View source for le saske smani


== ::le saske smani:: ==

=== ::''fi'e la'o gy Robert Louis Stevenson gy'':: ===

::''fanva fa la [[User:xorxes|xorxes]] zoi gy [http://en.wikisource.org/wiki/The_Scientific_Ape 'The Scientific Ape''] gy''::

ni'o bu'u lo sicyxindo daplu lo zdani cu jibni lo ricfoi i lo zdani cu se xabju lo mivyka'a i lo ricfoi cu go'i lo lanzu be lo remsmi smani i pa smani cu se kavbu le mivyka'a gi'e ze'a pinfu fi lo selri'u pe lo skeku'a i le smani cu mutce terpa lo se viska be sy gi'e carmi se cinri ro lo se tirna be sy i sy se zanfu'a lo nu ba zi zifre barkla lo sy selri'u noi se tcita li 701 i sy xruti lo lanzu gi'e se xrani fi lo jamfu fo lo cmalu po'o i sy jinvi lo du'u su'a prali sy lo se lifri

ni'o sy ca lo nu ba'o xruti cu te cmene vo'a zo prije gi'e co'a jai fanza lo drata smani fai lo nu retsku lu ki'u ma lo smani na favysra li'u i pa smani cu cusku lu mi na se slabu lo smuni be zo favysra li'u gi'e renro lo branarge lo mamymamta be vo'a i lo drata cu cusku lu mi ge nai djuno gi nai se cinri li'u gi'e dandu klama lo jibni tricu i lo ci moi cu krixa lu ko co'u co'e li'u i lu mabla

nu farvi li'u se cusku le ralju noi tolci'o stonei gi'e zanru lo nu xadni tsali i lu e'u do xagze'a tarti li'u

ni'o ku'i le saske smani cu jajgau lo so'o citmau smani lo sepli diklo gi'e jundi zmadu se tirna i lu lo remna cu se farvi fi lo smani sa'u li'u se cusku ca lo nu dandu lo galtu jimca lo rebla i lu lo tedyske vreji cu na mulno i ja'e bo na cumki fa lo nu kanji lo temci be lo nu lo remna mo'u farvi be'o e lo temci poi se nitcu ma'a lo nu se lidne i ku'i pe'i ma'a va'o lo nu vlipa pilno lo ciste poi mi pu finti ba carmi spaji ro da i lo remna cu xaksu lo ctona'a be li so'i ta'i lo lijda jo'u lo marde jo'u lo pemci jo'u lo drata nalsa'u i lo ctona'a be li so'i cu temci lo nu co'a drani zukte lo saske i pu zi sai co'a mivyka'a i ma'a ba fatne litru co'a lo nu mivyka'a li'u

ni'o lu io censa branarge i mivyka'a ki'a li'u preti fi lo smani i le prije cu tcila ciksi lo se viska be bu'u lo skeku'a i so'o je nai ku'i ro lo se tirna cu manci i lu mi no roi pu tirna lo tai nu kusru li'u se krixa lo smani poi pu cirko lo kerlo ca lo nu damba lo famti i lu ma prali ma'a li'u preti fi lo drata i lu xu do na sanji sei le prije cu cusku i ma'a ta'i lo nu mivyka'a lo remna cu facki lo du'u lo smani cu te marji ma kau gi'e ja'o crakla li'u i lu ki'u ma na mivyka'a lo

smani li'u preti fi lo se ctuca poi darlu nelci i lu ue ckeji sei le prije cu cusku i mi na ba stali lo nu tirna lo simsa i do'a nai na gubni go'i li'u i lu e'u pei pilno lo zerzu'e li'u preti fi le darlu nelci i lu mutce senpi lo du'u xu kau zasti fa lo nu vrude jo'u lo nu palci i ja'o ma zekri zukte sei le prije cu spuda i ji'a ru'a lo cecmu na zanru i lo remna cu mapti ki'u lo nu mintu klesi li'u i lu simlu lo ka

kusru lo remna li'u se cusku le smani poi se kerlo pa da i lu pa mai sei le prije cu cusku lo remna cu xusra lo du'u ma'a na cortu gi'e zmidai i se ki'u bo mi prane zifre lo nu xusra lo mintu lo remna li'u i lu la'e di'u cu cizra sei le darlu nelci cu cusku i ji'a du'ospo i ga nai zmidai gi ctuca ma'a no da ma'a i ga nai ctuca su'o da gi to io branarge toi ja'a cortu li'u i lu ie go'i sei le prije cu cusku i je'u lo se darlu cu mapti lo masti karni po'o i i'a cortu i ku'i cortu se va'u lo mleca

danlu poi nitcu lo nu se sidju i no da zmadu la'e di'u lo ka mapti je drani i ji'a li'a ma'a ba facki su'o prali be lo remna li'u i lu ku'i ma'a ta'i ma ba facki sei le darlu nelci cu cusku va'o lo nu ma'a na djuno lo du'u ma'a sisku ma kau li'u i lu oi e'o lo cevni cu zandapma lo rebla be mi sei le prije cu fenki krixa i pe'i do tolrai lo ka saske se menli kei lo ro smani pe lai bifyfa'a daplu i ue ia nai djuno lo du'u sisku ma kau i lo jetnu saske na srana la'e di'u i sa'u da mivyka'a gi'e lacri lo cunso i da va'o lo nu facki de cu pamoi lo se spaji ie nai

pei li'u i lu mi pensi lo pa se jmina fapro sei le darlu nelci cu cusku i i'a mutce zdile i ku'i lo remna cu mutce tsali gi'e ponse lo cecla xarci li'u i lu ja'o ma'a ba kavbu lo cifnu li'u 

ni'o le prije ca lo cabvanci cu xruti lo purdi pe le mivyka'a gi'e lebna lo balre pa'o lo canko be lo kumfa gi'e ba bo lebna lo cifnu noi zvati lo ckana pe lo

verba kumfa

ni'o mutce zukte bu'u lo gapru be lo tricu i le smani poi se kerlo pa da zi'e noi xendo cu jgari le cifnu lo birka i lo drata cu punji lo narge lo moklu gi'e fengu le cifnu lo nu cy na djica lo nu citka i cusku lu na racli li'u i lu au ti na klaku sei le smani poi se kerlo pa da cu cusku i rigni dunli lo smani li'u i lu la'e di'u cu bebna sei le prije cu cusku i ko dunda le balre mi li'u i ku'i ca lo di'u valsi

le smani poi se kerlo pa da cu sputu fo le prije gi'e klama fi'o kansa le cifnu lo gapru be lo lamji tricu i lu le'o sei le smani poi se kerlo pa da cu krixa ko ko mivyka'a li'u 

ni'o pi ro lo girzu co'a jersi gi'e krixa i lo savru cu kajde le ralju noi jibni gi'e ca'o catra lo civla be fi ry i lu lo vi savru cu mo li'u se krixa le ralju i ry ba lo nu se jungau cu sudgau lo mebri i lu io barda branarge sei krixa i xu ti mabla se senva i xu lo smani ka'e zukte lo tai nu kusru i ko xruti bevri le cifnu li'u i lu do na saske se menli li'u se cusku le prije i lu mi na djuno lo du'u xu kau mi

saske se menli i ku'i mi ja'a ralte lo ganra grana i ga nai do pencu lo va cifnu gi mi gy pilno lo nu popygau lo stedu be do li'u i ja'e bo bevri le cifnu lo crane purdi i le mivyka'a noi xamgu ke lanzu nanmu cu mutce gleki gi'e gleki cfagau ci cnino skecipra bu'u le skeku'a pu lo fanmo be lo donri

::fa'o::