo kùmfa pe lo cràne be la noldì'u .i ky tràji lo ka kùkte gi'e cmàlu kei lo ro kùmfa pe lo mùnje kei gi'e vàsru lo rànti je se kùfra ckàna pe lo bòxfo co crìno sìlka .e lo crìno ke demsìlka dorckabò'o .i mìdju lo kùmfa fa lo cmàtce je'erjìnto poi cècla lo crìno pukpanlìtki fa'a lo vàcri pu lo nu py. xrùti fàrlu lo mèlbi ke se sràku ke marmàro tànsi .i lo mèlbi ke crìno xrùla cu sànli bu'u lo cànko .i je pa da se zvàti lo kàjna poi lo lìnji be lo cmàlu ke crìno cùkta cu sànli ke'a .i la .dòrotis. ca lo nu zìfre lo ka tèmpli lo ka kàrgau lo vi cùkta cu fàcki lo du'u cy vàsru lo cizra ke crìno pixra poi rìnka lo nu dy. cmìla .i tai xàjmi ni'o lo tafnì'e cu vàsru lo so'i crìno tàxfu poi màrji lo sìlka fa'u lo xulbù'u fa'u lo demsìlka .i je ro boi ty pràne màpti la .dòrotis. ni'o «lu do'a ko kùfra pràne —sei lo crìno nìxli cu cùsku— .i je va'o lo nu do djìca zo'u: ko selsnàgau lo jànbe .i la .oz. ba mìnde ca lo bavlà'i cèrni lo nu da cpàcu do li'u» ni'o ny clìva la .dòrotis. gi'e xrùti lo dràta .i ri ji'a zo'u: ny klagì'a fi lo kùmfa .i je ro lo lìtru cu ro mai zvàti lo plùka mùtce pàgbu be la noldì'u .i li'a no da pràli fi lo bi'u nai nu clìte tu'a la cpitèpygau .i ki'u bo cy ca lo nu nonselkànsa lo nu zvàti lo ri kùmfa cu bèbna sànli bu'u lo pa mòkca bu'u lo vòrme te zu'e lo nu dènpa co'u lo cèrni .i da'i cy na sùrla lo ka vrèta .i je cy na ka'e ga'òrgau lo kànla .i se mu'i bo cy stòdi ze'a pi ro lo nìcte lo ka càtlu lo pa cmàlu jùkni noi jìvbu lo jùlne tai lo nu da'i lo vi kùmfa na cmìma lo mèlrai be lo kùmfa pe lo mùnje .i la tìnci mùdypre cu vrebì'o lo ri ckàna ri'a lo nu tcàci .i ki'u bo my cu mòrji lo du'u my pu ca lo nu màrji lo rèctu cu co'e .i ku'i ki'u lo nu na kàkne lo ka sìpna kei my te zu'e lo nu selbìtygau lo du'u lo cìdni cu stòdi lo ka tolpò'u kei cu xàksu lo nìcte ta'i lo nu mùvgau cy .i da'i la cìnfo cu zmànei tu'a lo ckàna poi màrji lo sùdga pèzli zi'e poi zvàti lo rìcfoi ku'o gi'e na nèlci lo ka nènri lo gànlo kùmfa .i ku'i cy dùkse lo ka tolbèbna kei lo ka cùrmi lo nu la'e di'u ràktu cy .i se ki'u bo cy cu plìpe lo ckàna gi'e bolbì'o tai tu'a lo mlàtu gi'e làtcmo gàsnu lo nu cy ba zi lo mèntu cu sìpna ni'o ca lo bavlà'i cèrni ba tu'a lo vàcysai lo crìno nìxli cu klàma te zu'e lo nu cpàcu la .dòrotis .i je ny cu dàsygau dy lo mèlbi mùtce pàstu poi màrji lo mòrna xulbù'u .i la .dòrotis. cu dasybì'o lo crìno ke sìlka jisystotà'u gi'e làsna lo crìno dàsri lo cnèbo be la .tòtos. .i je lo ro mei cu co'a klàma la nolstìzu kùmfa pe la bànli .oz. ni'o pa mai tolylì'a lo bàrda balkù'a noi ne'i ke'a lo so'i nolnì'u .e lo so'i nòlnau vu'o pe lo nòlstu zi'e noi ro ke'a dàsni lo rìcfu tàxfu .i lo vi prènu cu zùkte no dràta be lo ka tavysì'u .i ku'i py ca ro cèrni cu klàma te zu'e lo nu dènpa to'e ne'i la nolstìzu kùmfa .i to'e ki'u nai bo py no roi jai se cùrmi fai lo ka vìska la .oz. .i ca lo nu la .dòrotis. cu nèrkla kei py kùcli càtlu dy .i je pa boi py smàsku: ni'o «lu xu do ja'a ba càtlu lo flìra be la .oz. no'u la xlàtce li'u» ni'o «lu li'a go'i —sei lo nìxli cu spùsku— va'o lo nu .obu mi ba klàcru li'u» ni'o «lu .obu ba cùrmi —sei lo sònci poi pu bèvri lo nòtci pe ny la te màkfa cu cùsku— .i to'e ki'u bai bo .obu na nèlci lo nu lo prènu cu cpèdu lo nu vìska .obu .i je'u ca lo cfàri .obu pu fèngu gi'e cùsku lo se du'u .ei mi do xrùgau bènji lo do te klàma .i ba bo .obu fi mi rètsku lo se du'u ma kau do jvìnu .i je ca lo nu mi jùngau .obu fo lo do rìjno cùtci kei .obu mùtce lo ka se cìnri .i ro mai mi .obu pu jùngau fo lo bàrna be lo do mèbri .i je .obu cu jdìce lo du'u ba cùrmi lo nu do .obu vìtke li'u» ni'o ca ku lo jànbe cu jabysèlsna .i je lo crìno nìxli cu cùsku fi la .dòrotis. fe «lu ta snàsni .i .ei do nonselkànsa klàma la nolstìzu kùmfa li'u» ni'o ny kàrgau lo cmàlu vòrme .i je la .dòrotis. cu vìrnu càdzu pa'o vy gi'e co'a zvàti lo se mànci stùzi .i sy bàrda je cùkla kùmfa .i se drùdi lo gàltu bàrgu .i je lo bìtmu .e lo drùdi .e lo lòldi cu se gàcri lo bàrda ri'òjme poi zvajbisì'u .i bu'u lo mìdju be lo drùdi cu gùsni fa lo bàrda noi càrmi dùnli lo sòlri zi'e noi rìnka lo nu lo ri'òjme cu mìrcai tai lo se mànci

ni'o ku'i tràji lo ka cìnri la .dòrotis. kei fa lo barda nolstìzu co crìno marmàro poi sànli lo mìdju be lo kùmfa .i tàrmi sìmsa lo stìzu gi'e se pàgbu lo mìrcai ri'òjme du'i tu'a ro lo dràta .i lo mìdju be lo stìzu cu se zvàti lo bràtce stèdu poi se xàdni no da poi ka'e sàrji sy zi'e pe no bìrka .e no tùple .i no kèrfa cu cpàna lo vi stèdu .i ku'i sy se kànla gi'e se nàzbi gi'e se mòklu .i je sy. mùtce lo ka bràmau lo stèdu be lo bràrai be lo brabracrìda ni'o ca lo nu la .dòrotis. ca'o càtlu la'e di'u fau lo nu mànci joi tèrpa zo'u: lo kànla cu càrna màsno gi'e kìnli je stòdi càtlu dy .i ba bo lo mòklu cu mùvdu .i je la .dòrotis. cu tìrna lo nu lo vòksa cu cùsku ni'o «lu mi'e .oz. no'u la bànli je xlàtce .i do me ma .i je mu'i ma do mi klàma li'u»

ni'o lo ni lo vòksa be lo bàrda stèdu cu màbla cu mlèca lo me lo se kànpe be la .dòrotis. moi .i se ki'u bo dy. zu'e dàrsi gi'e spùsku: ni'o «lu mi'e. dòrotis. no'u la cmàlu je rùble .i mi klàma te zu'e lo nu do mi sìdju li'u» ni'o lo kànla cu pènsi càtlu dy ze'a lo mùlno mèntu .i ba bo lo vòksa cu cùsku ni'o «lu do pu cpàcu lo rìjno cùtci ma li'u» ni'o «lu mi pu cpàcu cy la pàlci termafyfè'i pe la stùna ca lo nu lo mi zdàni cu fàrlu ty gi'e jai mrorì'a ty —sei dy spùsku— li'u» ni'o «lu do pu cpàcu lo bàrna be lo do mèbri ma —sei lo vòksa cu di'a co'e— li'u» ni'o «lu by pu te cìnba mi la xàmgu termafyfè'i pe la bèrti ca lo nu ty cu tolrìnsa mi gi'e klàgau mi do —sei lo nìxli cu cùsku— li'u» ni'o za'u re'u ku lo kànla cu kìnli càtlu ny .i je vìska lo nu ny cu jùngau fi lo jètnu .i ba bo la .oz. cu rètsku «lu do djìca lo nu mi mo li'u» ni'o «lu ko mi xrùgau bènji la .kànzas. ku noi la fetfàmti .em. .e la nakfàmti .xènris. cu zvàti — la .dòrotis. cu jùnri cùsku— .i mi na nèlci lo do gùgde .i to'e ki'u bai bo gy cu tai mèlbi .i je mi bìrti lo du'u la fetfàmti .em. cu xànka zei mùtce lo mi nu tòlzva ze'a lo tai clàni li'u» ni'o lo kànla cu ci roi kalgaislìgau gi'e ba bo selfarbì'o lo drùdi je ba bo lo cnìta lòldi gi'e càrna tai lo cìzra mùtce ja'e lo nu ky. sìmlu lo ka vìska ro pàgbu be lo kùmfa .i ro mai ky. za'u re'u càtlu la .dòrotis. ni'o «lu da'i ma mùkti lo nu mi zùkte la'e di'u se va'u do —sei la .oz. cu rètsku— li'u» ni'o «lu lo nu ge do tsàli gi mi rùble .e lo nu ge do bànli te màkfa gi mi cmàlu nìxli li'u» ni'o «lu ku'i lo ni do tsàli cu pu bànzu lo nu càtra la pàlci termafyfè'i pe la stùna —sei la .oz. cu cùsku— li'u» ni'o «lu sa'u pu fàsnu —sei la .dòrotis. cu sàmpu spùda— .i mi na fùzme li'u» ni'o «lu ja'o —sei la stèdu cu cùsku— .i mi ba spùda .i do na se kràli lo nu kànpe lo nu mi do ba bènji la .kànzas. kei va'o lo nu na ku do da poi xàmgu mi cu zùkte fi'o se cànja .i bu'u lo vi gùgde ro prènu cu bìlga lo ka plèji fo ro se dùnda be vo'a .i do va'o lo nu djìca lo nu mi pìlno lo mi màkfa lo nu xrùgau bènji do lo zdàni cu pa mai bìlga da pe se va'u mi .i ko mi sìdju .i se va'o bo mi do ba sìdju li'u» ni'o «lu ma mi se bìlga —sei lo nìxli cu rètsku— li'u» ni'o «lu ko càtra la pàlci termafyfè'i pe la stìci —sei la .oz. cu spùsku— li'u» ni'o «lu ŭe sai .i ku'i mi na kàkne —sei la .dòrotis. cu krìxa be fau lo nu mùtce lo ka se spàji— li'u» ni'o «lu do pu càtra la pàlci termafyfè'i pe la stùna .i je do dàsni lo rìjno cùtci noi vàsru lo tsàli màkfa .i ca ku bu'u lo mùlno gùgde cu zàsti fa pa po'o la pàlci termafyfè'i .i je ca lo nu do mi jùngau lo du'u ty cu mòrsi zo'u: mi do ba xrùgau bènji la .kànzas .i ku'i pu ku na co'e li'u» ni'o lo cmàlu nìxli cu co'a klàku .i ny tai mùtce lo ka nalfàudri .i je lo kànla cu za'u re'u ... gi'e xànka càtlu ny tai lo nu da'i la bànli .oz. cu jìnvi lo du'u ny ka'e sìdju va'o lo nu da'i tròci ni'o «lu mi pu no roi càtra da se zu'e lo nu no'a —sei ny klàkycmo— .i va'o lo ji'a sai nu da'i mi djìca zo'u: mi ta'i ma ka'e càtra la pàlci termafyfè'i .i va'o lo nu do no'u la bànli je xlàtce na ka'e càtra ty zo'u: do kànpe ma poi nu mi ja'a ca'a co'e li'u» ni'o «lu mi na djùno —sei la stèdu cu cùsku— .i ku'i de'u se spùsku mi .i je ze'a lo nu la pàlci termafyfè'i cu jmìve kei do na za'u re'u vìska lo do nakfàmti .e lo do fetfàmti .i ko mòrji lo du'u la termafyfè'i cu pàlci (to tcètce lo ka pàlci toi) gi'e .ei se càtra .i nau ku ko clìva .i je ko ze'a lo nu do na ba'o zùkte lo do selgù'a cu na cpèdu lo ka za'u re'u vìska mi li'u»

ni'o la .dòrotis. fau lo nu bàdri cu clìva la nolstìzu kùmfa gi'e xrùti lo jai bu'u dènpa be fai la cìnfo .e la cpitèpygau .e la tìnci mùdypre bei lo nu tìrna lo nu la .oz. cu cùsku ma kau dy .i «lu ŭi nai li no te pàcna fi mi —sei dy bàdri cùsku— .i ki'u bo la .oz. co'u lo nu mi ba'o càtra la pàlci termafyfè'i pe la stìci cu na bènji mi lo zdàni .i je mi no roi ka'e co'e la'e di'u li'u»
ni'o lo pèndo be dy cu kècti gi'e ku'i na ka'e zùkte da lo nu sìdju dy .i se ki'u bo la .dòrotis. cu klàma lo ri kùmfa gi'e vrebì'o lo ckàna gi'e klàku sipybì'o ni'o ca lo bavlà'i cèrni lo sònci pe lo crìno zbìkre cu klàma la cpitèpygau gi'e cùsku: ni'o «lu ko mi jèrsi .i la .oz. pu mìnde lo nu do se cpàcu li'u»

ni'o ja'e bo la cpitèpygau cu jèrsi gi'e jai se cùrmi fai lo ka nèrkla la bàrda ke nolstìzu kùmfa ku noi bu'u ke'a cy vìska lo kùkte mùtce nolnì'u poi zùtse lo ri'òjme nolstìzu .i ny dàsni lo crìon ke sìlka se jìvbu .i je cpàna lo gàpru be lo ny. flècu ke crìno kèrfa fa lo nolmàpku co jèmna .i lo birjànco cu se jìmca lo nàlci poi mèltce skàri gi'e tai lìnto ja'e lo nu ny. va'o lo nu lo rùbrai be lo brìfe cu tolylì'a ny. cu slìlu ni'o ca lo nu la cpitèpygau ba'o krobì'o se rai lo ka mèlbi poi lo se sètca sudysràsu cu cùrmi kei ca'u lo vi mèlbi jmìve kei jy. xèndo càtlu cy gi'e cùsku: ni'o «lu mi'e .oz. no'u la bànli je xlàtce .i do du ma .i je mu'i ma do mi klàma li'u»

ni'o ca ku la cpitèpygau ku noi pu kànpe lo nu vìska lo mìntu ke barda stèdu poi la .dòrotis. pu jùngau cy tu'a ke'a cu mùtce lo ka se spàji .i ku'i cy cu vìrnu spùda ni'o «lu mi cpitèpygau po'o .i tersè'a lo sudysràsu .i se ki'u bo mi na se bèsna .i je bo mi klàma do fau lo nu mi pìkci do lo ka sètca lo bèsna lo mi stèdu ja'e lo nu mi bìnxo lo ka dùnli lo do dràta se gùgde lo ka rèmna li'u» ni'o «lu da'i mu'i ma mi zùkte la'e di'u se va'u do —sei la nìnmu cu rètsku— li'u» ni'o «lu lo nu do prìge'e tsàli gi'e lo nu no dràta mi ka'e sìdju —sei la cpitèpygau cu spùsku— li'u» ni'o «lu mi no roi cùrmi lo se cpèdu va'o lo nu no da se plèji —sei la .oz. cu cùsku— .i ku'i mi la'e di'e ba nùpre .i va'o lo nu do càtra se va'u mi la pàlci termafyfè'i pe la stìci kei mi baldù'a fi do fe lo so'i bèsna poi tai xàmgu ja'e lo nu do ba pìjyrai lo ro rèmna pe lo gùgde pe la .oz. li'u» ni'o «lu mi pu jìnvi lo du'u do fi la .dòrotis. cu cpèdu lo nu càtra la termafyfè'i —sei la cpitèpygau cu se spàji cùsku— li'u» ni'o «lu mi ja'a co'e .i mi na se vàjni lo nu ma kau càtra ty .i ku'i co'u lo nu ty cu mòrsi zo'u: mi na cùrmi lo se djìca be do .i ca ku ko clìva .i je ko co'u lo nu do ba'o jèrna lo bèsna poi do tai mùtce lo ka djìca tu'a ke'a cu na za'u re'u klàma mi li'u» ni'o la cpitèpygau cu bàdri xrùti lo ri pèndo gi'e jùngau py lo du'u la .oz. pu cùsku ma kau .i je la .dòrotis. cu se spàji lo nu la bànli te màkfa cu ckàji ge nai lo ka stèdu noi dy pu vìska tu'a ke'a gi'a'ai lo ka kùkte nìnmu ni'o «lu to'e ki'u nai ku —sei la cpitèpygau cu cùsku— lo nìnmu du'i tu'a la tìnci mùdypre cu nìtcu tu'a lo rìsna li'u» ni'o ca lo bavlà'i cèrni lo sònci pe lo crìno zbìkre cu klàma la tìnci mùdypre gi'e cùsku: ni'o «lu la .oz. cu cpèdu lo nu do klàma .i ko mi jèrsi li'u»

ni'o ja'e bo la tìnci mùdypre cu jèrsi sy gi'e tolclìva la bàrda ke nolstìzu kùmfa .i ty my na djùno lo du'u la .oz. cu kùkte nìnmu gi'i kau stèdu .i ku'i ty my pàcna lo nu kùkte nolnì'u .i «lu .i ki'u bo —sei ty my lo sèvzi cu cùsku— ga nai .obu stèdu gi mi bìrti lo du'u mi ba na te dùnda lo rìsna .i ki'u bo lo stèdu ku ji'a na se rìsna gi'e se ki'u bo na ka'e kècti mi .i ku'i ga nai .obu kùkte nolnì'u gi mi ba càrmi cpèdu tu'a lo rìsna .i ki'u bo ka'u ro nolnì'u cu xèndo se rìsna li'u»

ni'o ku'i la mùdypre ca lo nu nèrkla la bàrda ke nolstìzu kùmfa cu vìska ge nai la stèdu gi nai la nolnì'u .i ki'u bo la .oz. pu seltambì'o lo seltè'a mùtce dànlu .i dy mìlxe lo ka cmamè'a lo xànto .i je lo crìno nolstìzu cu sìmlu lo ka lo ni ce'u tsàli cu ja'a ru'e banzu lo nu sàrji lo jùnta be dy .i la dànlu cu se stèdu da poi sìmsa lo me lo zbiseljìrna moi .i frìca fi po'o lo ka mu da kànla lo stèdu be ce'u .i mu clàni bìrka cu jòrne lo xàdni .i je si'a mu da clàni je cìnla tùple .i lo ròtsu je sùnla kèrfa cu gàcri ro pàgbu be dy .i je na cùmki fa lo nu se xànri lo tolpùkmau se jvìnu mònstra .i zanfù'a fa lo nu la tìnci mudypre ca lo ca mòkca na se rìsna .i ki'u bo da'i ry clàdu je sùtra slìlu ri'a lo nu tèrpa .i ku'i ki'u lo nu màrji lo tìnci ku po'o kei la mùdypre cu na sai tèrpa gi'e ku'i mùtce lo ka nalfàudri ni'o «lu mi'e .oz. no'u la bànli je xlàtce —sei la dànlu se pi'o lo vòksa po'u lo pa bàrda sèlcmo cu cùsku— .i do du ma .i mu'i ma do mi klàma li'u» ni'o «lu mi mùdypre gi'e màrji lo tìnci .i se ki'u bo mi na se rìsna gi'e na ka'e pràmi .i mi do pìkci lo nu dùnda lo rìsna mi ja'e lo nu mi dùnli lo dràta prènu li'u» ni'o «lu da'i mi mu'i ma zùkte la'e di'u —sei la maldà'u cu te prèti— li'u» ni'o «lu ki'u lo nu mi cpèdu .e lo nu do po'o kàkne lo ka gàsnu lo mi se cpèdu —sei la mùdypre cu spùsku— li'u» ni'o la .oz. spùda lo nu cmòni kei la'e di'u gi'e ku'i rùfsu cùsku «lu va'o lo nu do je'a djìca tu'a lo rìsna kei do bìlga lo ka jèrna li'u» ni'o «lu ta'i ma —sei la mùdypre cu rètsku— li'u» ni'o «lu ko sìdju la .dòrotis. lo ka càtra la pàlci termafyfè'i pe la stìci —sei la dànlu cu spùsku— .i ca lo nu la termafyfè'i cu mòrsi kei ko mi klàma .i se va'o bo mi do ba dùnda lo bràrai je xèdrai je pàmrai ke'e be lo ro rìsna pe lo mùlno gùgde pe la .oz. li'u» ni'o ja'e bo la tìnci mùdypre cu jai se bàpli fai lo ka bàdri xrùti lo ri pèndo gi'e jùngau py fo lo xlàtce dànlu poi my ke'a pu vìska .i ro boi py mùtce lo ka mànci lo so'i tàrmi poi la bànli te màkfa cu ka'e seltambì'o ke'a .i je la cìnfo cu cùsku: ni'o «lu va'o lo nu .obu dànlu ca lo nu mi klàma te zu'e lo nu vìska zo'u: mi ba clàdyrai cmòni gi'e tèpygau .obu ja'e lo nu .obu cùrmi ro lo se cpèdu be mi .i va'o lo nu .obu kùkte nolnì'u zo'u: mi ba jifkritrazù'e lo ka plìpe .obu kei te zu'e lo nu bàpli lo nu .obu gàsnu lo mi se cpèdu .i va'o lo nu .obu bàrda stèdu zo'u: .obu jai jàlge fai lo ka xu kau mi fràxu ce'u .i ki'u bo mi ba co'u lo nu .obu nùpre lo ka dùnda mi'o lo jai se djìca be mi'a cu gùrgau lo stèdu be .obu vi'u pi ro lo kùmfa .i ja'o ko glèki doi pèndo .i ki'u bo ro da ba xàmgu li'u» ni'o ca lo bavlà'i cèrni lo sònci pe lo crìno zbìkre cu klagì'a la cìnfo la bàrda ke nolstìzu kùmfa gi'e mìnde cy lo ka nèrkla lo me la .oz. moi

ni'o la cìnfo cu ba zi pàgre lo vòrme gi'e vìska fau lo nu ru'u càtlu kei fau lo nu spàji kei lo nu ca'u lo nolstìzu cu zvàti fa lo bòlci be lo fàgri poi ke'a tai tsàli gi'e tai gùsycai vau ja'e lo nu cy. ja'a ru'e ka'e jdàri lo ka càtlu ke'a .i pa moi lo sìdbo be cy fa lo du'u la .oz. cu se snùti lo ka co'a se fàgri gi'e jenca .i ku'i ca lo nu cy. tròci lo ka jbibì'o kei lo glanèjni cu tai càrmi ja'e lo nu lo zbìkre be cy cu jènca mìlxe .i je cy. cu dèsku ke cpàre xrùti lo mòkca poi jbìmau lo vòrme ni'o ba bo lo dìzlo je làuble vòksa cu se sànce lo bòlci be lo fàgri .i di'e se cùsku be fy. vàlsi: ni'o «lu mi'e .oz. no'u la bànli je xlàtce .i do du ma .i je mu'i ma do mi klàma li'u»

ni'o la cìnfo cu spùsku «lu mi tolvìrnu cìnfo gi'e tèrpa ro da .i mi do pu klàma te zu'e lo nu cpèdu lo nu do dùnda lo kamvìrnu mi ja'e lo nu mi ka'e bìnxo lo nòltru be lo dànlu be'o noi lo rèmna mi te cmène li'u» ni'o «lu da'i mi mu'i ma dùnda lo kamvìrnu do —sei la .oz. cu te prèti— li'u» ni'o «lu ki'u lo nu ge lo ro te màkfa cu se bàlrai do gi do po'o vlìpa lo ka cùrmi lo mi se cpèdu —sei la cìnfo cu spùsku— li'u» ni'o lo bòlci be lo fàgri cu ze'a tsàli jèlca .i je lo vòksa cu cùsku «lu ko je'urjà'o fi mi fe lo du'u la pàlci termafyfè'i cu mòrsi .i ca lo nu do go'i kei mi dùnda lo kamvìrnu do .i ku'i ze'a lo nu la termafyfè'i cu jmìve kei do na ka'e na stòdi lo ka tolvìrnu li'u» ni'o la cìnfo cu fèngu lo di'u nùnsku gi'e ku'i na ka'e spùsku da .i je ze'a lo nu cy cu sànli fau lo nu smàji càtlu lo bòlci be lo fàgri kei kei by tai càrmi glàre bìnxo ja'e lo nu cy cu càrna gi'e bàjra clìva lo kùmfa .i cy glèki lo nu lo cy. pèndo cu dènpa cy kei gi'e jùngau py fo lo xlàtce nu tàvla la te màkfa ni'o «lu .ei mi'o ca mo —sei la .dòrotis. cu bàdri rètsku— li'u» ni'o «lu ro pa mei lo ka'e se zùkte be mi'o fa lo ka klàma lo gùgde be la .ŭìnkis. gi'e sìsku la pàlci termafyfè'i gi'e dàspo ri li'u» ni'o «lu ku'i mo va'o lo nu na kàkne —sei lo nìxli cu cùsku— li'u» ni'o «lu va'o ku mi ba no roi vìrnu —sei la cìnfo cu xùsra— li'u» ni'o «lu si'a mi ba no roi se bèsna —sei la cpitèpygau cu jmìna— li'u» ni'o «lu si'a mi ba no roi se rìsna —sei la tìnci mùdypre cu cùsku— li'u» ni'o «lu si'a mi ba no roi vìska la fetfàmti .em. .e la nakfàmti .xènris. —sei la .dòrotis. fau lo nu co'a klàku cu cùsku— li'u» ni'o «lu .o'i sai —sei lo crìno nìxli cu krìxa— .i lo se klàku ba fàrlu lo do crìno ke sìlka pàstu gi'e selba'àgau py li'u» ni'o ja'e bo la .dòrotis. cu sùdgau lo kànla gi'e cùsku «lu ru'a mi'o nìtcu lo ka tròci .i ku'i mi bìrti lo du'u mi na djìca lo nu càtra da kei lo ji'a sai nu za'u re'u vìska la fetfàmti .em. li'u» ni'o «lu mi do ba klakànsa .i ku'i mi dùkse lo ka tolvìrnu kei lo nu càtra la termafyfè'i —sei la cìnfo cu cùsku— li'u» ni'o «lu mi ji'a ba klàma —sei la cpitèpygau cu jdìce— .i ku'i mi ba na mùtce lo ka plìxau do .i mi tai bèbna li'u» ni'o «lu mi na pònse lo rìsna poi lo termafyfè'i ku ji'a sai zo'u: ke'a ka'e xràni ty —sei la tìnci mùdypre cu te nòtci— .i ku'i va'o lo nu do klàma cu klàma fa mi ji'a li'u» ni'o ki'u ku lo se bènde cu jdìce lo du'u co'a lìtru ca lo bavlà'i cèrni .i je la tìnci mùdypre cu kìlgau lo ri ka'àmru se pi'o lo crìno kilgaurò'i gi'e ba'o ctilypù'i lo cìdni .i la cpitèpygau cu cùlgau lo sèvzi lo vìfne sùdysràsu .i je la .dòrotis. cu pùnji lo cnìno cìnta lo cy. kànla te zu'e lo nu cy. xàgmau kàkne lo ka vìska .i lo crìno nìxli noi mùtce lo ka xèndo cu cùlgau lo lànka be la .dòrotis. lo jai xàmgu be fai lo ka cìtka gi'e làsna lo cmàlu jànbe lo cnèbo be la .tòtos. lo crìno dàsri ni'o clìra fa lo nu lo se bènde cu klàma lo ckàna .i je còndi sìpna co'u tu'a lo dorgù'i lu'u noi ca ke'a se cikrì'a lo nu lo crìno nakyjìpci poi xàbju lo trìxe bimsèlsru pe la noldì'u kei .e lo nu cmòni fa lo fetyjìpci poi ba'o pùnji lo crìno sòvda

ni'o ni'o pa re mo'o lo nu sìsku la pàlci termafyfè'i
	ni'o lo sònci pe lo crìno zbìkre cu klagì'a pa'o lo klàji pe la ri'òjme tcàdu co'u lo nu tolclìva lo kùmfa poi la bàdypre pe lo vrògai cu xàbju .i lo di'u càtni cu toltèlgau lo vìstci te zu'e lo nu xrùgau vy lo bàrda tànxe kei gi'e ba bo clìte kàrgau lo vòrme se va'u lo mi'o pèndo

ni'o «lu ma dàrgu la pàlci termafyfè'i pe la stìci —sei la .dòrotis. cu rètsku— li'u» ni'o «lu no da dàrgu —sei la bàdypre pe lo vrògai cu spùsku— .i no da su'o roi djìca lo nu klàma fa'a ku li'u» ni'o «lu va'o ku mi'a ta'i ma ka'e tòlcri ty —sei lo nìxli cu te prèti— li'u» ni'o «lu ba frìli —sei lo nànmu cu spùsku— .i ki'u bo ty ca lo nu djùno lo du'u do zvàti lo gùgde pe la .ŭìnkis. cu tòlcri do gi'e sèfygau do li'u» ni'o «lu ju'o cu'i na go'i —sei la cpitèpygau cu cùsku— .i ki'u bo mi'a djìca lo nu dàspo ty li'u»

ni'o «lu ŭa .i la'e di'u frìca —sei la bàdypre pe lo vrògai cu cùsku— .i no da pu su'o roi dàspo ty .i se ki'u bo li'a mi pu jìnvi lo du'u da'i ty do sèfygau du'i lo nu no'a ro lo dràta .i ku'i ko capyjù'i .i ki'u bo ty cu pàlci gi'e tsàli gi'e ju'o cu'i ba na cùrmi lo nu do dàspo ty .i ko stòdi lo ka klàma fa la bèrti ku noi lo sòlri cu galjdìka bu'u ke'a .i se va'o bo do na ka'e flìba lo nu tòlcri ty li'u» ni'o lo lìtru cu kìrsku lo sònci gi'e tolrìnsa sy gi'e selfarbì'o la bèrti fau lo nu càdzu lo fòldi be lo rànti sràsu noi fe'e ru'i nai se bàrna lo xrulrxasteràka .e lo xrulnranunkùlu .i la .dòrotis. cu za'o dàsni lo mèlbi ke sìlka pàstu poi pu dàsybi'o ke'a bu'u lo noldì'u .i ku'i ca ku fau lo nu spàji dy kei dy fàcki lo du'u na za'o crìno gi'e ku'i cùrve blàbi .i lo ji'a dàsri pe ru'u lo cnèbo be la .tòtos. cu cìrko lo ka crìno kei gi'e ca blàbi du'i tu'a lo pàstu pe la .dòrotis. ni'o la ri'òjme tcàdu cu ba za dàrno mùtce trìxe .i ca lo nu lo lìtru cu ca'o cramù'u kei lo lòldi cu fe'e ca'o rùfsu je cmàna zènba .i ki'u bo zvàti lo vi gùgde pe la stìci fa no cànge je no zdàni .i je lo lòldi cu kùnti lo se zbàsu ni'o ca lo lecydò'i lo sòlri cu glàre te gùsni lo flìra .i ri'a bo zvàti fa no trìcu poi ka'e se va'u se ctìno .i ja'e bo pu lo nìcte la .dòrotis. .e la .tòtos. .e la cìnfo cu tàtpi gi'e vrebì'o lo sràsu gi'e co'a sìpna fau lo nu la mùdypre .e la cpitèpygau cu snùra zgàna

ni'o la pàlci termafyfè'i pe la stìci cu se kànla lo pa po'o mei .i ku'i lo kànla cu vlìpa du'i tu'a lo darcvìstci gi'e kàkne lo ka vìska ro da .i ja'e bo ty. fau lo nu zùtse lo vòrme pe lo ri badydì'u cu ru'u càtlu gi'e vìska lo nu la .dòrotis. cu sìpna vrèta fau lo nu lo ri pèndo cu srùri .i dàrno mùtce .i ku'i la pàlci termafyfè'i cu fèngu lo nu zvàti lo ri gùgde .i ja'e bo ty. bifcà'e lo rìjno sìltci poi srùri dàndu lo ri cnèbo ni'o ba zi sai bo fa'a bàjra te ka'a ro fàrna fa lo gùnme be lo bàrda làbno .i ro boi ly se tùple lo clàni gi'e se kànla lo pàlci gi'e se dènci lo kìnli ni'o «lu ko klàma lo vu prènu —sei la termafyfè'i cu cùsku— gi'e vilkà'a py lo spìsa li'u» ni'o «lu xu do na sèfygau py do —sei lo jàtna be lo làbno cu rètsku— li'u» ni'o «lu na go'i —sei ty spùda— .i pa boi py màrji lo tìnci .i pa boi py màrji lo sudysràsu .i pa boi py nìxli .i pa dràta cu cìnfo .i no boi py kàkne lo ka gùnka .i se ki'u bo .e'a do vilkà'a py lo spìsa li'u» ni'o «lu je'e do'u —sei lo làbno cu cùsku— li'u» .i ly to'o bàjra se rai lo ka sùtra kei fau lo nu lo dràta làbno cu jèrsi ni'o zanfù'a fa lo nu la cpitèpygau .e la mùdypre cu cìkna pràne gi'e tìrna lo nu lo làbno cu ca'o klàma ni'o «lu lo ca nundà'a cu me mi moi —sei la mùdypre cu cùsku— .i se ki'u bo ko mi trìxe .i mi ba pènmi lo làbno ca lo nu ly cu klàma li'u»

ni'o my lèbna lo vo'a ka'àmru noi vo'a pu gàsnu lo nu ke'a kìnli mùtce .i je ca lo nu lo jàtna be lo làbno cu klàma kei la tìnci mùdypre cu slìgau lo bìrka gi'e kàtna vìmcu lo stèdu be lo làbno lo xàdni ja'e lo nu ba zi sai mrobì'o .i co'a lo nu my cu ka'e làfti lo ka'àmru kei lo dràta làbno cu klàma .i je ri ji'a fàrlu gau lo kìnli kòrbi be lo xàrci pe la tìnci mùdypre .i lo làbno cu vo no mei .i je vo no roi ku lo làbno cu se càtra .i ja'e bo ro mai lo ro mòrsi làbno cu dèrxi vrèta lo lòldi

ni'o ba bo my cu lolpù'i lo ka'àmru gi'e tsebì'o re'o la cpitèpygau ku noi cùsku «lu pu xàmgu nundà'a doi pèndo li'u» ni'o lo re da cu dènpa co'u lo nu la .dòrotis. cu cikybì'o ca lo bavlà'i cèrni .i lo cmàlu nìxli cu tèrpa mùtce ca lo nu vìska lo bàrda dèrxi be lo kàlsa làbno .i ku'i la mùdypre cu jùngau dy boi ro da .i dy kìrsku my lo nu nùrgau kei gi'e tsebì'o te zu'e lo nu cèrsai cìtka noi ba ke'a lo gùnma cu za'u re'u co'a lìtru li'u» ni'o ca lo mìntu cèrni la pàlci termafyfè'i cu klàma lo vòrme be fo lo badydì'u gi'e càtlu se pi'o lo pa kànla poi kàkne lo ka vìska lo dàrno .i vìska lo nu ro lo làbno cu mòrsi lòlvre .e lo nu lo fànge cu za'o lìtru pàgre lo vo'a gùgde .i la'e di'u gàsnu lo nu ty cu fèngu se mau lo pùrci kei ja'e lo nu re roi bifcà'e lo sìltci ni'o ba zi bo lo bàrda gùnma be lo cìlce kòrvo cu vòikla fa'a ty fi'o se bànzu lo nu lo tsàni cu mànku bìnxo ni'o la pàlci termafyfè'i fi la nolràitru kòrvo cu cùsku «lu ko ba zi vòikla lo fànge .i ko ... gi'e vilkà'a fy lo spìsa li'u» ni'o lo cìlre kòrvo cu vòikla se kai lo ka bàrda gùnma kei fa'a la .dòrotis. .e lo ri pèndo .i ca lo nu lo cmàlu nìxli cu vìska lo nu ky cu klàma cu tèrpa ni'o ku'i la cpitèpygau cu cùsku «lu lo ca nundà'a cu me mi moi .i se ki'u bo ko vrebì'o ne'a mi .i se va'o bo do ba na se xràni li'u»

ni'o mu'i ku ro lo lìtru po'u na'e bo la cpitèpygau cu vrebì'o lo lòldi .i je cy cu sa'irbì'o gi'e tèngau lo bìrka .i ca lo nu lo kòrvo cu vìska cy kei ky tèrpa (to tai lo nu lo vi cìpni cu ro roi co'e lo cpitèpygau toi) gi'e na dàrsi lo ka jbibì'o .i ku'i la nolràitru kòrvo cu cùsku: ni'o «lu ĭi nai tu tersè'a nànmu .i mi ba ja'urxè'a ke tùnta vìmcu lo kànla be ny li'u» ni'o la nolràitru kòrvo cu vòikla fa'a la cpitèpygau ku noi jairbì'o ky fo lo stèdu gi'e se tòrni lo cnèbo co'u lo nu mrobì'o .i je ba bo lo dràta kòrvo cu fa'a vòikla .i je bo la cpitèpygau cu se tòrni lo ra cnèbo ku ji'a .i lo kòrvo cu vo no mei .i je vo no roi ku la cpitèpygau cu se tòrni lo cnèbo .i co'u bo ro mai ro boi ky cu re'o mòrsi vrèta .i ba bo la cpitèpygau fi lo ri pèndo cu cpèdu lo nu sa'irbì'o .i je za'u re'u di'a lìtru

ni'o la pàlci termafyfè'i ca lo nu za'u re'u càtlu lo bàrtu gi'e vìska lo nu ro lo kòrvo cu dèrxi cu bìnxo lo fèngu mùtce gi'e ci roi bifcà'e lo vo'a rìjno sìclu ni'o ba zi bo tìrna lo bànli zbazàza poi zvàti lo vàcri .i je lo cinkygùnma be lo xèkri bìfce cu vòfli jbibì'o ty ni'o «lu ko klàma lo fànge gi'e kilràngo càtra ri —sei la termafyfè'i cu mìnde— li'u» .i lo bìfce cu càrna gi'e sùtra vòfli co'u lo nu jìbni lo jai bu'u càdzu be fai la .dòrotis. .e lo ri pèndo .i ku'i la mùdypre pu vìska lo nu by. klàma .i je la cpitèpygau pu jdìce lo ka zùkte ma kau

ni'o «lu ko tolsè'a lo mi sudysràsu gi'e pèjgau sy lo cmàlu nìxli .e lo gèrku .e la cìnfo —sei fi la mùdypre cu cùsku— .i se va'o bo lo bìfce na ka'e kilrangytùnta li'u» .i la mùdypre cu zùkte la'e di'u .i je la .dòrotis. cu vrebì'o lo jìbni be la cìnfo gi'e jgàri la .tòtos. lo bìrka fau lo nu lo sudysràsu cu mùlno gàcri

ni'o lo bìfce cu klàma gi'e tòlcri no na'e bo la cpitèpygau ku poi ka'e se kilrangytùnta .i se mu'i bo vòikla fa'a cy gi'e lìfri lo ka lo kilràngo be ce'u cu pòrpi ri'a tu'a lo tìnci se cau lo nu ja'a ru'e ji'a sai crògau la mùdypre .i je ki'u lo du'u lo bìfce ca lo nu lo kilràngo cu ba'o pòrpi na ka'e jmìve zo'u: la'e di'u fànmo lo xèkri bìfce .i je by. ròtsu sènta cpàna la mùdypre tai tu'a lo cmàlu dèrxi be lo tolrùfsu kòlme ni'o ba bo la .dòrotis. .e la cìnfo cu sa'irbì'o .i je lo nìxli cu sìdju la tìnci mùdypre lo nu xrùgau lo sudysràsu lo nènri be la cpitèpygau co'u lo nu cy cu cnìci du'i lo nu no'a ca lo pùrci .i ja'e bo lo ro da cu za'u re'u co'a lìtru ni'o la pàlci termafyfè'i cu tai fèngu ca lo nu vìska lo nu lo ri xèkri bìfce cu se dèrxi lo cmàlu tai tu'a lo kòlme kei kei ja'e lo nu jàlgau lo jàmfu lo lòldi gi'e làcpu lo kèrfa gi'e dànre lo dènci .i je ba bo klàcpe lo pa re mei be lo sèlfu noi me la .ŭìnkis. ku'o gi'e dùnda lo kilgà'a sy fau lo nu mìnde sy lo nu klàma lo fànge gi'e dàspo fy ni'o la .ŭìnkis. na vìrnu sèlnai gi'e ku'i bìlga lo te mìnde .i se ki'u bo càdzu co'u lo nu jìbni la .dòrotis .i ba bo la cìnfo cu clàdu cmòni gi'e bàjra fa'a ŭy .i je la ŭu .ŭìnkis. cu tai tèrpa ja'e lo nu to'o bàjra se rai lo ka sùtra

ni'o ca lo nu ba'o xrùti lo badydì'u kei la pàlci termafyfè'i cu so'i roi dàrxi ŭy lo dàsri gi'e xrumì'e ŭy lo nu gùnka kei gi'e ba bo tsebì'o te zu'e lo nu pènsi lo nu .ei ba mo kau .i na kàkne lo ka jìmpe lo du'u se ja'e ma kau ro lo se plàtu be fi lo nu dàspo lo va fànge cu pu zìlfli .i ku'i vlipa termafyfè'i gi'e pàlci co'e .i je ba za bo jdìce lo du'u ba mo kau ni'o zvàti lo nènri be lo kajnytà'e fa lo sòlji màpku noi se srùri lo tàbjme jo'u lo zirxu'èjme .i lo bi'u nai sòlji màpku cu vàsru lo màkfa .i lo pònse be lo go'i cu ka'e ci roi klàcpe la selnà'i smàni ku noi tìnbe ro lo se mìnde .i ku'i no prènu ka'e mìnde lo bi'u nai cìzra dànlu za'u ci roi ku .i xa'o ba'o re roi ku la pàlci termafyfè'i cu pìlno lo màkfa pe la màpku .i pu pa roi go'i ca lo nu sèfygau la .ŭìnkis. gi'e bìxygau lo sèvzi lo ka tùrni lo gùgde be ŭy .i la selnà'i smàni pu sìdju ty la'e di'u .i re re'u go'i ca lo nu dàmba la bànli .oz. gi'e li'àrgau .obu lo gùgde pe la stìci .i la selnà'i smàni pu sìdju ty la'e di'u ji'a .i ca lo pa po'o se jmìna ty ka'e pìlno lo bi'u nai sòlji màpku .i se mu'i bo na'e djìca lo nu ca'a go'i kei co'u lo nu ro lo dràta se vlìpa cu ba'o se pìlno .i ku'i ca fau lo nu lo tsàli làbno .e lo cìlce kòrvo .e lo kìnli bìfce cu ba'o cànci .e lo nu lo ro lo sèlfu cu ba'o se tepli'àgau la tolvìrnu cìnfo cu sajbì'o lo du'u ca pa p'o mei fa lo tàdji be lo nu dàspo la .dòrotis. .e lo ri pèndo ni'o se mu'i bo la pàlci termafyfè'i cu lèbna la sòlji màpku lo kajnytà'e gi'e pùnji my lo stèdu .i ba bo co'a sànli lo zùnle jàmfu gi'e màsno lo ka cùsku: ni'o zoi «lu. Ep-pe, pep-pe, kak-ke! .lu» ni'o bavlà'i fa lo nu co'a sànli lo prìtu jàmfu gi'e cùsku: ni'o zoi «lu. Hil-lo, hol-lo, hel-lo! .lu» ni'o ba bo co'a sànli lo jàmfu re mei gi'e clàdu vòksa krìxa: ni'o zoi «lu. Ziz-zy, zuz-zy, zik! .lu» ni'o ca ku lo màkfa cu co'a rìnka .i lo tsàni cu mànku zènba .i je lo dìzlo rumbàlu poi zvàti lo vàcri cu se tìrna .i sànce fa lo carcàca be lo so'i nàlci be'o .e lo clàdu nu tavysì'u gi jo'u cmìla .i je lo sòlri cu co'a te gùsni lo tcìni ja'e lo nu ka'e vìska lo nu la pàlci termafyfè'i cu se srùri lo gùnma be lo smàni noi ro ke'a se nàlci lo bànli je tsàli re mei poi zvàti lo birjànco

ni'o pa boi sy noi bràmau zei mùtce lo dràta cu sìmlu lo ka jàtna sy .i vòikla lo jìbni be la termafyfè'i gi'e cùsku «lu do ba'o klàcpe mi'a ci .e ro re'u .i do mi'a ma mìnde li'u» ni'o «lu ko klàma lo fànge poi zvàti lo mi gùgde ku'o gi'e dàspo ro boi fy po'u na'e bo la cìnfo —sei la pàlci termafyfè'i cu cùsku— .i ko zvàgau lo bi'u nai dànlu mi .i mu'i bo mi plàtu lo nu jìtro cy tai tu'a lo xìrma gi'e gàsnu lo nu cy cu gùnka li'u»

ni'o «lu .ai lo do te mìnde cu se tìnbe —sei lo jàtna cu cùsku— li'u» .i ba ku fau lo clàdu nu tàvla bàcru kei je nu sàvru kei la selnà'i smàni cu to'o vòikla lo jai bu'u càdzu be fai la .dòrotis. .e lo ri pèndo ni'o lo su'o la smàni cu jairbì'o la tìnci mùdypre gi'e bèvri my pa'o lo vàcri co'u lo nu gàpru lo gùgde poi ròtsu se gàcri lo kìnli ròkci .i bu'u ku sy cu fàlcru la ŭu mùdypre ku noi fàrlu ve'a lo bàrda lo ròkci noi bu'u ke'a my vrèta fau lo nu tai se kèvna je sèlxai vau ja'e lo nu na ka'e ga mùvdu gi cmòni ni'o lo su'o dràta smàni cu kàvbu la cpitèpygau .i je se pi'o lo ra clàni dègji cu làcpu pi ro lo sudysràsu lo se dàsni .e lo stèdu .i gàsnu lo nu lo màpku .e lo cùtci .e lo tàxfu cu cmàlu dèrxi kei gi'e rènro dy lo gàlrai jìmca be lo ràjycla trìcu

ni'o lo dràta smàni cu rènro lo spìsa be lo ròtsu skòri ja'e lo nu srùri la cìnfo kei gi'e srùgau so'i djìne lo xàdni .e lo stèdu .e lo tùple vu'o pe cy .i ja'e bo la cìnfo na ka'e ga bàtci gi sràku gi'a dàmba tai su'o da .i ba bo sy sy làfti cy gi'e to'o vòikla to'e se cau cy lo noldì'u pe la termafyfè'i ge'u noi bu'u ke'a pùnji cy lo cmàlu selsrùstu poi lo gàltu ke tìrse bìtmu cu srùri ke'a ja'e lo nu no da ka'e rìvbi bàrkla ni'o ku'i la .dòrotis. zo'u: sy sy na sai xràni dy .i dy sànli fau lo nu zvàti lo vo'a bìrka fa la .tòtos. kei .e lo nu zgàna lo se bàdri dìmna be lo vo'a pèndo gi'e jìnvi lo du'u ba zi se li'erlà'i fa vo'a .i lo jàtna be la selnà'i smàni cu vòikla dy fau lo nu lo ri clàni je se kèrfa bìrka cu se tèngau .e lo nu lo to'e mèlbi flìra cu màbla cìsma .i ku'i jy vìska lo bàrna be lo mèbri be dy gi'e klàsti fau lo nu xanjà'o jùngau lo dràta lo du'u .ei na pèncu dy

ni'o «lu mi'o na dàrsi lo ka xràni lo vi cmàlu nìxli —sei jy fi lo dràta cu cùsku— .i ki'u bo ny se bàndu la kamvlìpa co vrùde .i je ri bàlmau la kamvlìpa co pàlci .i ro pa mei lo mi'a ka'e se zùkte fa lo ka bèvri ny lo noldì'u pe la pàlci termafyfè'i gi'e stàcru li'u» ni'o ja'e bo racyjù'i joi toljùrsa làfti fa sy sy la .dòrotis. fi'o te jgàri lo bìrka gi'e sùtra bèvri dy pa'o lo vàcri co'u lo nu tolylì'a lo noldì'u noi bu'u ke'a pùnji dy lo sèrti pe lo cràne vòrme .i ba bo lo jàtna fi la termafyfè'i cu cùsku: ni'o «lu mi'a ba'o tìnbe fi do fi'o se jìmte lo ni mi'a kàkne .i la tìnci mùdypre .e la cpitèpygau cu ba'o se dàspo .i je la cìnfo cu skojò'e bu'u lo do bimsèlsru .i lo cmàlu nìxli zo'u: mi'a na dàrsi lo nu xràni ny .a lo gèrku poi ny ke'a bìrka bèvri .i lo nu do vlìpa lo ka jìtro lo mi'a bènde cu ca tòlcfa .i je do ba no roi za'u re'u vìska mi'a li'u» ni'o ba bo ro la selnà'i smàni fau lo nu cmìla je tàvla je sèlsna mùtce cu vòikla fa'a ne'i lo vàcri gi'e ba za bo cu'u se vìska ni'o la pàlci termafyfè'i cu ge se spàge'i xànka vau ca lo nu vìska lo bàrna be lo mèbri ba la .dòrotis. .i ki'u bo je'a djùno lo du'u ge nai la selnà'i smàni gi nai vo'a dàrsi lo ka crògau lo nìxli tai su'o da .i fa'a ni'a càtlu lo jàmfu be la .dòrotis. .i je ca lo nu vìska lo rìjno cùtci cu co'a dèsku ri'a lo nu tèrpa .i ki'u bo ty. djùno lo du'u lo tsàli màkfa cu jìnzi cy .i ca lo cfàri la termafyfè'i cu se xlùra fi lo ka bàjra to'o la .dòrotis. .i ku'i fàsnu fa lo nu ty. càtlu lo kànla be lo nìxli gi'e visygà'e lo du'u sàmpu mùtce fa lo ruxsè'i poi trìxe ky kei .e lo du'u lo cmàlu nìxli cu na djùno fi lo se mànci kamvlìpa poi la rìjno cùtci cu dùnda ny .i ja'e bo la pàlci termafyfè'i cu mìpri cmìla gi'e pènsi «lu mi za'o ka'e gàsnu lo nu ny mi sèlfu .i ki'u bo ny na djùno lo du'u ta'i ma kau pìlno lo kamvlìpa li'u» .i ba bo ty. jùrsa je rùfsu cùsku fi la .dòrotis.: ni'o «lu ko klakànsa mi .i je ko tìnbe ro da poi mi do ke'a mìnde .i ki'u bo va'o lo nu do na go'i kei mi ba tolcfàgau do tai lo nu mi pu no'a la tìnci mùdypre .e la cpitèpygau li'u» ni'o la .dòrotis. cu jèrsi ty pa'o so'i lo mèlbi kùmfa be fo lo vo'e badydì'u co'u lo nu tolclìva lo jupkù'a noi bu'u ke'a la termafyfè'i cu mìnde dy lo ka lùmci lo pàtxu gi'e brulù'i lo lòldi gi'e stògau lo fàgri lo ka da cìdja ce'u ni'o la .dòrotis. co'a gùnka co filsèltro fau lo nu ba'o zu'èdji lo ka gùnka se rai lo ka kàkne .i mu'i bo dy. glèki lo nu la pàlci termafyfè'i pu zu'èjdi lo ka na càtra dy ni'o fau lo nu la .dòrotis. cu ca'o càrmi gùnka kei la termafyfè'i cu pènsi lo nu ri ba klàma lo selsrùstu gi'e jìtro la tolvìrnu cìnfo tai tu'a lo xìrma .i da'i zdìle ty (to ty bìrti toi) fa lo ka gàsnu lo nu cy. làcpu lo ty. càrce se ka'a ro da poi ty djìca lo nu ty. klàma ke'a .i ku'i ca lo nu ty. kàrgau lo vòrme kei la cìnfo cu clàdu càmcmo gi'e tai tsàli plìpe ty ja'e lo nu la termafyfè'i cu tèrpa gi'e barbàjra gi'e gàsnu lo nu lo vòrme cu di'a gànlo ni'o «lu va'o lo nu mi na ka'e jìtro do zo'u: —sei la termafyfè'i fi la cìnfo cu cùsku be fau lo nu tàvla pa'o lo gràna be lo vrògai se'u— mi ka'e djacaumrògau do .i jai do co'u lo nu do zùkte lo mi se djìca cu na cìtka da li'u» ni'o ba la'e di'u ty bèvri no cìd.a lo pìnfu cìnfo .i ku'i ca ro djèdi cu klàma lo vrògai ca lo dormìdgu'e rètsku «lu xu do brèdi lo nu se jìtro tai tu'a lo xìrma li'u» ni'o .e la cìnfo cu spùsku «lu na go'i .i va'o lo nu do nèrkla lo vi bimsèlsru kei mi do ba bàtci li'u» ni'o krìnu lo nu la cìnfo cu na bìlga lo ka zùkte jai se djìca be la termafyfè'i kei kei fa lo nu ca ro nìcte ca lo nu lo nìnmu cu sìpna kei la .dòrotis. cu bèvri lo cìdja cy lo kajnytà'e .i di'i ku ba lo nu cy. cìtka kei cy. vrebì'o lo cy. ckàna be lo sudysràsu .i je la .dòrotis. cu vrebì'o lo jìbni be cy. gi'e pùnji lo stèdu be dy. lo cy. rànti je ròtsu ne'òkre .i je ca bo lo re mei cu ca'o càsnu lo ri ràktu sèlfri gi'e tròci lo ka plàtu tu'a da poi tàdji lo nu rìvbi .i ku'i lo re mei na snàda lo ka fàcki fi lo tàdji be lo nu bàrkla lo noldì'u .i ki'u bo ri ro roi se bàndu lo pèlxu .ŭìnkis. ku noi sèlfu la pàlci termafyfè'i gi'e dukse lo ka tèrpa ty kei lo ka na zùkte lo te mìnde be ŭy bei ty

ni'o lo nìxli cu bìlga lo ka càrmi gùnka ze'a lo dònri .i je so'i roi ku la termafyfè'i cu capnù'e lo nu dàrxi ny lo tolcì'o sànta poi ro roi xànce bèvri ke'a .i ku'i je'u ty na'e dàrsi lo nu dàrxi la .dòrotis. kei ki'u tu'a lo bàrna be lo mèbri .i lo vèrba cu na djùno la'e di'u gi'e jai ni vy. tèrpa lo dìmna me vy .e la .tòtos. moi kei fa li ro .i pa roi ku la termafyfè'i cu dàrxi la .tòtos. se pi'o lo ty. sànta .i je lo vìrnu ke cmàlu gèrku cu vòfli plìpe ty gi'e vènfu fo lo ka bàtci lo tùple be ty .i la termafyfè'i zo'u: na blùcri fa lo mòkca poi se bàtci .i ki'u bo ty cu tai pàlci ja'e lo nu lo cìblu be ne'i ty pu za lo nànca be li so'i ba'o sudbì'o

ni'o lo nunjì'e pe la .dòrotis. cu se bàdri mùtce bìnxo ca lo nu dy cu co'a jìmpe lo du'u lo nu xrùti la .kànzas. ju'e la fetfàmti .em. cu nàdmau ro lo pùrci .i su'o roi ku la .dòrotis. cu klàku ze'a lo càcra be li so'i fau lo nu la .tòtos. cu zùtse re'o lo jàmfu be dy gi'e càtlu lo flìra be dy fau lo nu pànte tònga ke klàku cmòni te zu'e lo nu jàrco lo ka kècti lo cmàlu jìtro be ty .i la .tòtos. cu no'e se vàjni lo du'u ty zvàti la .kànzas. ji kau lo gùgde pa la .oz. kei va'o lo nu la .dòrotis. cu kànsa ty .i ku'i ty djùno lo du'u lo cmàlu nìxli cu tòlgei .i je la'e di'u se jàlge lo nu tòlgei fa ty ji'a ni'o la pàlci termafyfè'i cu mùtce lo ka djìca lo nu pònse la rìjno cùtci ku noi lo nìxli cu ro roi dàsni .i lo bìfce .e lo kòrvo .e lo làbno vu'o pe ty cu dèrxi vrèta gi'e sudbì'o .i je ty cu ba'o xàksu pi ro lo màkfa pe la sòlji màpku .i ku'i va'o lo nu da'i snàda lo ka cpàcu la rìjno cùtci kei cy dùnda lo ty lo ka vlìpa poi zmàdu ke'a pe ro lo dràta dàcti poi pu cìrko .i ty jùndi càtlu la .dòrotis. te zu'e lo nu fàcki lo du'u xu kau dy su'o roi toldasybì'o lo cùtci kei fau lo nu jìnvi lo du'u da'i ty kàkne lo ka zerlè'a cy .i ku'i lo vèrba cu tai jgìra tu'a lo mèlbi cùtci ja'e lo nu vy toldasybì'o cy ca no da po'u na'e lo nicte noi ca ke'a vy jirlì'u vy .i la termafyfè'i cu dùkse lo ka tèrpa lo mànku kei lo nu dàrsi lo nu nèrkla lo kùmfa pe la .dòrotis. ca lo nìcte te zu'e lo nu lèbna lo cùtci .i je lo ni ty cu tèrpa tu'a lo djàcu cu zmàdu lo ni ty cu tèrpa lo mànku .i se ki'u bo ty cu no roi klàma lo jìbni ca lo nu la .dòrotis. cu djàcu jìnru .i je'u lo tolcì'o me la termafyfè'i cu no roi pèncu lo djàcu .i je nai ty cùrmi lo nu lo djàcu cu pèncu ty tai su'o da ni'o ku'i lo bi'u nai pàlci dànlu cu mùtce lo ka mèncre kei gi'e ro mai te sìdbo fi da poi ju'o ba se jàlge lo nu vo'a cpàcu lo jai se djìca .i pùnji lo tìrse gràna lo mìdju be lo jupkù'a lòldi gi'e ba bo gàsnu se pi'o lo vo'a màkfa làrcu lo nu lo tìrse cu nonseljì'u lo rèmna kànla .i ja'e bo la .dòrotis. ca lo nu càdzu lo lòldi cu snùti stàpa lo gràna ki'u lo nu na kàkne lo ka vìska gy kei gi'e fàrlu .i na mùtce lo ka se xràni .i ku'i ca lo nu fàrlu kei pa la rìjno cùtci cu co'u jòrne .i je pu lo nu dy ka'e cpàcu cy kei la termafyfè'i cu lèbna cy gi'e jòngau cy lo cìnla jàmfu be lo ty. sèvzi ni'o lo pàlci nìnmu cu mùtce lo ka glèki lo nu ba'o snàda lo nu tcìca .i ki'u bo ze'a lo nu pònse pa lo cùtci cu pònse lo xàdba be lo màkfa .i je la .dòrotis. na ka'e pìlno my to'e se va'u ty va'o lo ji'a sai nu da'i dy djùno lo du'u ta'i ma kau ja'a ca'a co'e ni'o lo cmàlu nìxli fau lo nu vìska lo nu ba'o cìrko pa lo vo'a mèlbi cùtci cu bìnxo lo fèngu gi'e cùsku fi la termafyfè'i fe «lu ko xrùgau lo mi cùtci mi li'u» ni'o «lu mi ba na go'i —sei la termafyfè'i cu spùda— .i mu'i bo cy ca me mi moi gi'e nai me do moi li'u» ni'o «lu do pàlci maldànlu —sei la .dòrotis. cu krìxa— .i do na se kràli lo ka lèbna lo cùtci mi li'u» ni'o «lu .ai mi to'e ki'u nai ràlte —sei la termafyfè'i fau lo nu cmìla fa'a dy cu cùsku— .i je ca pa djèdi mi cpàcu lo ji'a dràta do li'u» ni'o la'e di'u se jàlge lo nu la .dòrotis. cu tai fèngu ja'e lo nu làfti lo bàktu be lo djàcu be'o poi vi zvàti ku'o gi'e gàsnu lo nu by toltìsna ga'u la termafyfè'i ja'e lo nu fy bìnxo lo ka fe'e co'a lo stèdu fe'e co'u lo jàmfu cu cìlmo ni'o ba zi sai ku lo pàlci nìnmu cu clàdu ke tèrpa krìxa .i je ba bo fau lo nu la .dòrotis. cu mànci càtlu ny kei la termafyfè'i co'a ge cmazè'a gi rùnta ni'o «lu ko càtlu lo nu do ba'o mo kau —sei ty krìxa— .i zi lo mèntu mi ba rùnme li'u» ni'o «lu mi xènru mùtce ja'a ku —sei la .dòrotis. ku noi je'u tèrpa lo nu da'i nai la termafyfè'i cu ca'o rùnme tai tu'a lo bùnre sàkta ca'u je'a bo lo kànla be dy cu cùsku— li'u» ni'o «lu xu do pu na djùno lo du'u lo djàcu cu fànmo mi —sei la termafyfè'i cu pànte je tolpà'a tònga rètsku— li'u» ni'o «lu li'a na go'i —sei la .dòrotis. cu spùsku— .i da'i ma pu ve djùno li'u»

ni'o «lu ba zi lo mèntu be li su'o mi mo'u rùnme .i je do po'o ba pònse lo badydì'u .i mi pu pàlci ze'a lo mi nunjì'e .i ku'i mi pu no roi jìnvi lo du'u lo cmàlu nìxli be mu'u do cu su'o roi ka'e rùmgau mi gi'e tolcfàgau lo mi pàlci nunzùkte .i .o'i mi co'a co'e li'u»

ni'o fau tu'a lo di'u vàlsi cu fàrlu lo lòldi fa la termafyfè'i ku poi bùnre je rùnme be ba'o je nonsèltai pèsxu zi'e noi prè.a lo jìnsa tànbo pe lo jupkù'a lòldi .i la .dòrotis. fau lo nu vìska lo nu ty ja'a ba'o rùnme ja'e lo no da cu cpàcu lo dràta bàktu be lo djàcu gi'e rènro lo nènri lo tolcnìci .i ba bo brulù'i càtke pa'o lo vòrme .i ba lo nu lèbna lo pa rìjno cùtci noi ro pa mei lo vilvì'u be fo lo tolcì'o nìnmu ku'o la .dòrotis. cu lùmci cy se pi'o lo bùkpu gi'e seldàsygau cy lo jàmfu .i ba ku dy fau lo nu ro mai zìfre lo ka zùkte lo se cùxna cu bàjra bàrkla fi lo selsrùstu te zu'e lo nu jùngau la cìnfo lo du'u la pàlci termafyfè'i pe la stìci cu ba'o tòlcfa .e lo du'u lo re mei cu co'u pìnfu bu'u lo fànge gùgde

ni'o ni'o pa ci mo'o lo nu nùrgau
	ni'o la tolvìrnu cìnfo cu mùtce lo ka se plùka lo ka junbì'o lo du'u la pàlci termafyfè'i ba'o se rùmgau se pi'o lo bàktu be lo djàcu .i je la .dòrotis. cu ba zi sai toltèlgau lo vrògai pe lo pifkù'a pe cy gi'e zìfygau cy .i lo re mei cu kansì'u lo ka nèrkla lo badydì'u noi bu'u ke'a pa moi lo se zùkte be la .dòrotis. fa lo ka klàcpe ro la .ŭìnkis. gi'e jùngau ŭy lo du'u ŭy co'u sèlfu
ni'o càrmi glèki fa lo pèlxu .ŭìnkis. .i ki'u bo ŭy pu jai se gàsnu fai lo ka nànca li so'i fa lo nu ce'u càrmi gùnka se va'u la pàlci termafyfè'i ku noi ke'a pu ro roi fàrtra ŭy lo ka kùsru .i ŭy jdìce lo du'u lo ca se dètri cu slàdei ca je ze'e kei gi'e jai xàksu lo tèmci fai lo ka sòrcti gi jo'u dànsu ni'o «lu .o'e nai va'o lo nu lo mi'o pèndo no'u la cpitèpygau .e la tìnci mùdypre cu kànsa mi'o zo'u: —sei la cìnfo cu cùsku— mi glèki mùtce li'u» ni'o «lu ru'a pei mi'o ka'e nùrgau lo re mei —sei lo nìxli cu xànka rètsku— li'u» ni'o «lu mi'o ka'e tròci —sei la cìnfo cu spùsku— li'u» ni'o ja'e bo klàcpe la pèlxu .ŭìnkis. gi'e rètsku fi ŭy fe lo se du'u xu kau ŭy djìca lo ka sìdju fi lo ka nùrgau lo pèndo .i je la .ŭìnkis. cu cùsku lo se du'u da'i ŭy glèki lo ka zùkte ro lo se kàkne se va'u la .dòrotis. ku noi pu gàsnu lo nu ŭy co'u sèlfu .i ja'e bo dy cùxna lo su'o .ŭìnkis. poi sìmlu fi dy fe lo ka tràji lo ka djùno xo kau da .i je lo ro da cu tòlsti lo ka klàma .i lìtru ca lo ca djèdi je ze'a pi su'o lo bavlà'i djèdi gi'e klàsti ca lo nu tolclìva lo jai bu'u vrèta be fai la tìnci mùdypre ku noi vrèta co se dàspo je kòrcu mùtce .i lo ka'àmru pe my cu zvàjbi .i ku'i lo bàlre cu furtìrse .i je lo bàtke cu pòrpi

ni'o la .ŭìnkis. cu toljùrsa làfti ty my se pi'o lo bìrka gi'e xrùbei ty my la pèlxu badydì'u fau lo nu la .dòrotis. cu klàku so'o kakydìrgo lo se vìska bètri pe lo dìrba pèndo kei .e lo nu la cìnfo cu mùtce lo ka kècti .i ca lo nu lo ro da cu tolclìva la badydì'u kei la .dòrotis. cu cùsku fi la .uìnkis.:
ni'o «lu xu su'o lo do se gùgde cu tìncyzba li'u» ni'o «lu go'i .i su'o mi'a cèrtu mùtce tìncyzba —sei ŭy fi dy jùngau— li'u» ni'o «lu ja'o ko klagì'a ty mi —sei dy cùsku— li'u» .i ca lo nu lo tìncyzba cu klàma fau lo nu bèvri ro lo tùtci pe ty kei dy rètsku «lu xu do kàkne lo ka vìmcu lo kèvna la tìnci mùdypre gi'e krògau ri ja'e lo nu di'a dràni se tàrmi kei gi'e jinjòngau lo spòfu pàgbu li'u»

ni'o lo tìncyzba cu mùtce mèrli la mùdypre gi'e ba bo spùsku lo se du'u ty jìnvi lo du'u ty kàkne lo ka cìkre my ja'e lo nu tcìni du'i lo nu no'a ca lo pùrci .i ja'e bo ty co'a gùnka bu'u pa lo bàrda ke pèlxu kùmfa be lo badydì'u gi'e gùnka ze'a lo ci dònri jo'u lo vo nìcte fau lo nu mrùpli gi'e tòngau gi'e krògau gi'e jinjòngau gi'e spàli gi'e dàrxi vau lo tùple .e lo xàdni .e lo stèdu be la tìnci mùdypre co'u lo nu ca lo fànmo ge ty my sìrji du'i lo nu pu no'a gi lo cìdni cu di'a pràne tolpò'u .i ju'o so'i da vabyfìcfoi ty my .i ku'i lo tìncyzba pu xàmgu gùnka .i je la mùdypre ki'u lo nu ri na sèzyjgi cu na sai se nàbmi lo vabyfìcfoi

ni'o ca lo nu ro mai my nerdzùkla lo kùmfa pe la .dòrotis. gi'e kìrsku dy lo ka nùrgau my .i my tai glèki gi'e ja'e bo klàku lo glèki kakydìrgo .i je la .dòrotis. cu bìlga lo ka te zu'e lo nu lo cìdni na furtirbì'o cu racyjù'i vìmcu ro lo kakydìrgo lo flìra .i ca lo mìntu lo dy. sèvzi kakydìrgo cu ròtsu je sùtra fàrlu ri'a lo nu glèki lo nu za'u re'u pènmi lo slàbu pèndo .i je lo vi kakydìrgo cu na jai se nìtcu fai lo ka vìmcu .i la cìnfo zo'u: cy tai so'i roi sàtre lo kànla be cy. se pi'o lo jìpno be lo rèbla ja'e lo nu bìnxo lo ka cìlmo mùtce kei .e lo nu cy. bìlga lo ka bàrtu klàma lo selsrùstu gi'e zvàgau ry lo solgù'i co'u lo nu sudbì'o ni'o «lu .o'e nai va'o lo nu da'i mi'o di'a tòlcau la cpitèpygau kei —sei la tìnci mùdypre cu cùsku be ca lo nu la .dòrotis. ba'o mo'u jùngau my fo ro lo ba'o fàsnu— mi mùtce lo ka glèki li'u» ni'o «lu mi'o bìlga lo ka tòlcri cy —sei lo nìxli cu cùsku— li'u» ni'o ja'e bo ny cu klàcpe la .ŭìnkis. gi'e cpèdu lo ka sìdju ny .i lo ro mei cu càdzu ze'a pi ro lo ca djèdi su'i pi su'o lo bavlà'i .i co'u bo tolclìva lo bi'u nai gàltu trìcu poi la selnà'i smàni pu rènro lo tàxfu pe la cpitèpygau lo jìmca be ke'a ni'o gàltu mùtce trìcu .i je lo stàni cu tai xùtla ja'e lo nu no da ka'e cpàre .i ku'i la mùdypre cu cùsku «lu mi ta ba kàtna .i ja ba bo mi'o ka'e cpàcu lo tàxfu pe la cpitèpygau li'u» ni'o pu ca lo nu lo tìncyzba cu ca'o gùnka lo ka cìkre lo du be la mùdypre kei kei pa dràta .ŭìnkis. noi slòzba cu zbàsu lo ka'àmru jàitci poi slìgu lo sòlji ku'o gi'e màtgau fi lo ka'àmru pe la mùdypre fe jy noi bàsti lo làldo ke spòfu jàitci .i su'o dràta cu spàli lo bàlre co'u lo nu ro lo furtìrse cu ba'o se vìmcu .e lo nu camgù'i tai tu'a lo se spàli rìjno ni'o ca sai lo nu ty my mo'u tàvla kei la tìnci mùdypre cu tòlsti lo ka kàtna .i je ba za lo cmàlu lo trìcu cu fàrlu fau lo nu clàdu sàvru noi ba ke'a lo tàxfu pe la cpitèpygau cu fàrlu fi lo jìmca gi'e gùnro lo lòldi

ni'o la .dòrotis. cu làfti ty gi'e gàsnu lo nu la .ŭìnkis. cu xrùgau bèvri ty lo noldì'u noi bu'u ke'a ty tersè'a lo zàbna je jìnsa sudysràsu .i je ŭa za'a zvàti fa la cpitèpygau fau lo nu sìmsa lo pùrci tàrmi gi'e za'u re'u je za'u re'u kìrsku fi lo ka nùrgau cy

ni'o ca ku fau lo nu refkansì'u kei la .dòrotis. .e lo ri pèndo cu xàksu lo so'o glèki djèdi bu'u la pèlxu badydì'u ku noi bu'u ke'a tòlcri ro da poi nìtcu ke'a lo ka kùfra ni'o ku'i ca pa lo djèdi lo nìxli cu pènsi la fetfàmti .em. gi'e cùsku «lu mi'o nìtcu lo ka xrùti la .oz. gi'e cpàcu lo mi'o se nùpre li'u» ni'o «lu go'i —sei la mùdypre cu cùsku— .i ŭo mi ba cpàcu lo mi rìsna li'u» ni'o «lu si'a mi ba cpàcu lo mi bèsna —sei la cpitèpygau cu glèki jmìna— li'u» ni'o «lu si'a mi ba cpàcu lo mi kamvìrnu —sei la cìnfo cu pènsi cùsku— li'u» ni'o «lu si'a mi ba xrùti la .kànzas. —sei la .dòrotis. cu krìxa be fau lo nu jalsìmgau lo xànce— .i .e'e mi'o ca lo bavlàmdei cu tòlsti lo ka co'e fa'a la ri'òjme tcàdu li'u» ni'o la'e di'u jai se jdìce fai lo ka zùkte .i ca lo bavlà'i djèdi cu klàcpe la .ŭìnkis. gi'e tolrìnsa ŭy .i la .ŭìnkis. cu bàdri lo nu lo dràta cu clìva .i je ŭy pu bìnxo lo ka tai nèlci la tìnci mùdypre kei ja'e lo nu pìkci ty my lo ka stàli gi'e tùrni ŭy .e la pèlxu gùgde pe la stìci .i la .ŭìnkis. ca lo nu sajbì'o lo du'u lo dràta cu djìtsa lo ka clìva cu dùnda .i je la .tòtos. gi la cìnfo pa sòlji djìne .i je fi la .dòrotis. cu dùnda fa ŭy lo mèlbi birjà'i poi cpàna fa lo tàbjme .i je fi la cpitèpygau cu dùnda lo sòlji jìpno ke càdzu gràna te zu'e lo nu fànta lo nu cy. fàrlu .i je fi la tìnci mùdypre cu frìti lo rìjno ctilylànte noi lo sòlji cu pàgbu zi'e poi lo dìrba jèmna cu cpàna ni'o ro lo lìtru se va'u la .ŭìnkis. cu cùsku lo mèlbi .i je lo ro mei cu xanjaisì'u co'u lo nu còrtu lo bìrka ni'o la .dòrotis. cu klàma lo kajnytà'e pe la termafyfè'i te zu'e lo nu clùgau lo lànka lo cìdja te zu'e tu'a lo nunlì'u .i je ca ku dy vìska lo sòlji màpku .i dy. tròci lo ka stèdu dàsni my kei gi'e fàcki lo du'u pràne màpti .i dy na djùno su'o da pe lo màkfa pe la sòlji màpku .i ku'i dy. vìska lo nu my. mèlbi .i ja'e bo dy. zu'èjdi lo ka dàsni my gi'e bèvri lo solmàpku fau lo nu ri nènri lo lànka pe dy ni'o ba ku fau lo nu brèdi tu'a lo nunlì'u kei lo ro mei cu tòlsti tu'a la ri'òjme tcàdu .i je la .ŭìnkis. cu ci roi tolrìnsa gi'e cùsku so'i jai te xèndo poi lo go'i ka'e pènsi ke'a ca lo nu lìtru

ni'o ni'o pa vo mo'o la selnà'i smàni
ni'o ju'o do mòrji lo du'u zàsti fa no klàji (to je nai ji'a sai lo càdzu plùta toi) bu'u lo bàdydi'u pe la pàlci termafyfè'i ge'u bi'i la ri'òjme tcàdu .i ca lo nu lo vo lìtru cu ca'o klàma co sìsku la termafyfè'i kei ty cu vìska lo nu ly cu klàma kei gi'e ja'e bo mìnde fi la selnà'i smàni fe lo ka klàma gi'e zvàgau ly boi ty .i fi ly nàdmau zei mùtce fa lo ka fàcki lo du'u ve ka'a ma kau xrùkla pàgre lo bàrda fòldi be lo matnyxrùla jo'u lo pèlxu sparbèli kei kei lo ka se bèvri .i ly djùno li'a lo du'u bìlga lo ka sìrji klàma lo stùna fa'a lo galzè'a sòlri .i je ly tòlsti fau lo nu klàma lo dràni fàrna .i ku'i ca lo dormìdju ca lo nu lo sòlri cu gàpru lo stèdu be ly kei ly na djùno lo du'u ma kau fa'u ma kau stùna fa'u stìci .i je la'e di'u krìnu lo nu fàrcri bu'u lo bàrda fòldi .i ku'i ly stòdi lo ka càdzu .i je ca lo nìcte lo lùnra cu tolcànci gi'e càrmi te gùsni .i ja'e bo ly zùkte vrebì'o lo jbìni be lo tìtla se pànci ke pèlxu xrùla gi'e còndi sìpna co'u lo cèrni .i sa'e go'i fa ro boi ly po'u na'e bo la cpitèpygau ja la tìnci mùdypre
ni'o ca lo bavlà'i cèrni lo sòlri cu trìxe lo dìlnu .i ku'i co'a klàma tai lo nu mùtce lo ka bìrti lo du'u klàma fa'a ma kau ni'o «lu va'o lo nu lo jai ve'a càdzu cu bànzu zo'u: —sei la .dòrotis. cu cùsku se'u— ju'o mi'o ca da tolclìva su'o stùzi li'u» ni'o ku'i so'o djèdi cu prubì'o .i je lo bi'u nai lìtru cu za'o vìska no da poi cràne ly gi'e na me lo camxù'e fòldi .i la cpitèpygau cu co'a fegmlibà'u mìlxe

ni'o «lu ju'o mi'o ba'o màlkla —sei cy cùsku— .i je va'o lo nu na ku lo ni clìra fa lo nu mi'o tolclìva la ri'òjme tcàdu cu bànzu zo'u: mi ba no roi cpàcu lo mi bèsna li'u» ni'o «lu si'a na ku mi lo mi rìsna —sei la tìnci mùdypre cu xùsra cùsku— .i si'au mi ja'a ru'e ka'e dènpa lo nu pènmi la .oz. .i je ju'o ru'e do mi tùgni lo du'u clàni mùtce nu lìtru li'u» ni'o «lu .oi —sei la tolvìrnu cìnfo cu pàtcmo cùsku be fau lo nu pa roi cròcmo— .i mi na vìrnu be'au lo nu ze'e càdzu se cau lo nu tolclìva ba'e su'o da li'u»

ni'o ca ku la .dòrotis. cu cìrko lo ka pàcna .i dy tsebì'o lo sràsu gi'e càtlu lo ra kànsa .i je ky cu tsebì'o gi jje càtlu dy .i je la .tòtos. cu cìnmo lo ka pa re'u lo ri nunjì'e cu dùkse lo ka tàtpi kei lo nu jèrsi lo tòldi poi ca vòfli lampàgre lo vo'a stèdu .i ja'e bo ty cu bàrgau lo tànxe gi'e gervà'u gi'e càtlu la .dòrotis. tai lo nu djìca lo nu rètsku fi dy fe lo du'u .ei lo ro da ca zùkte ma kau ni'o «lu da'i mi'o klàcpe lo tumsmàcu —sei dy stìdi— .i la'a ty kàkne lo ka jùngau mi'o lo du'u ma kau plùta la ri'òjme tcàdu li'u» ni'o «lu ju'o sai kàkne —sei la cpitèpygau cu krìxa .i ki'u ma mi'o na pènsi la'e di'u pu ku li'u» ni'o la .dòrotis. cu bifcà'e lo cmàlu sìltcu poi dy. pu ro roi dàsni fau lo nu dàndu lo cnèbo kei co'a lo nu la noltrunì'u be la smàcu pu dùnda sy. boi dy. .i ba zi lo mèntu be li so'o cu tìrna lo tapsàta be tu'a lo cmàlu jàmfu .i je so'i lo cmàlu ke grùsi smàcu cu bàjra jbibì'o dy .i me lo go'i fa lo du be la noltrunì'u ku noi torbratò'a ke cmàlu vòksa rètsku: ni'o «lu da'i mi sìdju lo mi pèndo ta'i ma li'u» ni'o «lu mi'a pu màlkla —sei la .dòrotis. cu cùsku— .i xu do kàkne lo ka jùngau mi'a lo du'u ma kau stùzi la ri'òjme tcàdu li'u» ni'o «lu ju'o —sei la noltrunì'u cu spùsku— .i ku'i dàrno mìlxe .i ki'u bo do pu ze'a lo mùlno cu se trìxe ry ty li'u» .i ba bo my cu sajbì'o a sòlji màpku ku pe la .dòrotis. gi'e cùsku «lu mu'i ma na ku do pìlno lo màkfa pe la màpku gi'e klàcpe la selnà'i smàni .i da'i sy sy do bèvri la tcàdu pe la .oz. ze'a lo càcra be li me'i pa li'u» ni'o «lu mi pu na djùno lo du'u màkfa —sei la .dòrotis. fau lo nu se spàji cu spùsku— .i màkfa rìnka ma li'u» ni'o «lu se cìska fi lo nènri be la sòlji màpku —sei la noltrunì'u be la smàcu cu spùsku— .i ku'i va'o lo nu do ba klàcpe la selnà'i smàni kei mi'a nìtcu lo nu to'o bàjra .i mu'i bo sy sy kùsru mùtce gi'e jìnvi lo du'u zdìle fa lo nu kùsru mi'a li'u» ni'o «lu xu sy mi na ba crògau —sei lo nìxli cu xànka rètsku— li'u» ni'o na go'i .i sy bìlga lo ka tìnbe fi lo dàsni be la màpku .i co'o li'u» .i je ny cu to'o klàma co nalselvì'a bìnxo fau lo nu ro lo smàcu cu jèrsi ni'o la .dòrotis. cu càtlu lo nènri be la sòlji màpku gi'e vìska lo so'u vàlsi poi se cìska fi lo nènri kòrbi .i «lu ti —sei dy pènsi— cu ru'a màkfa rìnka vàlsi li'u» .i mu'i ku dy. racyjù'i tcìdu lo ctusèlsku gi'e pùnji la màpku lo stèdu be dy. ni'o zoi «lu. Ep-pe, pep-pe, kak-ke! .lu» —sei dy fau lo nu sànli lo zùnle jàmfu cu cùsku— ni'o «lu do ma pu cùsku —sei la cpitèpygau ku noi na djùno lo du'u dy mo kau cu rètsku li'u» ni'o zoi «lu. Hil-lo, hol-lo, hel-lo! .lu» —sei la .dòrotis. fau lo nu ca lo ca krèfu cu sànli lo prìtu jàmfu cu di'a co'e— ni'o «lu coi —sei la tìnci mùdypre cu smàcni spùda— li'u» ni'o zoi «lu Ziz-zy, zuz-zy, zik! .lu» —sei la .dòrotis. ku noi ca sànli lo re jàmfu cu cùsku— .i la'e di'u se fànmo lo màkfa sèlsku .i tìrna lo clàdu nuntà'a je nu nàlci mùvdu kei fau lo nu lo bènde be la selnà'i smàni cu fa'a ga'u vòikla lo dràta

ni'o la nolràitru cu dìzlo krobì'o ca'u la .dòrotis. gi'e rètsku «lu do mi'a ma mìnde li'u» ni'o «lu mi'a djìca lo ka klàma la ri'òjme tcàdu kei —sei lo vèrba cu cùsku— gi'e fàrcri li'u»
ni'o «lu mi'a do'o ba bèvri —sei la nolràitru cu spùsku— li'u» .i ca sai lo nu ny cu mo'u tàvla kei je la smàni cu jairbì'o la .dòrotis. lo bìrka gi'e to'o vòfli to'e se cau dy .i lo dràta cu lèbna la cpitèpygau .e la mùdypre .e la cinfo .i je lo pa cmàlu me la smàni cu jairbì'o la .tòtos. gi'e vòfli jèrsi lo dràta vau to'e ki'u nai lo nu lo gèrku cu mùtce lo ka tròci lo ka bàtci cy

ni'o la cpitèpygau .e la tìnci mùdypre ca lo cfàri cu tcèmli lo ka tèrpa .i ki'u bo mòrji lo li'i la selnà'i smàni pu xlàli fàrtra vo'a .i ku'i lo go'i cu gànse lo du'u na djìca lo nu xràni kei gi'e ja'e bo glèki mùtce tsèkla pa'o lo vàcri gi'e pùkfri lo ka càtlu lo mèlbi pùrdi .e lo mèlbi rìcfoi vu'o poi dàrno cnìta ni'o la .dòrotis. cu kùfra lo ka tsèkla bu'u lo jbìni be lo re me lo bràrai be la smàni be'o noi pa ke'a me la nolràitru .i sy pu zbàsu lo stìzu lo xànce be sy. gi'e racyjù'i lo ka na crògau dy ni'o «lu ki'u ma do'o bìlga lo ka tìnbe fi lo màkfa pe la sòlji màpku —sei dy rètsku— li'u» ni'o «lu clàni lìsri —sei la nolràitru fau lo nu nàlci cmìla cu spùsku— .i ku'i mi ki'u lo nu ma'a pu'o ze'u lìtru cu .ai jai xàksu lo tèmci fai lo ka lìsysku la'e di'u (to va'o lo nu do djìca toi) li'u»

ni'o «lu da'i mi ba glèki lo ka tìrna —sei dy spùsku— li'u» ni'o «lu ni'o pu zu ku —sei lo jàtna cu co'a tàvla— mi'a zìfre prènu gi'e glèki xàbju lo bàrda rìcfoi fau lo nu mi'a vòikla lo pa trìcu lo dràta gi'e cìtka lo nàrge .e lo grùte gi'e zùkte fi lo se djìca be mi'a se cau lo nu da selsè'u mi'a .i ju'o cu'i su'o mi'a su'o roi dùkse lo ka ra'ùtra kei fau lo nu fa'a ni'a vòfli te zu'e lo nu làcpu lo rèbla be lo dànlu poi na se nàlci kei .e lo nu jèrsi lo cìpni .e lo nu rènro lo nàrge lo prènu poi càdzu ne'i lo rìcfoi .i ku'i mi'a nonselrà'u gi'e glèki gi'e mùlno lo ka sèlzdi kei gi'e selpù'a ro mèntu pe lo djèdi .i la'e di'u cabysèltei lo nànca be li so'i gi'e sèltei lo bàrda lo nu la .oz. cu bàrkla lo dìlnu te zu'e lo nu tùrni lo vi gùgde ni'o pu zu vi ku xàbju lo dàrno bèrti fa lo mèlbi noltrutì'u noi ke'a ke ji'a vlìpa te màkfa .i ro lo ri màkfa cu se pìlno fi lo ka sìdju lo prènu .i je ra no roi jai se djùno fai lo ka xràni da poi vrùde .i cmène ra fa zo .geilèt. .i xàbju lo mèlbi noldì'u poi zìlzba lo bàrda blìku be lo zirxùnjme .i ro da pràmi gy .i ku'i tràji lo ka gy. bàdri ce'u kei fa lo nu gy. ki'u lo nu ro lo nànmu cu dùkse lo ka bèbna gi'e to'èmle kei lo ka glètu lo nìnmu poi tai mèlbi gi'e tai prìje cu na kàkne lo ka tòlcri su'o da poi gy. ke'a ka'e pràmi .i ro mai ku'i gy. tòlcri lo nànla poi ke'a mèlbi je nànmu je prìje zmàdu lo na'àzma be ke'a .i la .geilèt. cu jdìce lo du'u gy. ca lo nu ny. ma'ùrnau cu gàsnu lo nu ny. spèni gy .i ja'e bo gy. zvàgau ny lo gy. noldì'u gi'e pìlno ro lo màkfa se kàkne lo ka gàsnu lo nu ny. tsàli gi'e vrùde gi'e kùkte ja'e lo nu da'i no nìnmu ka'e djìca lo zmàdu .i ca lo nu bànro lo màkcu kei la .kuelàlas. noi bi'u cmène ke'a cu jai se jìnvi fai lo ka xàgrai je pìjrai nànmu te rai lo ro se gùgde .i je lo ni ky. nànmu mèlbi cu tai bàrda ja'e lo nu la .geilèt. cu se dìrba pràmi ky gi'e sutyzù'e lo ka gàsnu lo nu ro da brèdi tu'a lo specfarì'i

ni'o lo mi rirpà'u cu nolràitru la selnà'i smàni ku noi xàbju lo rìcfoi poi jìbni lo noldì'u pe la .geilèt. .i je lo bi'u nai tolcì'o cu zmànei lo xàmgu xamsèlsku lo xàmgu vàcysai .i ca pa djèdi zi pu lo specfarì'i lo mi rirpà'u cu vòfli lìtru fi'o kànsa lo bènde .i ca bo ry. vìska lo nu la .kuelàlas. cu càdzu re'o lo rìrxe .i ky dàsni lo rìfcu tàxfu co xunblàbi joi zìrpu demsìlka .i je lo mi rirpà'u cu zùkpei lo ka tròci da .i co'a tu'a lo vàlsi pe ry lo bènde cu fa'a ni'a vòfli gi'e jàirbi'o la .kuelàlas. gi'e bèvri ri lo bìrka co'u lo nu zvàti lo gàpru be lo mìdju be lo rìrxe kei gi'e fàlgau ky lo djàcu ni'o «lu ko lìmkla lo bàrtu doi pe mi xàmgu nànmu —sei lo mi rirpà'u cu krìxa— gi'e fàcki lo du'u xu kau lo djàcu cu jai rìnka lo nu lo do tàxfu cu se bàrna li'u» .i la .kuelàlas. cu dùkse lo ka prìje kei lo ka na lìmna .i je lo nu ky. rìcfu cu na sai se jàlge lo nu ky. na'e vrùde .i ky. cmìla ca lo nu tolylì'a lo gàpru be lo djàcu kei gi'e lìmkla lo ri'èrkoi .i ku'i la .geilèt. ca lo nu klàma lo bàrtu ju'e ky cu fàcki lo du'u ro lo sìlka je ro lo dimsìlka pu se dàspo lo rìrxe

ni'o lo noltrutì'u cu fèngu .i je ri djùno li'a lo du'u ma kau pu gàsnu .i ny gàsnu lo nu ro la selnà'i smàni cu zvàti lo cràne be ny .i je ny. pa moi cùsku lo se du'u djìca lo nu lo nàlci be sy sy cu se ciljonsìmgau .e lo nu sy se fàrtra du'i lo nu sy pu no'a la .kuelàlas. kei gi'e se fàlgau fi lo rìrxe .i ku'i lo mi rirpà'u cu mùtce lo ka pìkci .i ki'u bo ry. djùno lo du'u la smàni va'o lo nu lo nàlci cu ciljonsì'u cu jaurvàsmro ne'i lo rìrxe .i je ji'a la .kuelàlas. cu cùsku da poi xèndo sy .i ja'e bo la .geilèt. cu ro mai cùrmi lo nu sy na se xràni kei lo nu ba ku la smàni cu bìlga lo ka ci roi tìnbe lo se mìnde be lo dàsni be la sòlji màpku .i lo bi'u nai màpku pu se zbàsu te zu'e lo nu my. specfarì'i seldù'a fi la .kuelàlas. .i je my jai se krìci fai lo ka se jdìma lo xàdba be lo noltùtra .i li'a lo mi rirpà'u je ro lo dràta smàni cu ba zi sai tùgni fi lo se bìlga .i je la'e di'u se jàlge lo nu ro da poi pònse la sòlji màpku zo'u: mi'a ci roi sèlfu da .i ju da mo kau li'u» ni'o «lu ma jàlge tu'a lo re mei —sei la .dòrotis. ku noi pu mùtce lo ka se cìnri lo lìsri cu rètsku— li'u» ni'o «lu la .kuelàlas. ki'u lo nu ri pa moi lo pònse be lo sòlji màpku —sei la smàni cu spùsku— cu pa moi lo mìnde be mi'a bei lo se djìca be ky .i ky ki'u lo nu lo spèni be ky cu na kàkne lo ka jdàri lo jvìnu be mi'a cu klamì'e mi'a ky noi zvàti lo rìcfoi kei ba lo nu spebì'o kei gi'e mìnde mi'a lo ka ro roi zvàti da poi lo spèni be ky na ka'e vìska su'o la selnà'i smàni kei noi mi'a pu glèki lo ka tìnbe ke'a kei ki'u lo nu ro mi'a pu tèrpa sy ni'o la'e di'u ro mei lo mi'a se bìlga co'u lo nu la sòlji màpku cu jai fàsnu fai lo ka zvabì'o lo xànce be la pàlci termafyfè'i pe la stìci ku noi gàsnu lo nu mi'a sèfygau la .ŭìnkis. gi'e ba bo li'àrgau lo du be la .oz. la gùgde pe la stìci .i ca ku la sòlji màpku cu me do moi .i je ci roi ku do se kràli lo ka gàsnu lo nu mi'a tìnbe lo se djìca be do li'u»

ni'o ca lo nu la smàni nolràitru cu mo'u lìsysku kei la .dòrotis. cu fa'a ni'a càtlu gi'e vìska lo crìno je gùsycai bìtmu pe la ri'òjme tcàdu ku noi cràne .i dy se spàji lo sùtra nu vòfli pe la smàni gi'e ku'i glèki lo nu lo nunlì'u cu mùlno .i lo cìzra dànlu cu toljùrsa pùnji lo lìtru lo cràne be lo bàlvro pe la tcàdu .i je la nolràitru cu dìzlo krobì'o fa'a la .dòrotis. gi'e ba bo to'o sùtra vòfli fau lo nu pi ro lo ri bènde cu jèrsi

ni'o «lu xàmgu nu tsèkla —sei lo cmàlu nìxli cu cùsku— li'u» ni'o «lu ĭe .i ji'a sùtra tàdji lo nu rìvbi lo mi'o ràktu —sei la cìnfo cu spùsku— .i zanfù'a mùtce fa lo nu do pu lèbna lo va se mànci màpku li'u»

ni'o ni'o pa mu mo'o lo nu fàcki fi la .oz. no'u la xlàtce
	ni'o lo vo lìtru cu càdzu klàma lo bàrda vrògai pe la ri'òjme tcàdu gi'e selsnàgau lo jànbe .i ba lo nu so'i roi selsnàgau cu se kàrgau lo mìntu bàdypre pe lo vrògai be'o poi ly ke'a pu pa roi pènmi ni'o «lu ŭe sai .i xu do ba'o xrùti —sei by fau lo nu se spàji cu rètsku— li'u» ni'o «lu xu do mi'a na vìska —sei la cpitèpygau cu spùsku— li'u» ni'o «lu ku'i mi pu jìnvi lo du'u do pu klàma gi'e vìtke la pàlci termafyfè'i pe la stìci li'u» ni'o «lu mi'a ty pu ja'a vìtke —sei la cpitèpygau cu cùsku— li'u» ni'o «lu .i je ty pu cùrmi lo nu do clìva xu —sei lo nànmu cu mànci rètsku— li'u»
ni'o «lu ty pu na ka'e fànta .i ki'u bo ty cu rùmne —sei la cpitèpygau cu cìksi— li'u» ni'o «lu rùmne ŭe .i la'e di'u xàmgu nùzba ja'a ku —sei lo nànmu cu cùsku—.i ma ty pu rùmgau li'u» ni'o «lu la .dòrotis. cu go'i —sei la cìnfo cu jùnri cùsku— li'u» ni'o «lu ŭe sai —sei lo nànmu cu krìxa— li'u» .i je ny cu dìzlo mùtce krobì'o ca'u dy ni'o ba bo ny lo dràta cu klagì'a lo vo'a cmàlu kùmfa gi'e stèla jòngau lo vìstci lo kànla pe ro lo dràta du'i lo nu ny cu no'a ca lo prulà'i .i ba bo lo vo da pàgre lo vòrme be la ri'òjme tcàdu .i ca lo nu lo prènu cu se jùngau la bàdypre be lo vrògai lo du'u la .dòrotis. pu rùmgau la pàlci termafyfè'i pe la stìci kei ro boi py jmàji lo srùri be lo lìtru gi'e jèrsi ly fau lo nu bàrda pregùnma kei fa'a la noldì'u pe la .oz. ni'o lo sònci pe lo crìno zbìkre cu za'o bàndu sànli ca'u lo vòrme .i ku'i sy ba zi nerklàcru ly .i e ly cu za'u re'u se pènmi lo mèlbi ke crìno nìxli noi ba zi klagì'a ro boi ly lo kùmfa pe ly te zu'e lo nu ly cu ka'e sùrla co'u lo nu la bànli .oz. cu brèdi lo nu se pènmi ly ni'o lo sònci cu gàsnu lo nu la .oz. cu ba zi se jùngau fi lo nùzba poi du'u la .dòrotis. .e lo dràta lìtru pu xrùti ba lo nu dàspo la pàlci termafyfè'i .i ku'i la .oz. spùda fi no da .i ly kànpe lo nu la bànli te màkfa cu ba zi cpàgau ly .i ku'i .obu na co'e .i ly te cùsku no vàlsi pe la .oz. ca lo bavlà'i djèdi .a lo bavlà'i .a lo bavlà'i .i lo nu dènpa cu ta'inrì'a gi'e tòlzdi .i je ro mai ly bìnxo lo ka fèngu lo du'u la .oz. ba lo nu .obu gàsnu lo nu ly. lìfri lo nadytcìni .e lo ka sèlfu cu tai xlàli fàrtra ly .i se ki'u bo la cpitèpygau cu ro mai cpèdu fi lo crìno nìxli fe lo ka bèvri fi la .oz. fe lo dràta nòtci poi se du'u ly. va'o lo nu .obu na ba zi sai cùrmi lo nu ly. nèrkla gi'e vìska .obu cu klamì'e la selnà'i smàni gi'e mìnde sy lo ka sìdju ly kei gi'e fàcki lo du'u xu kau .obu gàsnu lo se nùpre .i la te màkfa ca lo nu te dùnda lo bi'u nai nòtci cu tai tèrpa ja'e lo nu .obu notybè'i fi ly fe lo se du'u .e'a klàma la nolstìzu kùmfa ca lo bavlà'i cèrni ti'u li so pi'e vo .i .obu pu pa roi pènmi la selnà'i smàni bu'u la gùgde pe la stìci .i je .obu na djìca lo nu za'u re'u pènmi ni'o lo vo lìtru cu lìfri lo nunsìpna clàxu nìcte fau lo nu ro da pènsi lo seldù'a poi la .oz. pu nùpre lo nu dùnda ke'a da .i la .dòrotis. pu sipybì'o pa po'o roi .i je dy ca la'e di'u cu sènva lo nu dy cu zvàti la .kànzas. ku noi bu'u ke'a la fetfàmti .em. dy jùngau lo du'u tai ma kau glèki lo nu lo .ebu cmàlu nìxli cu di'a zdàzva ni'o ca lo se tcìka be li so ca lo bavlà'i cèrni lo crìno se zbìkre sònci cu klàma ly .i je ba za lo mèntu be li vo lo ro da nèrkla la nolstìzu kùmfa pe la .oz. ni'o li'a ro boi ly kànpe lo nu vìska la .oz. ku pe lo tàrmi poi .obu ke'a pu pa re'u se tàrmi .i je ro boi ly mùtce lo ka se spàji kei ca lo nu ru'u càtlu gi'e vìska no sai prènu poi nènri lo kùmfa .i stàli lo jìbni be lo vòrme gi'e sìmxu lo ka zmàdu jìbni .i mu'i bo lo nunsmàji pe lo kùnti kùmfa cu zmàdu ro lo tàrmi be la .oz. lo ka màbla

ni'o ca'o ku lo vìtke cu tìrna lo sàlci tònga vòksa noi sìmlu lo ka se kràsi lo jìbni be lo galràipau be lo bàrda kùmfa zi'e noi cùsku ni'o «lu mi'e .oz. no'u la bànli je xlàtce .i mu'i ma do mi sìsku li'u» ni'o lo lìtru cu za'u re'u sìsku càtlu ro pàgbu be lo kùmfa .i je ba bo la .dòrotis. fau lo nu vìska no prènu cu rètsku «lu do ma zvàti li'u»

ni'o «lu mi ro da zvàti —sei la vòksa cu spùsku— .i ku'i mi nonseljì'u lo kànla be lo fàdni mrokà'e .i mi ca ba tsebì'o lo mi nolstìzu te zu'e lo nu do mi ka'e tàvla li'u» .i je'u la vòksa cu sìmlu lo ka ca se kràsi lo nolstìzu .i se mu'i bo lo dràta cu càdzu fa'a ny .i ca bo la .dòrotis. cu cùsku ni'o «lu mi'a pu klàma te zu'e lo nu do gàsnu lo mi'a se nùpre be do doi .oz. li'u» ni'o «lu ma se nùpre —sei la .oz. cu rètsku— li'u» ni'o «lu do pu nùpre lo nu bènji mi la .kànzas. ca lo nu la pàlci termafyfè'i ba'o se dàspo —sei lo nìxli cu cùsku— li'u» ni'o «lu ji'a do pu nùpre lo nu dùnda lo bèsna mi —sei la cpitèpygau cu cùsku— li'u» ni'o «lu ji'a do pu nùpre lo nu dùnda lo rìsna mi —sei la tìnci mùdypre cu cùsku— li'u» ni'o «lu ji'a do pu nùpre lo nu dùnda lo kamvìrnu mi —sei la tolvìrnu cìnfo cu cùsku— li'u» ni'o «lu xu la pàlci termafyfè'i cu ja'a ba'o se dàspo —sei la vòksa cu rètsku— li'u» .i je la .dòrotis. cu te sìmlu fi vy fe lo ka dèsku mìlxe ni'o «lu go'i —sei dy spùsku— .i mi ty pu rùmgau se pi'o lo bàktu be lo djàcu li'u» ni'o «lu ŭe sai —sei la vòksa cu cùsku— .i sùksa mùtce .i .i'a ko mi klàma ca lo bavlàmdei .i ki'u bo mi nìtcu lo tèmci lo nu pènsi li'u» ni'o «lu do ba'o kàkne lo ka ze'u pènsi —sei la tìnci mùdypre cu fèngu cu cùsku— li'u» ni'o «lu .ai mi'a na dènpa ze'a lo se jmìna djèdi —sei la cpitèpygau cu cùsku— li'u» ni'o «lu do bìlga lo ka gàsnu lo do se nùpre be fi mi'a —sei la .dòrotis. cu bàsna cùsku— li'u» ni'o la cìnfo cu jìnvi lo du'u xàmgu fa lo nu fèpygau la te màkfa .i se mu'i bo cy cu cmòni lo bàrda je clàdu sèlcmo noi tai tsàli je màbla ku'o ja'e lo nu la .tòtos. cu to'o plìpe fau lo nu tèrpa càrmi kei gi'e fàlgau lo sepybì'u poi zvàti pa lo kòjna .i ca lo nu by fàrlu fau lo nu màxyvru kei kei lo ro da cu fa'a càtlu .i je ca lo bavlà'i mòkca ro lo ro da cu mùlno lo ka mànci .i ki'u bo vìska lo nu zvàti je'a lo mòkca poi lo sepybì'u pu mìpri ke'a ku'o fa lo cmàlu ke tolcì'o nànmu noi sedykrècau zi'e noi lo flìra be ke'a cu se cìnje zi'e noi sìmlu lo ka dùnli lo dràta lo ka ma kau ni ce'u se spàji .i la tìnci mùdypre fau lo nu gàlgau lo ri ka'àmru cu bàjra fa'a lo cmàlu nànmu gi'e krìxa «lu do du ma li'u»

ni'o «lu mi'e .oz. no'u la bànli je xlàtce —sei lo cmàlu nànmu cu dèsku vòksa cùsku— .i ku'i ko mi na dàrxi .i .e'o do na go'i .i se va'o bo mi ba zùkte ro lo do se djìca li'u» ni'o lo ma'a pèndo cu càtlu ny fau lo nu se spàge'i'e xànka

ni'o «lu mi pu jìnvi lo du'u la .oz. cu bàrda stèdu —sei la .dòrotis. cu cùsku— li'u» ni'o «lu si'a mi pu jìnvi lo du'u la .oz. cu kùkte nìnmu —sei la cpitèpygau cu cùsku— li'u» ni'o «lu si'a mi pu jìnvi lo du'u la .oz. cu xlàtce dànlu —sei la tìnci mùdypre cu cùsku— li'u» ni'o «lu si'a mi pu jìnvi lo du'u la .oz. cu bòlci lo fàgri —sei la cìnfo cu cùsku— li'u» ni'o «lu na go'i .i ro do tòldra —sei lo cmàlu nànmu cu rùble cùsku— .i mi pu tcìca li'u» ni'o «lu ŭe tcìca —sei la .dòrotis. cu krìxa— .i xu do na bànli te màkfa li'u» ni'o «lu .e'o do smàji doi dìrba —sei .obu cùsku— .i ko na tai clàdu cùsku .i se va'o nai bo lo dràta do ba tìrna .i je mi ba se maldìmna .i .ei mi bànli te màkfa li'u» ni'o «lu xu do na go'i —sei la .dòrotis. cu rètsku— li'u» ni'o «lu na sai go'i doi dìrba .i sa'u mi fàdni prènu li'u» ni'o «lu do xlàmau lo fàdni —sei cpitèpygau cu bàdri tònga cùsku— .i do tìcpre li'u» ni'o «lu ĭe sai —sei lo cmàlu nànmu fau lo nu termosysìmgau lo xànce tai lo nu la'e di'u ny plùka cu cùsku— .i mi tìcpre li'u» ni'o «lu ku'i la'e di'u xlàtce —sei la tìnci mùdypre cu cùsku .i ta'i ma mi ba cpàcu lo mi rìsna li'u» ni'o «lu si'a mi go'i lo mi kamvìrnu —sei la cìnfo cu rètsku— li'u» ni'o «lu si'a mi go'i lo mi bèsna —sei la cpitèpygau fau lo nu vìmcu lo se klàku lo kànla se pi'o lo kòsta birtù'u cu cùsku— li'u»

ni'o «lu doi pe mi dìrba pèndo —sei la .oz. cu cùsku— mi fi do cpèdu lo nu na càsnu lo tai nàlvai .i ko pènsi mi .e lo xlàtce ràktu poi nu mi te fàcki li'u» "ni'o «lu xu no dràta cu djùno lo du'u do tìcpre —sei la .dòrotis. cu rètsku— li'u» ni'o «lu no da po'u na'e bo lo vo do ja! mi cu djùno —sei la .oz. cu spùsku— .i mi pu tcìca ro lo prènu ze'a lo tai clàni ja'e lo nu mi pu jìnvi lo du'u mi ba no roi te fàcki .i pu bàrda se srèra mi fa lo nu cùrmi lo nu do nèrkla la nolstìzu kùmfa .i ta'e ku mi na vìska lo ji'a sai mi sèlfu .i je se ki'u bo sy cu jìnvi lo du'u mi xlàtce li'u»

ni'o «lu ku'i mi na jìmpe —sei la .dòrotis. cu se cfìpu cùsku— .i ki'u ma mi do te jvìnu lo bàrda stèdu li'u» ni'o «lu mi pu tcìca —sei la .oz. cu spùda— .i .e'o klàma fa'a ta .i se va'o bo mi fi do ba cìksi li'u» ni'o .obu gìdva klàma lo cmàlu kùmfa be ti'a la nolstìzu kùmfa .i je lo dràta .obu jèrsi .i .obu jàrco lo pa kòjna noi lo bàrda stèdu noi zìlzba lo so'i pèlji sènta gi'e co'e lo ràlci se fìnti ke cìnta flìra cu lolcpàna ni'o «lu ta zo'u: mi pu dàdgau fi lo drùdi lo skòri —sei la .oz. cu cùsku— .i mi pu sànli ti'a lo sepybì'u! gi'e làcpu lo cìlta te zu'e lo nu gàsnu lo nu lo kànla cu mùvdu .e lo nu lo mòklu cu kàlri li'u» ni'o «lu ku'i lo vòska zo'u mo —sei la .dòrotis. cu te prèti— li'u» ni'o «lu mi beftà'a —sei lo cmàlu nànmu cu cùsku— .i mi kàkne lo ka rènro lo sànce pe lo mi vòksa ro lo mi se djìca stùzi .i ja'e bo do pu jìnvi lo du'u lo vòksa cu se sànca lo stèdu .i ti dràta se pìlno mi lo nu tcìca do li'u» .i .obu fi la cpitèpygau cu jàrco lo tàxfu .e lo fìrgai vu'o poi .obu ke'a pu dàsni ca lo nu .obu sìmlu lo ka kùkte nìnmu .i je la tìnci mùdypre cu vìska lo nu lo ri màbla dànlu cu ckàji lo po'o ka gùnma lo so'i skàpi poi se fènso zi'e poi lo pìnta mùdri bo spìsa cu sàrji .i lo bòlci be lo fàgri zo'u: lo jìtfa te màkfa pu dàdgau by ji'a lo drùdi .i je'u by bòlci lo màpni .i ku'i ca lo nu rincypù'i lo ctìle kei lo bòlci cu tsàli jènca ni'o «lu je'u —sei la cpitèpygau cu cùsku— .ei do ckèji lo ka tai tìcpre li'u» ni'o «lu mi co'e .i ju'o mi ja'a co'e —sei lo cmàlu nànmu cu xènru cùsku— .i ku'i no dràta mi pu ka'e se zùkte .i .e'o do tsebì'o .i lo stìzu cu so'i mei .i mi fo do ba to'ai lìsri lo me mi moi li'u» ni'o ja'e bo tsebì'o gi'e tinjù'i ze'a lo nu .obu te lìsri lo di'e lìsri ni'o «lu mi jbèna fo la .òma'as. li'u» ni'o lu ŭe .i na dàrno zei mùtce la .kànzas. —sei la .dòrotis. cu krìxa— li'u» ni'o «lu go'i .i ku'i dàrmau ti —sei .obu fau lo nu bàdri dèsygau lo stèdu fa'a dy cu cùsku— .i mi ca lo nu ma'urbì'o cu bìnxo lo befybà'u .i je mi pu xàmgu mùtce se ctùca fi lo ka befybà'u kei fe lo bànli bàlcre .i ro da klèsi lo cìpni .a lo dànlu zo'u: mi kàkne lo ka monfu'igau da li'u» .i ca ku .obu làtcmo tai tu'a lo citmlàtu ja'e lo nu la .tòtos. cu sìrgau lo kèrlo gi'e càtlu te zu'e lo nu vìska lo nu my ma kau zvati kei kei ro da .i «lu ba za lo tèmci —sei la .oz. cu di'a co'e— mi bìnxo lo ka tàtpi la'e di'u kei gi'e bìnxo lo vartìsyboi prènu li'u» ni'o «lu ri mo —sei la .dòrotis. cu rètsku— li'u» ni'o «lu prènu gi'e galbì'o ne'i lo vartìsyboi ca lo tsirkùso djèdi te zu'e lo nu lo remgùnma cu jmàji .e lo nu ry. plèji fo lo ka vìska lo tsirkùso se tìgni —sei .obu cìksi— li'u» ni'o «lu ŭa —sei dy cùsku— .i mi djùno li'u» ni'o «lu ni'o pu ku mi ca pa djèdi cu galzè'a ne'i lo vartìsyboi .i je lo skòri cu bìnxo lo ka se tòrne kei ja'e lo nu mi na ka'e di'a dìzlo .i vy galzè'a ja'e lo nu gàpru lo dìlnu .i tai dàrno ja'e lo nu lo flècu be lo vàcri cu jànli vy gi'e bèvri vy ve'a lo mìnli be li so'i so'i .i ze'a lo dònri su'i lo nìcte mi lìtru pa'o lo vàcri .i je ca lo cèrni pe lo re moi be lo djèdi mi cikybì'o gi'e vìska lo nu lo vartìsyboi cu fùlta ga'u lo fànge je mèlbi gùgde

ni'o vy màsno zènba lo ka dìzlo .i je mi na sai se xràni .i ku'i mi zvàti lo mìdju be lo fànge prènu noi ca lo nu ke'a vìska lo nu mi klàma fi lo dìlnu cu jìnvi lo du'u mi bànli te màkfa .i li'a mi cùrmi lo nu py. jìnvi la'e di'u kei ki'u lo nu py. tèrpa mi gi'e nùpre lo ka zùkte ro da poi mi djìca lo nu vy ke'a zùkte

ni'o «lu mi te zu'e sa'u lo nu mi se zdìle .e lo nu lo xàmgu prènu cu tolcàndo cu pu mìnde py lo ka zbàsu lo vi tcàdu .e lo mi noldì'u .i je py djìca je xàmgu zùkte ro la'e di'u .i ba bo mi jìnvi lo du'u mi lo gùgde noi tai crìno gi'e tai mèlbi cu te cmène «lu ri'òjme tcàdu li'u» .i je te zu'e lo nu lo cmène cu zmàdu màpti kei mi pùnji lo crìno vìstci ro lo prènu ja'e lo nu ro da poi se vìska cu crìno li'u» ni'o «lu ku'i xu vi na ku ro da crìno —sei la .dòrotis. cu rètsku— li'u» ni'o «lu na zmàdu su'o dràta tcàdu —sei la .oz. cu spùsku— .i ku'i da ca lo nu da dàsni lo crìno vìstci zo'u: li'a ro da poi se vìska da cu skàri lo ka crìno kei da .i la ri'òjme tcàdu cu se zbàsu pu za lo nànca be li so'i sai .i ki'u bo mi pu cìtno nànmu ca lo nu lo vartìsyboi cu bèvri mi ti .i je mi nau tolcì'o mùtce nànmu .i ku'i lo mi prènu ba'o ze'u kànla dàsni lo crìno vìstci ja'e lo nu so'i boi py jìnvi lo du'u ja'a ri'òjme tcàdu .i ju'o ry ty mèlbi stùzi gi'e rìcfu lo jèmna .e lo kàrgu jìnme je ro xàmgu poi se nìtcu fi lo nu glèki .i mi ba'o xèndo lo prènu .i je py. nèlci mi .i ku'i co'a lo nu lo vi noldì'u cu se zbàsu kei mi gau mi nènri gi'e vìska no boi py li'u» ni'o «lu pa lo bràrai be lo se tèrpa be mi cu nu co'e la termafyfè'i .i ki'u bo to'e ki'u nai gi mi na sai kàkne su'o màkfa gi mi ba za fàcki lo du'u la termafyfè'i cu ja'a kàkne lo se mànci .i ty vu vo mei .i je ty. tùrni lo prènu pi xàbju la bèrti fa'u la snànu fa'u la stùna fa'u la stìci .i zanfù'a fa lo nu la termafyfè'i pe la bèrti fa'u la snànu cu vrùde .i je mi pu djùno lo du'u lo re mei mi na xràni .i ku'i la termafyfè'i pe la stùna fa'u la stìci cu xlàtce pàlci .i je va'o lo nu da'i lo re mei pu na jìnvi lo du'u mi zmàdu lo du be ty lo ka vlìpa cu ju'o pu dàspo mi .i da'i nai mi pu jmìve ze'a lo nànca be li so'i fau lo nu mòrsi tèrpa tu'a ty .i se ki'u bo do ka'e se xànri lo nu ma kau ni mi glèki ca lo nu mi junbì'o lo du'u lo zdàni be do pu fàrlu la pàlci termafyfè'i pe la stùna .i mi pu ca lo nu do mi pu klàma cu brèdi lo ka va'o lo nu do càtra lo dràta termafyfè'i cu nùpre ro da .i ku'i nau ku fau lo nu do ba'o rùmgau ty zo'u: mi bùrna lo ka cùsku lo se du'u mi na kàkne lo ka gàsnu lo se nùpre li'u» ni'o «lu pe'i do xlàli mùtce nànmu —sei la .dòrotis. cu cùsku— li'u» ni'o «lu ĭe nai doi pe mi dìrba .i je'u mi vrùde mùtce nànmu .i ku'i mi tòlcre mùtce te màkfa .i mi bilga lo ka ra'arjì'i li'u»

ni'o «lu xu do na kàkne lo ka dùnda lo bèsna mi —sei la cpitèpygau cu rètsku— li'u» ni'o «lu do na nìtcu by .i do ca ro djèdi cu cìlre da .i lo cìfnu cu se bèsna .i ku'i cy na djùno so'i da .i lo nu lìfri cu ro pa mei lo se jàlge be lo nu djùno .i je lo jai ze'a zvàti be lo tèrdi be fai do cu pànra lo jai se la'u lìfri be fai do li'u» ni'o «lu cùmki fa lo nu ro la'e di'u jètnu —sei la cpitèpygau cu cùsku— .i ku'i mi va'o lo nu na ku do dùnda lo bèsna mi cu ba tòlgei mùtce li'u» ni'o lo jìtfa te màkfa cu jùndi càtlu cy

ni'o «lu .y —sei cy fau lo nu patyvà'u cu cùsku— .i mi no'e te màkfa .i ku'i va'o lo nu do ca lo bavlàmdei cèrni cu klàma mi zo'u: mi ba sètca lo bèsna lo do stèdu .i ku'i mi na ka'e jùngau do lo du'u ta'i ma kau pìlno by .i do nìtcu lo ka fàcki zu'e do po'o li'u» ni'o «lu ki'e do ki'e do —sei la cpitèpygau cu krìxa— .i mi ba fàcki fi lo tàdji be lo nu pìlno .i ko na xànka li'u» ni'o «lu ku'i lo mi kamvìrnu zo'u: mo —sei la cìnfo cu xànka rètsku— li'u» ni'o «lu lo ni do vìrnu cu bàrda .i mi bìrti —sei la .oz. cu spùsku— .i ro se nìtcu be do cu ka làcri lo sèvzi .i na zàsti fa su'o jmìve poi na'e tèrpa ca lo nu pènmi lo ckàpe .i jètnu nu vìrnu kei fa lo nu farzù'e lo ckàpe ca lo nu tèrpa .i je lo tai kamvìrnu zo'u: lo ni do ckàji cu bànzu li'u» ni'o «lu cùmki fa lo nu go'i .i ku'i mi to'e ki'u nai tèrpa —sei la cìnfo cu cùsku— .i mi va'o lo nu na ku do dùnda lo klèsi be lo kamvìrnu be'o poi gàsnu lo nu tolmò'i lo du'u tèrpa li'u» ni'o «lu .i'a .i mi ca lo bavlàmdei cu dùnda lo tai kamvìrnu do —sei la .oz. cu spùda— li'u»

ni'o «lu lo mi rìsna zo'u: mo —sei la tìnci mùdypre cu rètsku— li'u» ni'o «lu .y ri zo'u: —sei la .oz. cu spùsku— mi jìnvi lo du'u do tòldra lo ka djìca tu'a lo rìsna .i ry tolgèigau so'e prènu .i ja'o do djùno .i do se zanfù'a lo nu do na se rìsna li'u» ni'o «lu ju'o lo du'u ma kau se jìnvi cu mànri —sei la tìnci mùdypre cu cùsku— .i mi zo'u: mi va'o lo nu do dùnda lo rìsna mi cu ba jàrfri ro li'i nàlgei kei se cau lo nu pànte li'u» ni'o «lu .i'a —sei la .oz. cu rùble spùda— .i ko klàma mi ca lo bavlàmdei .i jai do ba cpàcu lo rìsna .i mi pu ze'u lo nànca be li so'i cu sezmlùgau lo ka te màkfa .i se ki'u .e'a se'i mi ra'ìrgau la'e di'u lo cmàlu ziljmìna li'u»

ni'o «lu .i je —sei la .dòrotis. cu cùsku— ta'i ma mi xrùti la .kànzas. li'u» ni'o «lu .ai mi pènsi la'e di'u —sei lo cmàlu nànmu cu spùsku— .i ko cùrmi lo nu mi pènsi lo tcìni ze'a lo djèdi be li re ji'i ci .i se va'o bo mi tròci lo ka fàcki fi lo tàdji be lo nu bèvri do lo ràgve be lo cantù'a .i ze'a lo tèrsei do'o se fàrtra .ai tai tu'a lo vìtke be mi .i je ze'a lo nu do'o xàbju la noldì'u kei lo mi prènu cu sèlfu do'o gi'e tìnbe ro lo se djìca be do'o .i pa po'o da zo'u: mi cpèdu lo nu da se plèji fo lo nu mi sìdju .i do bìlga lo ka na jùngau su'o da lo se mìpri be mi be'o noi du'u mi tìcpre li'u» ni'o lo ro mei cu tùgni fi lo du'u ba jùngau no da lo se cìlre kei gi'e xrùti lo vo'a kùmfa fau lo nu zàncni .i la .dòrotis. ku ji'a sai cu pàcna fi li pi za'u no fe lo nu la'e «lu bànli je xlàtce tìcpre li'u» noi dy tèrcme .obu ke'a cu fàcki fi lo tàdji be lo nu xrùgau bènji dy la .kànzas. .i je da'i dy va'o lo nu .obu ja'a co'e cu brèdi lo ka fràxu .obu ro da

ni'o ni'o pa xa mo'o lo màkfa làrcu pe la bànli tìcpre
	ni'o ca lo bavlà'i cèrni la cpitèpygau cu cùsku fi lo ri pèndo ni'o «lu ŭi sai mi klàma la .oz. te zu'e lo nu ro mai cpàcu lo mi bèsna .i mi ca lo nu xrùti cu dùnli lo dràta rèmna li'u» ni'o «lu mi pu ro roi nèlci do poi do du —sei la .dòrotis. cu sàmpu cùsku— li'u» ni'o «lu do xèndo fi lo nu nèlci lo cpitèpygau —sei cy spùsku— .i ku'i ju'o do ba jìnvi lo xàgmau mi ca lo nu do zgàna lo xàutce se pènsi poi lo mi cnìno bèsna cu cùpra li'u» .i ba bo cùsku zo co'o se pi'o lo glèki vòksa gi'e klàma lo nolstìzu kùmfa noi bu'u ke'a dàrxi lo vrògai
ni'o «lu ko nèrkla —sei la .oz. cu cùsku— li'u» ni'o la cpitèpygau cu nèrkla gi'e tòlcri lo cmàlu nànmu poi zùtse ne'a lo cànko fau lo nu còndi pènsi ni'o «lu mi klàma te zu'e tu'a lo mi bèsna —sei la cpitèpygau cu te nòtci be fau lo nu xànka mìlxe— li'u» ni'o «lu je'e .i'a .i ko zùtse lo va stìzu pe'u do'u —sei la .oz. cu spùsku— .i ko mi fràxu lo nu mi vìmcu lo do stèdu .i ku'i mi nìtcu la'e di'u lo nu sètca lo do bèsna lo dràni stùzi li'u» ni'o «lu na sai nàbmi —sei la cpitèpygau cu cùsku— .i do ja'a sai jai se cùrmi fai lo nu vìmcu lo mi stèdu .i va'o bo sy cu xàgmau ca lo nu do ba'o jòngau sy li'u» ni'o ja'e bo lo te màkfa cu tolylà'a lo stèdu gi'e vìmcu lo sudysràsu .i je ba bo nèrkla lo trìxe kùmfa gi'e lèbna lo gùrni klàni noi .obu ke'a jmìna lo mìxre be lo so'i pìjne joi lo so'i jèsni .i ca lo nu ba'o dèsygau lo mìxre zo'u .obu tìsygau lo gàlpau be lo stèdu be la cpitèpygau lo mìxre gi'e mùlno sètca lo sudysràsu lo ve vìmcu cànlu te zu'e lo nu lo bèsna cu zvàsto ni'o ca lo nu ba'o làsna lo stèdu be la cpitèpygau lo xàdni cu cùsku fi cy fe «lu co'a lo cabna do bànli rèmna .i ki'u bo mi ba'o dùnda lo cnìno je bàrda bèsna li'u» ni'o la cpitèpygau ge glèki gi jgìra vau lo nu lo bràrai se djìca cu bìnxo lo fàtci .i je fau lo nu ba'o kìrsku zei càrmi la .oz. cu xrùti lo vo'a pèndo ni'o la .dòrotis. cu kùcli càtlu cy .i lo stèdu be cy cu mùtce lo ka se pùnli lo bèsna bu'u lo gàlpau ni'o «lu do ma cìnmo —sei dy te prèti— li'u» ni'o «lu mi cìnmo lo ka prìje je'u —sei cy stàce spùsku— .i mi ca lo nu se slàbu lo mi bèsna cu djùno ro da li'u» ni'o «lu ki'u ma lo va jèsni joi pìjne cu bàrtu pàgre fo lo do stèdu —sei la tìnci mùdypre cu rètsku— li'u» ni'o «lu la'e di'u je'urjà'o lo du'u ta kìnli se mènli —sei la cìnfo cu te nòtci— li'u» ni'o «lu .ei mi klàma la .oz. te zu'e lo nu te dùnda lo mi rìsna —sei la mùdypre cu cùsku— li'u» .i my klàma lo nolstìzu kùmfa gi'e dàrxi lo vrògai ni'o «lu ko nèrkla —sei la .oz. cu cùsku— li'u» .i je la mùdypre cu nèrkla gi'e cùsku «lu mi klàma te zu'e tu'a lo mi rìsna li'u» ni'o «lu xàmgu —sei lo cmàlu nànmu cu spùsku— .i ku'i sàrcu fa lo nu mi kàtna lo do cùtne kei lo nu mi ka'e sètca pùnji lo do rìsna lo dràni .i .a'o do na ba còrtu li'u»

ni'o «lu .o'u —sei la mùdypre cu cùsku— .i na ba gànse da li'u» ni'o la .oz. cu bèvri lo re mei be lo tìnzba jìnci gi'e sràku lo zùnle pàgbu be lo cùtne be la tìnci mùdypre ja'e lo cmàlu ke kùrfa kùnti .i ba bo fau lo nu klàma lo tànxe be lo dàcru cu tolsè'a lo mèlbi rìsna noi mùlno màrji lo sìlka gi'e zilsè'a lo komkà'a pùlce ni'o «lu xu na mèlbi —sei .obu rètsku— li'u» ni'o «lu ja'a go'i —sei la mùdypre noi mùtce lo ka se plùka cu spùsku— .i ku'i xu xèndo rìsna li'u» ni'o «lu ja'a sai go'i —sei .obu spùda— li'u» .i .obu sètca lo rìsna lo cùtne be la mùdypre gi'e selbàsygau lo tìnci kùrfa fau lo nu cnìci ranjìnjòngau ry lo jai bu'u sràku

ni'o «lu ŭo —sei .obu cùsku— .i do ca se rìsna da poi ro prènu cu jgìra da'i tu'a ke'a .i mi xènru lo nu pu nìtcu lo ka pùnji lo kùrfa lo do cùtne .i ku'i je'u pu sàrcu li'u» ni'o «lu na nàbmi fa tu'a lo kùrfa —sei la mùdypre cu glèki bàsnysku— .i mi mùtce lo ka ckìre do kei gi'e no roi tolmò'i lo du'u ma kau ni do xèndo li'u» ni'o «lu ko na tàvla fi la'e di'u —sei la .oz. cu spùsku— li'u» ni'o ba bo la tìnci mùdypre cu xrùti lo ri pèndo noi zandàpsku ty my ni'o la cìnfo cu klàma lo nolstìzu kùmfa gi'e dàrxi lo vrògai ni'o «lu ko nèrkla —sei la .oz. cu cùsku— li'u» ni'o «lu mi klàma te zu'e tu'a lo mi ka vìrnu —sei la cìnfo fau lo nu nèrkla lo kùmfa cu nòisku— li'u» ni'o «lu je'e do'u —sei lo cmàlu nànmu cu spùsku— .i mi ba lèbna klàma se va'u do li'u» ni'o ny klàma lo kajnytà'e gi'e lèbna fi lo gàltu kàjna lo kùrfa ke crìno bòtpi noi ny seltìsygau lo se vàsru be ke'a lo crìno joi sòlji pàlta noi mèlbi ke sràku mòrna .i la te màkfa fau lo nu pùnji py lo cràne be la tolvìrnu cìnfo ku noi sumne py tai lo nu na nèlci cu cùsku:

ni'o «lu ko pìnxe li'u» ni'o «lu ti mo —sei la cìnfo cu rètsku— li'u» ni'o «lu ti zo'u: —sei .obu spùsku— va'o lo nu nènri do cu ka vìrnu .i li'a do djùno lo du'u lo kamvìrnu cu ro roi nènri lo prènu .i ja'o .ei ti na'e zìlski lo ka kamvìrnu kei co'u lo nu do ba'o tùnlo vo'a .i se ki'u bo mi stìdi lo ka pìnxe se rai lo kamsùtra li'u» ni'o la cìnfo cu dènpa ze'i no ziljmìna gi'e pìnxe co'u lo nu lo pàlta cu kùnti

ni'o «lu do ma cìnmo ca ku —sei la .oz. cu rètsku— li'u» ni'o «lu lo ka cùlno lo ka vìrnu —sei la cìnfo cu spùda— li'u» .i cy glèki xrùti lo ri pèndo te zu'e lo nu jùngau py fo lo ri zanfù'a

ni'o la .oz. fau lo nu no dràta cu zvàti cu cìsma co pènsi lo nu snàda lo ka dùnda la cpitèpygau .e la tìnci mùdypre .e la cìnfo je'a lo se djìca se jìnvi .i «lu pau nai ta'i ma mi sìsti lo ka tìcypre kei—sei .obu cùsku— va'o lo nu ro lo prènu cu djìca lo nu mi gàsnu lo fàsnu poi ro da djùno lo du'u ke'a na cùmki .i pu frìli fa lo ka gàsnu lo nu la cpitèpygau .e la cìnfo .e la mùdypre cu glèki .i ki'u bo ro lo ci mei pu se xànri lo nu mi kàkne ro da .i ku'i lo ka xrùgau la .dòrotis. la .kànzas. cu ba zmàdu fi lo ka nàndu .i je mi bìrti lo du'u mi na djùno lo du'u ta'i ma kau ka'e gàsnu li'u»

ni'o ni'o pa ze mo'o lo nu lo vartìsyboi cu se galze'àcru
	ni'o ze'a lo djèdi be li ci la .dòrotis cu se jùngau fi no da la .oz .i djèdi co se bàdri lo cmàlu nìxli .i ku'i ro lo ri pèndo cu mùtce lo ka glèki gi'e se mànsa .i la cpitèpygau cu jùngau lo dràta lo du'u lo mèlbi se pènsi cu zvàti lo stèdu be cy .i ku'i cy jùngau no da lo du'u ma kau me lo se pènsi .i ki'u bo djùno lo du'u no da po'u na'e bo cy ka'e jìmpe py .i la tìnci mùdypre ca lo nu ru'u càdzu cu gànse lo nu lo ri rìsna cu ru'u mùvdu ne'i lo cùtne .i je my cu jùngau la .dòrotis. lo du'u my pu fàcki lo du'u ry xèndo je toljùrsa zmàdu lo rìsna poi my ke'a se rìsna ca lo nu my. màrji lo rèctu .i la cìnfo cu xùsra lo du'u cy tèrpa no da pe lo tòlrdi kei gi'e da'i glèki lo nu pènmi lo jènmi .a lo pa re mei be lo tsàli .kalìdas.
ni'o tai ku ro cmìma be lo cmàlu gùnma be'o po'u na'e bo la .dòrotis. ku noi mùtce lo ka djìca lo nu xrùti la .kànzas. cu se mànsa ni'o ca lo vo moi be lo djèdi ja'e lo nu la .dòrotis. cu bànli glèki kei la .oz. cu cpèdu lo nu dy klàma .i je ca lo nu dy. nèrkla la nolstìzu kùmfa kei .obu plùka rìnsa dy ni'o «lu ko tsebì'o doi dìrba .i pe'i mi fàcki lo du'u ma kau tàdji lo nu xrùgau bènji fi lo vi gùgde ni'o «lu pau se ka'a la .kànzas. —sei dy djìcni rètsku— li'u» ni'o «lu .y mi na bìrti tu'a la .kànzas. —sei la .oz. cu cùsku— .i ki'u bo mi na te sìdbo fi lo cmàrai fe lo du'u ky fa'a ma kau cràne .i ku'i lo pa moi be lo do se bìlga cu nu pàgre lo cantù'a .i ba ku .ei frìli fa lo ka zvafà'i lo do zdàni li'u» ni'o «lu ta'i ma mi pàgre lo cantù'a —sei dy te prèti— li'u» ni'o «lu mi do ba jùngau lo du'u mi ma kau jìnvi —sei lo cmàlu nànmu cu cùsku— .i sa'u nai ca lo nu mi klàma lo vi gùgde kei mi klàma fu lo vartìsyboi .i do ji'a pu klàma pa'o lo vàcri fau lo nu se bèvri lo vilcarbì'e .i ja'o mi krìci lo du'u xàgrai tàdji lo nu zvabì'o lo ràgve be lo kutytù'a kei fa lo nu pàgre lo vàcri .i lo ka zbàsu lo vilcarbì'e cu dùkse lo ka nàndu kei lo ka cmìma lo mi se vlìpa .i ku'i mi pu pènsi lo tcìni gi'e krìci lo du'u mi kàkne lo ka zbàsu lo vartìsyboi li'u» ni'o «lu ta'i ma —sei la .dòrotis. cu rètsku— li'u» ni'o «lu lo vartìsyboi —sei la .oz. cu cùsku— cu màrji lo sìlka noi se gàpci lo snìpa te zu'e lo nu lo gàcri na ka'e barbì'o .i bu'u la mi noldì'u so'i sìlka cu zvàti .i se ki'u bo ba na nàbmi fa lo nu zbàsu lo vartìsyboi .i ku'i bu'u pi ro lo vi gùgde cu zvàti fa no gàpci pe te pi'o lo nu fùlta gàsnu li'u» ni'o «lu ga nai na fùlta —sei la .dòrotis. cu pìksku— gi na plìxau ma'a li'u» ni'o «lu jètnu —sei la .oz. cu spùsku— .i ku'i tàdji fa lo dràta noi nu clùgau vy lo glàre vàcri .i lo glàre vàcri na xagdù'i lo gàpci .i ki'u bo va'o lo nu lo vàcri cu lènku bìnxo kei lo vartìsyboi cu zvabì'o lo cantù'a ja'e lo nu mi'o fàrcri li'u» ni'o «lu ŭe zo mi'o —sei lo nìxli cu krìxa— .i xu do klakànsa mi li'u»

ni'o «lu go'i li'a —sei la .oz. cu spùsku— .i mi tàtpi lo nu mi tai tìcpre .i va'o lo nu da'i mi bàrkla lo vi noldì'u lo mi se gùgde cu ba zi fàcki lo du'u mi na te màkfa kei gi'e ba bo fèngu mi lo ka tcìca gy .i se ki'u bo mi bìlga lo ka stàli lo nènri be lo vi kùmfa ze'a pi ro lo dònri .i je bìnxo lo ka se tàtpi .i da'i mi zmànei lo ka klàma la .kànzas. fi'o se kànsa do gi'e za'u re'u zvàti lo tsirkùso li'u» ni'o «lu da'i mi glèki lo nu do mi kànsa —sei la .dòrotis. cu cùsku— li'u» ni'o «lu ki'e do'u —sei .obu spùsku— .i ca ku va'o lo nu do ba sìdju mi lo ka fènso lo sìlka zo'u: mi'o ba co'a gùnka tu'a lo do vartìsyboi li'u»

ni'o ja'e bo la .dòrotis. cu lèbna lo jèsni .e lo cìlta .i je du'i lo nu la .oz. cu sùtra kàtna lo dàsri be lo sìlka lo dràni tàrmi kei lo nìxli cu cnìci fènso dy .i pa mai lo dàsri be lo càrmi crìno sìlka .i re mai lo dàsri be lo mànku crìno .i ci mai lo dàsri be lo ri'òjme crìno .i ki'u bo la .oz. cu nèlci lo nu zbàsu lo vartìsyboi poi skàri lo vrìci .i dìtcu fa lo djèdi be li ci lo nu fènso ro lo dàsri .i ku'i ca lo nu mùlno kei lo bàrda dàkli be fi lo crìno sìlka be'o poi mìtre li za'u re no ni'o ba bo la .oz. cu pùnji fi lo nènri sèfta fe lo cìnla gàcri co snìpa te zu'e lo nu no vàcri cu ka'e pàgre kei gi'e ba bo nòisku lo se du'u lo vartìsyboi cu brèdi

ni'o «lu ku'i sàrcu fa tu'a lo lànka poi ka'e se màrce ke'a —sei .obu cùsku— li'u» .i ja'e bo .obu mìnde lo sònci pe lo crìno zbìkre lo ka jbìbei lo bàrda ke tàxfu lànka noi .obu ke'a làsna lo lòldi be lo vartìsyboi lo so'i skòri ni'o ca lo nu lo ro mei cu brèdi kei la .oz. cu bènji fi lo ri prènu fe lo nòtci noi se du'u .obu ba vìtke lo bànli ke brùna te màkfa poi xàbju lo dìlnu .i lo nùzba cu sùtra prèja pi ro lo tcàdu .i je ro da klàma te zu'e lo nu vìska lo se mànci jvìnu ni'o la .oz. cu mìnde fi lo nu lo vartìsyboi cu se bàrbei fi lo cràne be la noldì'u .i je lo prènu cu kùcli mùtce càtlu vy .i la tìnci mùdypre pu kàtna cùpra lo bàrda dèrxi be lo mùdri .i je ca ku ty my zbàsu lo fàgri my .i je bo la .oz. cu jgàri lo dziràipau be lo vartìsyboi fau lo nu gàpru lo fàgri kei te zu'e lo nu lo glàre gàpci poi ra'i galzè'a cu se kàvbu fi lo sìlka dàkli .i lo vartìsyboi cu zènba lo ka plàna kei gi'e galzè'a fa'a lo vàcri kei co'u lo nu ro mai lo lànka ku po'o cpàna lo lòldi li'u»

ni'o ba bo la .oz. cu nerbì'o lo lànka gi'e cùsku fi lo ro prènu se pi'o lo clàdu vòksa: ni'o «lu mi ca clìva te zu'e lo nu vìtke .i ca lo nu mi nàlzva kei la cpitèpygau cu tùrni do .i mi do mìnde lo ka tìnbe fi cy du'i lo nu do no'a fi mi li'u» ni'o ca la'e di'u lo vartìsyboi cu càrmi làcpu lo skòri poi te jòrne vy lo lòldi .i ri'a bo lo vàcri poi nènci cu glàre .i je la'e di'u rìnka lo nu lo vartìsyboi cu mùtce lo ka mlèca lo bàrtu vàcri lo ka lìnto kei ja'e lo nu càrmi làcpu te zu'e lo nu galzè'a fa'a lo tsàni ni'o «lu ko ti klàma doi .dòrotis. —sei la te màkfa cu krìxa— .i ko sùtra .i se va'o nai bo lo vartìsyboi cu to'o vòfli li'u» ni'o «lu mi na kàkne lo ka tòlcri la .tòtos. su'o da —sei la .dòrotis. ku noi na djìca lo nu clìva lo ri cmàlu gèrku cu spùda— li'u» .i la .tòtos. pu bàjra se ka'a lo mìdju be lo remgùnma te zu'e lo nu gèrcmo fa'a lo cìtno mlàtu .i je ro mai la .dòrotis. cu tòlcri ty .i dy làfti ty gi'e bàjra fa'a lo vartìsyboi ni'o dy zvàti ki vy vi lo nu so'u roi stàpa .i je la .oz. cu tèngau lo xànce te zu'e lo nu sìdju dy lo ka nèrkla lo lànka .i ca bo —sei .kràk.— lo skòri cu pòrpi .i je lo vartìsyboi cu galzè'a fa'a lo vàcri se cau la .dòrotis. ni'o «lu ko xrùti —sei dy krìxa— .i mi ji'a djìca lo nu mi klàma li'u» ni'o «lu mi na kàkne lo ka xrùti doi dìrba —sei la .oz. ne'i lo lànka cu làusku— .i co'o li'u» ni'o «lu co'o —sei ro da krìxa— li'u» .i ro lo kànla cu se fàrna lo gàpru poi nu la te màkfa cu se màrce lo lànka fau lo nu zènba ca ro mòkca lo ka gàltu lo tsàni ni'o la'e di'u nu lo ro da ro re'u vìska la .oz. ku no'u la se mànci te màkfa .i ku'i cùmki fa lo nu ri snùra tolylì'a la .omà'as. gi'e nau zvàti ri .i ku'i lo prènu cu pràmi mòrji fi la .oz. gi'e sìmxu lo ka cùsku: ni'o «lu la .oz. pu ro roi pèndo mi'o .i ri ca lo nu zvàti cu zbàsu se va'u ma'a lo vi mèlbi pe la ri'òjme tcàdu .i je nau ku .obu nàlzva gi'e pu gàsnu lo nu la prìje cpitèpygau cu kànsa ma'a li'u» ni'o ku'i ze'a lo djèdi be li so'i lo ro da cu bàdri lo nu cìrko la se mànci te màkfa kei gi'e na kùfra

ni'o ni'o pa bi mo'o to'o mo'i ne'u

ni'o la .dòrotis. cu bàdri lo nu fànmo fa lo nu dy cu pàcna lo nu xrùti la .kànzas .i ku'i dy ca lo nu pènsi ro la'e di'u cu glèki lo nu pu na galzè'a ne'i lo vartìsyboi .i je ji'a dy bàdri lo nu ba'o cìrko la .oz .i je si'a lo kànsa be dy cu go'i ni'o la tìnci mùdypre cu jbibì'o dy gi'e cùsku: ni'o «lu je'u mi ga nai flìba lo nu bàdri tu'a lo nànmu poi dùnda lo mi mèlbi rìsna mi gi maltolckìre .i jai mi ze'i klàku fi lo nu la .oz. cu cànci .i .e'o do xèndo vìmcu lo mi se klàku te zu'e lo nu mi na furtìrse bìnxo li'u»

ni'o «lu .au —sei dy spùda— li'u» .i ba zi bèvri lo bùkpu .i ba bo la tìnci mùdypre cu klàku ze'a lo mèntu be li so'o .i je la .dòrotis. cu ràlci càtlu lo se klàku gi'e vìmcu ky se pi'o lo bùpku .i my ca lo nu ba'o mo'u co'e cu xèndo kìrsku dy gi'e mùlo sàbji lo ctìle lo sèvzi se pi'o lo jmesèljai ctìle bo lànte te zu'e lo nu rìvbi lo nàbmi
ni'o la cpitèpygau ca tùrni la ri'òjme tcàdu .i je lo prènu to'e ki'u nai lo nu cy na te màkfa cu sìnma cy .i «lu ki'u bo —sei py cùsku— bu'u lo mùlno mùnje cu zàsti fa no dràta tcàdu poi se tùrni lo tersè'a nànmu li'u» .i je py du'o py cu dràni jìnvi

ni'o ca lo cèrni be ba lo nu lo vartìsyboi joi la .oz. cu galzè'a zo'u lo vo lìtru cu pensì'u la nolstìzu kùmfa gi'e càsnu lo cùntu .i la cpitèpygau cu zùtse lo bàrda nolstìzu .i je lo dràta cu sìnma sànli ca'u cy ni'o «lu mi'o na mùtce lo ka se malfù'a —sei lo cnìno tùrni cu cùsku— .i ki'u bo lo vi badydì'u .e la ri'òjme tcàdu mi'o se pònse .i je mi'o zìfre lo nu zùkte lo se djìca .i mi ca lo nu mòrji lo du'u mi pu za lo cmàlu cu gàpru lo gràna bu'u lo zmùfoi pe lo te cànge .e lo du'u mi ca tùrni lo vi mèlbi tcàdu cu mùtce lo ka se mànsa lo me mi moi li'u»

ni'o «lu mi ji'a —sei la tìnci mùdypre cu cùsku— cu se plùka zei mùtce tu'a lo mi cnìno rìsna .i je'u ri po'o je no dràta pe lo mùlno mùnje pu se djìca mi li'u» ni'o «lu mi zo'u: glèki lo nu djùno lo du'u vìrnu dùnli ro lo dànlu poi pu jmìve ku'o gi jo nai vìrnu zmàdu —sei la cìnfo cu cùmla cùsku— li'u» ni'o «lu mi'o va'o lo nu la .dòrotis. cu da'i glèki lo nu xàbju la ri'òjme tcàdu —sei cpitèpygau cu di'a co'e— cu kansì'u lo nu glèki li'u» ni'o «lu ku'i mi na djìca lo nu vi xàbju —sei la .dòrotis. cu krìxa— .i mi djìca lo nu klàma la .kànzas. gi'e xàbju fi'o kànsa la fetfàmti .em. .e la nakfàmti .xenris. li'u» ni'o «lu va'o ku ma ka'e se zùkte —sei la mùdypre cu fàcki zùkte rètsku— li'u» ni'o la cpitèpygau cu jdìce lo nu pènsi .i je cy cu tai càrmi pènsi ja'e lo nu lo pìjne .e lo jèsni cu co'a barbì'o lo bèsna .i ro mai cy cùsku ni'o «lu mu'i ma na klàcpe la selnà'i smàni gi'e cpèdu lo nu bèvri do ga'u lo kutytù'a li'u» ni'o «lu ŭe mi no roi pènsi la'e di'u —sei la .dòrotis. cu glèki cùsku— .i pràne sìdbo .i mi ba zi klàma gi'e cpàcu la sòlji màpku li'u» ni'o dy ca lo nu bèvri my la nolstìzu kùmfa cu cùsku lo màkfa vàlsi .i je ba zi bo lo bènde be la selnà'i smàni cu vòikla pa'o lo kàlri cànko gi'e sànli ne'a dy ni'o «lu do mi'a ca re re'u klàcpe —sei la smàni nòltru fau lo nu krobì'o ca'u lo cmàlu nìxli cu cùsku— .i do ma djìca li'u» ni'o «lu mi djìca lo nu do mi vòfli bèvri la .kànzas. —sei la .dòrotis. cu cùsku— li'u» ni'o ku'i la smàni nòltru cu stèdu slìgau ni'o «lu na cùmki —sei cùsku— .i mi'a ckìni lo vi gùgde ku po'o gi'e na ka'e clìva gy .i no roi zvàti fa su'o la selnà'i smàni la .kànzas .i je ru'a ba no roi co'e .i ki'u bo sy boi ky na dràzva .i da'i mi'a glèki lo nu sìdju do ta'i ro lo mi'a selkà'e .i ku'i mi'a na ka'e pàgre lo kutytù'a .i co'o li'u» ni'o .e la smàni nòltru fau lo nu za'u re'u krobì'o cu tòlplo lo nàlci gi'e to'o vòikla pa'o lo cànko fau lo nu pi ro lo bènde cu jèrsi ni'o ni'o la .dòrotis. cu brèdi lo nu selpa'aspòcni klàku .i «lu mi ba'o xàksu lo màkfa pe sòlji màpku —sei dy cùsku— .i ki'u bo la selnà'i smàni mi na ka'e sìdju li'u» ni'o «lu ju'o ŭu xlàli mùtce —sei la mùdypre ku noi rànti se rìsna cu cùsku— li'u» ni'o la cpitèpygau cu za'u re'u pènsi .i je lo ri stèdu cu bìnxo lo tai se pùnli ja'e lo nu la .dòrotis. cu tèrpa lo nu sy cu spòja ni'o «lu .e'u mi'o klàcpe lo sònci pe lo crìno gàskre —sei cy cùsku— gi'e stìdi cpèdu li'u» ni'o ja'e bo lo sònci cu se klàcpe gi'e toldàrsi nèrkla la nolstìzu kùmfa ki'u lo nu sy ze'a lo nu la .oz. cu jmìve cu no roi jai se cùrmi fai lo nu klàma lo dàrmau be lo vòrme ni'o «lu lo vi cmàlu nìxli —sei la cpitèpygau fi lo sònci cu cùsku— cu djìca lo nu pàgre lo kutytù'a .i ny ta'i ma ka'e co'e li'u» ni'o «lu mi na ka'e djùno —sei lo sònci cu cùsku— .i ki'u bo no da su'o roi pàgre lo kutytù'a .i va'o bo da'i na ku la .oz. cu go'i li'u» «lu xu no da mi'a ka'e sìdju —sei la .dòrotis. cu jùnri te prèti— li'u» ni'o «lu ju'o cu'i la .glìndas. cu go'i —sei lo sònci cu stìdi— li'u» ni'o «lu la .glìndas. cu me ma —sei la cpitèpygau cu rètsku— li'u»

ni'o la termafyfè'i pe la snànu .i gy vlìrai lo ro termafyfè'i gi'e tùrni la vònpre .i ji'a lo badydì'u pe gy cu se stùzi lo kòrbi be lo kutytù'a .i se ki'u bo ju'o cu'i gy djùno lo du'u ma kau tàdji lo nu pàgre ky li'u» ni'o «lu la .glìndas. cu vrùde termafyfè'i vau ĭe pei —sei lo vèrba cu rètsku— li'u» ni'o «lu la vònpre cu jìnvi lo du'u xàmgu —sei lo sònci cu cùsku— .i je gy cu xèndo ro da .i ti'e la .glìndas. cu mèlbi nìnmu gi'e snàda lo nu cìtno stòdi kei to'e ri'a nai lo nànca be li so'i be'o poi nu gy jmìve li'u» ni'o «lu ta'i ma mi ka'e klàma lo badydì'u pe gy —sei la .dòrotis. cu rètsku— li'u» ni'o lo dàrgu cu sìrji fi la snànu —sei lo sònci cu spùda— .i ku'i ti'e dy tòlcau lo so'i ckàpe be lo lìtru .i zvàti lo rìcfoi fa lo cìlce dànlul .e lo lànzu be lo cìzra prènu poi na djìca lo nu lo fànge cu pàgre lo ra gùgde .i ki'u ku no la vònpre cu su'o roi klàma la ri'òjme tcàdu li'u»

ni'o lo sònci ba clìva lo dràta .i je la cpitèpygau cu cùsku: ni'o «lu si'au to'e ki'u nai lo ckàpe lo xàgrai poi la .dòrotis. ke'a ka'e zùkte cu nu lìtru klàma la snànu gùgde gi'e cpèdu fi la .glìndas. fe lo nu sìdju dy .i ki'u bo li'a la .dòrotis. va'o lo nu stàli ti cu no roi xrùti la .kànzas. li'u» ni'o «lu ju'o do pu za'u re'u pènsi —sei la tìnci mùdypre cu te nòtci— li'u» ni'o «lu go'i —sei la cpitèpygau cu cùsku— li'u» ni'o «lu .ai mi klakànsa la .dòrotis. —sei la cìnfo cu xùsra— .i mu'i bo mi tàtpi tu'a lo do tcàdu gi'e djìcai tu'a lo rìcfoi .e lo nùmra .i je'u mi cìlce dànlu du'o do .i ji'a la .dòrotis. cu nìtcu da poi bàndu dy li'u» ni'o «lu jètnu —sei la mùdypre cu tùgni— .i lo mi ka'àmru cu ju'o cu'i sìdju dy .i se ki'u bo mi ji'a ba kànsa dy lo ka klàma la gùgde be la snànu li'u» ni'o «lu .ei ca ma mi'o tòlsti —sei la cpitèpygau cu rètsku— li'u» ni'o «lu ŭe xu do klàma —sei lo dràta cu rètsku be fau lo nu ri se spàji— li'u» ni'o «lu ju'o .i ga nai lo nu da'i la .dòrotis. pu na co'e gi lo nu mi se bèsna cu ze'e ba na fàsnu .i dy mi pu lafyvì'u lo gràna pe lo gùrni fòldi gi'e gìdva mi la ri'òjme tcàdu .i ja'o ro lo mi zanfù'a cu se gàsnu dy .i je .ai mi co'u lo nu dy cu co'a xrùti la .kànzas. cu se va'u no roi clìva dy li'u» ni'o «lu ki'e do —sei la .dòrotis. cu ckìre cùsku— .i ro do mùtce lo ka xèndo mi .i ku'i .au mi tòlsti ca lo cùmki tràji be lo ka clìra li'u» ni'o «lu .ei mi'o klàma co'a lo bavlàmdei cèrni —sei la cpitèpygau cu spùda— .i .e'e mi'o ca brebì'o .i ki'u bo ba clàni nunlì'u li'u»

ni'o ni'o pa so mo'o se gùnta la dàmba trìcu
	ni'o ca lo bavlà'i cèrni la .dòrotis. cu tolrìnsa cìnba lo mèlbi ke crìno nìxli .i je lo ro da jo'u lo sònci pe lo crìno zbìkre cu desysìmgau lo xànce noi pu klakànsa fe'e co'u lo balvrògai .i ca lo nu la bàdypre be la vrògai cu vìska lo gùnma cu mùtce lo ka se spàji lo nu ri ka'e clìva lo mèlbi tcàdu te zu'e lo nu za'u re'u ràktu lìfri .i ku'i by ba zi toltèlgau lo vìstci noi by ke'a xrùgau sètca lo crìno tànxe ku'o gi'e cùsku lo so'i xèndo vàlsi pe te zu'e tu'a lo nunlì'u
ni'o «lu do mi'a ca tùrni —sei by fi la cpitèpygau cu cùsku— .i se ki'u bo do nìtcu lo nu xrùti mi'a se rai lo kamsùtra li'u» ni'o «lu .ai mi ba xrùti va'o lo nu kàkne —sei la cpitèpygau cu spùda— .i ku'i .ei pa mai mi sìdju la .dòrotis. lo nu xrùti lo zdàni li'u» ni'o la .dòrotis. ca lo nu ro re'u tolrìnsa lo xèndo bàdypre cu cùsku: ni'o «lu mi pu se xèndo mùtce bu'u lo do kùkte tcàdu .i je ro prènu mi pu xèndo .i mi na ka'e cùsku lo se du'u ma kau ni mi do ckìre li'u» ni'o «lu ko na tròci doi dìrba —sei by spùsku— .i da'i mi'a glèki lo nu do mi'a stàli .i ku'i va'o lo nu do djìca lo nu xrùti la .kànzas. kei mi pàcna lo nu do snàda li'u» .i ba bo by cu kàrgau lo bràvro pe lo bàrtu bìtmu .i je lo bènde cu càdzu pàgre gi'e co'a lìtru ni'o lo sòlri cu càrmi te gùsni ca lo nu lo mi'a pèndo cu selfàrgau lo ri flìra la gùgde pe la snànu .i ro boi py mùtce lo ka glèki gi'e pa'àcni gi'e kansì'u lo ka cmìla kei gi'e tavysì'u .i la .dòrotis. cu za'u re'u mùlno lo ka pàcna lo nu xrùti lo zdàni .i je la cpitèpygau .e la tìnci mùdypre cu glèki lo ka plìxau dy .i la cìnfo zo'u: cy sùmne lo vìfne vàcri se kai lo ka se kùkte kei gi'e mùvgau lo rèbla lo pa mlàna lo dràta ri'a lo nu mùlno glèki lo nu di'a zvàti lo nùrma .i ca bo la .tòtos. cu bàjra ru'u lo dràta gi'e jèrsi lo ctetòldi .e lo todmà'u fau lo nu ru'i glèki gèrcmo ni'o «lu lo tcàdu nunjì'e mi na sai màpti —sei la cìnfo fau lo nu lo ro da cu càdzu sùtra cu te nòtci— .i mi pu cìrko lo bàrda rèctu bo klàni co'a lo nu mi xàbju ty .i je nau ku mi djìca lo ka jàrco fi lo dràta dànlu fe lo ni mi ba'o vìrnu zènba li'u» ni'o ca ku lo lìtru cu càrna gi'e ro re'u càtlu la ri'òjme tcàdu .i vìska fe po'o lo gùnma be lo slanydì'u be ti'a lo crìno bìtmu be'o be'o .e lo dàrno gàlmau be lo ro da be'o po'u lo slanydì'u jìpno .e lo boldì'u vu'o pe la noldì'u pe la .oz. ni'o «lu ja'o la .oz. pu na tai xlàli te màkfa —sei la tìnci mùdypre fau lo nu gànse lo nu lo ri rìnsa ne'i lo cùtne cu ru'u mùvdu cu cùsku— li'u» ni'o «lu .obu pu djùno lo du'u ta'i ma kau dùnda lo bèsna mi .i je ji'a xàmgu mùtce bèsna —sei la cpitèpygau cu cùsku— li'u» ni'o «lu la .oz. va'o lo nu da'i pu pìnxe pi su'o lo mìntu kamvìrnu poi pu dùnda fi mi —sei la cìnfo cu jmìna cùsku— cu vìrnu mùtce nànmu li'u» ni'o la .dòrotis. cu cùsku no da .i la .oz. pu na gàsnu lo ri se nùpre be fi dy .i ku'i .obu pu tròci se kai lo xàgrai selkà'e .i se ki'u bo dy boi .obu fràxu .i cu'u .obu ji'a .obu xàmgu nànmu gi'u xlàli te màkfa ni'o lo nunlì'u pe lo pa moi be lo djèdi cu nu pàgre lo crìno fòldi .e lo càrmi xrùla vu'o poi srùri la ri'òjme tcàdu .i lo lìtru cu sìpna fi'o se cpàna lo sràsu fau lo nu no dràta be lo tàrci cu gàpru .i je ja'a xàmgu sùrla ni'o ca lo cèrni ly lìtru co'u lo nu tolylì'a lo ròtsu rìcfoi .i na cùmki fa lo nu srùkla ry .i ki'u bo ry. sìmlu lo ka kùspe fa'a lo prìtu je zo zùnle lo jai ve'a ka'e vìska .i ji'a ly na dàrsi lo ka cènba lo ka lìtru klàma fa'a ma kau .i ki'u bo tèrpa lo ka fàrcri .i ja'e bo sìsku lo stùzi poi da'i bu'u ke'a fìlrai fa lo ka nèrkla lo rìcfoi

ni'o la cpitèpygau ku noi lìdne cu ro moi tòlcri lo bàrda trìcu poi se jìmca lo tai gànra prèja ja'e lo nu lo bènde ka'e cnìta pàgre .i se mu'i bo cy cu càdzu fa'a lo trìcu .i ku'i ca sai lo nu bìnxo lo cnìta be lo pa moi be lo jìmca kei jy fa'a ni'a krobì'o gi'e skòri sìmsa srùri cy .i je ba zi bo cy cu làfti se vìmcu fi lo lòldi gi'e se rènro fa'a lo lìtru kànsa ni'o la'e di'u na crorì'a la cpitèpygau .i ku'i spàji cy .i je cy cu sìmlu lo ka laxselfì'u tcèmli kei ca lo nu la .dòrotis. cy làfti

ni'o «lu vi dràta cànlu fa lo jbìni be lo trìcu —sei la cìnfo cu jùngau— li'u» ni'o «lu ko cùrmi lo nu mi tròci pa moi —sei la cpitèpygau cu cùsku— .i mu'i bo mi na se crorì'a lo nu se rènro li'u» .i cy klàma lo dràta trìcu ca lo nu tàvla .i ku'i lo jìmca cu ba zi sai jairbì'o cy gi'e rènro cy lo pu se zvàti ni'o «lu cìzra —sei la .dòrotis. cu bàsna cùsku— .i .ei mi'o ma zùkte li'u» ni'o «lu lo trìcu cu sìmlu lo ka ba'o jdìce lo ka dàmba mi'o gi'e tolcfàgau lo mi'o nunlì'u —sei la cìnfo cu te nòtci— li'u» ni'o «lu ĭa mi ji'a ba tròci —sei la mùdypre fau lo nu jànco pùnji lo ri ka'àmru cu cùsku— li'u» .i my càdzu lo pa moi be lo trìcu be'o noi ke'a pu tai jùrsa tàrti tu'a la cpitèpygau .i ca lo nu lo pa bàrda jìmca cu cnìta krobì'o te zu'e lo nu jgàri my kei la mùdypre cu vlìle ke ka'àmru dàrxi jy tai lo jàlge be lo nu kàtna fi lo re spìsa .i ba zi sai bo lo trìcu cu co'a dèsygau lo ri ro jìmca tai lo nu da'i còrtu .i je la tìnci mùdypre cu snùra pàgre lo cnìta be ty

ni'o «lu .e'e sai —sei my fa'a lo dràta cu krìxa— .i ko sùtra li'u» .i lo ro da fa'a ca'u bàjra gi'e pàgre lo cnìta be lo trìcu fau lo nu se xràni fa no da po'u na'e la .tòtos. ku noi se kàvbu lo cmàlu jìmca gi'e se dèsygau ja'e lo nu gerkì'a .i ku'i la mùdypre cu ba zi kàtna vìmcu lo jìmca gi'e zìfygau lo cmàlu gèrku

ni'o lo dràta trìcu pe lo rìcfoi na zùkte fi lo nu zùnti .i ja'e bo co'a jìnvi lo du'u lo po'o pa moi be lo lìjgri be lo trìcu cu kàkne lo ka krògau lo ri jìmca kei .e lo du'u lo bi'u nai trìcu cu pùlji tu'a lo rìcfoi gi'e pu se mànci vlìpa jai se gàsnu te zu'e lo nu gàsnu lo nu no fànge cu nèrkla lo rìcfoi ni'o lo vo lìtru cu frìli càdzu pàgre lo trìcu co'u lo nu tolylì'a lo dàrno kòrbi be lo rìcfoi .i ba ku sei spàji ly ca'u vìska lo ràjycla bìtmu poi sìmlu lo ka màrji lo blàbi portcelànu .i xùtla tai tu'a lo sèfta be lo pàlta gi'e gàlmau lo ly. stèdu ni'o «lu .ei mi'o ma zùkte ca ku —sei la .dòrotis. cu rètsku— li'u» ni'o «lu mi ba zbàsu lo rajysèrti —sei la tìnci mùdypre cu cùsku— .i ki'u bo ju'o mi'o nìtcu lo nu ravypàrkla lo bìtmu li'u»

ni'o ni'o re no mo'o lo kùkte ke portcelànu gùgde
	ni'o ze'a lo nu la mùdypre cu zbàsu lo rajysèrti lo mùdri poi my ke'a tolcri lo rìcfoi kei la .dòrotis. cu vrèta gi'e sìpna .i ki'u bo se ta'inrì'a lo ve'u nu cadzu .i la cìnfo ku ji'a djìne tàrmi vrèta bìnxo te zu'e lo nu sìpna .i je la .tòtos. cu re'o vrèta
ni'o la cpitèpygau cu càtlu la mùdypre ze'a lo nu my cu gùnka kei gi'e cùsku: ni'o «lu mi na ka'e fàcki ga lo krinu be lo nu lo vi bìtmu cu vi zvàti gi lo du'u ma kau te zbàsu li'u» ni'o «lu ko sùrgau lo do bèsna gi'e na xànka tu'a lo bìtmu —sei la mùdypre cu spùda— .i ma'a ca lo nu ba'o cpàre lampàgre by cu djùno lo du'u ma kau zvàti lo ràgve li'u»

ni'o ba za lo tèmci lo rajysèrti cu mùlno .i sìmlu lo ka jùxre .i ku'i la tìnci mùdypre cu bìrti lo du'u by tsàli gi'e sàrji lo sàrcu .i la cpitèpygau cu cìkygau la .dòrotis. .e la cìnfo .e la .tòtos. gi'e jùngau fi lo du'u lo rajysèrti cu mùlno .i la cpitèpygau cu pa moi lo cpàre gi'e ku'i tai jùxre ja'e lo nu la .dòrotis. cu nìtcu lo nu jìbni jèrsi gi'e fànta lo nu cy cu fàrlu fi .i cy ca lo nu lo ri stèdu cu bìnxo lo gàpru be lo bìtmu cu cùsku «lu ŭe sai li'u»

ni'o «lu ko di'a klàma —sei la .dòrotis. cu clàdu cùsku— li'u» ni'o ja'e bo la cpitèpygau cu di'a gapypàrkla gi'e tsebì'o lo gàpru be lo bìtmu .i je la .dòrotis. cu gàpygau lo ri stèdu by gi'e krìxa «lu ŭe sai li'u» du'i lo nu la cpitèpygau pu no'a ni'o ba bo la .tòtos. cu klàma lo gàpru gi'e ba zi sai bo co'a gèrcmo .i ku'i la .dòrotis. cu gàsnu lo nu ty cu smàji ni'o la cìnfo cu selylì'e fi lo pàrkla .i je la tìnci mùdypre cu ro moi .i ku'i ro lo re mei cu krìxa «lu ŭe sai li'u» co'a lo nu càtlu ga'u lo bìtmu .i lo ro da ca lo nu zùtse tai lo lìnji lo gàpru be lo bìtmu cu càtlu lo cnìta gi'e vìska lo cìzra se jvìnu ni'o ca'u ku lo bàrda se kùspe lo gùgde cu se lòldi da poi xùtla je camgù'i je blàbi dùnli lo lòldi be lo bàrda pàlta .i zvàti fa so'i zdàni poi mùlno màrji lo portcelànu gi'e zilcintypù'i lo camgùsrai .i lo bi'u nai zdàni cu mùtce lo ka cmàlu .i lo bràrai cu na gàlmau lo xadmìdju be la .dòrotis. .i zvàti fa ji'a lo mèlbi je cmàlu cagdaidì'u noi lo portcelànu bìtmu cu srùri .i je ru'u sànli fa lo so'i bàkni .e lo so'i xìrma .e lo so'i xàrju .e lo so'i jìpci vu'o noi ro ke'a màrji lo portcelànu

ni'o ku'i cìzrai lo ro mei fa lo prènu poi xàbju lo vi cìzra gùgde .i zvàti fa lo ladycpanì'u .e lo lankujnì'u vu'o noi dàsni lo càrmi skàri nimcrèka zi'e noi lo pasyskàci be ke'a cu mùlno se gàcri lo sòlji bànra ku'o .e lo noltrutì'u noi dàsni lo meltcèrai pàstu pe lo rìjno .e lo sòlji .e lo zìrpu ku'o .e lo lankù'i poi dàsni lo tupycìdni pàlku poi sràji se sribà'a lo xunblàbi .e lo pèlxu .e lo blànu zi'e poi lo sòlji bàtke cu zvàti lo ke'a cùtci ku'o .e lo noltrutì'u poi lo jèmna nolmàpku cu cpàna lo stèdu be ke'a zi'e poi dàsni lo .ermìne pàstu .e lo xulbù'u torluznaukosta ku'o .e lo xàjmi xàmpre pe lo se rùfygau pàstu zi'e poi lo cùkla xùnre cu bàrna lo ke'a mòlmla zi'e pe lo clàni je kònju màpku .i ji'a cìzrai lo ro mei fa lo du'u ro lo bi'u nai prènu cu mùlno màrji lo portcelànu gi'e tai cmàlu ja'e lo nu lo bràrai be py cu na gàlmau lo tupycìdni be la .dòrotis.

ni'o lo lìtru ca lo cfàri cu se càtlu no da po'u na'e bo lo pa cmàlu ke zìrpu portcelànu gèrku noi se stèdu lo bàrda mùtce zi'e noi klàma lo bìtmu gi'e gèrcmo fa'a ly se pi'o lo cmàlu vòksa gi'e ba bo to'o bàjra ni'o «lu .ei mi'o ta'i ma zvabì'o lo lòldi —sei la .dòrotis. cu rètsu— li'u» ni'o lo rajysèrti cu dùkse lo ka tìlju kei lo nu làfti .i se ki'u bo la cpitèpygau ri fàlcru fo lo bìtmu .i je lo dràta te zu'e lo nu lo jdàri lòldi na crògau lo jàmfu be dy cu fa'a ni'a plìpe lo gàpru be cy .i li'a dy mùtce lo ka kùrji lo nu na plìpe lo flìra ja'e lo nu lo pìjne cu tùnta lo jàmfu .i ca lo nu lo ro mei cu snùra zvàti lo lòldi cu làfti la cpitèpygau ku noi lo xàdni be ke'a cu ba'o bìnxo lo ka pìntce ku'o gi'e toljusygà'i lo sudysràsu pe cy lo drasèltai ni'o «lu mi'o nìtcu lo ka pàgre lo vi cìzra stùzi kei lo ka klàma lo ràgve —sei la .dòrotis. cu cùsku— .i ki'u bo nalpijzù'e da'i fa mi'o lo ka klàma fa'a su'o na'e bo lo snànu li'u» ni'o tòlsti lo ka càdzu pa'o lo gùgde be lo portcelànu prènu .i je pa moi lo se pènmi fa lo portcelànu ladycpanì'u noi ca'o làdycpa lo portcelànu bàkni .i ca lo nu lo lìtru cu jbibì'o kei lo bàkni cu sùksa fa lo nu lo bàkni cu tìkpa gi'e tìkpa fàlgau lo stìzu .e lo bAktu je ji'a sai lo ladycpanì'u .i je lo ro da fàrlu lo portcelànu lòldi fau lo nu clàdu sàvru ni'o la .dòrotis. cu selpàjytce vìska lo nu lo bàkni ba'o pòrpi lo pa tùple kei .e lo nu lo bàktu cu vrèta gi'e se spìsa so'i da kei .e lo nu lo ŭu ladycpanì'u zo'u: lo zùnle bircìdni cu se fènra ni'o «lu .oi sai —sei lo ladycpanì'u cu fèngu krìxa— .i ko càtlu lo se gàsnu be do .i lo pa tùple be lo mi bàkni pu pòrpi .i je mi nìtcu lo ka klagì'a by lo me lo cìkrypre moi ja'e lo nu ty se nipyjòngau .i mu'i ma do klàma ti gi'e tèpygau lo mi bàkni li'u» ni'o «lu mi xènru mùtce —sei la .dòrotis. cu spùda— .i .e'o ko mi'a fràxu li'u» ni'o ku'i lo mèlbi ladycpanì'u cu dùkse lo ka fèngu kei lo ka spùsku su'o da .i ly se fànza làfti lo tùple gi'e to'o klagì'a lo bàkni fau lo nu lo ŭu dànlu cu nadydzu fi lo tùple ci mei .i ca lo nu clìva lo lìtru kei lo ladycpanì'u cu so'i roi ze'i jùrsa càtlu ga'u lo tùple fa'a lo jùxre fànge fau lo nu stògau lo fènra bircìdni lo ka jìbni lo xadmlàpau ni'o la .dòrotis. cu mùtce lo ka bàdri lo vi malfù'a ni'o «lu .ei mi'o vi mùtce lo ka jùndi —sei lo xèndo me la mùdypre cu cùsku— .i se va'o nai bo cùmki fa lo nu mi'o xràni lo vi mèlbi ke cmàlu prènu ja'e lo nu ri ba no roi di'a kànro li'u» ni'o bu'u lo dàrmau mìlxe la .dòrotis. cu pènmi lo mèlbi tràji dàsni ke cìtno noltrutì'u noi klàsti ca lo nu vìska lo fànge kei gi'e co'a to'o bàjra ni'o la .dòrotis. cu djìca lo ka zènba lo ka vìska lo noltrutì'u .i se mu'i bo dy bàjra jèrsi .i ku'i lo portcelànu noltrutì'u cu krìxa: ni'o «lu ko mi na jèrsi .i ko mi na jèrsi li'u» ni'o ny tai tèrpa ke cmàlu se vòksa ja'e lo nu la .dòrotis. cu klàsti gi'e cùsku «lu ki'u ma na ku li'u» ni'o «lu ki'u —sei la noltrutì'u cu spùsku be fau lo nu ri ji'a klàsti bu'u lo snùra dàrno— lo nu mi va'o lo nu bàjra cu ka'e fàrlu ja'e lo nu mi pòrpi li'u» ni'o «lu ku'i xu do na ka'e se cikre —sei lo nìxli cu rètsku— li'u» ni'o «lu ja'a go'i .i ku'i da ba lo nu se cìkre cu no roi dùnli fi lo ka mèlbi —sei la noltrutì'u cu spùsku— li'u» ni'o «lu la'a jètnu —sei la .dòrotis. cu cùsku— li'u» ni'o «lu ta me la xàmpre ku noi pa mei me lo mi'a xàmpre —sei lo portcelànu nìnmu cu di'a co'e— zi'e noi ro roi tròci lo ka sànli fi lo stèdu .i ra pu tai so'i roi pòrpi ja'e lo nu pa no no mòkca be ra cu se cìkre .e lo nu na sai mèlbi .i va ku ra ca klàma .i ja'o do ka'e zgàna li'u» ni'o je'u lo xèdgei ke cmàlu xàmpre cu ca'o càdzu fa'a ku .i je la .dòrotis. cu vìska lo nu to'e ki'u nai tu'a lo xy. mèlbi tàxfu co xùnre je pèlxu je crìno xy mùlno se gàcri lo fènra poi se fàrna ro da zi'e noi jàrco lo du'u so'i mòkca be xy pu se cìkre ni'o la xàmpre cu sètca lo ri xànce lo ra dàski .i je ba lo nu bàljygau lo mòlmla gi'e tolclìte sedysa'òrgau fa'a lo dràta cu cùsku «lu doi mèlbi melnì'u .i do càtlu ki'u ma la xàmpre ŭu.i do tìnsa càrmi gi'e sìrji se tàrmi tai lo nu pu cìtka lo gràna ku li'u» ni'o «lu ko smàji —sei la noltrutì'u cu cùsku— .i xu do na djùno lo du'u ti fànge gi'e .ei se fàrtra fi lo ka sìnma li'u» ni'o «lu —sei la xàmpre cu xùsra— li'u» .i je xy ba zi sànli fi lo stèdu ni'o «lu ko na se fànza la xàmpre —sei la noltrutì'u fi la .dòrotis. cu cùsku— .i lo ri stèdu cu se fènra so'i da .i ja'e bo xy bèbna li'u» ni'o «lu mi na sai se fànza —sei la .dòrotis. cu cùsku— .i ku'i do tai mèlbi —sei dy di'a co'e— ja'e lo nu mi bìrti lo du'u da'i mi kàkne lo ka dìrba pràmi do .i je'a pei mi xrùti bèvri do la .kànzas. gi'e pùnji do lo fàgzda kàjna pe la fetfàmti .em. .i mi ka'e bèvri do fau lo nu do nènri lo mi lànka li'u» ni'o «lu da'i la'e di'u se jàlge lo nu mi mùtce lo ka tolglèki —sei la portcelànu noltrutì'u cu spùsku— .i sa'u nai vi ku bu'u lo mi'a gùgde mi'a jmìve co glèki gi'e ka'e ge tàvla gi mùvdu vau tai lo se nèlci be mi'a .i ku'i ro da poi me mi'a zo'u: ca ro nu da se bèvri fi lo dàrno kei lo da cìdni cu tìnsa bìnxo ja'e lo nu ro pa mei lo se kàkne be da fa lo ka sìrji sànli gi jo'u mèlbi se jvìnu .i li'a lo nu mi'a ri ckàji cu ro pa mei lo jai se kànpe be fai lo nu mi'a zùkte ca lo nu mi'a cpàna lo fàgzda kàjna fa'u lo kajnyvronì'e fa'u lo xa'urkù'a jùbme .i ku'i lo mi'a nunjì'e be bu'u lo vi gùgde be mi'a cu mùtce lo ka pùkmau ni'o «lu da'i mi va'o ji'a sai lo nu mi zildù'a lo mùlno mùnje cu na zùkte fi lo nu do tolglèki —sei la .dòrotis.— .i se ki'u bo mi ba cùsku zo co'o li'u» ni'o «lu co'o —sei la noltrutì'u cu spùda— li'u» ni'o lo lìtru cu jùndi càdzu pa'o lo portcelànu gùgde .i lo cmàlu dànlu je ro lo prènu cu toljmàji lo ly. ve klàma fau lo nu tèrpa lo nu lo fànge cu pòpygau vo'a .i je ba za lo càcra be li ji'i pa lo lìtru cu tolylì'a lo dràta fànmo gi'e tolylì'a lo dràta portcelànu bìtmu

	ni'o by mlèca ku'i lo pa moi lo ka gàltu .i je ta'i lo nu sànli lo trìxe be la cìnfo kei lo ro da snàda lo ka jùxre klàma lo galraìpau .i ba bo la cìnfo cu jàjgau lo ri tùple gi'e plìpe lo gàpru be lo bìtmu .i ku'i ca sai lo nu plìpe kei lo rèbla be cy cu càtke lo portcelànu màlsi ja'e lo nu pòrpi lo so'i spìsa
ni'o «lu ŭi nai —sei la .dòrotis. cu cùsku— .i ku'i je'u pe'i zanfù'a mi'o fa lo nu mi'a xràni lo vi cmàlu prènu no dràta be lo ka pòpygau pa bàkni tùple je pa màlsi .i ro boi py tai filpò'i li'u» ni'o «lu ja'a go'i —sei la cpitèpygau cu cùsku— .i je mi ckìre fi lo nu mi màrji lo sudysràsu gi'e na ka'e frìli sèlxai .i zàsti fa lo xlàmau be lo nu cpitèpygau li'u»

ni'o ni'o re pa mo'o la cìnfo cu bìnxo lo nòltru be lo dànlu
	ni'o ba lo nu cnìta cpàre lo portcelànu bìtmu kei lo lìtru cu zvàti lo tolplùka gùgde ne lo so'i cimtù'a zi'e noi se gàcri lo clàni je màbla sràsu .i nàndu fa lo nu càdzu se cau lo nu fàrlu lo cimdè'u kèvna .i ri'a bo lo sràsu cu tai ròtsu ja'e lo nu ky na ka'e se vìska .i ku'i ta'i lo nu ràlci cùxna lo ve klàma cu snùra càdzu co'u lo nu tolclìva lo slìgu lòldi .i ku'i bu'u ku lo gùgde cu sìmlu lo ka cìlce tràji .i je ba lo clàni je ta'inrì'a nu càdzu pa'o lo dèmspa cu nèrkla lo dràta rìcfoi noi lo trìcu pe ke'a cu bràmau je tolcìtmau lo ro ba'o se vìska
ni'o «lu lo vi rìcfoi cu pràne lo ka kùkte —sei la cìnfo cu xùsra be fau lo nu glèki càtlu lo srùri— .i mi no roi vìska lo mèlbi zmàdu stùzi li'u» ni'o «lu si'au ta drimànku —sei la cpitèpygau cu cùsku— li'u» ni'o «lu na sai go'i — sei la cìnfo cu spùda— .i da'i mi djica lo nu xàbju ti ze'a lo nu nunjì'e .i ko gànse lo du'u ma kau ni lo ba'o sudbì'o pèzli pe ni'a lo do jàmfu cu rànti .e lo du'u ma kau ni rìcfu je crìno fa lo clìka be fi lo vi tolcì'o trìcu .i ju'o no cìlce dànlu ka'e djìca tu'a lo pùkmau zdàni li'u» ni'o «lu ju'o cu'i lo cìlce dànlu ca zvàti lo rìcfoi —sei la .dòrotis. cu cùsku— li'u» ni'o «lu ru'a go'i —sei la cìnfo cu spùda— .i ku'i mi vi na vìska su'o boi cy dy li'u» ni'o lo gùnma cu càdzu pàgre lo rìcfoi co'u lo nu ry cu mànku dùkse fi lo nu za'o càdzu .i la .dòrotis. .e la .tòtos. .e la cìnfo cu vrebì'o gi'e sìpna ze'a lo nu la mùdypre jo'u la cpitèpygau cu zgàna jùndi tai lo fàdni ni'o ca lo nu cèrni bìnxo cu di'a lìtru .i pu lo nu ba'o ve'u càdzu cu tìrna lo dìzlo sèlcmo be lo so'i cìlce dànlu .i la .tòtos. cu tèpcmo mìlxe .i ku'i no lo dràta cu tèrpa .i je ca'o klàma fo lo xàmgu se càdzu plùta co'u lo nu tolclìva lo trìcu kàlri noi lo su'o ki'o dànlu pe lo ro tàrmi ke'a jmàji .i zvàti fa lo tìrxu .e lo xànto .e lo crìbe .e lo làbno .e lo lòrxu .e lo ro dràta pe lo mivmù'e .i je ze'i lo mòkca la .dòrotis. cu tèrpa .i ku'i la cìnfo cu cìksi lo nu lo dànlu cu ca'o pènsi'u gi'e càsnu .i je cy fo lo sèlcmo fa'u sànce cu djùno lo du'u dy se ràktu lo bàrda

ni'o ca lo nu cy cu tàvla kei so'o lo dànlu cy co'a vìska .i je sùska fa lo nu lo bàrda càsnu bo gìrzu cu smàji bìnxo tai lo nu lo màkfa cu se pìlno .i lo bràrai be lo tìrxu cu jbìkla la cìnfo gi'e cùsku fau lo nu krobì'o: ni'o «lu fi'o doi ĭo nòltru be lo dànlu .i do klàma ca lo màpti be lo nu dàmba lo mi'a bràdi gi'e gàsnu lo nu lo ro dànlu pe lo rìcfoi cu di'a pànpi sìmxu li'u» ni'o «lu ma do'o ràktu —sei la cìnfo cu smàji mìlxe cùsku— li'u»

ni'o «lu ro mi'a se ckàpa —sei lo tìrxu cu spùsku— tu'a lo vlìle bràdi poi pu za klàma lo vi rìcfoi .i bàrda càrmi cizdà'u .i sìmsa lo bàrda jùkni poi se xàdni da poi bradù'i lo xànto ku'o gi'e se tùple da poi cladù'i lo trìcu stàni .i se tùple lo bi tai clàni tùple .i je fau lo nu cpàre pàgre lo rìcfoi cu co'a jgàri lo dànlu lo pa tùple gi'e làcpu dy fa'a lo mòklu noi bu'u ke'a cu cìtka dy tai lo nu lo jùkni cu cìtka lo sfàni .i na ku su'o mi'a snùra .i ze'a bo lo bi'u nai vlìpa dànlu cu jmìve .i je mi'a pu jmàji lo nuncàsnu te zu'e lo nu jdìce lo du'u mi'a mi'a ta'i ma kau kùrji .i ca bo do mi'a jbìkla li'u» ni'o la cìnfo cu ze'i pènsi ni'o «lu xu su'o dràta cìnfo cu zvàti lo vi rìcfoi —sei cy rètsku— li'u» ni'o «lu na go'i .i lo su'o cìnfo pu zvàti .i ku'i lo bi'u nai cìzda'u ba'o cìtka ro boi cy .i ji'a no lo pu zvàti cìnfo cu jìbni do lo kàmbra .a lo kamvìrnu li'u» ni'o «lu va'o lo nu mi selfàmgau tu'a lo do bràdi zo'u: xu do'o ba krobì'o fa'a mi gi'e tìnbe fi mi poi nòltru lo rìcfoi —sei la cìnfo cu te prèti— li'u» ni'o «lu mi'a ba glèki go'i —sei lo tìrxu cu spùda— li'u» .i je lo ro dràta dànlu cu làucmo se pi'o lo tsàli sèlcmo «lu .ai mi'a go'i li'u» ni'o «lu lo do bàrda jùkni ma zvàti ca ku —sei la cìnfo cu rètsku— li'u» ni'o «lu tu noi jbìni lo cìndu trìcu —sei lo tìrxu fau lo nu jàrco se pi'o lo cràne jàmfu cu cùsku— li'u» ni'o «lu ko xàmgu kùrji lo vi pèndo be mi —sei la cìnfo cu cùsku— .i se va'o bo mi ba zi klàma gi'e dàmba lo cizdà'u li'u» ni'o la cìnfo cu tolrìnsa lo ri pèndo gi'e jgìra càdzu to'o te zu'e lo nu dàmba lo bràdi ni'o lo bàrda jùkni cu sìpna vrèta ca lo nu la cìnfo jy tòlcri .i je jy se jvìnu lo tai tolmèlbi ja'e lo nu lo ra bràdi cu gàpru selfàrgau lo nàzbi ri'a lo nu rìgni .i lo tùple cu clàni du'i lo se xùsra be lo tìrxu .i je lo xàdni cu se gàcri lo rùfsu ke xèkri kèrfa .i se mòklu lo bàrda pe lo kìnli dènci poi cladù'i lo rèmna jàmfu .i ku'i lo stèdu cu jòrne lo plàna xàdni lo cnèbo poi cìnla dùnli lo bìfce xadmìdju .i la'e di'u gàsnu lo nu la cìnfo cu te sìdbo lo du'u ma kau xàgrai lo tàdji be lo nu gùnta lo dànlu .i ki'u bo djùno lo du'u lo nu dàmba dy ca lo nu sìpna cu fìlmau lo nu co'e ca lo nu cìkna .i la cìnfo cu bàrda plìpe gi'e pràne cpanybì'o lo trìxe be lo cizdà'u .i ba bo la cìnfo fau lo nu pa roi dàrxi fi lo ri tìlju jàmfu fi'o xàrci lo kìnli jgàlu cu ka'arvì'u lo stèdu be lo jùkni lo xàdni .i cy fi plìpe gi'e càtlu jy co'u lo nu lo clàni tùple cu co'u dèsku noi ca ke'a cy djùno lo du'u jy mòrsi mùlno ni'o la cìnfo cu xrùti lo rickàlri noi lo dànlu pe lo rìcfoi cu dènpa cy bu'u ke'a cu jgìra cùsku: ni'o «lu do na za'o nìtcu lo nu tèrpa tu'a lo do bràdi li'u»

ni'o ba bo lo dànlu cu krobì'o fa'a la cìnfo ku poi nòltru dy .i je cy cu nùpre lo nu ba xrùti gi'e tùrni vau ca lo nu la .dòrotis. cu snùra klàma la .kànzas.

ni'o ni'o re re mo'o lo gùgde be la vònpre
	ni'o lo vo lìtru cu pàgre lo ve vìmcu rìcfoi fau lo nu snùra .i je ly ca lo nu barbì'o lo mànku cu ca'u vìska lo nitsàlpo cmàna noi se gàcri fe'e co'a lo galràipau fe'e co'u lo dziràipau lo bàrda ke ròkci spìsa
ni'o «lu ba nàndu nu cpàre —sei la cpitèpygau cu cùsku— .i ku'i mi'o nìtcu lo nu zvabì'o lo ràgve be lo cmàna kei to'e ki'u nai li'u» ni'o cy klàma gìdva .i je lo dràta cu jèrsi .i xai tolclìva zei jìbni lo pa moi be lo ròkci ca lo nu tìrna lo nu lo rùfsu vòksa cu krìxa «lu ko klàsti li'u» ni'o «lu do me ma —sei la cpitèpygau cu rètsku— li'u» ni'o ba bo lo stèdu cu co'a dzaseljì'u ga'u lo ròkci .i je lo vòksa cu cùsku «lu lo vi cmàna mi'a se pònse .i je mi'a na cùrmi lo nu da pàgre cy li'u» ni'o «lu ku'i mi'a pàgre nìtcu —sei la cpitèpygau cu cùsku— .i mi'a klàma lo gùgde be la vònpre li'u» ni'o «lu ku'i .e'a nai do go'i —sei lo vòksa cu spùsku— li'u» .i je va stàpa klàma fi lo trìxe be lo ròkci fa lo cìzra tràji prènu be te rai lo ro ba'o se vìska be lo lìtru ni'o py mùtce lo ka tòrdu gi'e ròtsu kei gi'e se stèdu lo bàrda noi pìnta bu'u lo galràipau gi'e se sàrji lo ròtsu cnèbo poi se cìnje so'i da .i ku'i py no sai da se bìrka .i je la cpitèpygau ca lo nu vìska la'e di'u cu na xànka lo nu lo tai nonsèldju dànlu cu ka'e fànta lo nu cpàre lo cmàna .i se ki'u bo cùsku «lu mi xènru lo nu na zùkte lo se djìca be do .i ku'i mi'a nìtcu lo nu gàpru lampàgre lo do cmàna .i ju do glèki la'e di'u li'u» .i je la cpitèpygau cu vìrnu càdzu fa'a ca'u

ni'o fi'o sùtra dùnli lo nu lìndi kei lo stèdu be lo prènu cu fa'a ca'u zilcè'a .i je lo cnèbo cu tcèna co'u lo nu lo stèdu galràipau noi pìnta cu jànli lo mìdju be la cpitèpygau gi'e gàsnu lo nu cy fau lo nu so'i roi gùnro cu fa'a ni'a fàrlu re'o lo cmàna .i fi'o na ru'e sùtra dùnli lo nu klàma kei lo stèdu cu xrùti lo xàdni .i je lo prènu cu jùrsa cmìla gi'e cùsku «lu na frìli dùnli lo do se kànpe li'u» ni'o lo clàtce ke cmìla sànce cu se kràsi lo dràta ròkci .i je la .dòrotis. cu vìska lo nu lo su'o panono nonselbìrka me la mrùli stèdu cu sànli lo cmàna mlàna (to ti'a ro ròkci pa boi my sy cu sànli toi)

ni'o la cìnfo cu bìnxo lo ka mùtce lo ka fèngu lo nu cmìla lo nu la cpitèpygau cu se xlàli .i je fau lo nu cmòni lo clàdu noi se mìrsna lo lìdvru sìmsa cu bàjra fa'a lo gàpru be lo cmàna ni'o za'u re'u ku lo stèdu cu sùtra lo nu zilcè'a .i je la cìnfo cu bìnxo lo ka fa'a ni'a gùnro lo cmàna tai lo nu se jànli lo xacycèlboi ni'o la .dòrotis. cu fa'a ni'a bàjra gi'e sìdju la cpitèpygau lo nu sa'irbì'o .i je la cìnfo ku noi cìnmo lo ka se càgna nàlmli cu jbibì'o dy gi'e cùsku «lu no da pràli fi lo nu dàmba lo prènu pe lo cècla stèdu .i no prènu ka'e fàpro li'u» ni'o «lu .ei mi'o va'o mo —sei dy rètsku— li'u» ni'o «lu ko klàcpe la selnà'i smàni —sei la tìnci mùdypre cu stìdi— .i do za'o zìfre lo nu za'u re'u mìnde sy li'u» ni'o «lu .i'a —sei dy spùda— li'u» .i je fau lo nu dasybì'o la sòlska màpku cu bàcru lo màkfa vàlsi .i la smàni cu sùtra du'i lo prulà'i .i je ba zi lo so'u mòkca lo mùlno bènde cu sànli ca'u la .dòrotis. ni'o «lu do mi'a ma mìnde —sei la smàni noltrùnau fau lo nu dìzlo krobì'o cu te prèti— li'u» ni'o «lu ko mi'a bèvri ga'u lo cmàna lo gùgde be la vònpre —sei lo nìxli cu spùda— li'u»

ni'o «lu .ai gàsnu —sei la noltrùnau cu cùsku— li'u» .i je ba zi bo la selnà'i smàni cu kàvbu lo vo lìtru .e la .tòtos. lo bìrka gi'e to'o bèvri vòikla .i ca lo nu pàgre lo gàpru be lo cmàna kei la mrùli stèdu cu se fànza mùtce krìxa gi'e cècla lo stèdu lo gàltu vàcri gi'e ku'i na ka'e tcèna la selnà'i smàni ku noi snùra bèvri la .dòrotis. .e lo ri pèndo ga'u lo cmàna gi'e pùnji fi lo lòldi bu'u lo mèlbi gùgde be la vònpre

ni'o «lu ca ro re'u ka'e klàcpe mi'a —sei lo jàtna fi la .dòrotis. cu cùsku— .i co'o do'u .a'o do se zanfù'a li'u» ni'o «lu co'o do'u ki'e sai —sei lo nìxli cu spùda— li'u» .i je la smàni cu galzè'a ne'i lo vàcri gi'e ba zi bo co'u se vìska ni'o lo gùgde be la vònpre cu sìmlu lo ka rìcfu gi'e glèki stùzi .i zàsti fa lo so'i fòldi co ma'urbì'o gùrni pe to'e se cau lo xàmgu se sèfta dàrgu poi jbìni lo fòldi ku'o .e lo mèlbi ke cìnje cmarì'e noi lo tsàli ke'a crìpu .i lo bìtmu .e lo zdàni .e lo crìpu zo'u: lo ro ri se cintypù'i lo càrmi xùnre pa'a lo nu se cintypù'i nu'i ge lo pèlxu bu'u lo gùgde pe la .ŭìnkis. nu'u gi lo blànu bu'u lo gùgde pe la màxpre .i la vònpre ku noi tòrdu joi plàna zi'e noi sìmlu lo ka xèndo cu dàsni lo xùnre noi càrmi frìca lo crìno sràsu .e lo pèlxu gùrni ni'o la smàni pu pùnji fi lo jìbni be lo cànge zdàni .i je lo vo lìtru cu càdzu klàma zy gi'e dàrxi lo vòrme .i vy se kàrgau lo spèni be lo te cànge .i je ca lo nu la .dòrotis. cu cpèdu lo nu te dùnda lo cìdja kei lo nìnmu cu dùnda fi lo ro da fe lo xàmgu vàcysai noi vàsru lo ci cake! .e lo vo titnànba .e lo kàbri be lo làdru bei se va'u la .tòtos. ni'o «lu ma ni dàrno la badydì'u be la .glìndas. —sei lo vèrba cu cùsku— li'u» ni'o «lu na dàrno mùtce —sei lo spèni be lo te cànge cu spùsku— .i ko lìtru lo dàrgu be la snànu .i se va'o bo do ba za tolclìva by li'u»

ni'o lo gùnma fau lo nu kìrsku lo xèndo nìnmu cu za'u re'u co'a lìtru gi'e càdzu re'o lo fòldi gi'e pàgre lo mèlbi crìpu vau co'u lo nu ca'u vìska lo mèlbi mùtce badydì'u .i ca'u lo vrògai cu zvàti fa lo ci cìtno nìxli noi dàsni lo mèlbi ke xùnre tàxfu noi se kòrbi lo sòlji dàsri .i je ca lo nu la .dòrotis. cu jbibì'o kei pa boi ny fi dy cu cùsku ni'o «lu mu'i ma do klàma la snànu gùgde li'u» ni'o «lu lo nu pènmi la vrùde termafyfè'i ku noi vi tùrni —sei dy spùsku— .i .e'o do mi ty cu klagì'a li'u»

ni'o «lu ko mi jùngau lo du'u ma kau do cmène .i se va'o bo mi ba te prèti fo la .glìndas. fi lo se du'u xu kau gy ba rànda lo nu do pènmi li'u» .i lo ro da cu cmène jùngau .i je lo nìxli sònci cu klàma lo nènri be la badydì'u .i ba za lo su'o mòkca sy xrùti gi'e cùsku lo se du'u la .dòrotis. .e lo dràta cu jai se cùrmi fai lo nu ba zi pènmi

ni'o ni'o re ci mo'o la .glìndas. no'u la vrùde termafyfè'i cu cùrmi lo se djìca be la .dòrotis.
	ni'o lo gùnma pu lo nu klàma la .gìndas. cu se klagì'a fi pa lo kùmfa be la badydì'u be'o noi bu'u ke'a la .dòrotis. cu lùmci lo ri flìra gi'e kòmpli lo ra kèrfa .i je la cìnfo cu desyvì'u lo pùlce lo ra ne'òkre .i je la cpitèpygau cu tàmgau lo xàgrai lo sèvzi .i je la mùdypre cu spàli lo ri tìnci gi'e sàbji lo ctìle lo ra te jòrne
ni'o lo gùnma ca lo nu ro vo'a ka'e xàmgu se jàrco cu jèrsi lo sònci nìxli se ka'a lo bàrda kùmfa noi bu'u ke'a la termafyfè'i .glìndas. cu zùtse lo zirxu'èjme nolstìzu

ni'o gy ge mèlbi gi cìtno vau te ga'a lo ra kànla .i lo kèrfa be gy cu rìcfu xùnre skàri gi'e flècu djìne fàrlu lo jànco .i lo tàxfu cu cùrve blàbi .i ku'i lo kànla be gy cu blàbi .i je gy cu xèndo càtlu lo cmàlu nìxli ni'o «lu mi se va'u do ka'e mo doi pe mi vèrba —sei gy rètsku— li'u» ni'o la .dòrotis. cu te lìsri fi lo mùlno la termafyfè'i .i lo nu lo vilcarbì'e cu bèvri la .dòrotis. lo gùgde pe la .oz .i lo nu dy co'a se slàbu lo ri kànsa pèndo .i lo se mànci sèlfri be xai

ni'o «lu lo mi bàlrai se djìca —sei dy jmìna cùsku— cu nu xrùti la .kànzas .i mu'i bo la fetfàmti .em. cu ju'o jìnvi lo du'u lo xlàli mi pu sèlfri .i je la'e di'u ba gàsnu lo nu .ebu dribì'o .i je va'o lo nu na ku lo se crèpu pe lo ca nànca cu xàgmau lo me lo prulà'i moi zo'u ju'o la nakfàmti .xenris. cu na ka'e xàmgu rènvi li'u» ni'o la .glìndas. crasa'obì'o gi'e cìnba lo tìtla je gapselfà'a flìra be lo pràmi je cmàlu nìxli ni'o «lu .e'o lo do xèndo rìsna cu se zandàpma —sei gy cùsku— .i mi birti lo du'u mi do ka'e jùngau lo du'u ma kau tàdji lo nu xrùti la .kànzas. li'u» .i je ba bo jmìna cùsku «lu .i ku'i do va'o lo nu do xrùti cu bìlga lo ka dùnda la sòlji màpku mi li'u» ni'o «lu .i'a sai —sei la .dòrotis. cu cùsku— .i je'u my mi na za'o plìxau .i je do va'o lo nu pònse cu kàkne lo nu mìnde la selnà'i smàni ci roi ku li'u» ni'o «lu .i je pe'i mi ba nìtcu lo my te sèlfu ci po'o roi —sei la .glìndas. cu cìsma spùsku— li'u» ni'o la .dòrotis. cu ba dùnda la sòlji màpku gy .i je la termafyfè'i cu cùsku fi la cpitèpygau fe «lu do ba mo ca lo nu la .dòrotis. ma'a ba'o clìva li'u» ni'o «lu mi ba xrùti la ri'òjme tcàdu —sei cy spùda— .i mu'i bo la .oz. pu gàsnu lo nu mi tùrni .i je lo prènu mi nèlci .i pa po'o da se xànka mi gi'e nu ta'i ma kau klàma lo bàncu be lo cmàna be la mrùli stèdu li'u» ni'o «lu .ai mi se pi'o la sòlji màpku cu mìnde la selnà'i smàni lo nu bèvri do lo balvrògai pe la rì'ojme tcàdu —sei la .glìndas. cu cùsku— .i ki'u bo da'i xlàli fa lo nu càurgau lo prènu lo tai se mànci tùrni li'u» ni'o «lu xu mi ja'a zilmànci —sei la cpitèpygau cu rètsku— li'u» ni'o «lu do tolfàdni —sei la .gìndas. cu spùsku— li'u» ni'o gy fau lo nu selfarbì'o la tìnci mùdypre cu rètsku «lu do mo ca lo nu la .dòrotis. cu clìva lo vi gùgde li'u» ni'o my sa'orsà'i re'o lo ri ka'àmru gi'e ze'i pènsi .i ba bo my cu cùsku «lu la .ŭìnkis. pu xèndo zei mùtce mi gi'e djìca lo nu mi ŭy cu tùrni kei ba lo nu la pàlci termafyfè'i pu mrobì'o .i mi nèlci la .uìnkis .i je mi va'o lo nu ka'e xrùti la stìci gùgde cu zmànei no da lo nu ze'e tùrni ŭy li'u» ni'o «lu lo re moi be lo mi se cpèdu be fi la selnà'i smàni —sei la .glìndas. cu cùsku— cu nu sy do snùra bèvri lo gùgde be la .uìnkis .i lo do bèsna cu bramè'a da'i lo me la cpitèpygau moi .i ku'i do càrmi zmàdu je'u cy (to ca lo nu do xàmgu se spàli toi) .i je mi bìrti lo du'u do ba prìje je xàmgu tùrni la .ŭìnkis. li'u» ni'o ba bo la termafyfè'i cu càtlu lo bàrda je se kàskre cìnfo gi'e rètsku «lu ca lo nu la .dòrotis. ba'o xrùti lo ri zdàni zo'u: do mo li'u» ni'o «lu ti'a lo cmàna pe la mrùli stèdu —sei la mùdypre cu spùsku— cu bàrda ke tolcì'o rìcfoi .i je ro lo dànlu poi bu'u xàbju cu jdìce lo du'u mi vo'a nòltru .i da'i mi va'o lo nu ka'e xrùti lo bi'u nai rìcfoi cu bu'u glèki mùtce lìfri lo mi nunjì'e li'u» ni'o «lu .ai lo ci moi be lo mi se cpèdu be fi la selnà'i smàni —sei la .gìndas. cu cùsku— cu nu sy do bèvri lo do rìcfoi .i ba ku zo'u .ai mi ki'u lo nu ba'o xàksu lo màkfa pe la sòlji màpku cu dùnda my la smàni nòltru te zu'e lo nu ri jo'u lo ri bènde cu ba ze'e zìfre li'u» ni'o la cpitèpygau .e la tìnci mùdypre .e la cìnfo cu ca stàce kìrsku la vrùde termafyfè'i lo ri te xèndo .i je la .dòrotis. cu cùsku: ni'o «lu ju'o do xàmgu du'i lo nu do mèlbi .i ku'i do mi na xa'o jùngau lo du'u ta'i ma kau xrùti la .kànzas. li'u» ni'o «lu lo do rìjno skàri cùtci do ba bèvri ga'u lo kutytù'a —sei la .glìndas. cu spùsku— .i da'i do va'o lo nu pu djùno fi lo cy se vlìpa cu ka'e xrùti lo do fetfàmti .em. ca lo pa sai moi be lo djèdi poi do zvàti lo vi gùgde ca ke'a li'u» ni'o «lu ku'i va'o ku mi na te dùnda lo mi se mànci bèsna —sei la cpitèpgygau cu krìxa— .i da'i mi zvàti ze'a pi ro lo mi nunjì'e lo zmùfoi pe lo te cànge li'u» ni'o «lu .i je da'i mi na te dùnda lo mi dìrba rìsna —sei la tìnci mùdypre cu cùsku— .i da'i mi sànli gi'e furtirtolcaubì'o vau bu'u lo rìcfoi co'u lo fànmo be lo mùnje li'u» ni'o «lu .i je da'i mi ze'e toldàrsi —sei la cìnfo cu cùsku— .i je da'i no lo dànlu pe lo rìcfoi cu cùsku lo xèndo vàlsi mi li'u» ni'o «lu pi ro la'e di'u jètnu —sei la .dòrotis. cu cùsku— .i je mi glèki lo nu mi pu plìxau lo vi xàmgu pèndo .i ku'i ca lo càbna noi nu ro boi py cu tòlcau lo se djìca tràji gi'e glèki lo nu ji'a pònse lo se tùrni tùmla zo'u: mi jinvi lo du'u .ei mi xrùti la .kànzas. li'u» ni'o «lu lo rìjno skàri cùtci —sei la vrùde termafyfè'i cu vlìpa lo bànli .i pa lo cìnri tràji sèlkai be cy cu ka ka'e bèvri do ro stùzi pe lo mùnje se zu'e lo ci nu stàpa .i je ro lo ci nu stàpa cu se dìtcu lo nu kalgaislìgau lo kànla .i do jai sàrcu fai lo nu po'o ci roi jalsìmgau lo cuctì'e gi'e mìnde lo cùtci lo nu bèvri do lo do se djìca ni'o «lu va'o lo nu jètnu zo'u: —sei lo vèrba cu glèki cùsku— mi ba zi cpèdu fi cy fe lo nu bèvri mi la .kànzas. li'u»

	ni'o vy srùgau lo bìrka lo cnèbo be la cìnfo gi'e cìnba cy fau lo nu toljùrsa càtke lo ri bàrda stèdu .i ba bo vy cu cìnba la tìnci mùdypre ku noi ca'o klàku tai lo tàmsmi poi mùtce lo ka ckàpe lo ri terjò'e .i ku'i vy pàmjai lo rànti je tersè'a xàdni be la cpitèpygau se ba'i lo nu cìnba lo se cintypù'i stèdu be cy kei gi'e fàcki lo du'u vy ji'a klàku fi lo vi sèldri nu clìva lo ri pràmi pèndo
ni'o la .glìndas. ku no'u la xàmgu cu stàpa klàma fi lo ri zirxu'èjme nolstìzu te zu'e lo nu tolrìnsa cìnba lo cmàlu nìxli .i je la .dòrotis. cu kìrsku gy lo nu pu tai xèndo la .dòrotis. .e lo ri pèndo

ni'o la .dòrotis. cu ca co'a sàlci jgàri la .tòtos. lo bìrka .i je ca lo nu ba'o ro re'u tolrìnsa cu ci roi jalsìmgau lo trìxe be lo cùtci fau lo nu cùsku: ni'o «lu ko mi bèvri lo zdàni ju'e la fetfàmti .em. li'u»

ni'o ba zi lo mòkca dy càrna pàgre lo vàcri .i tai sùtra ja'e lo nu vìska ja gànse no na'e bo lo brìfe poi sìcla re'o lo kèrlo ni'o la rìjno cùtci cu so'u ci roi stàpa .i je ba bo la .dòrotis. cu tai sùksa mu'ùsti ja'e lo nu pu lo nu djùno lo du'u zvàti ma kau cu so'o roi gùnro lo sràsu

ni'o ku'i ba lo bàrda dy tsebì'o gi'e ru'u càtlu ni'o «lu ŭe sai —sei dy krìxa— li'u» ni'o ki'u bo dy zùtse lo gànra sastù'a pe la .kànzas. .i je ca'u vi zvàti fa lo cnìno ke cànge zdàni poi la nakfàmti .xènris. ba lo nu lo vilcarbì'e cu dàrbei lo tolcì'o cu zbàsu .i la nakfàmti .xènris. ca'o làdycpa lo bàkni bu'u lo cagdàlstu .i je la .tòtos. pu plìpe fi lo bìrka be dy gi'e ca ca'o bàjra fa'a lo cagdàlstu fau lo nu càrmi gèrcmo

ni'o la .dòrotis. cu sa'irbì'o gi'e sajbì'o lo du'u dàsni lo po'o smòka .i ki'u bo la rìjno cùtci pu sepybì'o ca lo nu vòfli pa'o lo vàcri kei gi'e ze'e seltolcrinalkà'e bu'u lo cantù'a

ni'o ni'o re vo mo'o nu di'a zdàzva
	ni'o la fetfàmti .em. cu pu zi bàrkla lo zdàni te zu'e lo nu jaursàbji lo kòbli kei ca lo nu fa'a ca'u càtlu gi'e vìska lo nu la .dòrotis. cu fa'a bàjra
ni'o «lu doi pe mi dìrba vèrba —sei fy krìxa be fau lo nu bìrjai lo cmàlu nìxli gi'e cìnba dy boi pi ro lo flìra— .i do klàma fi ba'e ma li'u» ni'o «lu lo gùgde pe la .oz. —sei la .dòrotis. cu jùnri cùsku— .i je zvàti ti fa la .tòtos. ku ji'a .i ŭi sai doi fetfàmti .em .i mi tai glèki lo nu di'a zdàzva li'u» fa'o