UserWiki:Ilmen/lo smuni be zo kau

From Lojban
Revision as of 11:36, 23 April 2015 by Ilmen (talk | contribs) (ni'o ni'o lo nabmi pe mu'a zo kucli: .oi ba'e zo zilbri .enai zo zilkai mapti tu'a zo brireisku)
(diff) ← Older revision | Latest revision (diff) | Newer revision → (diff)
Jump to: navigation, search

prosa

to'i gubgau de'i li 2015:04:22 toi

ni'o ni'o ni'o ka smuni zo kau mi

ni'o ni'o prosa se srana

ni'o ze'u ku mi kucli tu'a zo kau .i mi se faumlu lo nu lo satci smuni be zo kau naku se skicu su'o da .i je ji'a lo ca'abna cedra nunpli zo'u faumlu fa lo nu tersmu zo kau za'u pa da .i fau lo mu'a nu ca'o ku da gunka tu'a la .tersmus. noi samselpla tutci lo ka fanva fi lo lojyskebau fo lo jbobau zo'u co'a sarcu fa lo nu djuno lo du'u zo kau ma kau selsmu lo jbopli .i lo nu na djuno lo du'u zo kau ma kau logji selsmu cu banzu lo nu na ka'e jdice lo du'u zo kau se fanva fu ma kau fi mu'a lo lojyskebau

ni'o jalge fa lo nu mi pu co'a sisku lo ka ce'u smuni mapti zo kau gi'e mansa mi .i ca nau ba'o facki fa mi su'o mansa be mi velski be zo kau .i ku'i ja'a cumki fa lo nu na mansa lo jbopli poi drata .i ju'o mi na birti lo du'u lo mi danfu cu traji lo ka mapti ku lo ro cumki danfu .i ku'i mi na facki su'o zmadu be fi lo ni danfu mansa mi .i mi pacna lo nu lo danfu poi mi stidi cu cinri lo drata gi'e sidju fi lo ka facki ja jdice tu'a lo mapti velski be zo kau xoi te prali fe mu'a la .tersmus.

ni'o ti'e la tsani cu tersmu zo kau lo drata be lo me mi moi .i ku'i nu'o ku la tsani fi mi ciksi fe lo smuni be fi ri .i .au ca da la tsani lo me ri moi mi'a ciksi ja'e lo nu ka'e karbi xoi cinri ju'o


ni'o ni'o citri

ni'o pu zu ku mi se jetmlu lo du'u zo kau smuni simsa zo ba'e kei ki'u lo nu ganse lo nu xusra fe mu'a lo du'u smudra fa lu mi djuno lo du'u la .djan. kau cu klama li'u .i ku'i se jalge lo nu lu ma kau li'u mutce co cizra ki'u lo nu naku se pilno fi lo ka reisku su'o da ku xoi da'i simsa lu ba'e ma li'u .i jalge fa lo nu mi ca jinvi lo du'u lu ma kau li'u selsmudu'i lu zo'e kau li'u .i mu'a da'i lu mi djuno lo du'u ma kau sipna li'u selsmudu'i lu mi djuno lo du'u zo'e kau sipna li'u

ni'o ku'i ba ku mi co'a facki lo du'u da nabmi .i co'a sanji lo du'u lu mi na djuno lo du'u ma kau sipna li'u ba'e na smuni dunli ja simsa lu mi na djuno lo du'u zo'e sipna li'u .i ja'e bo co'a mutce co ju'odji lo ka ce'u ja'a smuni zo kau .i ca ku da mi jungau lo du'u pu zu ku lu da kau li'u basti lu ma kau li'u .i mi na birti lo du'u xu kau jetnu fa lo nu lo dzena jbopli cu pilno lu da kau li'u to ku'i ja'a ku ca su'o da mi ganse su'o nu su'o laldo jufra cu selpau lu da kau li'u toi .i je ku'i ca rinka lo nu mi kucli lo du'u zo kau ka'e srana zo da

ni'o ku'i lu mi djuno lo du'u da sipna li'u na li'a mansa danfu tu'a lu mi djuno lo du'u ma kau sipna li'u .i ku'i jai selja'e lo nu mi pensi tu'a lu su'o da zo'u mi djuno lo du'u da sipna li'u .i da'i lo natfe to lu mi na djuno lo du'u ma kau sipna toi cu co'e lu naku su'o da zo'u mi djuno lo du'u da sipna li'u .i ri'a su'o da mi ca ze'a se mansa .i ku'i ba zi ku mi co'a sanji lo nu za'o danfu na'e mapti .i ja'e bo mi co'a sisku lo ka se jinvi lo banskepre gi'e srana lo rarbau panra be zo kau kei joi cu pacna lo nu sidju mi lo ka zenba co jimpe zo kau .i ba zi bo mi facki tu'a lo cinri ke bauske prosa poi se judri ti ↓ to glibau prosa toi

.i lo nau se jinvi be mi cu se jicmu tu'a lo se judri


ni'o ni'o lo nau se jinvi be mi

ni'o jalge fa lo nu mi farvi lo ka jinvi di'e .i tu'e la'a lu mi djuno lo du'u ma kau sipna li'u selsmudu'i lu su'oi da poi .olkai lo ka sipna zo'u mi djuno lo du'u da .e no na me da cu sipna li'u noi la'a selsmudu'i lu lo ro sipna cu poi'i mi djuno lo du'u ke'a .e no na me ke'a cu sipna li'u je noi simsa lu ro'oi da zo'u go da sipna gi mi djuno lo du'u da sipna li'u je noi ca'e me la tsali nu tersmu .i je ji'a cumki fa lo nu selsmudu'i lu su'oi da poi .olkai lo ka sipna zo'u mi djuno lo du'u da sipna li'u noi la'a selsmudu'i lu lo ro sipna cu poi'i mi djuno lo du'u ke'a sipna li'u je noi simsa lu ro'oi da zo'u ga nai da sipna gi mi djuno lo du'u da sipna li'u je noi ca'e me la ruble nu tersmu tu'u

ni'o ku'i lu xu kau li'u joi lu mo kau li'u joi lo simsa zo'u mo dai .i pe'i ka'e smuni se skicu ta'i lo nu basygau lu ma kau li'u .i mu'a lu mi djuno lo du'u xu kau ko'a sipna li'u selsmudu'i pe'i lu mi djuno lo du'u ma kau jei ko'a sipna li'u .i si'a lu mo kau li'u selsmudu'i lu me'au ma kau li'u .i lu mi djuno lo du'u xo kau gerku cu sipna li'u zo'u co'e lu mi djuno lo du'u vei mo'e ma kau gerku cu sipna li'u .i pe'i nandu traji fa tu'a lo terjonma'o .i mupli fa lu ji kau li'u .i la'a lu ge'i kau brode gi brodo li'u co'e lu fi'o mo kau gi brode gi brodo li'u .a su'o pluja zmadu


ni'o ni'o zo ka joi zo kau

ni'o ku'i naku zo kau se pilno fi po'o tu'a lo zo du'u .astrato .i ta'e ku lo jbopli cu pilno fi ji'a tu'a lo zo ka .astrato .i mupli fa lu mi do frica lo ka ce'u nelci ma kau li'u .i zo dunli .e zo zmadu .e zo traji .e zo zenba .e zo cenba cu fadni mupli lo ka lo selpau be zo kau zilkai cu sumti ce'u da .i ku'i lo smuni be zo kau joi zo ka cu simlu lo ka frica lo me zo kau joi zo du'u moi .i lo du'u lo zilkai naku ge mulno bridi gi ka'e jetnu ja jitfa cu nibli lo du'u lo smuni pe zo kau joi zo du'u ge'u poi mi skicu do'e lo lidne ke prosa pagbu cu mapti naku tu'a zo ka .i ja'o ma pau nai ka'e ku smuni gi'e mapti tu'a zo kau joi zo ka

ni'o lo nu gunka lo ka skicu lo gismu smuni sepi'o lo drata jbobau jufra kei te zu'e tu'a lo jbobau vlaste cu se jalge lo nu mi troci lo ka skicu lo smuni be lo bi'u nai gismu poi se sumti lo zo kau selpau zilkai .i mi pu facki lo du'u lo ka basygau zo ce'u lo zo kau sumti cu xamgu tadji lo ka skicu .i mu'a basygau fi lu mi do zmadu lo ka ce'u xo kau da citka li'u fe lu mi do zmadu lo ka ce'u vei mo'e ce'u citka li'u .i se jicmu lo du'u lo si'o ce'u ce'u zmadu ce'u cu si'o ko'a ko'e ko'i ce'ai lo se ckini be ko'a bei ko'i cu dubmau lo se ckini be ko'e bei ko'i .i ja'o lu mi do zmadu lo ka ce'u citka vei mo'e ce'u da li'u selsmudu'i lu lo kaidza be lo ka mi citka ce'u cu dubmau lo kaidza be lo ka do citka ce'u li'u

ni'o cnita dei fa lo liste be lo so'o velski mupli

  • zenba = lo ka x1 ce'u x2 ckini cu zilzena x3
  • zmadu = lo se ckini be x1 bei x3 cu dubmau lo se ckini be x1 bei x3 fi x4
  • traji = ge x1 me x3 gi'e ckini da x2 gi no x3 zmadu x1 fi x2
  • dunli = ro'oi da zo'u x1 .o x2 da ckini x3
  • frica = naku ro'oi da zo'u x1 .o x2 da ckini x3

.i za'a dai lo nu lo ti gismu cu se sumti lo te ckini cu se cumki lo nu frili ke jbobau skicu lo smuni sepi'o lo jicmu zmadu valsi .i ku'i lo nu da'i lo bi'u nai gismu ka'e nai se sumti lo te ckini cu banzu lo nu mi na djuno lo du'u ma kau mapti co tadji lo ka smuni skicu

ni'o ku'i xu dai lo nu ri'oi gismu ka'e se sumti lo te ckini cu fanta lo nu smudra fa lo nu se sumti lo zo kau joi zo ka sumti kei noi ja'a fadni nunpli .i la'a ŭe dai bi'ai nai fanta .i sa'u cumki fa lo nu lo nu zo kau pagbu lo zilkai .astrato cu selja'e lo nu lu ma kau li'u selsmudu'i zo ce'u .i ke'u lo nu lo zilkai na mulno bridi gi'e na ka'e jetnu ja jitfa cu banzu lo nu lu ma kau li'u pe lo zilkai .astrato ka'e nai se smuni lo mintu be tu'a lo zo du'u .astrato .i ja'e bo la'a va'o zifre lo ka selsmudu'i zo ce'u .i mu'a da'i lu mi do dunli lo ka ce'u ma kau nelci li'u selsmudu'i lu mi do dunli lo ka ce'u ce'u nelci li'u .i da'i selja'e lo nu lo purci nunpli co'u nai smudra .o'u

ni'o ku'i ji'a lo bi'u nai gismu cu jai cafne fai lo ka zo ni joi ce'u se pilno .i mu'a lu mi zenba lo ni ce'u certu li'u .i lo ri nunpli zo'u mo dai .i xu dai na smudra .i pe'i lo ka jei lo simsa cu smudra cu se fancuka lo ka ce'u smuni zo ni .i mu'a ja'a cumki fa lo nu lu lo ni ce'u barda li'u selsmudu'i lu lo ka ce'u ce'u nilbra li'u kei ja'e lo nu mu'a lu mi zenba lo ni ce'u certu li'u selsmudu'i lu mi zenba lo ka ce'u ce'u nilcre li'u .i ku'i da'i natfe lo du'u lo sumti be lo zo ni .astrato cu namcu .i mu'a da'i natfe tu'a lu li no ni mi certu li'u ki'u lo nu da'i lo zo ni .astrato cu se sumti lo te ckini .e nai lo namcu .i pe'i lo du'u lo zo ni .astrato cu se sumti lo namcu gi'i kau dunli lo te ckini cu .ei catni se jdice .i vajni


ni'o ni'o lo nabmi pe mu'a zo kucli

ni'o na'o ku zo kucli se pilno lo jbopre tai lo poi'i mupli fa lu mi kucli lo du'u do platu ma kau li'u .i faumlu fa lo nu frili fa lo ka skicu lo smuni be zo kucli sepi'o zo djuno jo'u zo djica .i mu'a lu fabu djica lo nu ri djuno febu li'u .i ku'i ca lo nu mi troci lo simsa kei mi facki lo du'u da barda nabmi

ni'o .e'o se xanri lo nu lo si'o kucli cu si'o ce'u djica lo nu ri djuno ce'u .i mu'a lu ko'e ko'o kucli li'u selsmudu'i lu ko'e djica lo nu ko'e djuno ko'o li'u .i ca nau jundi .e'u fa mi'o lu mi kucli lo du'u do ma kau platu li'u .i lo zilkancu cmavo noi zo da mupli cu poi'i lo nu basygau fi ke'a fe lo jicmu zmadu cu purci lo nu basygau fi lo selbrivla fe lo sampu zmadu .i mu'a tu'a lu mi do ro da jungau li'u purci tu'a lu ro da zo'u mi do da jungau li'u .i je ri purci tu'a lu ro da zo'u mi gasnu lo nu do da djuno li'u .i lo nu da'i lo selbrivla cu te basygau lo sampu zmadu ba'e pu tu'a lo zilkancu cmavo no'u zo da cu selja'e tu'a lu mi gasnu lo nu ro da zo'u do da djuno li'u noi za'a dai na smuni mapti lo krasi jufra

ni'o jalge fa lo nu xoi simsa cu ba'e purci fa lo nu basygau lo jicmu zmadu lu ma kau li'u kei fe lo nu selbrivla basygau .i pa mai basygau fi lu ma kau li'u fe lo se morna be lu su'oi da poi .olkai lo ka ce'u brode zo'u brodo lo du'u da .e no na me da cu brode li'u .i je ba bo re mai basygau lo jicmu velski fa'u mu'a lu djica lo nu djuno li'u lo krasi selbrivla fa'u mu'a zo kucli .i .e'u mi'o zgana lo nu ma kau jalge

  • mi kucli lo du'u do ma kau platu
  • su'oi da poi .olkai lo ka do ce'u platu zo'u mi kucli lo du'u do da .e no na me da cu platu
  • su'oi da poi .olkai lo ka do ce'u platu zo'u mi djica lo nu mi djuno lo du'u do da .e no na me da cu platu

ni'o za'a dai lo te pruce jufra na smuni mapti lo krasi jufra .i sa'e zo djica na mapti zvati lo jufra lidne .i ja'o da cfila ga lo zo kau basti ve pruce gi lo velski be lo si'o kucli be'o po'u tu'a zo djica jo'u zo djuno

ni'o ji'a sai lu su'oi da poi .olkai lo ka do ce'u platu zo'u mi kucli lo du'u do da .e no na me da cu platu li'u jai cizra mutce .i pe'i kucli va'o lo ji'a nu na platu ku ĭe nai pei

ni'o se ja'e jinvi fa mi lo du'u lu ma kau li'u na mapti zo kucli .i pe'i ba'e lo zilkai zo kucli mapti ŭe dai .i je'u simsa zo zenba jo'u lo simsa lo ka pe'i zo ce'u lu ma kau li'u mapti zmadu .i jufmupli fa lu mi kucli lo ka do ce'u platu li'u .i va'i djica lo nu djuno lo du'u ma kau ckaji lo ka do ce'u platu

ni'o mi stidi lo du'u lo dei cnita cu smuvelski zo kucli

  • kucli = x1 djica lo nu x1 djuno lo du'u x2 ma kau zilbri

.i lo di'u velski cu simsytce lo me di'e moi gi'e ku'i smuni ganra zmadu

  • kucli ≈ x1 djica lo nu x1 djuno lo du'u ma kau x2 ckaji

.i lo nu lu ma kau li'u pagbu ba'e lo smuni velski be lo selbrivla cu banzu lo nu lo bi'u nai nabmi cu tolcanci .i mupli fa di'e

  • mi kucli lo ka do ce'u platu
  • mi djica lo nu mi djuno lo du'u do ma kau platu
  • mi djica lo nu su'oi da poi .olkai lo ka do ce'u platu zo'u mi djuno lo du'u do .e no na me da platu

.i za'a dai va'o tu'a di'u lo te pruce jufra ja'a smuni mapti lo krasi jufra .i lo me zo zilkai moi velski be zo kucli cu curmi fe ji'a lo simsa be lu mi kucli lo ka ce'u citka ce'u li'u noi dunli lo cacklu me lu mi kucli lo du'u ma kau ma kau citka li'u .i ji'a curmi lu mi kucli lo du'u do sipna li'u noi dunli lo cacklu me lu mi kucli lo du'u xu kau do sipna li'u

ni'o lu xu kau li'u zo'u mapti fa ji'a lu mi kucli lo ka ce'u jei do sipna li'u .e va'i lu mi kucli lo ka jei do sipna li'u .i ku'i ke'u va'o tu'a lo mi velski zo'u lu mi kucli lo du'u do sipna li'u ja'a jai banzu

ni'o mi ba'o finti lo so'o brivo poi simsa zo kucli .i zo ju'odji jo'u zo brireisku cu ralju mupli .i zo brireisku zo'u smuvelski fa di'e

  • brireisku = x1 cpedu fi x3 fe lo ka jungau x1 lo du'u x2 zilbri ma kau

.i sa'u smuni simsa zo reisku .i je ku'i se sumti lo ba'e zilkai ja tersu'imei xoi plixau mutce pe'i .i mu'a lu ko'a mi reisku be lu do ma citka cu se panra lu ko'a mi brireisku be lo ka mi ce'u citka li'u .i curmi fa lo nu na bilga lo ka satci fukygau fi lo se cusku .i ge nai pilno lo satci ke krasi vlapoi gi jungau fe po'o lo smuni be lo selsku

ni'o ni'o zo kau jo'u zo nu

ni'o lo smuni be zo kau ku poi mi stidi do'e lo dei prosa cu curmi fe ji'a lo nu zo kau nenri lo zo nu .astrato .i jufmupli fa lu lo nu ko'a ckaji ma kau cu rinka lo nu ko'a se dimna ma kau li'u .i sa'u nai lu ti jalge lo nu do ma kau zukte li'u cu selmudu'i da'i lu su'oi da poi .olkai lo ka do ce'u zukte zo'u ti jalge lo nu do da .e no na me da cu zukte li'u ne la tsali nu tersmu ge'u .a lu su'oi da poi .olkai lo ka do ce'u zukte zo'u ti jalge lo nu do da zukte li'u ne la ruble nu tersmu .i sa'u tu'a zo kau tarti te dunli lo zo du'u .astrato lo zo nu .astrato

ni'o li'a da'i na se prije fa lo ka curmi lo nu zo kau ka'e se smuni ge tu'a la tsali nu tersmu gi tu'a la ruble nu tersmu .i .ei pa lo re smuni cu se cuxna ja'e lo nu zo kau sorselsmu naku .i ku'i mi nu'o birti lo du'u ma kau poi me lo re mei cu mapti traji


no'i no'i fanmo selsku

ni'o .a'o lo dei prosa cu cinri do gi'e na juxre dukse .i .e'o .a'o piksku lo srana se jinvi be do

fa'o


to'i zasni notci fo mi fa di'e .i tu'e ku'i mu'a lu mi djica lo nu mi djuno lo du'u do ma kau platu li'u mo va'o lo nu ba'e no da se platu .i la tsali nu tersmu zo'u matmau xu fa lu ro'oi da zo'u ge go da .olkai lo ka do ce'u platu gi mi djuno lo du'u do da .e no na me da cu platu gi go do no da platu gi mi djuno lo du'u do no da platu li'u noi barda .oi toi