la ckuzda pe la babel

From Lojban
Revision as of 11:30, 12 June 2015 by Guskant (talk | contribs) (ref)
(diff) ← Older revision | Latest revision (diff) | Newer revision → (diff)
Jump to: navigation, search

la ckuzda pe la .babel.

fi'e la .xorxeluis.borxes.

sei la .xorxes. cu fanva

By this art you may contemplate the variation of the 23 letters...

The Anathomy of Melancholy, part. 2, sec. ii, mem. iv


ni'o lo munje to noi zo ckuzda cu cmene ke'a lo drata toi cu gunma lo vei no'o ja ju'o cu'i ci'i xavyselmla kumfa noi barda ke vacri se kevna lo

midju zi'e noi se korbi lo dizlo garna .i ro xavyselmla cu te jvinu lo cnita jo'u gapru loldi lo famcau .i lo te ganzu be lo kumfa cu na cenba .i

lo re no kajna noi lo mu clani kajna cu srana lo mlana cu gacri lo da'a re mlana .i lo se kajna .e si'a lo kumfa cu ja'a ru'e zmadu lo cnano

cuzdaku'i lo ka galtu .i pa lo kunti mlana cu se vorme lo cmalu kumcra lo drata kumfa poi dunli lo pa moi kumfa .e ro kumfa .i lo zunle jo'u pritu

be lo kumcra cu se zvati lo re cmatce sabnu .i pa ri curmi lo nu sanli sipna .i lo drata cu go'i lo nu mansa lo fanmo se nitcu .i vi pagre fa lo

sarlu serti noi se farna lo darno cnita jo'u gapru .i lo kumcra cu se zvati lo minra noi satci fu'irgau lo jvinu .i lo remna cu ta'e lojycpa fi lo

minra fe lo du'u la ckuzda cu na cimni to va'o lo nu da'i ja'a co'e zo'u ma krinu lo xanri fukpi toi .i mi zmanei lo nu senva lo nu lo se spali

sefta cu sinxa je nupre lo cimni ...i ro xavyselmla cu se gusni fi lo re bolci grute fe lo na'e banzu je na'e sisti

ni'o tai tu'a ro remna pe la ckuzda mi pu litru ca lo nu mi citno .i mi litru sisku lo cukta no'u ju'o cu'i lo liste be lo liste .i mi nau lo nu

lo kanla cu na ru'e kakne lo nu tolmifygau lo se ciska be mi cu bregau mi lo nu mrobi'o va lo minli be li so'u ne'a lo xavyselmla poi mi jbena bu'u

ke'a .i ca lo nu morsi cu na ba claxu lo kecti xance poi renro mi ga'u lo garna .i lo mrostu be mi cu ba lolcau vacri .i lo xadni be mi cu ba ze'u

jirbi'o gi'e fusra gi'e runta lo brife poi se rorci lo nu farlu noi cimni .i mi xusra lo du'u la ckuzda cu na se fanmo .i lo tersi'o cu darlu lo

du'u o xavyselmla kumfa cu sarcu tarmi lo traji canlu .a do'a nai lo se jijnu be ma'a bei lo canlu .i ra darlu lo du'u lo cibyselmla ja mumselmla

kumfa cu na ka'e se pensi to lo ru'icre cu xusra lo du'u lo ruxtcini cu jarco lo cukla kumfa noi vasru lo barda ke cukla cukta poi lo trixe cu ranji

pi ro lo bitmu .i ku'i lo se xusra be ra cu se senpi .i lo ra valsi cu manku .i lo cukla cukta cu cevni toi .i ku'i .e'i mi nau rapli xusra lo klusau

se jinvi .i la ckuzda cu bolci noi se midju ro xavyselmla zi'e noi lo cukykoi be ke'a cu na ka'e se kuspe

ni'o ro bitmu be ro xavyselmla cu se srana mu kajna .i ro kajna cu vasru ci re cukta noi manfo tarmi .i ro cukta cu se papri vo pa no da .i ro papri

cu se lijysenta vo no da .i ro lijysenta cu linji ji'i bi no lerfu noi xekri .i ji'a su'o lerfu cu zvati lo trixe be ro cukta .i lo tai lerfu cu na

jarco ja sinxa lo se cusku be fo lo papri .i ka'u lo tai na te tcini cu pu simlu lo ka cizra .i mi pu lo nu tordu dunda lo danfu to noi ju'o cu'i lo

nu facki ke'a cu traji to'e ki'u nai lo betri se preja lo ka vajni kei lo se lisri toi cu djica lo nu mojgau fi su'o jicmu

ni'o pa mai la ckuzda cu ze'e pu zasti .i lo tai jetnu noi sirji nibli lo nu lo munje cu balvi vitno cu na ka'e se senpi lo racli menli .i lo remna

no'u lo na'e prane cuzdaku'i zo'u cumki fa lo nu se zbasu lo cunso .a lo palci zbacrida .i lo munje noi melbi ricfu lo kanja jo'u lo nabmi se papri

jo'u lo na'e tatpi serti poi xamgu lo litru ku'o jo'u lo vimku'a noi xamgu lo zutse cuzdaku'i zo'u cumki fa lo po'o nu se zbasu lo cevni .i lo nu

ganse lo te sepli be lo cevra'a bei lo remra'a cu se banzu lo nu karbi lo vi rufsu je korcu sinxa poi lo fliba xance be mi cu malciska ke'a lo gacri

be lo cukta ku'o lo nenri ke se stura lerfu noi satci gi'e ralci gi'e xektce gi'e fukcau lanxe [1]

ni'o re mai lo ciska kantu sinxa cu klani li re mu .i lo tai se pajni cu curmi pu za lo nanca be li ci no no lo nu finti lo tolte'i velski be

la ckuzda gi'e mansa dafsabji lo nabmi poi no se smadi cu pu tolmifgau ku'o no'u lo tolmanfo je kalsa jinzi be so'a cukta .i lo pa ri noi lo patfu

be mi cu viska ke'a lo xavselmla pe lo pluta po'u li pa mu pi'e so vo cu gunma lo lerfu po'u M C V noi palci rapli fe'e co'a lo pa moi lijysenta fe'e

co'u lo ro moi .i lo drata noi bu'u vi mutce se catlu cu lerfu lajykalsa po'o gi'e ku'i lo da'a moi papri cu ve cusku lu doi temci lo do pirmido li'u

.i ka'u lo pa racli jufra .a lo pa drani nuzba cu se mapti lo so'i minli pe lo tolracli malsna jo'u lo valsi kalsa jo'u lo seljminalka'e to ti'e bu'u

lo nurma diklo lo cuzdaku'i cu tolzau lo mafkri je palcau tcaci poi nu sisku lo smuni lo cukta .i ra xusra lo du'u dunli lo nu sisku fi lo se senva .a

lo kalsa linji pe lo xance ...i ra radji'i lo du'u lo finti be lo nu ciska cu pu fukygau fi lo re mu rarna sinxa .i ku'i ra xusra lo du'u lo fancu cu

cunso .e lo du'u lo cukta cu se smuni no da .i mi'o ba zgana lo du'u lo tai se xusra cu na mulno jitfa toi

ni'o da ze'u krici lo du'u lo tai selse'analka'e cukta cu te bangu fi lo prutce ja darno .i je'u lo prurai remna no'u lo pa moi cuzdaku'i cu se bangu

lo mutce frica be lo cabna .i je'u ri'u va lo minli be li so'o lo bangu cu gribau .i je ga'u va lo so no loldi cu seljminalka'e .i ke'u ro la'e di'u

jetnu .i ku'i lo vo pa no papri pe lo na'e cenba me M C V cu na kakne lo nu mapti lo bangu noi da'i ji'a sai gribau ja malsampu .i su'o da stidi lo

du'u ro lerfu cu ka'e stika lo jersi .i M C V pe lo ci moi linji pe lo papri po'u li ze pa cu na dunli lo mintu porsi pe lo drata stuzi pe lo drata

papri lo ka vamji .i ku'i lo tai nalsatci se stidi cu na zenba lo ka se zanru .i lo drata cu pensi lo te mifri .i lo tai se sruma cu ve'e se radji'i

.i ku'i na go'i fa lo smuni be ra bei lo finti

ni'o pu za lo nanca be li mu no no lo ralju pe lo gapru xavyselmla [2] cu tolcri lo cukta noi cfipu tai tu'a lo drata gi'e ku'i vasru lo ji'i re papri

pe lo saxsi'u linji .i ra jarco lo se tolcri lo litru tolmifygau noi cusku lo se du'u lo porto cu bangu fi ra .i lo drata cu cusku tu'a lo xebdo'o .i

pu lo nu mo'u ctona'a cu facki fi lo bangu fe lo du'u ri smoiedylietfio gribau pe lo guarni'o zi'e poi krasi xrabo taicne .i ji'a da tolmifygau lo se

vasru noi faircmaci sidbo poi se mupli lo jitcau rapli vrici .i lo tai mupli cu curmi lo nu lo mencre cuzdaku'i cu facki lo jicmu seldikni be la ckuzda

.i lo bi'u nai pensi cu zgana lo nu ro cukta noi na vajni fa lo nu vrici cu gunma lo mintu selci no'u lo ca'urle'u jo'u lo mocle'u jo'u lo ka'arle'u

jo'u lo re re lerfu be lo .alfabeta .i ji'a ra xusra lo fatci poi ro litru cu srasabji ke'a noi du'u na zvati la barda ckuzda fa lo re cukta poi dunsi'u

.i ra lojycpa fi lo tai terdaunalka'e fe lo du'u ge la ckuzda cu ro mei gi lo ri kajna cu ve vreji lo ro cumki porsi be fi lo re so'o ciska kantu sinxa

to klani lo bratce je nai ku'i cimni toi .i va'i ro da poi ka'e se cusku .i bau ro bangu .i ro da .i lo tcila lisri be lo balvi .i lo sezyskinoi be lo

raly'angeli .i lo pa jetnu liste pe la ckuzda .i lo vei ki'o je ki'o jitfa liste .i lo jarco be lo nu lo tai liste cu jitfa .i lo jarco be lo nu lo pa

jetnu liste cu jitfa .i lo junxi'o xagnuzba be fi la .basilides. .i lo pinka be lo tai xagnuzba .i lo pinka be lo pinka be lo tai xagnuzba .i lo jetnu

datni be lo nu do mrobi'o .i lo xe fanva be ro cukta bei ro bangu .i lo selfi'i poi la .bedas. cu pu'i ciska sa ra'a lo ranmi be fo lo purgli .i lo se

cirko cukta be fi la .tacitus.

ni'o lo nuzba be lo nu la ckuzda cu kuspe lo ro cukta cu pa moi te frati lo nu fenki gleki .i ro remna cu cinmo lo ka ponse lo curve je se mipri selcfu

.i no prenu ja munje nabmi zo'u lo klina danfu cu na zasti bu'u su'o xavyselmla .i lo munje cu se krinu .i lo munje cu suksa zerle'a lo jitcau cimde be

lo nu pacna .i ca lo tai temci da mutce casnu lo zanvelcki noi cukta be lo nu sinma bandu gi'e dimna xusra zi'e noi zancki lo se zukte be ro remna pe lo

munje gi'e ralte lo se manci se mipri pe lo ra balvi .i so'i ki'o djipre cu cliva lo titla ke veljbe xavyselmla gi'e co'a litru lo serti fa'a lo galtu

fau lo nu ra se xlura lo palcau te zukte poi nu tolcri lo ra zanvelcki .i lo tai litru cu dapsi'u bu'u lo jarki nerklaji gi'e bacru lo manku se dapma

gi'e nebda'esi'u bu'u lo cevra'a serti gi'e renro lo tcica cukta lo condi pe lo tubnu gi'e se mrobi'o fau lo nu farlu gau lo remna pe lo darno diklo .i

lo drata cu fekybi'o ...i lo zanvelcki cu zasti to mi pu viska re da poi srana lo balvi prenu noi ju'o cu'i na xanri toi .i ku'i lo sisku cu na morji lo

du'u da pacna lo nu tolcri lo me da moi .a lo nalmapti fukpi be lo me da moi lo selkajyka'e po'u li no

ni'o ji'a ca la'e di'u da pacna lo nu ciksi lo jimcu se nalju'o be lo remna be'o no'u lo krasi be la ckuzda jo'u lo temci .i je'umlu fa lo nu lo tai vajni

se nalju'o cu ka'e se ciksi se pi'o lo valsi .i ju'o la ckuzda va'o lo nu lo bangu be lo pesprije cu na banzu cu ba'o cupra lo nalsau bangu poi se nitcu

jo'u lo valsi jo'u lo gerna be lo tai bangu .i ze'a lo ctona'a be li vo lo remna cu ca'o litru lo xavyselmla ...i su'o da catni sisku .i va'i lalpai .i mi

pu viska da ca lo nu da zukte lo jibri be da .i da ro roi tatpi tolci'a .i da tavla fi lo serti poi claxu lo te serti zi'e noi na ru'e catra da tavla lo

cuzdaku'i lo kumfa jo'u lo serti .i da su'o roi lebna lo jbirai cukta gi'e mlitcidu ri fau lo nu sisku lo palci valsi .i za'a no da kanpe lo nu facki de

ni'o li'a lo nonri'u nunpa'a cu lidne lo dukse nuntolpa'a .i lo nu birti lo du'u ge su'o kajna be su'o xavyselmla cu vasru lo jemna cukta gi lo tai jemna

cukta cu selcpanalka'e cu simlu lo ka na ru'e selrevnalka'e .i lo cestolsi'a girzu cu stidi lo nu ge sisti lo nu sisku gi ro remna cu xregau fi lo lerfu

jo'u lo sinxa co'u lo nu zbasu ta'i lo cunso seldu'a lo tai jimcu cukta .i lo catni cu bilga lo nu xe flalu lo jursa .i lo girzu cu tolcanci .i ku'i mi ca

lo nu verba cu viska lo tolci'o remna poi ta'e ze'u sezmipri bu'u lo vimku'a fi'o se kansa lo jimne cukla poi nenri lo cmabaktu zi'e poi ruble fu'irgau fi

lo cevra'a kalsa

ni'o si'a nai lo drata cu krici lo du'u vajrai fa lo nu vimcu lo palcau selfi'i .i ra vlile nerkla lo xavyselmla .i ra jarco lo ca'irpikta noi na ro roi

jitfa .i ra se fanza mlitcidu lo selpapri .i ra dapma lo mulno kajna .i lo nu ra fengu je jusycurve lumci cu rinka lo nalracli nu cirko lo megdo be lo

cukta .i lo cmene be ra cu se xebni .i ku'i lo klaku be fi lo selcfu poi fenki se daspo cu nalju'i lo re vajni fatci .i pa mai la ckuzda cu tai barda ja'e

lo nu ro nunyjdika poi remna se krasi cu cmacimni .i re mai ro mupli cu pa ro mei gi'e selbasnalka'e .i je ku'i (to ki'u lo nu la ckazda cu ro mei toi ro

roi zasti fa so'o xecto be lo kilto be lo nalprane fukpi no'u lo selfi'i poi frica fi lo pa lerfu .a lo pa ka'arle'u .i ka'u nai ru'a .u'o lo jalge be lo

nu daspo fa la cuvgau cu se du'erbasna ri'a lo nu terpa lo tai fekyzu'e .i ri te mukti fi lo nu fekydji lo nu cpacu lo cukta pe la conxunre xavyselmla .i

lo tai cukta cu cmamau lo rarna gi'e rolvli gi'e xravau gi'e makfa

ni'o ka'u lo drata ranmi pe lo cedra cu me la io cukta nanmu .i .ei su'o lo kajna be su'o lo xavyselmla sei lo remna cu pajni cu se zvati lo cukta poi

sinxa gi'e prane se jmaji vau lo ro drata .i lo pa cuzdaku'i cu litru ra gi'e simsa lo cevni .i bau lo diklo bangu cu za'o zasti fa lo velvi'u be lo nu

jdasi'a lo bi'u nai darno se jibri .i so'i da litru sisku ra io .i ze'a lo ctona'a cu palcau litru lo mutce vrici dargu .i ta'i ma tolcri lo selsi'a ke

selmipri xavyselmla poi se xabju ra .i da stidi lo xruti tadji .i te zu'e lo nu tolcri lo cukta po'u A cu .e'i pu tcidu lo cukta po'u B zi'e poi jarco

lo stuzi be A .i te zu'e lo nu tolcri lo cukta po'u B cu .e'i pu tcidu lo cukta po'u C .i go'i ra'o co'u lo cimni ...i mi fau lo tai se tarti cu du'erdu'a

je xaksu lo mi nanca .i pe'i na naljetmlu fa lo nu su'o kajna pe lo munje cu se zvati lo mulno cukta [3] .i ce'a mi pikci lo nalterju'o cevni lo nu lo pa

remna to pa mo'a nai da pu za lo kilto be lo nanca toi cu pu'i lanli gi'e tcidu ra .i va'o lo nu se sinma gi'e djuno gi'e gleki vau na ku fa mi cu .e'o

ja'a co'e fa lo drata .i .e'o zasti fa lo cevzda to'e ki'u nai lo nu da'i mi se dimna lo fagvi'o .i .i'a mi se daspo .i ku'i .e'o ca lo mokca bu'u lo

jmive lo do io barda ckuzda cu se krinu

ni'o xusra fa lo nalkri lo du'u ge lo muncau cu cnano bu'u la ckuzda gi lo racli to lo ji'a sai cumla je curve sarxe toi cu na'e ru'e makfa nafselte'i

.i ra tavla fi fu'e ke'u la glabilma ckuzda noi lo cunso selpapri cu ru'i se ckape lo nu binxo lo drata zi'e noi xusra je tolxu'a je fi'urgau ro da tai

tu'a lo fenki cevni fu'o .i lo tai valsi noi ge po'o nai tolzau lo ka kalsa gi ji'a mupli ri cu je'urja'o lo nu ra mabla ga'erstati jo'u lo nu ra tolpa'a

nalju'o .i je'u la ckuzda cu vasru ro valsi stura .i je go'i ro porsi poi lo re mu ciska kantu sinxa cu curmi .i je ku'i go'i no traji muncau .i terplicau

fa lo nu te pinka fi lo du'u ge lo xagrai selpapri pe lo so'i xavyselmla poi se catni mi cu se tcita lu se komganzu lindi li'u gi ge lo drata cu co'e

lu bakri slusuksa li'u gi lo drata cu co'e lu .axaxaxas.mlun. li'u .i lo tai bridi noi ca lo nu pa re'u viska cu simlu lo ka na'e sarxe cu ju'o kakne

lo nu krinu se ciksi fo lo mifra ja sucyxra velski .i lo tai velski cu vlagunma gi'e ru'a se vasru la ckuzda .i mi na kakne lo nu xregau fi lo so'o lerfu

no'u mu'a zo'oi

dhcmrlchtdj

zi'e poi la cevra'a ckuzda cu na pu kanpe zi'e poi bau su'o lo ri mipri bangu cu na se nenri lo betri smuni .i no da kakne lo nu bacru lo slaka poi na

culno lo nunxe'o jo'u lo nunte'a zi'e poi na cmene bau su'o da lo vlipa cevni .i lo nu tavla cu nu cusku lo kutyje'u .i lo dei terplicau je vladu'e xatra

cu xa'o zasti bu'u su'o lo ci no selpapri pe lo mu kajna pe lo selkacnalka'e xavyselmla .i ji'a go'i fa lo natfe be ri .i to no'o cumki bangu cu pilno

lo mintu valsi .i bau su'o da zo ckuzda cu se munvelcki lo drani po'u lu ve'e ze'e ciste fi lo xavyselmla kumfa li'u .i ku'i lo ckuzda cu nanba gi'a pirmido

gi'a drata .i je lo ze valsi poi munvelcki ra cu se smuni lo drata .i xu do doi tcidu cu birti lo du'u do jimpe lo mi bangu toi

ni'o lo nu tadji ciska cu toljudri'a mi lo cabna tcini be lo remna .i lo nu da birti lo du'u ro de ba'o se ciska cu nonmemri'a ja ruxri'a da .i mi se slabu

lo jarbu poi bu'u ke'a lo citno cu krosi'a lo cukta gi'e cilce cinba lo papri gi'e ku'i na kakne lo nu tolmifygau lo pa ji'a sai lerfu .i lo kupterbi'a jo'u

lo jifkri nunda'a jo'u lo nunjdali'u noi ro roi malfarvi lo bedzei cu tcejdikyri'a lo xa'urlai .i pe'i mi pu te pinka lo nunsezycatra noi ca ro nanca cu

zenba lo ka cafne .i ju'o cu'i mi se tcica lo nu tolci'o gi'e terpa .i ku'i mi smadi lo du'u ge lo remna jutsi noi selte'i cu pu'o canci gi la ckuzda ba

renvi fau lo nu se gusni gi'e nonkansa gi'e cimni gi'e prane cando gi'e te xarci fi lo jemna selpapri gi'e terplicau gi'e furnalka'e gi'e selmipri

ni'o mi pu zi ciska zo cimni .i mi na setca lo tai valsi se ja'e lo cusku tcaci .i ju'a na lojypro fa lo nu pensi lo nu lo munje cu cimni .i da poi pajni

lo du'u ra se jimte cu sruma lo du'u bu'u lo darno lo nerklaji jo'u lo serti jo'u lo xavyselmla cu ka'e sisti noi tolracli .i da poi se xanri lo nu ra

claxu lo jimte cu tolmo'i lo du'u lo se klani be lo cukta cu ja'a se jimte .i mi darsi lo nu stidi lo di'e danfu be lo tolci'o nabmi .i la ckuzda cu jitcau

gi'e dikni .i lo da'i vitno litru poi pagre ra fa'a ma kau cu facki ba zu lo ctona'a be li so'i lo du'u lo mintu selpapri cu rapli po'i lo mintu kalsa noi

ki'u lo nu rapli cu binxo lo cnici no'u la cnici .i lo nonkansa me mi cu gleki lo tai pluka se pacna [4]

bu'u la .mardelplatas. de'i li 1941

  1. lo krasi selci'a cu na vasru lo numle'u .a lo brale'u .i lo terpandi cu gunma lo ka'arle'u jo'u lo mocle'u .i lo re sinxa jo'u lo ca'urle'u jo'u lo re re lerfu be lo .alfabeta cu me lo re mu banzu sinxa poi lo fange finti cu kancu to'i pinka fi lo selfinbregau toi
  2. ro lo xavyselmla ci mei cu pu vasru pa remna .i lo nunsezycatra jo'u lo fepri terbi'a cu ba'o daspo lo tai parbi .i lo selskunalka'e kamdri selmo'i zo'u su'o roi mi litru ze'a lo so'i nicte lo se spali nerklaji jo'u serti se cau lo nu tolcri lo pa ji'a sai ckuzdaku'i
  3. ke'u lo nu lo cukta cu cumki cu banzu lo nu ri zasti .i lo po'o nalcu'i cu se tolvau .i mu'a no cukta cu serti ji'a .i ku'i ju'o su'o cukta cu casnu gi'e tolxu'a gi'e je'urja'o lo tai tcini .i je lo drata cu mapti lo serti lo ka stura
  4. la .letizias.alvarez.toledos. cu te pinka fi lo du'u la barda ckuzda cu palcau .i sa'e banzu fa lo pa po'o selpapri pe lo cnano tarmi zi'e poi gunma lo ci'i papri poi cimni cinla to la .kavalieris. ca lo co'a pa ze moi ctona'a cu xusra lo du'u ro sligu cu se senta lo ci'i pliti toi .i lo nu pilno lo tai silka selbeicku cu da'i na se kufra .i ro papri cu simlu lo ka se tolplo ja'e lo simsa drata .i lo selpesnalka'e ke midju papri cu na se trixe